Lata e Tagata mo e Iloilo ke he Atua
“Ti iloa ai e koe e matakutaku kia Iehova, mo e moua ai e koe e iloilo ke he Atua.”—TAU FAKATAI 2:5.
1. Ko e ha kua pehe ai ko e atevili he tagata ko e talagaaga faka-Atua ne homo ue atu?
KUA liga fotufotu ke hoko ke he 5,600,000,000 e tau atevili he falu tagata he magaaho tonu nei. He tau aho oti, kua fotufotu e atevili hau ke laga 100,000 he magaaho mo e pamu 7,600 e lita he toto ki loto he fakaholoaga hala toto ne 100,000 kilomita, he tino hau. Nakai fai vala kakano foki ne lahi e gahuahua ke tuga e talagaaga faka-Atua ne homo ue atu nei.
2. Maeke fefe ia koe ke fakamaama e atevili fakatai?
2 Kua 5,600,000,000 foki he tau atevili [po ke, loto] fakatai ne fa e gahuahua he lalolagi. I loto he atevili fakatai ha tautolu kua ha ha ai e tau loto manamanatu, ha tautolu a tau omoomoiaga, mo e ha tautolu a tau manako. Ko e tokaaga a ia he ha tautolu a manatu, ha tautolu a maamaaga, mo e ha tautolu a fifiliaga. Kua maeke e atevili fakatai ke loto fakatokoluga po ke fakatokolalo, fakaagitau po ke fiafia lahi, nakai maama po ke maama.—Nehemia 2:2; Tau Fakatai 16:5; Mataio 11:29; Gahua 14:17; 2 Korinito 4:6; Efeso 1:16-18.
3, 4. Kua maeke fefe e tau loto ke hokotia ki ai e tala mitaki?
3 Maeke he Atua ko Iehova ke totou e loto he tagata. Ne pehe mai e Tau Fakatai 17:3: “Kua fai kapiniu ke tunu ai e ario, mo e gutuumu ke tunu ai e auro; ka ko Iehova kua kamatamata ai e tau loto.” He nakai totou noa ni e tau loto takitaha mo e talahau e fakafiliaga, kua fakaaoga e Iehova e Tau Fakamoli hana ke hokotia e tala mitaki ke he tau loto he tau tagata. Kua felauaki e mena nei mo e tau kupu he aposetolo ko Paulo: “Ha ko e mena fakamomoui a lautolu oti kana kua ui ke he higoa he Iki. Hanai, po ke tauui fefe a lautolu kia ia kua nakai tua ki ai a lautolu? ka e tua fefe a lautolu kia ia kua nakai fanogonogo atu ki ai a lautolu? ka e fanogonogo atu fefe a lautolu, ka nakai fai tagata ke fakamatala atu? Ka e fakamatala atu fefe e tau tagata, kaeke ke nakai fekau atu a lautolu ki ai? Tuga he tohi mai, Kua fulufuluola ni e tau hui ha lautolu kua ta mai e tala mitaki ke he monuina, ko lautolu kua ta mai e tala ke he tau mena mitaki.”—Roma 10:13-15.
4 Ko e mena fiafia ki a Iehova ke fakafano hana Tau Fakamoli ke he tau fahi loga he lalolagi ke ‘uta e tala mitaki he tau mena mitaki’ mo e ke kumi a lautolu ne loto fanogonogo. He mogonei kua numera a tautolu ke molea e 5,000,000—ko e fakatokatoka ia ke 1 e Fakamoli ke he 1,200 he tau tagata he lalolagi. Ke hokotia atu ke he tau piliona he lalolagi mo e tala mitaki, nakai ko e mena mukamuka. Ka e kua takitaki he Atua e gahua nei he puhala mai ia Iesu Keriso mo e kua futiaki mai a lautolu ne loto fakamoli. Ati kua fakamoli ai e perofetaaga ne fakamau ia Isaia 60:22: “Ko e tokogahoa to eke ia mo tokoafe, mo e maga fakateaga to eke ia mo motu malolo; ko au ko Iehova to fakaave au ke eke ke he hana ni a aho.”
5. Ko e heigoa e iloilo, mo e ko e heigoa ka talahau hagaao ke he pulotu fakalalolagi?
5 Ko e magaaho ia anei, mo e taha e mena ne maama mitaki—kua lata e tau piliona he lalolagi mo e iloilo. Ko e matapatuaga, kua tatai e iloilo mo e tau mena moli ne moua he taute, kitekiteaga, po ke fakaakoaga. Kua lahi e iloilo ne moua fakahaga he lalolagi. Kua holo ki mua ai e tau mena ne taute tuga he fahi peleoafi, levekiaga he malolo tino, mo e fematutakiaki. Ka e ko e iloilo fakalalolagi ka ne kua lata moli mo e tau tagata? Nakai fakaai! Kua fakatumau e tau felakutaki, tau eke fakakelea, tau gagao, mo e mate ke fakamalaia aki e tau tagata. Kua fa mahani e pulotu he lalolagi ke eke ke tuga lahi e tau oneone pefano he afa tutakale.
6. Hagaao ai ke he toto, maeke fefe ke fakatatai e iloilo ke he Atua mo e pulotu fakalalolagi?
6 Ke fakatai: He tau senetenari ua ne mole, ko e mena mahani ke fakatafe e toto ke eke ke tuga e fakamauluaga. Ko George Washington, ko e pelesiteni fakamua he Tau Motu Kaufakalataha, ne tafe lagaloga e toto he tau tula fakahikuhiku he moui hana. Ne talahau e ia he taha matatepu: “Kia toka au ke mate fakaeneene; nakai maeke au ke moui loa.” Kua hako a ia, ha kua mate a ia he aho ia ni—ia Tesema 14, 1799. Kua nakai fakatafe e toto, ka e kua ha ha ai e pehiaga ke he fagaiaga toto ki loto he tino he tagata, he vaha nei. Kua putoia e tau puhala ua ia mo e tau lekua ke mamate ai. Ka e kua talahau tumau mai he Kupu he Atua: “Kia fakamamao . . . mo e toto.” (Gahua 15:29) Ko e iloilo ke he Atua kua hako tumau, maeke ke falanaki ki ai, mo e fou.
7. Kua maeke fefe e iloilo faka-Tohiaga Tapu tonuhia ke fakatatai mo e pulotu fakalalolagi ka hagaao ke he feakiaga he tama?
7 Manamanatu ke he taha fakafifitakiaga he pulotu fakalalolagi ne nakai fai falanakiaga. Ke he tau tau loga ne lago e tau tagata kumikumi ke he manamanatuaga ke tokaholo e feakiaga he tama, ka e taha ne lago ki ai kua talahau he magaaho fakamui ko e mena hepe anei. Ne talahau mai he Philological Association Tihamani ko e tokaholo ko e “puhala aia ne taute halaloto e tau lekua ke he fanau fuata ne ha ha ai ia tautolu he mogonei.” Ko e pulotu fakalalolagi kua liga lifa ke he taha fahi mo e taha fahi ke tuga ko e uulo he tau matagi, ka ko e iloilo tonu faka-Tohiaga Tapu kua nakai maluelue. Kua foaki mai he Tohi Tapu e fakatonutonuaga lagotatai ke he feakiaga he tama. “Kia akonaki e koe hāu a tama tane, ti moua ai e koe e okiokiaga; to tupu ai ni e fiafia ke he hāu a loto,” he talahau he Tau Fakatai 29:17. Ko e akonakiaga pihia kua lata ke fakahoko mo e fakaalofa, ha kua tohia e Paulo: “Ko e tau matua tane, aua neke fakahogohogomanava ke he fanau ha mutolu, ka kia leveki ai ke he tau kupu akonaki mo e tau kupu fakamafana he Iki.”—Efeso 6:4.
“E Iloilo ke he Atua”
8, 9. To maeke fefe ia koe ke fakamaama e kakano ne talahau mai he Tau Fakatai 2:1-6 hagaao ke he iloilo ne kua lata lahi mo e tau tagata?
8 Pete ni ko e tagata fakaako a Paulo, ne pehe a ia: “Kaeke kua ha ha ia mutolu taha kua manatu kua iloilo a ia ke he tau mena he lalolagi nai, kia uta a ia mo goagoa, kia iloilo ai a ia. Ha ko e iloilo he lalolagi nai, ko e goagoa haia ki mua he Atua.” (1 Korinito 3:18, 19) Ko e Atua ni ka foaki e iloilo ne lata moli mo e tau tagata. Hagaao ki ai, ne pehe mai he Tau Fakatai 2:1-6: “Haku tama na e, kaeke ke talia e koe haku a tau kupu, mo e toka ai e koe ke he loto hāu haku a tau poaki, Kua fakateliga hāu a tau teliga ke he iloilo, kua haga atu ai hāu a loto ke he manamanatu; Kaeke kua ui atu a koe ke he loto matala, mo e fakaleo lahi atu ke he loto manamanatu; Kaeke ke kumi e koe a ia, tuga he kumi ario; kaeke ke kumi fakamakutu ki ai, tuga he kumi e koloa galo; Ti iloa ai e koe e matakutaku kia Iehova, mo e moua ai e koe e iloilo ke he Atua. Ha ko Iehova kua foaki mai e iloilo; mai he fofoga hana e iloilo mo e loto manamanatu.”
9 Ko lautolu ne omoomoi he loto mitaki kua fanogonogo ke he pulotu he fakaaoga fakamitaki e iloilo ne foaki he Atua. Kua hahaga atu e tau loto ha lautolu ke manamanatu, he fakaeneene ke fuafua e tau mena ne fa e ako e lautolu. Ke he hufiaaga, ne ole atu a lautolu ma e maamaaga, po ke iloilo ke kitia ko e fematutaki fefe e tau tutalaaga. Kua gahua a lautolu ne loto tututonu ke tuga ko e kumi he ario mo e kumi ma e tau koloa galo. Ka ko e heigoa e koloa uho lahi ne moua e lautolu ne loto fanogonogo? Ko e “iloilo ke he Atua.” Ko e heigoa e mena ia? Ke fakamukamuka mai, ko e iloilo a ia ne moua he Kupu he Atua, ko e Tohi Tapu.
10. Ko e heigoa kua lata ia tautolu ke taute ke maeke ke olioli e malolo tino fakaagaga mitaki?
10 Ko e iloilo he Atua kua tonu, mauokafua, mo e foaki mai e moui. Kua fakaholo ki mua e malolo tino fakaagaga. Ne fakamafana age a Paulo ki a Timoteo: “Kia eke e koe mo fakafifitaki hau e tau kupu tonu, ne fanogonogo ai a koe kia au mo e tua mo e fakaalofa ha ia Keriso Iesu.” (2 Timoteo 1:13) Ha ha he vagahau mitaki e fakafifitaki he tau kupu. Ti tuga ai, kua ha ha he “vagahau mitaki” he kupu moli faka-Tohiaga Tapu e ‘fakafifitaki e tau kupu tonu,’ ne fakave ai ke he mataulu tala he Tohi Tapu he fakamatalahi e pule katoatoa ha Iehova he puhala mai he hana a Kautu. (Sefanaia 3:9) Kua lata ia tautolu ke tokaloto e fakafifitaki he tau kupu tonu nei. Kaeke ke kalo mai a tautolu he lekua he atevili fakatai mo e fakatumau ke malolo e tino fakaagaga, kua lata ia tautolu ke fakagahuahua e Tohi Tapu he tau aho takitaha mo e fakaaoga katoatoa ai e tau foakiaga fakaagaga ne taute he Atua he puhala mai he “fekafekau fakamoli mo e loto matala.” (Mataio 24:45-47; Tito 2:2) Kia lata ia tautolu ke manatu tumau ke moua e malolo tino fakaagaga mitaki, kua lata a tautolu mo e iloilo ke he Atua.
11. Ko e heigoa e falu kakano ne kua lata ai e tau tagata mo e iloilo ke he Atua?
11 Kikite atu foki ko e ha ne kua lata ai e tau piliona he lalolagi mo e iloilo ke he Atua. Iloa oti nakai e lautolu e puhala ne taute e lalolagi mo e tau tagata ke ha ha i ai? Nakai, ai iloa e lautolu. Iloa oti nakai he tau tagata e Atua moli mo e hana a Tama? Kua iloa oti nakai he tau tagata e tau matakupu ne fakahoko e Satani hagaao ke he pule katoatoa faka-Atua mo e fakamoli he tagata? Nakai foki. Kua iloa nakai he laulahi he tau tagata ko e ha ne fuakau ai a tautolu ti mamate? Kua lata foki a tautolu ke liu talahau nakai. Kua mailoga nakai e lautolu ne nonofo he lalolagi ko e hane fa e pule e Kautu he Atua he mogonei mo e kua momoui a tautolu he tau aho fakamui? Mataala nakai a lautolu ke he tau matakau fakaagaga kelea? Kua ha ha nakai he tau tagata oti e iloilo mitaki ko e moua fefe e moui fakamagafaoa fiafia? Mo e iloa nakai he tau tagata tokologa ko e moui olioli he Parataiso ko e finagalo he ha tautolu a Tufuga a ia ma e tau tagata omaoma? Ko e tali ke he tau huhu nei foki ko e nakai. Ti, maali mitaki ai, kua lata e tau tagata mo e iloilo ke he Atua.
12. Maeke fefe ia tautolu ke tapuaki ke he Atua ‘mo e agaga mo e kupu moli’?
12 Kua lata foki e tau tagata mo e iloilo ke he Atua ha ko e mena ne talahau e Iesu he liogi he po fakahiku he hana a moui ke he lalolagi. Liga kua aamotia e tau loto he tau aposetolo hana he logona a ia ne talahau: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” (Ioane 17:3) Ko e fakagahuahua he iloilo pihia ko e puhala ni a ia ke talia e tapuakiaga ke he Atua. “Ko e Atua ko e agaga ni a ia; ko lautolu foki ne tapuaki kia ia, kua lata ke tapuaki atu ki ai mo e agaga mo e [“kupu moli,” NW],” he talahau e Iesu. (Ioane 4:24) Kua tapuaki a tautolu ke he Atua “mo e agaga” he magaaho ka omoomoi he tau loto kua puke ke he tua mo e fakaalofa a tautolu. Tapuaki fefe a tautolu ki a ia ‘mo e kupu moli’? He fakaako hana Kupu mo e tapuaki ki a ia ke felauaki mo e hana a kupu moli kua fakakite—ko e “iloilo ke he Atua.”
13. Ko e heigoa e mena tupu ne fakamau ia Gahua 16:25-34, mo e ko e heigoa ke ako e tautolu mai i ai?
13 Ko e tau afe ne o mai ke tapuaki ki a Iehova he tau tau takitaha. Ti, kua lata kia ke fakatumau ke taute e tau fakaakoaga Tohi Tapu mo e tau tagata fiafia ke he vaha leva, po ke maeke nakai a lautolu ne loto fakamoli ke hohoko vave ke papatiso? Moli, kia kitekite e mena ne tupu ke he leoleo he fale pouli mo e hana a magafaoa, he talahau mai ia Gahua 16:25-34. Kua tuku a Paulo mo Sila he fale pouli i Filipi, ka e he tuloto po, ne mahafagi e tau gutuhala he fale pouli ha ko e mafuike lahi. Manatu ai kua fehola oti e tau pagota mo e to lahi e fakahala hana, ti he magaaho ne amanaki e leoleo he fale pouli ke taupega ne tala age a Paulo ki a ia ko lautolu oti ni aia. “Ti talahau atu ai e [Paulo mo Sila] e kupu he Iki kia ia, mo lautolu oti ha he fale hana.” Ko e leoleo fale pouli ia mo e hana magafaoa ko e tau tagata Motu Kehe ne nakai fai maamaaga ke he tau Tohiaga Tapu. Ka e, he po taha ia ni, kua eke a lautolu mo tau tagata tua. Ka e mua atu ke he mena ia, “ti papatiso ai agataha a ia mo e hana magafaoa oti.” Ko e tau tutuaga nakai fa mahani a ia, ka ko lautolu ne fou kua fakaako ki ai e tau matapatuaga he kupu moli mo e ako e falu a mena he tau feleveiaaga he fakapotopotoaga. Maeke foki ke pihia falu mena ke tupu he vaha nei.
Kua Loga e Tau Saito ke Helehele!
14. Ko e ha kua lata ai ke taute e tau fakaakoaga Tohi Tapu loga ne hufia mitaki ke he magaaho ku?
14 Ko e mena mitaki lahi ka fakaako he Tau Fakamoli a Iehova e tau numera loga he tau fakaakoaga Tohi Tapu ne hufia mitaki ke he magaaho ku. Kua ha ha ai e manako lahi ma e mena nei. Ke tuga ai he tau motu i Europa Uta, kua ha ha e tau tagata he tohi fakatalitali ma e tau fakaakoaga Tohi Tapu. Pihia foki e mena ne tupu he falu a matakavi. He taha taone he Repapilika a Tominika, ne tokologa ne ole ke he Tau Fakamoli tokolima ka e nakai maeke ia lautolu ke taute e tau fakaakoaga oti. Ko e heigoa ne taute e lautolu? Ne fakamalolo age a lautolu ki a lautolu ne fiafia ke o atu ke he tau feleveiaaga he Fale he Kautu mo e tohi e tau higoa he tohi fakatalitali ma e tau fakaakoaga Tohi Tapu. Kua pihia e tau mena ne tutupu ke he tau matakavi loga he lalolagi katoa.
15, 16. Ko e heigoa kua foaki mai ke fakamafiti aki e iloilo ke he Atua, mo e ko e heigoa e falu moli hagaao ki ai?
15 Tau matakavi lalahi—ko e tau fonua lalahi ma e heleheleaga—kua hafagi ke he tau tagata he Atua. Pete ni ko Iehova, ko e “Iki hana e tau saito,” kua fakafano mai e tokologa foki ke gahua, kua lahi agaia ni e gahua ke taute. (Mataio 9:37, 38) Ke fakamafiti lahi e tupu he iloilo ke he Atua, ne foaki he ‘fekafekau loto matala’ e taha mena ke fakahakotika aki e fakailoaaga ke maeke he tau tagata fakaako Tohi Tapu ke holo ki mua fakaagaga ke he tau fakaakoaga takitaha. Ko e tohi fou a ia ne kua maeke ke fakaaoga fakamafiti he tau fakaakoaga Tohi Tapu he kaina—liga ke he tau mahina gahoa. Mo e kua mukamuka ai ke tuku he tau kato ha tautolu, ha tautolu a tau kato tau lima, po ke he ha tautolu a tau kato fihui po ke tapulu foki! Ko e tau teau he tau afe ne fakalataha atu ke he tau Toloaga he Fahimotu ko e “Joyful Praisers” he Tau Fakamoli a Iehova kua fiafia lahi ke moua e tohi fou nei ne 192 e lau, ne fakahigoa Iloilo Ne Takitaki Atu ke he Moui Tukulagi.
16 Kua tauteute he tau tagata tohia he tau motu kehekehe e tau fakailoaaga ne kua taute fakamitaki ke tohi i loto he tohi Iloilo. Ti kua lata ai ke moua e fiafia ke he tau motu katoa. Ka e to leva nakai ato fakatoka e tohi fou nei ke he tau vagahau he tau tagata he lalolagi katoa? Nakai, ha kua maeke e tohi ne 192 e lau tohi ke mafiti lahi ke fakaliliu ke he tau tohi lalahi. Ti ia Oketopa 1995, ne talia he Komiti Tohia Tohi he Kau Fakatufono e fakaliliuaga he tohi nei mai he vagahau Peritania ke molea e 130 he tau vagahau.
17. Ko e heigoa e tau puhala ke fakamukamuka ke fakaaoga aki e tohi Iloilo?
17 Ko e tau tonuaga he tau veveheaga takitaha he tohi Iloilo ka lata ke taute e tau tagata fakaako ke fakaave e holo ki mua fakaagaga. Kua foaki mai he tohi e tau kupu moli faka-Tohiaga Tapu ke he puhala ati hake. Kua nakai fakave ke he tau taofiaga fakavai. Ko e maali he vagahau mo e kakano mitaki ka maeke ke fakamukamuka ke fakaaoga e tohi ke taute e tau fakaakoaga Tohi Tapu mo e lagomatai e tau tagata ke moua e maama he iloilo ke he Atua. Kehe mai he tau tohiaga tapu ne kua fatiaki, kua ha ha i ai e tau kupu Tohi Tapu ne tohi noa ne kua maeke he tagata fakaako ke kumikumi ki ai he magaaho ne tauteute ai ma e tutalaaga. Kua lata ai foki e tau kupu nei ke totou he magahala he fakaakoaga kaeke ke fai magaaho, ka e kua nakai ko e mena pulotu a ia ke lafi ki ai e falu fakaakoaga ke fakalavelave aki e tau matapatu kakano. Ka e, kua lata ia lautolu ne taute e tau fakaakoaga Tohi Tapu ke lali ke iloa mo e talahau ke he tagata fakaako ko e heigoa he tohi ne fakamoli ki ai he tau veveheaga takitaha. Ko e kakano he mena nei kua lata he faiaoga ke fakaako fakamitaki, ke hokotia ai e maama he tau matapatu manatu ke he hana a loto.
18. Ko e heigoa e tau talahauaga kua taute hagaao ke he fakaaogaaga he tohi Iloilo?
18 Maeke fefe he tohi Iloilo Ne Takitaki Atu ke he Moui Tukulagi ke fakamafiti e gahua taute tutaki? Ko e tohi ne 192 e lau tohi nei kua maeke ke fakaako ke he magaaho ku, ti ko lautolu “ne kotofa ke he moui tukulagi” kua lata ke lahi e mena ne ako mai he fakaako ki ai ke taute e tukuleleaga ki a Iehova mo e papatiso. (Gahua 13:48) Ti o mai a a tautolu ke fakaaoga fakamitaki e tohi Iloilo ke he fekafekauaga. Kaeke ke lahi e vala ne fakaako he tagata fakaako Tohi Tapu ke he taha tohi, kua lata ni ke fakaako katoa e tohi ia. Ka nakai, kua talahau mai ke hiki ke he tohi Iloilo. Ti ka oti e tohi fou nei, kua nakai talahau ke taute e fakaakoaga mo e tagata fakaako taha ia he tohi ke ua aki. Ko lautolu ne kuku mau e kupu moli kua maeke ke fakakatoatoa ha lautolu a iloilo ka o atu ke he tau feleveiaaga he Tau Fakamoli a Iehova mo e he totou foki e Tohi Tapu mo e tau tohi kehekehe faka-Kerisiano he magaaho ha lautolu ni.—2 Ioane 1.
19. Ato taute e tau fakaakoaga Tohi Tapu he tohi Iloilo, ko e ha kua aoga ai ke liu fakamanatu e tau lau tohi 175 ke he 218 i loto he tohi Organized to Accomplish Our Ministry?
19 Ko e tohi Iloilo kua tohia ai mo e amanakiaga ke lagomatai e tagata ke tali e tau huhu oti ka liu fakamanatu he tau motua ke he tau tagata fakailoa nakai la papatiso ne manako ke papatiso mo Tau Fakamoli a Iehova. Ka e, ato fehikitaki ai e tau fakaakoaga Tohi Tapu hau he mogonei ke he tohi fou nei, kua talahau ai ke fakamole e koe e falu matahola ke liu fakamanatu e tau huhu he tau lau tohi 175 ke he 218 he tohi Organized to Accomplish Our Ministry.a To lagomatai he mena nei a koe ke pehi e tau tali ke he tau huhu pihia he magahala he tau fakaakoaga Tohi Tapu i loto he tohi Iloilo.
20. Ko e heigoa hau a fakatokatokaaga ke he tohi Iloilo Ne Takitaki Atu ke he Moui Tukulagi?
20 Kua lata e tau tagata he tau matakavi oti ke logona e tala mitaki. E, kua lata e tau tagata mo e iloilo ke he Atua, ti kua tuku age e Iehova ke he Tau Fakamoli hana ke fakailoa ai. Kua ha ha ia tautolu he mogonei e tohi fou ne foaki he ha tautolu a Matua fakaalofa he lagi he puhala mai he fekafekau fakamoli mo e loto matala. To fakaaoga nakai e koe ke fakaako aki e kupu moli mo e tamai e lilifu ke he higoa tapu ha Iehova? To fakamonuina moli e Iehova a koe he fakamakamaka ai a koe ke fakailoa ke he tokologa e iloilo ne takitaki atu ke he moui tukulagi.
[Matahui Tala]
a Kua tohi fakailoa he Watchtower Bible and Tract Society of New York, Inc.
To Tali Fefe a Koe?
◻ Maeke fefe ia koe ke fakamaama e atevili fakatai?
◻ Ko e heigoa e iloilo ke he Atua?
◻ Ko e ha kua lata ai e tau tagata mo e iloilo ke he Atua?
◻ Ko e heigoa e tohi fou ne kua fai, mo e fefe hau a fakatokatokaaga ke fakaaoga ai?