Tau Porosua ke Foaki ia Novema
1. Ko e heigoa ka foaki e tautolu ia Novema?
1 He kitia e tautolu e fakamooliaga he perofetaaga he Tohi Tapu, kua fiafia a tautolu ke he amaamanaki ha tautolu ke he Kautu, ti omoomoi a tautolu ke talatala atu ke he tau tagata ka fanogonogo. (Luka 6:45; Roma 12:12) Ko e tau porosua ha tautolu ka fakatātā he gahua he fonua ia Novema e taha puhala ka fakakite e tautolu e amaamanaki ha tautolu he Kautu ke he falu tuga ne poaki e Iesu.—Mata. 24:14.
2. Ko e heigoa e paleko fakatagata ha tautolu hagaao ke he tau porosua?
2 Ha kua loga e porosua lanu kehekehe mo e tau vala tala ke fifili mai ai, ha e fe e tau porosua ka mitaki lahi mahaki ke felauaki mo e tau manako ha lautolu he fonua ha tautolu mo e fakalagā e fiafia ha lautolu? Ke fakaaoga fakalahi e tau porosua, kua latatonu ia tautolu ke iloa e tau tala i loto. Ko e kitekite fakakū ki ai mogonei ka lagomatai a tautolu ke he mena nai.
3-6. Maeke fēfē ia tautolu ke foaki e (a) porosua “Kitiala!”? (e) porosua Mataala!? (i) porosua Manako?
3 “Kitiala! Kua Fakafou Tuai e Au e Tau Mena Oti”: Kua fakatino he porosua nei e parataiso mo e atihake e loto fakaaue ke he Tohi Tapu mo e ha tautolu a Tufuga. He mole e fakatutala ke he kakano ne fakaatā he Atua e mahani kelea, kua hagaaki ai ke he tolu e fakaakoaga uho lahi he Tohi Tapu: ko e lukutoto, ko e liu tu mai, mo e ko e Kautu. Ha ha he porosua nai foki e tau hūhū i lalo he tau lau tohi, ne kua mukamuka lahi ai ma tautolu ke taute e fakaako Tohi Tapu he fakaaoga ai.
4 Kia Mataala! Maeke a koe ke pehē: “Tokologa e tau tagata ne tupetupe hagaao ke he tau lekua hagahaga kelea mo e tau mena tutupu matakutakuina ne tupu lahi mogonei. [Talahau e fakataiaga ke he mena tupu he matakavi.] Iloa nakai e koe ko e tau mena pihia ko e vala he tau fakamailoga he lalolagi katoa kua fakakite e fakatufono he Atua kua tata mai ke pule ke he tau mena he lalolagi? [Fakaatā ma e tali. Ti totou e kupu tohi kua latatonu, tuga e Mataio 24:3, 7, 8; Luka 21:7, 10, 11; po ke 2 Timoteo 3:1-5.] Kua fakatutala e porosua nai ke he kakano kua mafiti pauaki ke mataala ke he aoga lahi he tau mena tutupu mogonei.”
5 Taha puhala foki: “Tokologa he vahā nei kua tupetupe ha ko e tau mena tutupu matakutakuina po ke matematekelea lahi fakatagata. Falu ne manamanatu ke he kakano ne nakai fakalava mai e Atua ke taofi e tau mena ia. Fakamafana mai he Tohi Tapu to nakai leva ti fakatotoka he Atua e matematekelea he tagata. [Totou Fakakiteaga 14:6, 7.] Mailoga e kakano he fakafiliaga he Atua ma e tau tagata. [Totou 2 Peteru 3:10, 13.] Kua foaki he porosua nai e vala tala ke he matakupu aoga nai.”
6 Ko e Heigoa e Manako he Atua ma Tautolu? Maeke ke fakaaoga foki e manatu nā: “Ko e manako kia he Atua ma tautolu ke momoui he takatakai he tau mena kelea tuga kua fehagai mo tautolu he vahā nei, he manatu e koe? [Fakaatā ma e tali. Ti totou Mataio 6:10.] Kua manamanatu nakai a koe, ko e heigoa mooli e Kautu he Atua?” Veveu ke he Fakaakoaga 6, ti totou e tau hūhū i loto he kamataaga he fakaakoaga. Kamata e fakatutalaaga he fakaakoaga, po ke fakatoka ke taute he liu aahi atu. Kia fakalataha katoatoa a tautolu oti he foaki e tau porosua ia Novema!