Puhala ke Fakaaoga e Tala Mitaki Mai he Atua!
Porosua Foou ne Talaga ke Lagomatai a Tautolu ke Taute e Tau Liu Aahi Atu mo e Kamata e Tau Fakaako Tohi Tapu
1. Ko e heigoa e porosua foou ne moua mai he Fonoaga Faahimotu “Puipui Haau a Loto!” ne talaga ke lagomatai a tautolu ke taute e tau liu aahi atu mo e kamata e tau fakaako Tohi Tapu?
1 He Fonoaga Faahimotu “Puipui Haau a Loto!” ne fiafia lahi a tautolu ke moua e porosua foou ke lagomatai a tautolu ke taute e tau liu aahi atu mo e kamata e tau fakaako Tohi Tapu. Ko e Tala Mitaki Mai he Atua! ne hukui aki e porosua Manako kua teitei ni ke tatai, ka ko e tau fakaakoaga kua kūkū. Maeke ke lagomatai a tautolu ke fakaaoga e porosua ma e tau fakaako Tohi Tapu he gutuhala. Pete ni kua fakatutala e porosua Manako ke he tau mena kua lata e Kerisiano ke taute, ne liga uka he tau tagata fakaako foou ke talia, ko e porosua foou nei kua hagaaki ke he tala mitaki i loto he Tohi Tapu.—Gahua 15:35.
2. Ko e ha ne taute ai e porosua Tala Mitaki?
2 Ko e ha ne taute ai? Kua ole e tau matakainaga he lalolagi katoa ke moua taha tohi mukamuka ke futiaki e tau tagata ke he kupu mooli mo e takitaki atu a lautolu ke he tohi Fakaako he Tohi Tapu, ko e matapatu tohi ha tautolu ma e tau fakaako Tohi Tapu. Ko e tau tagata ne fakauaua ke he tohi kua fa makai ke fakaako e Tohi Tapu ka fakaaoga e porosua. Lafi foki, kua mukamuka e porosua ke fakaliliu ke he loga e tau vagahau.
3. Kehe fēfē e porosua nei mai he falu tohi fakaako?
3 Puhala ne Talaga Aki: Loga e tau tohi ha tautolu kua tohia ke maeke he tagata ke totou ti maama e kupu mooli, pete ni ka ai fai lagomatai. Kua kehe e tohi nei. Kua tohi ai mo takitakiaga ke lata mo e faiaoga ne takitaki e fakaakoaga Tohi Tapu. Ko e mena ia, ka foaki atu ai ke he taha tagata, kua mua e mitaki ka fakatutala ke he taha po ke ua e paratafa. Na kūkū e tau paratafa, ti maeke ke fakatutala he gutuhala he kaina po ke gahuaaga haana. Pete kua mitaki ke kamata aki e fakaakoaga 1, na maeke a tautolu ke kamata ni he ha fakaakoaga i loto he porosua.
4. Lagomatai fēfē he porosua a tautolu ke fakaako fakahako mai ni he Tohi Tapu?
4 Ke he loga he tau tohi ha tautolu, ko e tau tali ke he tau hūhū ne lolomi i ai kua maeke ke moua mai he tau paratafa. Ka ko e tohi nei, ko e laulahi he tau tali kua moua mai ni i loto he Tohi Tapu. Tokologa e tau tagata kua manako ke fakaako mai he Tohi Tapu ka e nakai mai he tau tohi ha tautolu. Ko e mena ia, kua teitei ni ke ai fai kupu tohi ne fatiaki i ai. Kua totou mai ni i loto he Tohi Tapu. To lagomatai he mena nei e tau tagata fakaako ke mailoga ko e tau mena kua fakaako a lautolu ki ai kua mai ni he Atua.—Isaia 54:13.
5. Ko e ha kua aoga ai ke he faiaoga ke mautauteute mitaki ke lata mo e tau magaaho fakaako takitaha?
5 Nakai fakamaama he porosua e tau kupu tohi oti. Ko e ha? Kua talaga ke fakamafana e tagata fakaako ke hūhū e tau hūhū mo e fakaatā e faiaoga ke fakagahuahua e lotomatala haana. Ko e mena ia, kua aoga lahi ke mautauteute pauaki ke lata mo e tau magaaho fakaako takitaha. Ka e mailoga: Ua tutala tumau. Na fiafia a tautolu ke fakamaama e tau kupu Tohi. Ka e mua atu e mitaki he gahua ha tautolu ka uiina e tagata fakaako ke fakamaama e manatu haana hagaao ke he kakano he kupu tohi. Ka fakaaoga fakailoilo e tau hūhū, to maeke ia tautolu ke lagomatai a ia ke maama e kakano he tau kupu tohi takitaha.—Gahua 17:2.
6. Fakaaoga fēfē e tautolu e porosua (a) ka fakauaua e tau tagata hagaao ke he Atua mo e Tohi Tapu? (e) ka ō he taha fale ke he taha fale? (i) ka fakaaoga fakahako ke kamata e fakaako Tohi Tapu? (o) ka taute e tau liu aahi atu?
6 Ke tuga e tau tohi ke lata mo e tau fakaakoaga, kua maeke e porosua nei ke foaki he ha magaaho, pete ni kua ha ha i ai e tohi foaki he mahina. To tokologa ka fiafia ke fakaaoga fakahako ai ke kamata aki e tau fakaakoaga he gutuhala. Lafi ki ai, tuga ni ne talahau he fonoaga faahimotu, ka fakaaoga ke he tau liu aahi atu ki a lautolu ne fiafia “kua maeke ke taute mooli e liu aahi atu mo gahua fiafia!”—Kikite e tau puha he lau 7-9.
7. Liga takitaki fēfē e koe e fakaako Tohi Tapu ka fakaaoga e porosua?
7 Puhala ke Takitaki Aki e Fakaako: Liga kamata e tautolu e fakatutalaaga ka totou e hūhū matatohi puni lahi ne fai numera. Ka mole ia, totou e paratafa mo e (tau) kupu tohi ne fakalilifa. Talahau e tau hūhū fakailoilo ke lagomatai e tagata he kaina ke maama e kakano he kupu tohi. Fakamua to hiki atu foki ke he taha vala, hūhū ke he tagata he kaina ke tali e hūhū ne matatohi puni lahi, ke iloa mooli kua maama e ia. Ma e tau aahi atu fakamua, liga mitaki ke fakatutala ke he taha ni e hūhū ne matatohi puni lahi. Ka fai magaaho, liga maeke ia tautolu ke fakaloaloa atu e fakatutalaaga ke fakaoti e fakaakoaga katoa.
8. Puhala fe ka hafagi aki e tautolu e tau kupu tohi, mo e ko e ha?
8 Ko e tau kupu tohi ne mui mai he kupu ne tohi “totou” kua hagaao fakatonu ke tali e hūhū ne matatohi puni lahi. Ka hafagi e kupu tohi, kalo mai he pehē, “Ne tohi he aposetolo ko Paulo” po ke, “Mailoga e tau mena ne talahau tuai e Ieremia.” Neke manatu e tagata he kaina kua totou na tautolu he tau kupu ni he tau tagata. Ka e mitaki ka pehē, “Pehē mai e Kupu he Atua” po ke, “Mailoga la e mena ne talahau tuai he Tohi Tapu.”
9. Lata kia ke totou e tau kupu tohi oti ne tūtū ai, he magaaho he fakaakoaga?
9 Lata kia ke totou oti e tau kupu tohi ne tutū ai po ke tau kupu ni ne tu ai “totou”? To uta ni ke he tuaga. Nakai fai kupu tohi ne tu ai ke fakakite noa ni e tuaga he manatu mai i loto he Tohi Tapu. Kua igatia e kupu tohi mo e fai vala tala kua aoga ke fakatutala ki ai. Ka e he falu tuaga, ka tote e magaaho he tagata fakaako, tote e fiafia, po ke fakakaupa haana totou, liga mailoga e tautolu kua lata ni ke kitekite ke he tau kupu tohi “totou.”
10. Ko e mogo fe kua maeke ia tautolu ke hiki e fakaako ke he tohi Fakaako he Tohi Tapu?
10 Magaaho Fe ka Hiki ke he Tohi Fakaako he Tohi Tapu: Ka lagaloga e fakatutala ti mailoga kua mau e fakaholoaga mitaki, maeke mogoia ia tautolu ke hiki ke he tohi Fakaako he Tohi Tapu po ke matutaki ni mo e porosua Tala Mitaki ato oti ai. Maeke he tau tagata fakailoa ke fakaaoga e fifiliaga ha lautolu ke mailoga e magaaho kua lata ke hiki. Ka hiki e tautolu ke he tohi Fakaako he Tohi Tapu, kua lata kia ke kamata mai he kamataaga? Nakai fai matafakatufono ke he mena nei. Na kehekehe e tau tagata takitaha. Pete ia, ko e laulahi he tau tagata fakaako to aoga mai ka liu taute fakamatafeiga e tau vala tala ia i loto he tohi Fakaako he Tohi Tapu.
11. Ko e ha kua lata ia tautolu ke fakaaoga fakamitaki e porosua foou nei?
11 He lalolagi ne hogeia e tau tala mitaki, kua moua e tautolu e lilifu lahi mahaki ke fakailoa e tala kua mua atu e mitaki—to pule e Kautu he Atua mo e to nakai leva ti tamai ai e lalolagi foou ka nofo ai e tututonu! (Mata. 24:14; 2 Pete. 3:13) Kua mauokafua a tautolu ko e tokologa ka logona mo e talia ai e tau kupu omoomoi nei: “Kua fulufuluola lahi ni ki luga he tau mouga e tau hui hana kua talahau mai e tala mitaki, ko ia kua ogo mai e monuina, kua talahau mai e tala mitaki; kua fakailoa mai e fakamouiaga; kua pehe mai kia Siona, Kua pule hau a Atua.” (Isaia 52:7) Kia fakaaoga e tautolu e porosua foou nei ke ta atu e tala mitaki mai he Atua ki a lautolu kua fia inu he fonua ha tautolu!
[Puha he lau 7]
Ka Fakauaua e Tau Tagata ke he Atua mo e Tohi Tapu:
● He falu matakavi, kua mailoga he tau tagata fakailoa ko e tau kupu “Atua” mo e “Tohi Tapu” ko e tau kupu kua taofi aki e fakatutalaaga. Ka pihia he feleveia fakamua, liga mitaki ke tutala ke he tau matakupu ne manamanatu e tau tagata he matakavi ki ai, tuga e lata ke mitaki e fakatufono, moua mai i fe e tau lagomatai aoga ma e tau magafaoa, mo e tau mena ke lata mo e anoiha. Liga mitaki mogoia ke fakakite e porosua Tala Mitaki ka mole e lagaloga e fakatutalaaga, ko e iloa fēfē e tautolu na fai Atua mo e kakano ne mauokafua ai ke he Tohi Tapu.
[Puha he lau 8]
Ka Ō he Taha Fale ke he Taha Fale:
● “Ko e aahi mai au ke fakakite atu ki a koe e mukamuka ke iloa e finagalo he Atua ma e vahā anoiha he tagata. Kua manamanatu nakai a koe to maeke nakai he Atua ke fakatotoka e mamahi ha tautolu? [Fakaatā ma e tali.] Fakakite mai he porosua nei e tokaaga i loto he Tohi Tapu kua maeke ia koe ke moua e tali ke he hūhū ia. [Age ki a ia e porosua, ti totou e paratafa fakamua he fakaakoaga 1, mo e totou foki a Ieremia 29:11.] Mai he mena nei, kua fai kakano mitaki nakai ki a koe he manako e Atua ki a tautolu ke mitaki e vahā anoiha? [Fakaatā ma e tali.] Ka manako a koe, ti toka e lagaki ē ma haau. Ka liu a taua ke feleveia, maeke ke fakatutala ke he paratafa ua ke iloa e tali he Tohi Tapu ke he hūhū nei, ‘Puhala fe ka fakatotoka he Atua e tau tagata mai he matematekelea?’” Ka fai magaaho e tagata he kaina he mogo ne fina atu fakamua ai, liga maeke a koe ke totou mo e fakatutala ke he paratafa ke uaaki ti totou tolu e kupu Tohi Tapu i ai. Fakatoka ke liu atu ke fakatutala ke he hūhū ke uaaki he fakaakoaga ia.
● “Tokologa e tagata ne manako ke liogi, mua atu ka fai lekua a lautolu. Liogi nakai a koe he falu magaaho? [Fakaatā ma e tali.] Manatu nakai a koe na fanogonogo e Atua ke he tau liogi oti, po ke liga fai liogi ne nakai fakafiafia a ia? [Fakaatā ma e tali.] Ha ha ai mo au e porosua kua fakakite e puhala ke kumi aki e tali mai he Tohi Tapu ke he tau hūhū ia. [Age e porosua ki a ia, ti fakatutala tokoua e paratafa fakamua he fakaakoaga 12 mo e tau kupu tohi “totou.”] Nakai kia ko e mena ofoofogia a ia ha kua manako e Atua ke fanogonogo mai ki a tautolu? Ka e ke aoga katoatoa mai he liogi, kua lata ia tautolu ke iloa mitaki e Atua. [Fuluhi ke he fakaakoaga 2 ti fakakite age e tau vala mataulu.] Ka manako a koe, maeke au ke toka e porosua nei ma haau, ti ke he taha magaaho, to maeke mogoia ke totou e tau tali he Tohi Tapu ke he tau hūhū fulufuluola nei.”
● “Kua hoko mai au ha kua tupetupe e tau tagata, ko e gutu atu ki fe e lalolagi nei. Manatu nakai a koe to holo mitaki e tau tutuaga? [Fakaatā ma e tali.] Tokologa e tagata ne ofo ke iloa na haia he Tohi Tapu e tala mitaki ne foaki mai ki a tautolu e amaamanakiaga. Ha ē falu hūhū ne kua maeke he Tohi Tapu ke tali.” Age e porosua ti uiina a ia ke fifili taha hūhū mai he kili i tua ne fiafia lahi a ia ki ai. Ti veveu mogoia ke he fakaakoaga, mo e fakatātā e puhala fakaako. Taute e tau fakatokaaga ke liu atu mo e fakatutala ke he taha hūhū foki he fakaakoaga ia.
[Puha he lau 9]
Fakatai e Puhala Ole Fakahako:
● “Kua hoko mai au ke fakailoa atu ki a koe hagaao ke he fakatokaaga foou ke fakaako Tohi Tapu. Ha ha he porosua nei 15 e fakaakoaga ke fakakite aki e tokaaga he tau tali i loto he Tohi Tapu hagaao ke he tau hūhū aoga. [Fakakite age ki a ia e kili i mua mo tua.] Kua lali nakai a koe ke maama e Tohi Tapu? [Fakaatā ma e tali.] To fakakite atu e au e mukamuka he tau fakaakoaga. [Fakatutala ke he paratafa fakamua he hūhū 3 he fakaakoaga 3, ti totou e Fakakiteaga 21:4, 5. Ka hagahaga mitaki, fakatutala ke he paratafa ne mui mai mo e tau kupu tohi ke “totou.”] Ka manako a koe, maeke ia au ke toka e porosua nei mo koe. Fakamafana a mautolu ke lagataha e lali haau ke fakaako e Tohi Tapu. Ka fiafia a koe ki ai, ti matutaki atu. He taha magaaho foki to onoono ke he fakaakoaga fakamua. Mailoga na taha ne lau.”
[Puha he lau 9]
Fakakite Age ka Liu Aahi Atu:
● Ka liu aahi atu ke he tagata ne fiafia he mogo fakamua, liga pehē a tautolu: “Ko e mitaki ha ia ke liu feleveia mo koe. Kua tamai e au e porosua nei ne foaki mai e tali he Tohi Tapu ke he loga e tau hūhū. [Age e porosua ki a ia, ti uiina a ia ke onoono ke he kili i tua.] Ha e fe e vala tala kua fiafia lahi a koe ki ai? [Fakaatā ma e tali. Ti fuluhi ke he fakaakoaga ne fifili e ia.] To fakakite atu e au e puhala ne maeke ke fakaaoga e porosua nei ke moua e tali mai he Tohi Tapu.” Fakatātā e fakaako he fakatutala ke he taha po ke ua e paratafa mo e tau kupu tohi “totou.” Kua kamata tuai e koe e fakaako Tohi Tapu! Toka e porosua mo e tagata he kaina, ti taute e tau fakatokaaga ke liu atu. Ka oti e fakaakoaga, maeke ia koe ke fakatutala ke he taha fakaakoaga foki ne fifili he tagata he kaina po ke kamata mai he kamataaga he porosua.