Fakaakoaga 8
Moui Magafaoa ne Fiafia e Atua ki Ai
Ko e heigoa e tuaga he tane i loto he magafaoa? (1)
Kua lata he tane ke taute fefe hana hoana? (2)
Ko e heigoa e tau matagahua he matua tane? (3)
Ko e heigoa e tuaga he hoana i loto he magafaoa? (4)
Ko e heigoa e manako he Atua ma e tau matua mo e tau fanau? (5)
Ko e heigoa e talahauaga he Tohi Tapu ke he tau mavehevehe mo e tiaki hoana mo e tane? (6, 7)
1. Pehe e Tohi Tapu ko e tane ko e ulu he hana magafaoa. (1 Korinito 11:3) Kua lata e tane ke taha ni e hoana. Kua lata ia laua ke taute e fakamauaga ke lata mo e fakatufono.—1 Timoteo 3:2; Tito 3:1.
2. Ko e tane kua lata ke fakaalofa ke he hana hoana tuga ni he fakaalofa a ia ki a ia ni. Kua lata ia ia ke taute e hoana tuga he taute e Iesu ke he hana tau tutaki. (Efeso 5:25, 28, 29) Kua nakai lata a ia ke keli hana hoana po ke taute fakakelea a ia ke he ha puhala. Ka kua lata ia ia ke fakakite e lilifu mo e fakalilifu ke he hana hoana.—Kolose 3:19; 1 Peteru 3:7.
3. Kua lata e matua tane ke gahua fakalahi ke leveki aki hana a magafaoa. Kua lata ia ia ke moua mai e tau kai, tau mena tui, mo e fale ma e hana hoana mo e fanau. Kua lata foki he matua tane ke leveki fakaagaga hana magafaoa. (1 Timoteo 5:8) Ko ia e takitaki ke lagomatai hana magafaoa ke fakaako ke he Atua mo e Hana tau finagalo.—Teutaronome 6:4-9; Efeso 6:4.
4. Ko e hoana kua lata ko e lagomatai mitaki ma e hana tane. (Kenese 2:18) Kua lata ia ia ke lagomatai hana tane ke fakaako mo e fakamahani ha laua fanau. (Tau Fakatai 1:8) Manako a Iehova ke he hoana ke leveki mo e fakaalofa hana magafaoa. (Tau Fakatai 31:10, 15, 26, 27; Tito 2:4, 5) Kua lata ia ia ke hokulo e fakalilifu ma e hana tane.—Efeso 5:22, 23, 33.
5. Manako e Atua ke omaoma e tau fanau ke he ha lautolu a tau matua. (Efeso 6:1-3) Amaamanaki a ia ke he tau matua ke fakaako mo e fakatonu ha lautolu a tau fanau. Kua lata he tau matua ke fai magaaho mo e ha lautolu a tau fanau mo e kumikumi ke he Tohi Tapu mo lautolu, leveki e ha lautolu a tau manako fakaagaga mo e logonaaga he tau loto. (Teutaronome 11:18, 19; Tau Fakatai 22:6, 15) Kua nakai lata he tau matua ke akonaki fakakelea po ke vale ke he ha lautolu a tau fanau.—Kolose 3:21.
6. Kaeke ke ha ha he tau hoa he fakamauaga e tau mena vihi ti uka ke nonofo tokoua mo e mafola, kua lata ia laua ke fakagahua e tau fakatonutonuaga he Tohi Tapu. Ne fakamalolo mai he Tohi Tapu a tautolu ke fakakite e fakaalofa mo e ke fakamagalo atu. (Kolose 3:12-14) Ne nakai fakamalolo he Kupu he Atua e tau mavehevehe ko e puhala ke taute aki e tau mena vihi ikiiki. Ka e fifili he hoana ke toka hana tane kaeke (1) ulu uka ke talia ke leveki hana magafaoa, (2) mahani vale ti hagahaga kelea e malolo tino mo e hana moui, po ke (3) hana totoko lahi ke nakai maeke a ia ke tapuaki ki a Iehova.—1 Korinito 7:12, 13.
7. Kua lata he tau hoa he fakamauaga ke fefakamoliaki. Ko e faivao ko e hala ke he Atua mo e ke he hana hoa. (Heperu 13:4) Ko e fakafetuiaga fakatane mo e fifine mo e tagata kehe i fafo he fakamauaga ko e tuaga faka-Tohiaga Tapu ni a ia hokoia ne fakaata e tiaki hoana mo e tane mo e maeke ke liu mau foki. (Mataio 19:6-9; Roma 7:2, 3) Vihiatia e Iehova ka tiaki hoana mo e tane e tau tagata ka e nakai fai fakaveaga mai he Tohi Tapu ti mau mo e taha.—Malaki 2:14-16.
[Tau Fakatino he lau 16, 17]
Amaamanaki e Atua ke fakaako he tau matua ha lautolu a tau fanau mo e fakatonu foki a lautolu
[Fakatino he lau 17]
Ko e matua tane loto fakaalofa ka leveki hana magafaoa ke he tau mena he tino mo e fakaagaga