Puha Huhu

◼ Fiha e leva kua lata he fakaako e Tohi Tapu mo e tagata ke he tohi Iloilo?

Kua fakamonuina e Iehova hana fakatokatokaaga he vaha nei. Kua kitia e tautolu e fakamoliaga nei he tau tau takitaha he totou afe a lautolu kua fou ne o mai ke he kupu moli. Kua eke moli e tohi Iloilo mo kanavaakau ke fakakatoatoa aki e mena nei. Ko e fufuta he Ko e Kolo Toko, Fepuari 1, 1996, ne talahau ai kua talaga e tohi nei ke lagomatai e tagata fakaako Tohi Tapu ke mafiti e tupu fakaagaga, liga ke hokotia ke he papatisoaga he tau mahina gahoa.

Ma e kakano nei, ko e Kolo Toko taha ia ni he lau 14 ne hataki: “Ka oti e fakaakoaga Tohi Tapu he tagata ke he tohi Iloilo mo e kua papatiso, kua liga nakai lata ke taute e taha fakaakoaga mo ia ke he tohi ke ua aki.”

Ka e kua e tagata ne nakai papatiso he oti e tohi Iloilo? Ko e Our Kingdom Ministry, Iuni 1996, he lau 6, paratafa 23, ne fakamanatu ki a tautolu e manatu he Ko e Kolo Toko he nakai fakaako e falu tohi mo e tagata fakaako taha ia ka oti e tohi Iloilo. Kakano kia e mena nei kua nakai fiafia a tautolu ke fakalaulahi atu ki mua e lagomatai he tagata fakaako Tohi Tapu? Nakai. Manako a tautolu ke moua he tau tagata e aoga he iloilo he kupu moli. Ka kua amanaki ai ke he magaaho ku, to maeke he faiaoga hufia mitaki ke lagomatai e tagata fakaako kua loto moli ke moua e iloilo ke taute e fifili lotomatala ke fekafekau ki a Iehova. Kua liga ha ko e tau tutuaga fakatagata ha lautolu, to manako foki e falu tagata fakaako Tohi Tapu ke fakaako nakai lagataha ni he fahi tapu.

Talahau ai, to fakatuai lahi e holo ki mua he falu tagata fakaako. Ka e ka oti e fakaako he tohi Iloilo, ne liga ke leva lahi, ka e nakai fifili e tagata ke fakalataha mo e fakapotopotoaga, kua lata he tagata fakailoa ke tutala e mena nei mo e taha he tau motua he Komiti Fekafekau he Fakapotopotoaga. Kaeke ke putoia ai e tuaga fakateaga po ke kua kehe, kua liga lata ke fai lagomatai foki. Lagotatai e mena nei mo e matapatu fakaakoaga ne hataki mai he Kolo Toko, Fepuari 1, lau 14, paratafa 11 mo e 12.

Mataala ai ke he iloilo aoga he kupu moli kua lata ke omoomoi e tagata fakaako ke fakalataha ke he tau feleveiaaga Kerisiano. Liga takitaki he mena nei e tagata fakaako ke fakakite falu fakamoliaga maaliali he hana a manako ke fekafekau ki a Iehova. Ka nakai fai fakamoliaga e mataala fakaagaga pihia ka oti e fakaakoaga ke he tohi Iloilo ne kua leva, kua hataki mai ke oti e fakaakoaga.

◼ Ko e heigoa ka taute ka talahau e tagata he kaina ke nakai liliu e Tau fakamoli a Iehova ke aahi atu ke he kaina ia?

Ka feleveia a tautolu mo e fakamailoga he gutuhala kua nakai fakaata ai ke he ha lotu mo e talahau fakamaali ai e Tau Fakamoli a Iehova, kua mua atu e mitaki ke fakalilifu e manako he tagata he kaina he nakai nokonoko.

Falu magaaho kua kitia e tautolu e fakamailoga nakai fakaata e tau tagata fakafua koloa po ke tau tagata tufa laupepa. Ha kua taute e tautolu e gahua fakalotu foaki fakaalofa, kua nakai lauia a tautolu. Kua lata tonu ni ke nokonoko e tau gutuhala pihia. Ka totoko mai e tagata he kaina, kia fakalotomatala a tautolu he fakamaama e kakano kua nakai lauia a tautolu ke he mena ia. Ka talahau fakamaali he tagata he kaina ko e nakai fakaataaga kua lauia foki e Tau Fakamoli a Iehova, to fakalilifu e tautolu e manako hana.

Ka gahua a tautolu he matakavi, to maeke he tagata he kaina ke fakakite e ita mo e peehi malolo ke nakai liliu a tautolu ke ahi atu. Ka nakai talia a ia ke talahau e kakano, kua lata ia tautolu ke mailoga e ole nei. Ko e fakailoaaga he aho kua lata he tohi he faga he matakavi ke nakai liliu e tau tagata fakailoa ke ahi atu e kaina ia he vaha i mua.

Nakai tiaki fakaoti ai e tau kaina ia. To liga o kehe e tau tagata ia ne nonofo ai. Liga ke feleveia atu a tautolu ke he tagata he magafaoa kua talia fiafia. Kua fai amaamanakiaga foki to hiki e loto he tagata he kaina ne tutala a tautolu ki ai ke maeke ke talia ha tautolu a ahi atu. He fai magaaho ka mole ko e ahi atu fakailoilo ke he tau tagata he kaina ke fifili e tau manatu fou ha lautolu.

Ko e fakamauaga he matakavi kua lata ke liu fakamanatu lagataha he tau, he tohi e tau kaina ne talahau ke nakai liu ahi atu. I lalo he takitakiaga he leveki fekafekau, kia kotofa falu tagata fakailoa lotomatala mo e mahani ke ahi atu e tau kaina nei. Maeke ke fakamaama ai kua ahi atu a tautolu ke fakakia ko e nofo agaia nakai e tagata ia i ai. Kua lata he tagata fakailoa ke mahani mo e talahauaga he tohi Reasoning, lau 15-24, ne mataulu “Liga Tali Atu Fefe a Koe ke he Tau Tagata Nakai Manako ke Tutala.” Ka fai tali mitaki, kia taute ni e ahi atu tuga ni ke he puhala fa mahani. Ka fakatumau ni e tagata he kaina ke totoko, kia nakai lata ke liu ahi atu ato hoko ke he tau ka hau. Ko e kau he tau motua he matakavi kua maeke ke fifili ai he lata e mena tupu ia ke taute fakakehe.