Kamata e Tau Fakaakoaga he Porosua Manako
1 Moua mai he tau tala takai he lalolagi kua fakailoa mai he porosua Ko e Heigoa e Manako he Atua ma Tautolu? ko e kanavaakau malolo lahi ke fakaako aki e tau tagata ke he kupu moli. Tokoafe he tau fakaakoaga Tohi Tapu ne kua kamata he fahitapu ke he porosua nei. Kua monuina nakai a koe he kamata ti takitaki ai e fakaakoaga he Tohi Tapu ke he porosua Manako?
2 Pete kua logona he falu kua mukamuka ke foaki e porosua, ha i ai e falu ne kitia kua uka ke iloa e puhala ke kamata ai e fakaakoaga. Ko e heigoa e tau puhala ne kitia he falu kua lauia mitaki ke kamata aki e tau fakaakoaga Tohi Tapu fakaaoga ai he porosua Manako? Ko e tau puhala na ne fakatoka atu kua lata ke lagomatai.
3 Foaki age e Fakataiaga he Fakaakoaga: He oatu fakapa po ke liliu aahi atu, he nakai foaki atu ni e fakaakoaga Tohi Tapu ke he tagata he kaina, lata ia tautolu ke fakatata e puhala ke takitaki aki e fakaakoaga Tohi Tapu. Fa mahani e mena nei ke uta kehe e tuaha mo e tupetupe ne tutaki mai he tau tagata he kaina ke he kupu “fakaakoaga.” He makutu a tautolu ke fakatai ai, to kitia e tautolu mai he kamataaga mukamuka ia, kua maeke ia tautolu ke taute fakamitaki e fakaakoaga.
4 Ko e Tauteuteaga e Kei: Ko e omoiaga ha tautolu ke kamata e tau fakaakoaga Tohi Tapu kua tutaki fakahako ke he tauteuteaga mitaki ha tautolu. Ke tauteute fakamua to lagomatai ke kautu he tau tehatehaua ha tautolu he fakalataha ai ke he gahua fakaakoaga Tohi Tapu. He fakagahua e fakataiaga ha tautolu lagaloga, kua maeke ia tautolu ke fakatutala makalakala, ke tutala fakamakutu mo e tau kupu ni ha tautolu. Nakai ni to lagomatai he mena nei a tautolu ke ai tupetupe ka e to fakatotoka foki e tagata he fale.
5 Ka fefakataitaiaki, kua lata lahi ke totou e taimi he hau a fakataiaga ke fakailoa ke he tagata he fale e loa he fakatai he fakaakoaga. He mole e fakafeleveia he taha matakainaga tane, ati pehe age a ia: “Afe mai au ke fakakite kia koe e polokalama fakaakoaga Tohi Tapu foaki noa. Na lima noa ni e minuti ke fakatai atu. Fai lima minuti nakai a koe.” Maeke e Fakaakoaga 1 he porosua Manako ke fakataitai ke he lima e minuti. Ka e moli, fifili e tau kupu Tohi ke totou he magaaho nei, ka e he oti ai e fakaakoaga fakamua nei fakaku, kua maeke e tagata he fale ke kitia e fakaakoaga fakapa hana. Ti fakailoa age ki a ia ka liu mai a koe ke ako e Fakaakoaga 2, to taute ke 15 ni e minuti.
6 Kua moli e fakataiaga na he lauia mitaki:
◼ “Manako au ke fakatai mo koe e fakaakoaga Tohi Tapu he kaina ne mukamuka, ka e mafiti, fakaaoga ai e porosua nei Ko e Heigoa e Manako he Atua ma Tautolu? Tokologa ne kitia, pete ni kua tote e 15 e minuti he fahitapu, he 16 e fahitapu, kua maeke ia lautolu ke moua e tau tali makona mai he Tohi Tapu ke he tau huhu aoga nei he Tohi Tapu.” Fakakite fakaku e tau veveheaga tala. Veveu ai ke he Fakaakoaga 1, pehe age: “Kaeke kua foaki mai e koe lima e minuti, manako a maua ke fakakite atu e puhala ke taute e mena nei. Ko e matapatu he Fakaakoaga 1 ko e ‘Kumi Fefe e Koe ke Iloa e Manako he Atua.’” Ti totou age e tau huhu tolu, mo e fakamaama age e tau numera i loto he parenetesi. Totou e paratafa 1, ti fakakite age ke he tagata he kaina e puhala ke kumi e tali. Kia fakamolemole age ke he tagata he kaina ke totou e paratafa 2. Ti pehe age: “Fakave ke he fakailoaaga nei, to maeke fefe ia koe ke tali e huhu nei? [Liu totou e huhu, ti fakata e tagata he kaina ke tali.] Kitia e koe ne ha ha i ai e tau kupu Tohi Tapu ne tutaki ke he tau paratafa. Futiaki he tau mena nei e manamanatu ha tautolu ke he tali he Tohi Tapu ke he tau huhu nei. He fakatai, totou la taua ke he 2 Timoteo 3:16, 17 mo e kikite na lago kia e tali hau ki a ia e punaaga he Tohi Tapu.” Oti ai he totou e paratafa 3, manamanatu ai ke he huhu, mo e totou a Ioane 17:3, futiaki e manamanatuaaga he tagata he fale ke he maamaaga ne moua e ia he liu fakamanatu e Fakaakoaga 1. He mogo nei veveu ke he Fakaakoaga 2 mo e totou e huhu fakahiku, “Ko e heigoa e tau puhala ua ne maeke ia tautolu ke fakaako ke he Atua?” Ati huhu age: “Magaaho fe kua maeke ia koe ke fakata e 15 e minuti ke ako tokoua e Fakaakoaga 2 ti moua e tali?”
7 Kua aoga lahi ke fakamukamuka e fakatutalaaga mo e fakaaue age ke he tagata he fale kaeke kua lata. Ka liu pulega ke liu aahi atu, ua huhu kua manako nakai a ia ke fakaholo atu, ka e fakamafana age a ia ke tutaki atu e fakaakoaga pihia he tapu ka hau. Fakailoa kia ia e fiafia hau ke amaamanaki ke liu mai. Falu e tau tagata fakailoa ne foaki ke taute e fakaakoaga he foni kaeke kua uka ke fakamau e magaaho. Fakamafana atu foki e tagata fakaako ke leveki fakamitaki e porosua, toka he mena mukamuka ke eke mai ka liu aahi atu a koe.
8 Kia Fakamalolo: Pete ni ko e tauteuteaga e kei ke kautu aki, lata ia tautolu ke fakamalolo ke tutaki tumau. Na paleko ke fakaako e fakaakoaga he tau minuti gahoa, ti fakamalolo ke fakatata e fakataiaga lagaloga ke makutu kaeke ka fakatai aki e fakaakoaga. Lali ke fakatai e fakaakoaga mo lautolu oti ne feleveia mo koe he tau gutuhala, he fakatutala noa, mo e fakamatala he telefoni. Ka uka ia koe ke kamata e fakaakoga he Tohi Tapu, aua neke fakalolelole. Ke kautu he kamata ai e tau fakaakoaga Tohi Tapu kua lata ke fakamalolo mo e manako loto fakamoli ke foaki atu e kupu moli kia falu.—Kala. 6:9.
9 He fakaaoga ai e tau puhala nei, maeke foki ia koe ke moua e kotofaaga ke lagomatai taha tagata ke he puhala he moui, he kamata mo e takitaki e fakaakoaga Tohi Tapu ke he porosua Manako.—Mata. 7:14.