“To Maeke Fefe e Au, Ka Nakai Fakakite Mai e Taha Kia Au?”
1 He magaaho ne huhu e tagata evagelia ko Filipo ke he eunuka Aitiope kua maama nakai kia ia e tau mena kua totou ai e ia he Kupu he Atua, kua tala age a ia: “To maeke fefe e au, ka nakai fakakite mai e taha kia au?” Kua fiafia lahi a Filipo ke lagomatai a ia ke iloa e tala mitaki hagaao ki a Iesu, ati tupu ai ne talia agataha mo e papatiso e tagata. (Gahua 8:26-38) Ne omaoma a Filipo ke he fakatokaaga ha Keriso ke ‘eke e tau motu oti kana mo tutaki, ti papatiso atu a lautolu ti fakaako atu a lautolu.’—Mata. 28:19, 20.
2 Lata ia tautolu ke omaoma ke he fakatokaaga ke eke e tau tutaki, tuga ne taute e Filipo. Ka e, ko e fakatolomaki mafiti tuga ne taute he eunuka Aitiope kua fa lavea ni ke he tau tagata ne fakaako Tohi Tapu mo tautolu. Ko e tagata ia, ko e tagata faka-Iutaia liliuina ne pulotu ke he tau kupu Tohi, ne ha ha ia ia e loto matala mo e manako lahi ni ke talia ko Iesu ko e Mesia ne mavehe mai. Kua uka lahi kaeke ko lautolu ne fakaako mo tautolu kua nakai mahani mo e Tohi Tapu, ha kua fakahehe he tau fakaakoaga fakavai fakalotu, po kua kavega mo e tau lekua uka fakatagata. Ko e heigoa ke lagomatai a tautolu ke monuina he takitaki e tau tagata fakaako Tohi Tapu ke tukulele mo e papatisoaga?
3 Mataala ke he Tau Manako Fakaagaga he Tagata Fakaako Tohi Tapu: Ne tutala mai he uho he Aukuso 1998 he Ha Tautolu a Fekafekauaga he Kautu e loa he magaaho ne lata ia tautolu ke fakaako mo e tau tagata, he fakaaoga e porosua Manako mo e tohi Iloilo. Ne fakatoka mai e puhala nei: “Kua lata ke fuafua e holoaga he fakaakoaga ke he tau tutuaga mo e hagahaga he tagata fakaako. . . . Nakai manako a tautolu ke to noa e maama mitaki he tagata fakaako ha ko e mafiti. Ko e tau tagata fakaako oti kua lata mo e fakaveaga mauokafua ma e hana a tua ne moua fou he Kupu he Atua.” Haia, kua tomatoma atu ke aua fakatepetepe e tau fakaakoaga ne ha ha i ai he tohi Iloilo he lali ke fakaoti e tohi he ono e mahina. Falu tagata ne fa lata ke molea atu e ono mahina ke lagomatai a lautolu ke tolomaki atu ke he papatisoaga. He taute e koe fakafahitapu e fakaakoaga, fakaaoga fakamakai e magaaho ke lagomatai e tagata fakaako ke iloa mo e talia e tau mena ne fakaako e ia he Kupu he Atua. He falu magaaho, kua lata ke fakaaoga ua po ke tolu e fahitapu ke taute taha e veveheaga he tohi Iloilo. Kua fakata he puhala nei e magaaho ke totou ti mahino e tau kupu Tohi loga.—Roma 12:2.
4 Ka e kua, ka oti tuai e tohi Iloilo, ti logona e koe kua lata ke fakakatoatoa e maamaaga he tagata fakaako po kua nakala omoi katoa a ia ke tu mauokafua he kupu moli mo e tukulele hana a moui ke he Atua? (1 Kori. 14:20) Heigoa foki hau ke taute ke ta atu a ia ke he hala ne pu atu ke he moui?—Mata. 7:14.
5 Fakamakona e tau Manako Fakaagaga he Tagata Fakaako: Ka kitia moli e tolomaki he tagata, pete kua nakai mafiti, ka e tupu fakahaga hana fakaaue ma e tau mena ne fakaako e ia, ati tutaki a e fakaakoaga Tohi Tapu ke he tohi ke ua aki he oti e porosua Manako mo e tohi Iloilo. Nakai lata ke taute pehenei he tau magaaho oti, ka e he magaaho ni kua lata, ti matutaki e fakaakoaga he tohi True Peace, he tohi United in Worship, po ke tohi God’s Word. Tokologa e tau tagata fakamatala ne ha ha i ai e tau tohi nei ke fakaaoga ka nakai fai tohi i loto he fakapotopotoaga. Kua maeke ke moua mai oti he la mo e maeke ke ota ka manako. Pete ia, ko e porosua Manako mo e tohi Iloilo ka fakaaoga fakamua tumau ke kamata e fakaakoaga. Ko e fakaakoaga he Tohi Tapu, he liu aahi atu, mo e magaaho fakaaoga he tutaki e fakaakoaga kua lata ke totou mo e hokotaki, pete ni kua fita e papatisoaga he tagata fakaako ato katoatoa e tohi ke ua aki.
6 Kakano kia e mena nei, ki a lautolu ne kua papatiso fou ka e fakaaoga taha ni e tohi, kua lata anei he liu foki moua e lagomatai mo e fakaako ke he tohi ke ua aki? Nakai pihia. Ka e, liga nakai kua gahuahua a lautolu po kua nakai fakatolomaki i loto he kupu moli, ti liga logona e lautolu kua lata tuai mo e lagomatai fakatagata ke fakaaoga fakalahi e kupu moli ke he tau momoui ha lautolu. Kua lata ke fakatutala fakamua ke he leveki fekafekau to liu kamata e fakaakoaga mo e tagata fakamatala papatiso. Kaeke foki kua iloa e koe a falu ne fakaako ke he tohi Iloilo he magaaho fakamua ka e nakai fakaholo atu ke tukulele mo e papatiso, liga lata ia koe ke finatu ki a lautolu ke kitia kua manako nakai ke liu tutaki e fakaakoaga Tohi Tapu ha lautolu.
7 Ko e mailoga a ia he fakaalofa faka-Kerisiano ke fakateliga fakatata mo e fakamafana takitaha a lautolu ne fiafia ne kua fakaako mo tautolu. Ko e foliaga ha tautolu ke lagomatai e tagata ne fakaako ke tupuolaola atu e lotomatala ke he kupu moli he Kupu he Atua. Ati maeke ia ia ke tu mauokafua e tuaga iloa tonuhia ke he kupu moli mo e tukulele e moui hana ki a Iehova, ke fakatata e tukulele ia he papatiso he vai.—Sala. 40:8; Efeso 3:17-19.
8 Manatu nakai e koe e mena ne tupu ke he eunuka Aitiope he oti e papatisoaga? “Kua fano foki a ia he hana fenoga mo e fiafia” ko e tutaki fou a Iesu Keriso. (Gahua 8:39, 40) Ati moua a e tautolu pihia mo lautolu ne lagomatai e tautolu e monuina ke he puhala he kupu moli mo e olioli mua atu he fekafekauaga ki a Iehova ko e Atua—anei mo e tukulagi!