Fakaakoaga 6
Ko e Heigoa e Kautu he Atua?
Toka i fe e Kautu he Atua? (1)
Ko hai hana a Patuiki? (2)
To pule fakalataha nakai e falu mo e Patuiki? Ka fai, toko fiha? (3)
Ko e heigoa kua fakakite ko e momoui a tautolu ke he tau aho fakamui? (4)
Ko e heigoa he Kautu he Atua ka taute ma e tau tagata he tau vaha i mua? (5-7)
1. Ke he magaaho ne nofo a ia he lalolagi, ne fakaako e Iesu hana a tau tutaki ke liogi ma e Kautu he Atua. Ko e kautu ko e fakatufono ne mataulu ia he patuiki. Ko e Kautu he Atua ko e fakatufono mahomo atu e kehe. Ne toka ia he lagi mo e to pule hifo ke he lalolagi nei. To fakatapu, po ke taute ai ke tapuina, e higoa he Atua. To taute ia e finagalo he Atua ke he lalolagi tuga ne eke ke he lagi.—Mataio 6:9, 10.
2. Ne mavehe tuai he Atua to eke a Iesu mo Patuiki he Hana Kautu. (Luka 1:30-33) Ke he magaaho ne moui a Iesu ke he lalolagi, ne fakamoli e ia to totonu, fakafili tonu, mo e Pule mitaki katoatoa a ia. Ke he magaaho ne liu hake a ia ke he lagi, ne nakai Patuiki fakaave a ia ke he Kautu he Atua. (Heperu 10:12, 13) Ke he 1914, ne foaki age e Iehova e pule ki a Iesu tuga ne mavehe e Ia ki a ia. Tali mai he magaaho ia, ne pule a Iesu i luga he lagi ko e Patuiki kotofa a Iehova.—Tanielu 7:13, 14.
3. Kua fita foki a Iehova he fifili e falu tagata tane mo e tau fifine fakamoli mai he lalolagi ke o atu ke he lagi. To pule fakalataha a lautolu mo Iesu ko e tau patuiki, ko e tau fakafili, mo e tau ekepoa ke he tau tagata. (Luka 22:28-30; Fakakiteaga 5:9, 10) Ne fakahigoa e Iesu a lautolu nei ka pule fakalataha mo ia he hana Kautu ko e “fuifui mamoe gahoa.” Ko e numela ha lautolu ko e 144,000.—Luka 12:32; Fakakiteaga 14:1-3.
4. Ko e magaaho ni ne Patuiki ai a Iesu, ne liti hifo e ia a Satani mo e hana a tau agelu kelea mai he lagi mo e ke he matakavi he lalolagi nei. Ko e mena haia kua tolomaki ki mua e kelea he tau mena he lalolagi nei tali mai he 1914. (Fakakiteaga 12:9, 12) Tau felakutaki, tau hoge, tau tatalu, tupu ki mua e matahavala—ko e tau mena oti nei ko e taha maga he “fakamailoga” ke fakakite aki e pule ha Iesu mo e ko e fakatokaaga nei kua hoko ke he hana a tau aho fakamui.—Mataio 24:3, 7, 8, 12; Luka 21:10, 11; 2 Timoteo 3:1-5.
5. To hoko mai mafiti e fakafiliaga ha Iesu ke he tau tagata, he vehe ai a lautolu tuga e leveki mamoe ka vehe e tau mamoe mai he tau koti. Ko e “tau mamoe” a lautolu ne fakamoli a lautolu ko e hana a tau tagata i lalo hifo he hana pule. To moua e lautolu e moui tukulagi ke he lalolagi. Ko e “tau koti” a lautolu ka tiaki e Kautu he Atua. (Mataio 25:31-34, 46) Ke he tau vaha i mua ne tata mai, to fakaotioti e Iesu a lautolu oti ne tuga e tau koti. (2 Tesalonia 1:6-9) Ka manako a koe ke eke mo taha he “tau mamoe” ha Iesu, kua lata ia koe ke fanogonogo ke he fekau he Kautu mo e fakagahuahua e tau mena hau ne fakaako.—Mataio 24:14.
6. Kua fakakatofia e lalolagi he vaha nei ke he loga e tau motu. Igatia mo e hana ni a fakatufono. Mahani e tau motu nei ke felatauaki. Ka to hukui he Kautu he Atua e tau fakatufono oti he tau tagata. To pule ni a ia tokotaha ke he lalolagi. (Tanielu 2:44) To nakai ha ha i ai ha felakutaki, matahavala, mo e favale. To nonofo fakalataha e tau tagata oti ke he mafola mo e maopoopo.—Mika 4:3, 4.
7. Ke he Afe Tau ha Iesu ka Pule ai, ko e tau tagata fakamoli to mitaki katoatoa, mo e eke ai e lalolagi oti mo parataiso. Ke he fakahikuaga he afe tau, to fakakatoatoa e Iesu e tau mena oti ne ole he Atua ke taute e ia. To liuaki age e ia e Kautu ke he hana Matua. (1 Korinito 15:24) Ko e ha ne nakai talahau ai ke he hau a tau kapitiga mo e tau fakahelehele e tau mena ka taute he Kautu he Atua?
[Fakatino he lau 13]
I lalo hifo he pule ha Iesu, to nakai liu ke fevihiatiaaki po ke fakamailoga tagata