Hane Fakaaoga Kia e Koe e Porosua Manako ke Kamata e Tau Fakaakoaga?
1 Mailoga nakai e koe ka fakatokatoka tumau a koe ma e tau fakatutalaaga fakaku he Tohi Tapu mo e tagata fiafia, ti tutala ke he taha tohi kua fakamalolo ke fakaaoga, ko e hane fakaako Tohi Tapu a koe mo ia a ia? E, moli e mena nei pete ni ka fakaako he gutuhala po ke telefoni. Ko e ha he taute e laliaga pauaki ia Me mo Iuni ke kamata e fakaakoaga pihia he fakaaoga e porosua Manako?
2 Tauteute ma e Kautuaga: Ka foaki e porosua Manako, kia iloa mitaki he loto hau e mena kua manako a koe ke fakatutala. Ka taute a koe he liu ahi atu, manamanatu ke he fakatutalaaga kua fita he taute e koe fakamua mo ia. Huhu hifo: ‘Ha e fe e tau paratafa he porosua ka fakakite e au ke ati hake e fakatutalaaga ia mo e takitaki ke he fakaako Tohi Tapu?’ Ka fina atu a koe he taha fale ke he taha fale, manamanatu ko e tau mataulu tala fe ka fakalagalaga e fuata mui, tagata motua, tagata tane, po ke fifine. Liu kitekite ke he tau mataulu tala he porosua, ti fifili e vala tala kua manako ki ai. Ka oti he fifili e fakafeleveiaaga ti fakataitai laga loga. Ko e taha anei he kei ke he kautuaga.
3 He uho he Ha Tautolu a Fekafekauaga he Kautu ia Ianuari 2002 ne fakakite mai valu e “Tau Puhala ke Foaki e Porosua Manako.” Kua fakakite mai he puha “Puhala Tuhi Fakahako” e puhala ke fakaaoga e porosua ke kamata e tau fakaakoaga. Maeke ia koe ke hiki e talahauaga fakamua ke pehe:
◼ “Iloa nakai e koe, he tau minuti gahoa na maeke ia koe ke moua e tali ke he huhu aoga he Tohi Tapu? Ma e fakatai, ko e ha ne loga koa ai e tau lotu ne talahau ke Kerisiano? Kua manamanatu nakai a koe ke he mena ia?” Ka oti e tali he tagata, veveu ke he fakaakoaga 13 ti fakatutala e tau paratafa ua fakamua. Ka fai magaaho, totou ti fakatutala taha po ke ua e kupu tohi. Ti totou e huhu fakahiku i luga he lau tohi, mo e pehe: “Kua fakakite mai he vala ne toe he fakaakoaga lima e fakamailoga ke kitia aki e lotu moli. To fiafia au ke liu mai mo e kikite e vala nei mo koe.”
4 Kia Fakatumau: Fakaaoga e tau magaaho oti ke fakatata e fakaako Tohi Tapu he porosua Manako. Ole ma e monuina ha Iehova. (Mata. 21:22) He fakatumau ke he tau laliaga hau, to kamata e koe e olioli he lagomatai e taha ke talia e tala mitaki!