2 Moua e Iloilo Tonu ke he Atua

“Ko e moui tukulagi foki hanai, kia iloa [po ke, iloilo tonu] e lautolu a koe, ko e Atua moli tokotaha ni.”—Ioane 17:3.

KO E HEIGOA E PALEKO? Ne talahau he falu ne nakai mooli e Atua. Ka e talahau he falu ko e Atua ko e mena malolō lahi noa ni. Ko lautolu ne talitonu kua mooli a ia ne fakaako e tau taofiaga kehekehe hagaao ko hai a ia mo e ke he tau mahani ne fakatātā e ia.

MAEKE FĒFĒ A KOE KE KAUTŪ KE HE PALEKO? Taha puhala ke moua e iloilo ke he Atua ko e onoono ke he tau mena ne eke e ia. Ne pehē e aposetolo ko Paulo: “Ko e hana [Atua] tau mena kua nakai kitia, tali mai he vaha ne eke e lalolagi, kua kitia ia he manamanatu e tau mena ne eke, ko e hana mana [po ke, malolō] haia kua tukulagi, mo e hana Atua.” (Roma 1:20) He onoono fakamatafeiga ke he tau tufugatia he lalolagi, maeke ia koe ke ako fakalahi hagaao ke he pulotu mo e malolō he Tufuga ha tautolu.—Salamo 104:24; Isaia 40:26.

Ka ke moua e iloilo tonu ke he Atua, kua lata he tau tagata takitokotaha ke hafagi e Kupu he Atua, ko e Tohi Tapu, mo e kumikumi fakatagata ki ai. Aua neke toka falu ke taute e fifiliaga ma haau. Ka e lata ke muitua ke he fakatonuaga he Tohi Tapu: “Aua neke mahani foki a mutolu fakalataha mo e lalolagi nai, ka kia faliu a mutolu ke he liu foki fakafou he tau loto ha mutolu, kia kumikumi e mutolu po ke heigoa e finagalo he Atua, ko e mena mitaki, kia talia foki mo e fiafia, ti kua katoatoa.” (Roma 12:2) Ma e fakatai, onoono ke he tau tala mooli kua tūtū i lalo ne fakakite he Tohi Tapu hagaao ke he Atua.

Fai higoa e Atua. Ne kitia e higoa he Atua he magaaho fakamua ke totou afe i loto he Tohi Tapu katoa. Loga e fakaliliuaga ne tohi ai he Salamo 83:18, ne talahau: “Ti iloa ai e lautolu a koe, ko e hāu a higoa ko Iehova, hoko koe ni kua Mua ue atu ke he lalolagi oti.”

Ko Iehova ko e Atua fai logonaaga ti lauia ai he tau gahua he tau tagata. He mole e fakatoka noa e Iehova e tau tagata a Isaraela mai he fakatupa i Aikupito, ne fakaheu e lautolu e fakatonuaga pulotu haana he falu magaaho. Ne “fakahukia” he tau gahua fakafualoto ha lautolu a ia. Ha ko e tau gahua ha lautolu ne “fakahogohogo e lautolu a [I]a, ne Tapu i Isaraela.”—Salamo 78:40, 41.

Kua leveki e Iehova a tautolu takitokotaha. He vagahau ke he tau tutaki haana, ne pehē a Iesu: “Nakai kia fakafua ua e manu ikiiki ke he asari? Nakai to foki taha ia laua ke he kelekele ka noa mo e Matua ha mutolu. Ka kua oti kana he totou ha mutolu a tau lauulu. Ko e mena ia, ua matakutaku ai a mutolu; mena mua a mutolu ke he tau manu ikiiki loga.”—Mataio 10:29-31.

Ne fiafia aIehova ke he tau lanu tagata po ke tau aga fakamotu oti. Ne tala age he aposetolo ko Paulo ke he tau Heleni i Atenai “kua eke foki [he Atua] e tau motu oti he tau tagata ke he toto taha, ke nonofo ai ke he fuga kelekele oti kana.” Ne talahau foki e ia kua “nakai ni mamao [e Atua] mo tautolu takitokotaha.” (Gahua 17:26, 27) Ne pehē e aposetolo ko Peteru: “Nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.”—Gahua 10:34, 35.

KO E HEIGOA E PALEPALE? Ko e falu ne “ha ha ia lautolu e fakamakutu ke he tau mena he Atua, ka e nakai lata mo e maama [po ke, iloilo tonu].” (Roma 10:2) Ka iloa e koe e mena ne fakaako mooli he Tohi Tapu hagaao ke he Atua, to kalo mai a koe he fakahehē ti maeke ke ‘fakatata atu ke he Atua.’—Iakopo 4:8.

Ma e falu vala tala foki, kikite e tohi Ko e Heigoa ne Fakaako Moli he Tohi Tapu?a he veveheaga 1, “Ko e Heigoa e Kupu Moli Hagaao ke he Atua?”

[Matahui Tala]

[Fakatino he lau 6]

Taha puhala ke moua e iloilo ke he Atua ko e onoono ke he tau mena ne eke e ia