Ko e Onoonoaga Atu ki Mua ke he Gahua Mafiti he Taute Tutaki
1 Ato toka e lalolagi, ne poaki e Iesu ke he hana tau tutaki ke “eke e tau motu oti kana mo tutaki.” Ko e manako anei ki a lautolu ke taute e matagahua fakamatala mo e fakaako atu ti fakalaulahi atu ha lautolu a gahua ke he tau kalakala oti he lalolagi. (Mata. 28:19, 20; Gahua 1:8) Onoono kia a lautolu ke he poakiaga nei ko e kavega kua uka lahi ke hahamo? Nakai pihia ke he aposetolo ko Ioane. He fakaaoga ai 65 e tau ko e tagata taute tutaki, ne tohi e ia: “Ha ko e fakaalofa ke he Atua hanai, kia omaoma a tautolu ke he tau poaki hana; nakai mamafa foki hana tau poaki.”—1 Ioane 5:3.
2 Ko e fakamauaga faka-Tohiaga Tapu he gahua he tau Kerisiano fakamua kua fakamoli ne gahua fakamafiti a lautolu ke he poakiaga ha lautolu ke taute tutaki ha Iesu Keriso. (2 Timo. 4:1, 2) Kua taute e lautolu e mena nei, nakai ko e matagahua noa, ka ko e ha lautolu a manako fakaalofa ke fakaheke e Atua mo e ke ta mai e amaamanakiaga he fakamouiaga ke he falu. (Gahua 13:47-49) Ko lautolu oti ne eke mo tau tutaki ne taute tutaki foki a lautolu he magaaho fakamui, ne tupu lahi e fakapotopotoaga Kerisiano ke he senetenari fakamua.—Gahua 5:14; 6:7; 16:5.
3 Kua Mafiti Lahi e Gahua Taute Tutaki: Ko e gahua taute tutaki mua atu he tau magaaho oti kua fakamoli ke he senetenari 20 aki nei! Mogonei, totou miliona e tau tagata kua talia e tala mitaki mo e hagaaki ki ai. (Luka 8:15) Ha kua ku lahi mahaki e magaaho ma e fakatokatokaaga he tau mena, kua foaki mai he “tau fekafekau fakamoli mo e loto matala” e tau kanavaakau ki a tautolu ke maeke he tau tagata loto fakamoli ke ako mafiti e kupu moli.—Mata. 24:45.
4 He 1995 ne moua e tautolu e tohi Iloilo ne Takitaki Atu ke he Moui Tukulagi, mo e he 1996 ne mui mai e porosua Ko e Heigoa e Manako he Atua ma Tautolu? Hagaao ke he tohi Iloilo, ko e fufuta he Kolo Toko, Fepuari 1, 1996, lau 11, ne talahau: “Ko e tohi ne 192 e lau tohi nei kua maeke ke fakaako ke he magaaho ku, ti ko lautolu “ne kotofa ke he moui tukulagi” kua lata ke lahi e mena ne ako mai he fakaako ki ai ke taute e tukuleleaga ki a Iehova mo e papatiso.—Gahua 13:48.
5 Ko e uho he Our Kingdom Ministry Iuni 1996, “Taute Tutaki Fefe Mo e Tohi Iloilo,” ne foaki mai ki a tautolu e foliaga nei: “Fakalago ni ke he tau tutuaga mo e hagahaga he tagata fakaako, kua liga maeke ia koe ke oti e loga he tau veveheaga he taha e fakaakoaga he tula po ke pihia, ka e nakai fakamafiti noa he fakaako. To tolomaki lahi ki mua e tagata fakaako ka fakatumau e faiaoga mo e tagata fakaako ke taute ha laua fakaakoaga he fahi tapu takitaha.” Kua holo atu e vala tala ke talahau: “Kua lata ke amanaki kaeke ke hokotia e tagata ke oti e fakaakoaga ke he tohi Iloilo, ko e fakamoli mo e hokulo hana he fiafia he fekafekau ke he finagalo he Atua to kitia maaliali.” Ne fakamaama mai he Puha Huhu he Ha Tautolu a Fekafekauaga he Kautu ia Mati 1998: “Ka kua amanaki ai ke he magaaho ku, to maeke he faiaoga hufia mitaki ke lagomatai e tagata fakaako kua loto moli ke moua e iloilo ke taute e fifili lotomatala ke fekafekau ki a Iehova.”
6 Kua Fua e Tohi Iloilo: He magaaho he papatisoaga he fifine fuata, ne talahau e ia e logonaaga hana ke he fakaaoga he tohi Iloilo. Kua fai magaaho, ne fakaako a ia ke he tohi Live Forever. He magaaho ne fakatoka mai e tohi Iloilo, ko e matakainaga fifine ne taute e fakaakoaga ne hiki ke he tohi fou. Nakai leva, ti maeke he tagata fakaako ke kitia ko e mena nei kua lata ni ke he fifiliaga hana, mo e kua omoomoi a ia ke lahi e tolomakiaga he mogoia. Ko e fifine fuata, ko e matakainaga fifine ha tautolu mogonei, kua talahau: “Kua lagomatai he tohi Live Forever au ke fakaalofa ki a Iehova, ka e lagomatai he tohi Iloilo au ke taute e fifiliaga ke fekafekau ki a ia.”
7 Manamanatu la ke he mafiti he taha fifine ke ako e kupu moli. He mole e fakaakoaga ke lagaua aki hana, ne fano a ia ke he feleveiaaga he Fale he Kautu he ahi atu he leveki takaiaga. He fahi tapu ia, he fakaakoaga ke lagatolu aki hana, ne tala age a ia ke he matakainaga kua taute tuai e ia e tukuleleaga hana ki a Iehova mo e manako ke eke mo tagata fakailoa nakai la papatiso. Ne feleveia a ia mo e tau motua, ne talia a ia mo tagata fakailoa, mo e he tapu hake ne kamata e fekafekauaga hana he fonua. Kua gahuahua lahi a ia ha ko e hana a fakaakoaga he Tohi Tapu ti fakato e ia e magaaho gahua hana ke maeke ke fakaako lagaua po ke lagatolu he fahi tapu mo e fakaaoga fakalahi e magaaho he fekafekauaga. Falu magaaho, kua taute e laua ua po ke tolu e veveheaga he magaaho. Ne kamata fakagahua e ia e tau mena ne ako e ia ke he tau fahi oti he hana moui, ne oti e tohi Iloilo he fa e fahitapu, mo e tolomaki atu ai ke he papatisoaga!
8 Kua fakamaama he tane he matakainaga fifine a ia ko e “hoa nakai talitonu tumau.” Taha aho, ne foaki he matakainaga tane ki a ia e fakaakoaga Tohi Tapu ke he tohi Iloilo ke he tuaga to maeke he tagata ke fakamamutu ka oti e fakaakoaga fakamua po ke ke ha mogo ni a mui. Ne talia e tane ke lali ai, pete ni he nakai lotomatala a ia he vaha tama hana ti nakai fai fakaakoaga fakalotu foki a ia ke molea e 20 tau. Ko e heigoa e tali hana ke fakaako e tohi Iloilo? Ne pehe a ia: “Ko e fiafia moli haku ke iloa ko e tohi faka-Tohi Tapu nei ne tohi fakamukamuka ai. Kua fakatoka mai ai e vala tala kua maama mo e tonu ne nakai leva, kua amanaki lahi au ke he fakaakoaga ha maua he tapu ka hau. Kua muitua fakapulotu he faiaoga haku e tau puhala taute tutaki ne fakatoka mai he Sosaiete, mo e lagomatai he agaga a Iehova, ne papatiso au he fa e mahina he mole. Maeke ia au ke talahau fakamoli ka feaki e tautolu e fakaalofa he taute tutaki, fakatumau ke kumikumi a lautolu ne loto hako he fekafekauaga he fonua, fakaaoga fakamitaki e tohi Iloilo mo e falu tohi faka-Tohi Tapu ko e foakiaga mai he Sosaiete, mua atu e aoga, liogi ma e takitakiaga a Iehova, kua moua e tautolu e kotofaaga uho lahi he lagomatai ke taute tutaki.” Ko e tau talahauaga i luga ko e tau iloaaga kehe pauaki. Tokologa he tau tagata fakaako ha tautolu kua nakai o mai mafiti pehe ke he kupu moli.
9 Kehekehe e Mafiti he Tupu Tolomaki he Tau Tagata Fakaako: Kua lata ke talahau ko e lotomatala he tau faiaoga mo e tau tagata fakaako he Kupu he Atua kua kehekehe e onoonoaga. Ko e tupuaga fakaagaga kua fakatuai po ke mafiti. Falu tagata fakaako kua tolomaki ki mua he tau mahina gahoa ka e kua liga fakatuai lahi e falu. Ko e tuaga he tupu fakaagaga he tagata kua lauia e tupuaga he hana a fakaakoga, ke he tuaga he hana a fakaaue ke he tau mena fakaagaga, mo e hokulo he hana a tapuakiaga ki a Iehova. Nakai “talia [oti e lautolu kua fakaako mo tautolu] e kupu mo e loto makutu” ke fakaako e tau Tohiaga Tapu he tau aho takitaha, tuga e tau Perea i tuai ne eke mo tau tagata talitonu.—Gahua 17:11, 12.
10 Ko e mena ia he uho he Ha Tautolu a Fekafekauaga he Kautu 1998, “Manako—Ke Loga e Tau Fakaako Tohi Tapu,” kua foaki e puhala moli: “Moli, nakai ta tatai oti e tupu ki mua he tau tagata fakaako Tohi Tapu. Nakai mafiti falu ke hagahaga fakaagaga tuga e falu po ke mafiti ke hufia e tau mena ne fakaako. Ko e falu kua lavelave lahi mo e nakai maeke ke foaki e magaaho kua lata ke oti e veveheaga katoa he tau fahitapu takitaha. Ti, ke he falu magaaho kua lata ke taute lagaloga e fakaako ke oti e falu veveheaga mo e falu mahina ke oti e tohi.”
11 Kia Lagotatai Tumau e Tau Tagata Taute Tutaki: Kua lata ke fuafua e holoaga he fakaakoaga ke he tau tutuaga mo e hagahaga he tagata fakaako. Ha kua fakamalolo a tautolu ke kamata e tau fakaakoaga ke he porosua Manako, kua liga ke katoa e ua po ke tolu e mahina ke oti ato hoko ke he tohi Iloilo. Ka fokifoki e tautolu e tau lagomataiaga oti ne fakatoka mai he uho he Our Kingdom Ministry, Iuni 1996 kua liga lata lahi ke liu ono ke he hiva e mahina foki ke oti e tohi Iloilo. Ko e falu ne kamata la ia e fakaakoaga he tohi Iloilo ne hiki ke he porosua Manako ke lagomatai e tagata fakaako ke mafiti e iloa he kupu moli he Tohi Tapu. Ti liu mogoia e fakaako he tohi iloilo ke kamata. Kaeke ke kamata e fakaakoaga he tohi Iloilo ti holo mitaki ai, kua lata ke fakaako e porosua Manako ka oti e tohi, he liu fakamanatu fakamafiti e tau kupu moli he Kupu he Atua. He puhala ua ia, nakai manako a tautolu ke to noa e maama mitaki he tagata fakaako ha ko e mafiti. Ko e tau tagata fakaako oti kua lata mo e fakaveaga mauokafua ma e hana a tua ne moua fou he Kupu he Atua.
12 He iloa e vaha kua nonofo ai a tautolu, kua lahi mahaki e mafiti nakai la pihia ia ke lagomatai e falu ke ako e kupu moli. Kehe mai he liogi ke kamata e tau fakaakoaga Tohi Tapu fou, kia liogi a tautolu ma lautolu ne fita e fakaako mo tautolu. Ti ko e olioli ha tautolu ke papatiso fakatumau e tau tutaki loga “ke he tau aho oti, ato hoko ni ke he fakaotiaga he lalolagi.”—Mata. 28:20.