Fakaako he Fakaaoga e Porosua Tala Mitaki
1. Talaga fēfē e porosua Tala Mitaki?
1 He fakatutala ke he fufuta ia Iulai he Ha Tautolu a Fekafekauaga he Kautu, taha he tau koloa aoga lahi he puha fakaako ha tautolu ko e porosua Tala Mitaki Mai he Atua! Ko e tau kupu tohi ne nakai fatiaki i ai ke maeke he tau tagata he kaina ke fakaako mai ni he Tohi Tapu. He loga e tau tohi fakaako ha tautolu ne tohi he puhala ne maeke he tagata totou ke iloa e ia, ko e porosua nei ne talaga ke fakatutala mo e faiaoga. Ko e mena ia, ka foaki ai e tautolu, kua lata ia tautolu ke fakataitai e fakaakoaga ke maeke he tagata he kaina ke kitia e puhala ofoofogia ke fakaako e tala mitaki mai he Tohi Tapu.—Mata. 13:44.
2. Maeke fēfē a tautolu ke fakaaoga e porosua Tala Mitaki he fina atu fakamua?
2 He Fina Atu Fakamua: Maeke a koe ke pehē: “Kua hoko mai au ha kua tupetupe e tau tagata, ko e gutu atu ki fe e lalolagi nei. Manatu nakai a koe to holo mitaki e tau tutuaga? [Fakaatā ma e tali.] Na haia he Tohi Tapu e tala mitaki ne foaki mai ki a tautolu e amaamanakiaga. Ha ē falu hūhū ne kua maeke he Tohi Tapu ke tali.” Age e porosua ke he tagata he kaina, ti uiina a ia ke fifili taha hūhū mai he kili i tua. Ti fakatātā e puhala fakaako he fakaaoga e paratafa fakamua he fakaakoaga ia. Taha puhala foki ke hūhū ke he tagata he kaina e hūhū fakalagalaga ne fakavē ke he fakaakoaga ne fifili e koe ti fakatātā e puhala ka lagomatai he porosua a ia ke kumi e tali he Tohi Tapu. Ka fai vitiō tatai ke he fakaakoaga ia he jw.org, falu tagata fakailoa ka tā ai he taute e fakataitaiaga ha laua.
3. Fakamaama e puhala ke taute e fakaakoaga he fakaaoga e porosua Tala Mitaki.
3 Puhala ke Takitaki Aki e Fakaako: (1) Totou e hūhū matatohi puni lahi kua fakanumera ke lagomatai e tagata he kaina ke hagaaki ke he matapatu manatu. (2) Totou e paratafa ka mui mai. (3) Totou e tau kupu tohi fakalilifa, ti talahau e tau hūhū fakailoilo ke lagomatai e tagata he kaina ke kitia e puhala ne tali he tau kupu tohi e hūhū kua fakanumera. (4) Ka fai paratafa foki i lalo he hūhū, fatiaki e tau lakaaga 2 mo e 3. Ka tatai e vitiō mo e hūhū ka e nakaila tā ai e koe ke he tagata he kaina, taute he taha mogo he fakatutalaaga. (5) Fakahiku aki, ole ke he tali he tagata he kaina ke he hūhū kua fakanumera ke mailoga kua maama e ia.
4. Ko e heigoa ka lagomatai a tautolu ke iloa e puhala ke fakaaoga e koloa aoga nei?
4 Fakamahani ke he koloa aoga nei. Fakaaoga ai ke he tau magaaho oti ne kua latatonu. Ato taute e tau fakaakoaga takitaha, manamanatu ke he tagata fakaako mo e puhala mitaki lahi ke fakamaama ki a ia, he fakaaoga e tau kupu tohi he fakaakoaga. (Fakatai 15:28; Gahua 17:2, 3) He moua e koe e puhala mo e iloaaga mitaki, to kitia mitaki e koe e porosua nei ko e koloa ne fiafia lahi a koe ke fakaaoga ke fakaako e tau tagata ke he kupu mooli!