Veveheaga 1

Maeke ia Koe ke Moua e Fiafia a Anoiha!

1, 2. Ko e heigoa ne manako e Tufuga hau ke moua e koe?

KUA peka fakamafana mai e taha ne ofania e koe. Kua kata fiafia he magaaho ne kai fakalataha mo e tau kapitiga fakahele. Kua fiafia he kitekite e fanau hau ne fefeua mo e kalaga fiafia. Ko e tau magaaho fiafia lahi e tau magaaho nei. Ka e ma e falu, tuga kua fai lekua tumau e tau momoui. Kaeke kua pihia e moui hau, kia fakamalolo.

² Ko e finagalo he Atua ki a koe ke olioli tukulagi i lalo he tau tutuaga kua mahomo atu e mitaki he tau takaiaga homo ue atu. Nakai ko e miti noa a nei, ha kua foaki fakatonu mai he Atua ki a koe e kei ke he fiafia pihia a anoiha. Ko e kei ia ko e iloilo.

3. Ko e iloilo fe e kei ke he fiafia lahi, mo e iloa moli he ha e tautolu to foaki he Atua e iloilo ia?

³ Ko e tutala a tautolu hagaao ke he faga iloilo pauaki ne kua mua ue atu ke he pulotu he tagata. Ko e mena ia ko e “iloilo ke he Atua.” (Tau Fakatai 2:5) Teitei ke 2,000 e tau tau ne mole, ne pehe e tagata tohia Tohi Tapu: “Ha kua takitaha e fale mo e tufugatia ai e taha, ka ko ia ne tufugatia ai e tau mena oti kana, ko e Atua haia.” (Heperu 3:4) Manamanatu la ke he iloilo ne moua he Taute he tau mena oti! Tala mai he Tohi Tapu kua totou mo e fakahigoa he Atua e tau fetu oti. Ko e manatu ofoofogia ha ia, ha kua ha ha he ha tautolu ni a fakatokaaga fetu e tau teau e tau piliona he tau fetu, mo e talahau he tau tagata kitekite pulagi kua hagahaga ke he teau piliona foki e falu a fakatokaaga fetu! (Salamo 147:4) Kua iloa foki he Atua e tau mena oti hagaao ki a tautolu, ti ko hai foki ka foaki mai e tau tali tonu ke he tau huhu ne mua atu e aoga ke he moui?​—Mataio 10:30.

4. Ko e ha kua lata ia tautolu ke amanaki to foaki mai he Atua e tau fakatonutonuaga ke takitaki aki a tautolu, mo e fakamakona he tohi fe e manako nei?

⁴ Kia manamanatu atu la ke he tau tagata tane tokoua ne lali ke taute e tau motoka ha laua. Ha kua ita, ti oti ai e gahua he taha tagata. Ko e taha, ne fakahako fakamitaki e lekua, fakamoui e motoka, mo e mamali he moui e enesini mo e holo mitaki. To nakai uka ia koe ke kitia ko e tagata fe ne fai tohi fakatonutonuaga mai he fale taute motoka. Ti nakai kia kakano mitaki to foaki mai he Atua e tau fakatonutonuaga ke takitaki aki a tautolu he moui? He iloa ai e koe, ko e mena tonu ia ni ne tala mai he Tohi Tapu​—ko e tohi fakatonutonu mo e takitakiaga mai he ha tautolu a Tufuga, kua talaga ke matutaki mai e iloilo ke he Atua.​—2 Timoteo 3:16.

5. Lahi fefe e uho he iloilo ne ha ha he Tohi Tapu?

⁵ Kaeke kua moli e talahauaga he Tohi Tapu, kia manamanatu la ke he tau mena uho he iloilo ne ha ha he tohi ia! He Tau Fakatai 2:​1-5, kua fakamakamaka mai ki a tautolu ke kumi e pulotu, ke kumi fakahokulo ki ai ke tuga e koloa uho galo​—nakai ke he kelekele he manamanatuaga he tagata, ka e ki loto he Kupu ni he Atua. Kaeke ke kumi a tautolu ki ai, to “moua ai e koe e iloilo ke he Atua.” Ha kua maama he Atua e tau kaupaaga mo e tau manako ha tautolu, ne foaki mai e ia e fakatonutonuaga ke lagomatai aki a tautolu ke moua e moui mafola mo e fiafia. (Salamo 103:14; Isaia 48:17) Ke lafi atu, kua foaki mai he iloilo ke he Atua e tala mitaki ne fiafia lahi.

MOUI TUKULAGI!

6. Ko e heigoa e fakamoliaga ne foaki e Iesu Keriso hagaao ke he iloilo ke he Atua?

⁶ Kua fakamaama fakamaaliali he tagata talahaua mitaki he fakamauaga tala tuai ko Iesu Keriso e vala nei he iloilo ke he Atua. Ne pehe a ia: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” (Ioane 17:3) Manamanatu​—ko e iloilo ka takitaki atu ke he moui tukulagi!

7. Ko e heigoa e fakamoliaga i ai kua nakai manako e Atua ki a tautolu ke mamate?

⁷ Aua vave ke tiaki e manatu ke he moui tukulagi ko e miti noa. Ka e lata, ke onoono atu ke he puhala ne talaga aki e tino he tagata. Kua talaga fakamitaki ai ke kamata, logona, hohogi, kitia, mo e logona hifo. Kua loga lahi e tau mena he lalolagi ne fakafiafia mai e tau logonaaga ha tautolu​—tau mena kai lolo, lologo mitaki he tau manulele, tau manogi he tau fiti, matatepu fulufuluola, tau hoa fiafia lahi! Mo e ha tautolu a uho ulu ofoofogia kua mua atu ke he komopiuta mahaki, ha kua taute a tautolu ke loto fakaaue mo e olioli ke he tau mena oti ia. Manatu nakai a koe ko e manako ha tautolu a Tufuga ke mamate a tautolu mo e fakagalo e tau mena nei? Nakai kia ko e kakano mitaki ke fakahiku ko e manako a ia ke nonofo fiafia a tautolu mo e ke olioli e moui tukulagi? Moli, haia e kakano he iloilo ke he Atua ma hau.

MOUI HE PARATAISO

8. Ko e heigoa ne talahau he Tohi Tapu hagaao ke he vaha anoiha he tau tagata?

⁸ Ko e mena ne talahau he Tohi Tapu hagaao ki a anoiha he lalolagi mo e tau tagata, ka liga fakakatoatoa mai he taha ni e kupu​—Parataiso! Ne vagahau a Iesu Keriso hagaao ki ai he magaaho ne tala age a ia ke he tagata hane teitei mate: “To fakalataha a koe mo au i Parataiso.” (Luka 23:43, NW) Ko e tutala ke he Parataiso kua tuku moli ke he loto manamanatu he tagata ia e tuaga fiafia he ha tautolu a tau mamatua fakamua, ko Atamu mo Eva. He magaaho ne tufugatia he Atua a laua, kua mitaki katoatoa a laua mo e nonofo he katene tuga e kaina ne talaga mo e to akau he Tufuga. Kua lata tonu ai e higoa ko e kaina ko Etena, ko e kakano he higoa ko e fiafia.

9. Kua tuga e heigoa ke nonofo he Parataiso fakamua aki?

⁹ Kua fulufuluola ha e kaina ia! Ko e parataiso moli. He vahaloto he tau akau fulufuluola ko e tau akau fua lolo lahi. He kumikumi atu a Atamu mo Eva ke he ha laua a kaina, inu mai he tau vai tavana, mo e tau mai e tau fua he tau akau, kua nakai fai kakano a laua ke tupetupe po ke matakutaku. Kua nakai fakamatakutaku foki he tau manu huifa, ha kua age he Atua ke he tagata tane mo e hana hoana e pule fakaalofa ki luga ia lautolu oti. Ke lafi ki ai, kua ha ha he tau tagata tokoua ia e malolo tino mitaki lahi. Ka fakatumau ni a laua ke omaoma ke he Atua, ko e vaha fiafia mo e tukulagi a anoiha ne fakatalitali ma laua. Kua foaki age ki a laua e gahua mitaki lahi ke leveki e kaina Parataiso homo ue atu ha laua. Ke lafi ki ai kua foaki age he Atua ki a Atamu mo Eva e poakiaga ke “fakapuke foki e lalolagi, mo e kautu ki ai.” To fakalaulahi atu e laua mo e ha laua a fanau e katofia he Parataiso ato eke ha tautolu a palaneta katoa mo nofoaga fulufuluola mo e fiafia lahi.​—Kenese 1:28.

10. He magaaho ne vagahau a Iesu hagaao ke he Parataiso, ko e heigoa e hana kakano?

¹⁰ Ka e, he magaaho ne tutala a Iesu ke he Parataiso, kua nakai huhu a ia ke he tagata hane teitei mate ke manamanatu ke he vaha mamao kua mole. Nakai, kua vagahau a Iesu ke he vaha anoiha! Ne iloa e ia to eke e kaina lalolagi katoa ha tautolu mo Parataiso. Ti to fakamoli ai he Atua e finagalo hana he kamataaga ma e tau tagata mo e ha tautolu a lalolagi. (Isaia 55:​10, 11) E, to liuaki mai e Parataiso! Mo e to tuga ai e heigoa? Kia toka ke tali mai he Kupu he Atua, ko e Tohi Tapu.

MOUI I LOTO HE PARATAISO LIUAKI MAI

11. He Parataiso ka liuaki mai, ko e heigoa ka tupu ke he gagao, fuakau, mo e mate?

¹¹ Gagao, fuakau, mo e mate to nakai ha ha i ai. “Ti fakaala ai e tau mata he tau tagata mata pouli, to logona foki he tau teliga he tau tagata teliga tuli; To hopohopo ai e tagata kulikuli tuga ne aila, to kalaga fiafia foki e alelo he tagata kuhukuhu.” (Isaia 35:​5, 6) “To ha e Atua ni [mo e tau tagata], ko e ha lautolu a Atua haia. To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”​—Fakakiteaga 21:​3, 4.

12. Ko e ha kua iloa moli e tautolu to nakai fai holifono, mahani vale, mo e mahani kelea he Parataiso i anoiha?

¹² Holifono, mahani vale, mo e mahani kelea to galo tukulagi. “Ha ko e mena fakaotioti a lautolu kua mahani kelea . . . Toe tote, ti nakai ha i ai e tagata mahani kelea; . . . nakai ha i ai a ia. Ka ko e tau tagata mahani molu, to eke ma lautolu e motu.” (Salamo 37:​9-11) “Ka to vevehe kehe mai he motu a lautolu ne mahani kelea, to taaki ai foki a lautolu ne mahani fakavai.”​—Tau Fakatai 2:22.

13. To tamai fefe he Atua e mafola?

¹³ To ha ha e mafola ke he lalolagi katoa. “Kua fakahiku e ia [Atua] e tau ato hoko ke he fakatulakiaga he lalolagi; kua fafati e ia e kaufana, mo e tūtū e tao.” (Salamo 46:9) “Ko e hana a vaha ke tupuolamoui ai e tau tagata tututonu; to monuina lahi ai, ato nakai fai mahina.”​—Salamo 72:7.

14, 15. Ko e heigoa e talahauaga he Tohi Tapu hagaao ke he ta fale, gahua, mo e tau mena kai he Parataiso ne liuaki mai?

¹⁴ To nakai haofia e ta fale mo e gahua kua makona. “To ta fale e lautolu, mo e nonofo ai a lautolu . . . Nakai ta fale e lautolu ke nonofo ai e falu, ti nakai to uluvine e lautolu ke kai ai e falu; ha kua tuga ne tau aho he akau e tau aho he haku motu; to oti ai kia lautolu ne fifili e au e tau mena ne eke ai ke he tau lima ha lautolu. Nakai gahua teao a lautolu, to fanau e lautolu, ka e nakai tupu ai e fakaatukehe.”​—Isaia 65:21-23.

¹⁵ To ha ha i ai e loga he tau mena kai malolo tino. “To ha i ai e puke aloalolima he tau saito ke he motu, ki luga he fuga mouga.” (Salamo 72:16) “Kua fua mai he kelekele hana tau fua; ko e Atua, ko e ha mautolu a Atua kua fakamonuina mai e ia a mautolu.”​—Salamo 67:6.

16. To lahi he ha e fiafia he moui he Parataiso?

¹⁶ Ko e moui tukulagi he lalolagi parataiso to fiafia lahi. “To eke ni e motu ma e tau tagata tututonu, to nonofo muatua ai a lautolu.” (Salamo 37:29) “To fiafia ha ko lautolu e tutakale, mo e motu nakai fai vai; to olioli e motu taluē, mo e fiti mai tuga ne kaute.”​—Isaia 35:1.

ILOILO MO E HAU A VAHA ANOIHA

17.(a) Ko e heigoa hau ka taute ka futiaki he moui he Parataiso a koe? (e) Iloa fefe e tautolu to tamai he Atua e tau hikihikiaga lalahi ke he lalolagi?

¹⁷ Kaeke ke futiaki he moui he Parataiso a koe, kia nakai fakaata ha mena ke taofi a koe mai he moua e iloilo ke he Atua. Kua ofania e ia e tau tagata mo e to tamai e tau hikihikiaga ne kua lata ke taute e lalolagi mo parataiso. Ha kua, ka ha ha ia koe e malolo ke fakaoti e tau matematekelea mo e mahani nakai tonu ne ha ha he lalolagi, nakai kia to taute pihia e koe? Ti amanaki nakai a tautolu ke tote hifo e mena ka taute he Atua? Kua vagahau fakatonu e Tohi Tapu ke he tau kupu maaliali ke he magaaho ka uta kehe he Atua e fakatokaaga matematekelea nei mo e hukui aki e pule mitaki katoatoa mo e tututonu. (Tanielu 2:44) Ka e mua atu foki e tau mena ne fakakite mai he Tohi Tapu ke he tala hagaao ke he tau mena oti nei ki a tautolu. Kua fakakite mai ko e maeke fefe a tautolu ke hao ke he lalolagi fou ne mavehe he Atua.​—2 Peteru 3:13; 1 Ioane 2:17.

18. Ko e heigoa he iloilo ke he Atua ka maeke ke taute ma hau he mogonei?

¹⁸ Kua maeke foki he iloilo ke he Atua ke lagomatai a koe he magaaho tonu nei. Ko e tau huhu fakaatukehe lahi mo e hokulo atu he moui kua tali mai i loto he Tohi Tapu. Ko e talia e takitakiaga mai i ai ka lagomatai a koe ke ati hake e kapitiga mo e Atua. Ko e monuina mua ue atu ha a ia! Mo e to taute he mena nei a koe ke olioli e mafola ne maeke he Atua tokotaha maka ke foaki. (Roma 15:​13, 33) He kamata a koe ke uta e iloilo aoga lahi nei, kua kamata tuai a koe ke he tutuliaga mo e palepaleaga ne mua atu e aoga he moui hau. To nakai momoko a koe he moua e iloilo ke he Atua ne takitaki atu ke he moui tukulagi.

19. Ko e heigoa e huhu ka onoono atu a tautolu ki ai he veveheaga ka mui mai?

¹⁹ Kua onoono ai a tautolu ke he Tohi Tapu mo tohi ne ha ha i ai e iloilo ke he Atua. Ka e, iloa fefe e tautolu ko e tohi a ia, nakai ko e tohi he pulotu he tagata, ka e he taha mena mua ue atu? To onoono a tautolu ke he huhu nei he veveheaga ne mui mai.

KAMATAMATA E ILOILO HAU

Ko e maeke he ha e iloilo ke he Atua ke takitaki a koe ke he fiafia tukulagi?

To tuga e heigoa e moui he lalolagi Parataiso ka hau?

Ko e ha ka lagomatai ai a koe he fanogonogo ke he iloilo ke he Atua he mogonei?