Fakatupu i Loto he Falu e Amaamanakiaga he Moui Tukulagi
1 Pete ni e kumi e tagata ke he tau puhala ke fakamaou hifo e fuakau mo e fakalaulahi hana moui, ka e hoko agaia e fuakau mo e mate. Ko e fakaaue ha ia ha tautolu ha kua fakamaama he Tohi Tapu e kakano kua fuakau mo e mamate e tau tagata, ti pihia mo e puhala ka uta kehe aki e fuakau mo e mate. Kua fakakite fakamitaki e tau kupu moli nei i loto he tohi Iloilo ne Takitaki Atu ke he Moui Tukulagi. Kua tali fakamahino he tohi e tau huhu vihi hagaao ke he moui mo e mate, he takitaki atu e tagata totou ke he magaaho ka fakafou e Parataiso.
2 Ia Mati to foaki e tautolu e tohi Iloilo mo e foliaga ke kamata e fakaakoaga Tohi Tapu he kaina. (Mata. 28:19, 20) Ti taute e tautolu e tau liu ahi atu ki a lautolu oti kua fakakite e fiafia ke he fekau he Kautu. Ke he puhala nei to fakatupu e tautolu i loto he falu e amaamanakiaga he moui tukulagi. (Tito 1:2) Ke fakakatoatoa e mena nei, kua liga moua e koe e tau talahauaga na kua aoga.
3 Ka ahi atu fakamua, liga huhu e koe e huhu nei:
◼ “Kua manamanatu nakai a koe ko e ha kua manako lahi e tau tagata ke he moui loa? [Fakaata ma e tali.] Ko e tau Puta, Kerisiano, Hinitu, Musilimi, mo e falu kua amaamanaki ke momoui he mole e mate.” Hafagi e tohi Iloilo ke he veveheaga 6, “Ko e Ha ne Fuakau mo e Mamate Ai a Tautolu?,” ti totou e paratafa 3. Fakatutala e tau kupu tohi ne tu ai. Hagaaki ke he tau huhu ua he fakaotiaga he paratafa, huhu ke he tagata he kaina ka fia manako a ia ke kitia e tau tali. Ka manako a ia, fakaholo e fakatutalaaga ke he tau paratafa gahoa i mua. Kua kamata ai e fakaakoaga! Ka nakai ti toka e tohi mo ia ke totou, mo e fakatoka ke liu ahi atu, ke liga mitaki ka mole atu taha po ke ua e aho ke fakatutala e tau tali.
4 Ka liu atu ke fakakia e tohi “Iloilo” ne toka, kia pehe a koe:
◼ “Kua liu mai au ke tutala ke he tau huhu ua ne nakai tali e taua hagaao ke he mate.” Fakamanatu ke he tagata he kaina e tau huhu. Ti fakatutala e vala tala he veveheaga 6 i lalo hifo he mataulu tala “Ko e Pulega Kelea.” Falanaki ke he tau tutuaga, ke fakatumau e fakaakoaga po ke fakaaoga e huhu fakahiku he fakaotiaga he paratafa 7 ke fakamatapatu ai e fakatutalaaga hake. Kia taute e tau fakatokaaga mau ke liu atu. Age ke he tagata he kaina e laupepa fakailoa, ti fakamaama fakaku e matakavi he tau feleveiaaga he fakapotopotoaga. Uiina mafanatia a ia ke hau.
5 He gahua ke he gutuhala po ke fakamatala nakai mautali kua liga kamata e koe e fakatutalaaga he pehe:
◼ “Kua manamanatu nakai a koe ko e heigoa he vaha anoiha ka fakatoka mai ma tautolu mo e lalolagi? [Fakaata ma e tali.] Kua talahau katoa mai he Tohi Tapu e vaha anoiha ke he taha e kupu—Parataiso! Kua fakamaama mai he kamataaga, ne taute he Atua taha vala he lalolagi ke he parataiso fulufuluola ati tuku e ia e hoa tokoua ne tufuga e ia. Kua lata a laua ke fakatupu e lalolagi katoa, ti taute fakahaga ai mo parataiso. Mailoga la e talahauaga nei ko e fefe la i ai.” Hafagi e tohi Iloilo ke he lau 8, ti totou e paratafa 9, i lalo he mataulu tala “Moui he Parataiso.” Ti fakatutala e tau manatu he paratafa 10, ti totou e kupu tohi ne tu ai, Isaia 55:10, 11. Foaki ke fakatumau e fakatutalaaga he moui he Parataiso ka liuaki mai ti totou oti e tau paratafa 11-16. Po ke fakamalolo e tagata ke totou ni e ia ke he magaaho hana, ti fakatoka ke liu feleveia mo e fakatutala ki ai.
6 Ka nakai la taute ia e fakaakoaga he ahi fakamua, kia lali a koe ke taute he magaaho ka liu atu he pehe:
◼ “He fakatutala fakahiku a taua, ko e finagalo he Atua ke fakafou e lalolagi katoa ke he parataiso. Ti tupu mai ai e huhu, To fefe e Parataiso?” Hafagi e tohi Iloilo ke he veveheaga 1, ti fakaako e paratafa 11-16, i lalo hifo he mataulu tala “Moui i Loto he Parataiso Liuaki Mai.” Ka mole ia ti fakakite age e fakatino he lau 4-5, ti huhu ke he tagata ko e fia manako nakai a ia ke moui i loto he tau takatakaiaga fulufuluola pihia. Ti totou e laini fakamua he paratafa 17 he lau 10. Falanaki ke he tau tutuaga, ke fakatumau e fakaakoaga po ke talahau ka liu atu a koe to fakamaama e koe e mena kua lata ke maeke he tagata ke moui ke he Parataiso liuaki mai. Toka e laupepa fakailoa, fakamaama e setulu he feleveiaaga, ti uiina mafanatia e tagata ke fina atu ke he Fale he Kautu.
7 Ko e tohi Iloilo ko e kanavaakau mitaki lahi ke fakaaoga ke fakakite ke he falu “e moui tukulagi” ne mavehe mai he Atua. Kua maeke he fakaakoaga Tohi Tapu hau he kaina mo e tau tagata ke fakatupu i loto ia lautolu e amaamanakiaga ne kua omoomoi he Atua “kua nakai maeke ke pikopiko.”