Leveki
Tau Fakataitaiaga ka Fakaaoga he Gahua ke he Fonua
Puhala ke Fakaaoga e Uho Nei
Laulahi he tau fakataitaiaga na kua fita i loto he tau fufuta kua mole he Ha Tautolu a Fekafekauaga he Kautu. Lali ke fakaaoga fakaloga ka manako a koe ki ai he hau a gahua fakamatala, ti kitia ko e heigoa e tau fua kua moua e koe. Leveki e uho nei, ti hagaao ki ai ka tauteute a koe ma e fonua.
Fakalagalaga e koe e fiafia he tagata ke he Kupu he Atua kaeke ke fakaku e koe hau a fekau. Fakatu taha huhu pauaki, ti totou e tali ku faka-Tohiaga Tapu. Maeke ia koe ke fakaaoga e tau puhala nei:
“He manamanatu a koe ke he vaha anoiha, ha ha nakai ia koe e amaamanakiaga po ke tuaha? [Fakaata ma e tali.] Talahau tuai mai he Tohi Tapu e tau mena tutupu fakatupetupe nukua kitia e tautolu he vaha nei mo e tau fua ha lautolu.”—2 Timo. 3:1, 2, 5; Fakatai 2:21, 22.
“Lahi mahaki e kapaletu he vaha nei hagaao ke he levekiaga he malolo tino. Iloa nakai e koe na mavehe mai e Atua to fakamaulu tukumalagi e ia e tau lekua he tino gagao?”—Isa 33:24; Fakakite. 21:3, 4.
“Iloa nakai e koe kua talahau tuai mai he Tohi Tapu to fakahiku ke taha maka ni e fakatufono ka pule ke he lalolagi katoa?”—Tani. 2:44; Mata. 6:9, 10.
“Fefe e manatu hau ke he tau tutuaga kaeke ke pule e Keriso ke he lalolagi?”—Sala. 72:7, 8.
“Tokologa e tau tagata ne matematekelea ha ko e feveheveheaki ha ko e ha lautolu a tuaga tane po ke fifine, lotu, po ke lanu. Fefe e manatu hau ke he logonaaga he Atua hagaao ke he mahani fili tagata?”—Gahua 10:34, 35.
“Iloa e tautolu na taute e Iesu Keriso e tau mana loga he vaha hana. Kaeke ke ole a koe ki a ia ke taute taha mana foki, ko e heigoa la?”—Sala. 72:12-14, 16.
“Tokologa e tau tagata kua fiu he logona hagaao ke he tau lekua. Manako a lautolu ke logona hagaao ke he tau totokaaga. Ka e moua mai fe e tautolu e tau totokaaga moli ke he tau lekua ha tautolu?”—2 Timo. 3:16, 17.
“Maeke nakai ia koe ke mailoga e Kautu kua liogi a koe ki ai he Liogi he Iki (po ke, Ha Mautolu a Matua)?”—Fakakite. 11:15
Tau Puhala Kamata Aki e Tau Fakatutalaaga
Ko e tau huhu na i lalo, ne fakaputu auloa mai he tau mataulu tala he tohi Reasoning, kua fakakite ai e numera he lau he tohi kua moua mai e tali:
Ko e ha kua fuakau mo e mamate a tautolu? (rs 98)
Ko e heigoa e tuaga he tagata mate? (rs 100)
Fai kakano mitaki nakai he talitonu ke he Atua? (rs 145)
Ko e peresona moli kia e Atua? (rs 147)
Manamanatu moli nakai e Atua ke he tau mena ne tutupu ki a tautolu e tau tagata? (rs 147)
O hake oti kia e tau tagata mitaki ke he lagi? (rs 162)
Hake ni kia e tagata ke he lagi ke moua e fiafia moli he vaha anoiha? (rs 163)
Ko e aoga he ha ke iloa mo e fakaaoga e higoa moli he Atua? (rs 196)
Ko Iesu Keriso kia ko e Atua moli? (rs 212)
Ko e heigoa ka fakakatoatoa he Kautu he Atua? (rs 227)
Ko e heigoa e kakano he moui he tagata? (rs 243)
Ko e heigoa ka lagomatai ke fakatolomaki ki mua e fakamauaga? (rs 253)
Talia kia he Atua e tau lotu oti? (rs 322)
Iloa fefe he tagata ha fe e lotu hako? (rs 328)
Malolo lahi fefe e omoomoiaga ha Satani ke he lalolagi he vaha nei? (rs 364)
Ko e fakaata he ha he Atua e matematekelea? (rs 393)
Ko e ha kua lahi mahaki e mahani kelea? (rs 427)
Ko hai e pule he lalolagi nei—ko e Atua po ko Satani? (rs 436)
Tau Puhala ke Foaki e Porosua Manako
“Nakai fakauaua ai to talia a koe na tokologa e tau tagata kua talitonu ke he Atua. Ko lautolu oti kua talia ki a ia na fai mena e Atua ne manako mai ia tautolu? Ko e mena kua nakai talia he tau tagata, Ko e heigoa e manako he Atua ki a tautolu?” Ti foaki e porosua Manako, veveu ke he fakaakoaga 1, ti tutala ki ai.
“Mo e loga he tau lekua he moui magafaoa he vaha nei, kua manamanatu nakai a koe, ko e heigoa e puhala ke moua e fiafia he magafaoa?” Mole e tali, fakamaama haia i loto he Tohi Tapu, kua fakakite he Atua e mena galo moli ke he fiafia he magafaoa. Totou Isaia 48:17. Ti veveu ke he fakaakoaga 8 he porosua Manako, ti tuhi ke he falu kupu tohi ne tu he Tohi Tapu nukua foaki e takitakiaga moli ma e tau tagata takitaha he magafaoa. Totou e tau huhu he mataulu he fakaakoaga. Huhu ke he tagata ko e manako nakai ke totou e tau tali.
“Kua ha ha he porosua nei e fakaakoaga maama mitaki he moua katoatoa e tau fakaakoaga aoga he Tohi Tapu. He tau lau takitaha, to moua e koe e tau tali ke he tau huhu nukua fakatupetupe aki e tau tagata. Ma e fakatai, Ko e heigoa e finagalo he Atua ma e lalolagi?” Veveu ke he fakaakoaga 5, ti totou e tau huhu he mataulu he fakaakoaga. Huhu ke he tagata he kaina ko e mena fe ne fia iloa lahi a ia ki ai, ti totou mogoia e (tau) paratafa fakatatau ke he huhu, mo e kumi e tau kupu tohi kua lata. Fakamaama ko e tau tali makona ke he falu huhu kua mukamuka ke moua tuga ni e huhu fakamua ia. Tala age to liu mai a koe ke fakatutala foki taha huhu.
“Ko e heigoa e manatu hau ke he tau favaleaga oti he tau aoga? Kua fua mai kia ha ko e nakai fai feakiaga fakamatua? Po ke taha mena kehe, tuga e fakaohoohoaga he Tiapolo?” Fakaata ma e tali. Kaeke ke pehe e tagata ko e omoomoiaga he Tiapolo, totou e Fakakiteaga 12:9, 12. Fakakite age e gahua he Tiapolo he fakaholo ki mua e malaia he lalolagi. Ti hafagi e porosua Manako ke he fakaakoaga 4, ti huhu kaeke ke tuaha e tagata na hau e Tiapolo i fe. Holo atu ke totou mo e fakatutala e tau paratafa ua fakamua. Kaeke ke fifili e tagata ko e “nakai fai feakiaga fakamatua” e kakano ma e favaleaga he tau aoga, totou e 2 Timoteo 3:1-3 ti tuhi age e tau aga kua lafilafi moli ke he lekua nei. Ti hafagi e porosua Manako ke he fakaakoaga 8, totou e paratafa 5, ti matuaki e fakatutalaaga.
“Manatu nakai a koe kua fai kakano ke amanaki to foaki he Tufuga ki a tautolu e iloilo kua lata mo tautolu ke ati hake e kautuaga he moui magafaoa?” Mole e tali, fakakite age e porosua Manako. Veveu ke he fakaakoaga 8, ti fakamaama e tau matapatu fakaakoaga mai i loto he Tohi Tapu ma e tau tagata oti he magafaoa. Foaki ke fakatata e puhala ke fakaaoga e porosua fakalataha mo e Tohi Tapu ke moua e aoga lahi mahaki.
“Fakalataha mo e tau lekua oti kua fehagai mo tautolu he moui he vaha fou nei, logona nakai e koe kua maeke he liogi ke lagomatai moli ki a tautolu? [Fakaata ma e tali.] Tokologa kua talahau ko e liogi kua foaki ki a lautolu e malolo he loto. [Totou Filipi 4:6, 7.] Pihia foki, kua liga logona he tagata ko e tau liogi hana kua nakai fai tali. [Veveu e porosua Manako ke he fakaakoaga 7.] Kua fakamaama he porosua nei e aoga lahi he liogi ki a tautolu.”
“Nukua tutala a mautolu ke he tau katofia ha mautolu hagaao ke he kakano kua to lahi e loga e tau lotu kehekehe he lalolagi. Ka e, taha ni e Tohi Tapu. He manatu hau, ko e ha ne tupu ai e malokiloki fano he tau lotu? [Fakaata ma e tali. Hafagi e porosua Manako ke he fakaakoaga 13, ti totou e tau huhu he mataulu.] To moua e koe e tau tali makona ke he tau huhu ia he totou e fakaakoaga nei.”
He mole e foaki atu he tau mekasini Ko e Kolo Toko mo e Awake! ke he tagata, huhu ke liga totou age e koe ki a ia taha paratafa ku. Kaeke ke manako, ti hafagi ke he porosua Manako ke he veveheaga 5. Tuhi ke he tau huhu he mataulu he fakaakoaga, ti ole age ki a ia ke fanogonogo ke he tali he huhu fakamua ka e totou e koe e paratafa fakamua. He oti e totou he paratafa, huhu e huhu ti fanogonogo ke he tali hana. Foaki e porosua ti, kaeke ke talia, fakatoka ke liu atu ke moua e tali ke he tau huhu ua foki he tohi.
Tau Puhala ke Foaki Aki e Tohi Iloilo
He toto e Tohi Tapu he lima, kia kamata he pehe: “Folafola e mautolu e kupu tohi ke he tau tagata oti he maaga hau he aho nei. Kua pehe . . . ” Totou Ioane 17:3, ti huhu mogoia: “Mailoga nakai e koe e maveheaga ka moua e tautolu e iloilo kua hako? [Fakaata ma e tali.] Moua mai he tagata e iloilo ia i fe?” He mole e tali, fakakite age e tohi Iloilo, ti pehe: “Kua fakakite mai he tohi nei e iloilo kua takitaki ke he moui tukulagi. Kua pihia moli ai ha kua tali e tau huhu aga mau he tau tagata hagaao ke he Tohi Tapu.” Fakakite age tau mataulu tala, ti huhu ke he tagata kaeke ke manamanatu a ia hagaao ke he ha mataulu tala ia.
“Kua manamanatu nakai a koe kaeke ke kapaletu moli e Atua hagaao ke he nakai fakafili tonu mo e matematekelea kua kitia fano e tautolu po kua lauia ai foki a tautolu? [Fakaata ma e tali.] Kua talahau mai he Tohi Tapu ki a tautolu nukua fakaalofa e Atua ki a tautolu mo e to lagomatai e ia a tautolu he tau magaaho tupetupe.” Totou e tau vala takitaha he Salamo 72:12-17. Hafagi e tohi Iloilo ke he veveheaga 8, ti fakakite age kua foaki mai e tali mafanatia ke he huhu ne fa e huhu he tau miliona, Ko e ha kua fakaata he Atua e matematekelea? Ka talia, fakatutala ke he falu manatu faka-Tohiaga Tapu ne toka he paratafa 3 ke he 5, po ke taute ai he liu ahi atu.
“Laulahi ia tautolu kua galo e tau fakahelehele he mate. Kua manamanatu nakai a koe to maeke a tautolu ke liu kitia a lautolu ia? [Fakaata ma e tali.] Ne fakamoli e Iesu to maeke he tau fakahelehele ha tautolu ke fakahao mai he mate. [Totou Ioane 11:11, 25, 44.] Pete ni na tupu e mena nei he tau senetenari i tuai, nukua fakatata ai e mena ne mavehe he Atua ke taute ma tautolu.” Hafagi e tohi Iloilo ke he fakatino he lau 85, ti totou e vala he fakatino. Ti fakakite e fakatino he lau 86, ti tutala hagaao ki ai. Fakatoka e fakaveaga ke lata mo e ahi atu ka hau, he huhu: “Manako nakai a koe ke iloa e kakano kua fuakau mo e mamate e tau tagata?” Liu atu ke fakatutala e veveheaga 6.
“Kua manamanatu nakai a koe, ko e ha kua manako e tau tagata ke moui loa?” He mole e tali, hafagi e tohi Iloilo ke he veveheaga 6, ti totou e paratafa 3. Fakamaama e tau kupu tohi ne tu ai. Hagaaki atu ke he ua e huhu he matahiku he paratafa, huhu ke he tagata ko e manako nakai a ia ke kitia e tau tali. Ka talia, fakatutala atu ke he falu paratafa gahoa foki.
“Huhu a mautolu ke he tau tagata ko e talitonu nakai a lautolu ke he mena nei . . . ” Totou Kenese 1:1, ti huhu: “Talia nakai a koe ke he talahauaga ia?” Kaeke ke talia e tagata, ti talahau: “Talitonu foki au. Pete ia, manatu nakai a koe kaeke ke tufuga he Atua e tau mena oti, kua fakalago foki ki a ia e mahani kelea?” He mole e fai tali ke he tagata, totou e Fakamatalaaga 7:29. Hafagi ke he veveheaga 8 he tohi Iloilo, ti totou e paratafa 2. Ka nakai talia a ia ke he Kenese 1:1, fakamalolo a ia ke kumikumi e fakamoliaga na fai Tufuga.—Kikite e tohi Reasoning, lau 84-6.
“To talia nakai e koe kua mafiti lahi e hiki he tau tuaga mahani mitaki he vaha nei, ti kua lata ke fai takitakiaga mauokafua a tautolu he moui? [Fakaata ma e tali.] Pete ni ko e tohi tuai, kua foaki he Tohi Tapu e tomatomaaga aoga ma e moui he vaha fou nei mo e moui fiafia he magafaoa.” Ti veveu ke he veveheaga 2 he tohi Iloilo, mo e totou e paratafa 10 mo e matakupu fakamua he paratafa 11, pihia mo e 2 Timoteo 3:16, 17.
“To manako nakai a koe ke iloa ko e heigoa kua fakatoka mai he vaha anoiha ma tautolu mo e pihia ma e lalolagi? [Fakaata ma e tali.] Kua fakakatoatoa mai he Tohi Tapu e vaha anoiha ke he taha e kupu—Parataiso! Ko e matakavi haia ne tuku he Atua e hoa mau fakamua he oti e tufugatia e ia a laua. Mailoga e talahauaga nai ko e fefe la e moui i ai.” Hafagi e tohi Iloilo ke he lau 8, ti totou e paratafa 9, i lalo hifo he mataulu “Moui he Parataiso.” Ti fakatutala ke he tau manatu he paratafa 10, ti totou e kupu tohi ne tu ai, Isaia 55:10, 11. Foaki ke matutaki e fakatutalaaga ke he moui he Parataiso ne fakatoka mai, he tutala foki ke he paratafa 11-16.
Ka taute e tau liu ahi atu ki a lautolu kua toka ai e koe e tau mekasini Kolo Toko mo e Awake!, liga pehe a koe:
“He hau haku kua mole, ne fiafia lahi au ke toka hifo mo koe e lagaki he Kolo Toko. Liga kua mailoga e koe e mataulu katoa he senolo ia Ko e Kolo Toko Fakapuloaaga he Kautu a Iehova. Manako au he aho nai ke fakamaama e Kautu nei mo e kakano hana ma hau mo e magafaoa hau.” Ti hafagi e porosua Manako ke he fakaakoaga 6, ti totou mo e fakatutala lahi ka fai magaaho e tagata.
“Nakai la leva e aahi mai haku mo e toka e tau lagaki he tau mekasini Kolo Toko mo e Awake!. Kua ati hake he tau senolo nei e fakalilifu ma e Tohi Tapu mo e hana takitakiaga he mahani. Ha kua logona e au e latatonu ma e tau tagata oti ke maama e Kupu he Atua, ne liu mai au ke fakakite ki a koe taha mena ka lagomatai aki a koe ke taute e mena ia.” Fakakite age e porosua Manako po ke tohi Iloilo, ti foaki e fakaakoaga Tohi Tapu.
Ka fakakite age e tau tohi lau 192 tuai, liga fakaaoga e koe e fakataitaiaga nei:
“Lahi e peehiaga ne tuku ke lata ma e aoga he fakaakoaga. He manatu hau, ko e faga fakaakoaga fefe kua lata he tagata ke tutuli ke moua e fiafia lahi mahaki mo e kautuaga he moui? [Fakaata ma e tali. Ti totou e Tau Fakatai 9:10, 11.] Ko e tohi nei [talahau e mataulu he tohi ka foaki e koe] kua fakave ke he Tohi Tapu. Kua fakakite ke he punaaga hokoia he iloilo kua maeke ke takitaki ke he moui tukulagi.” Fakakite age e fakafifitakiaga pauaki he tohi, ti fakamalolo e tagata ke totou ai.
Falu Tohi
Ko e tau fakataitaiaga kua foaki ma e tau tohi mo e tau porosua lafi ki luga ne kua moua he Watch Tower Publications Index i lalo he:
Presentations
List by Publication
Puhala Tuhi Fakahako
Ke kamata e fakaakoaga Tohi Tapu, lali ke fakaaoga taha he tau foakiaga nei:
“Iloa nakai e koe ke he tau minuti gahoa ni, na maeke ia koe ke moua e tali ke he huhu aoga he Tohi Tapu? Ma e fakatai, . . . ” Ti, fakatu e huhu he kamataaga he taha he tau fakaakoaga he porosua Manako nukua manatu a koe to fiafia e tagata ki ai.
“Ne liu mai au ke fakakite ki a koe e fakaholoaga fakaako Tohi Tapu nakai totogi. Kavi ke he lima e minuti ke fakatata ai. Fai lima minuti nakai a koe?” Ka pehe e, e tali, ti fakaaoga e fakaakoaga 1 he porosua Manako ke fakatata e fakaakoaga, he totou taha ni po ke ua e tau kupu tohi ne fifili. Mole atu, ti huhu: “Fai 15 minuti nakai a koe ke taute e taha fakaakoaga ka hau?”
“Tokologa e tau tagata kua fai Tohi Tapu, ka e nakai mailoga e lautolu nukua haia i loto ua e huhu aoga kua ha ha ia tautolu oti hagaao ke he ha tautolu a vaha anoiha. He fakaaoga e tohi lagomatai nei [ko e porosua Manako po ke tohi Iloilo] ke taha e tula he fahi tapu, maeke ia koe ke moua e maamaaga aoga he Tohi Tapu he tau mahina gahoa ni. To fiafia au ke fakakite ki a koe e puhala ka taute aki e fakaholoaga.”
“Hau au ke foaki ki a koe e fakaakoaga Tohi Tapu he kaina nakai fai totogi. Ka maeke, manako au ke fakaaoga falu minuti gahoa ke fakatata e puhala kua fakaako he tau tagata he kau ke 200 motu e Tohi Tapu he kaina ko e tau matakau he magafaoa. Maeke ia tautolu ke fakaaoga ha mataulu tala nei mo fakaveaga he fakatutalaaga. [Fakakite e tau mataulu veveheaga he tohi Iloilo.] Ha fe mataulu kua fiafia pauaki a koe ki ai?” Fakatali ma e tagata ke fifili. Veveu ke he veveheaga kua fifili, ti kamata e fakaakoaga he paratafa fakamua.
“Foaki noa e au e tau fakaakoaga Tohi Tapu ti fai magaaho au ke fakaako falu tagata fakaako kua loto. Ko e lagomataiaga fakaako hanei he Tohi Tapu kua fakaaoga e mautolu. [Fakakite e tohi Iloilo.] Katoa ai kavi ni ke he tau mahina gahoa e fakaakoaga mo e kua foaki e tau tali ke he tau huhu tuga: Ko e ha kua fakaata he Atua e matematekelea? Ko e ha kua fuakau mo e mamate a tautolu? Ko e heigoa e mena ka tupu ki a lautolu ne mamate kua ofania e tautolu? Maeke fefe a tautolu ke fakatata ke he Atua? Maeke nakai au ke fakatata e fakaakoaga?”
Ka kitia e koe e fakataitaiaga kua lauia mitaki ke moua e tau fua he feaki e fiafia, fakatumau ke fakaaoga ai! Kia hikihiki ke he foakiaga he tohi ma e mahina fou.