Fakaakoaga 5
Ko e Heigoa e Finagalo he Atua ma e Lalolagi?
Ko e ha ne tufugatia e Iehova e lalolagi? (1, 2)
Ko e ha e lalolagi ne nakai ko e parataiso he magaaho nei? (3)
Ko e heigoa ka hoko ke he tau tagata kelea? (4)
Ke he vaha i mua, ko e heigoa ka taute e Iesu ma lautolu ne gagao? lautolu ne momotua? mo lautolu ne mamate? (5, 6)
Ke moua auloa e tau monuina he tau vaha i mua, ko e heigoa hau kua lata ke taute? (7)
1. Ne tufugatia e Iehova e lalolagi nei ke maeke he tau tagata ke fiafia e moui tukulagi i ai. Ne manako a ia ke nonofo mau e tau tagata tututonu mo e fiafia ke he lalolagi. (Salamo 115:16; Isaia 45:18) To nakai fakaotioti e lalolagi; to tumau tukulagi ai.—Salamo 104:5; Fakamatalaaga 1:4.
2. Ato taute he Atua e tagata, ne fifili e Ia e taha vala tote mai he lalolagi mo e taute ai ke he parataiso fulufuluola. Ne fakahigoa e ia ko e katene i Etena. Ko e mena hanei ne tuku ai e ia e tane mo e fifine fakamua, ko Atamu mo Eva. Ko e finagalo he Atua ma laua ke fanafanau mo e fakapuke e lalolagi katoa. To taute fakahaga ai e lautolu e lalolagi katoa ke eke mo parataiso.—Kenese 1:28; 2:8, 15.
3. Ne hala a Atamu mo Eva he moumou pauaki e fakatufono he Atua. Ti ko e mena haia ne tuku e Iehova a laua i tua he katene ko Etena. Ne fakagalo ai e parataiso. (Kenese 3:1-6, 23) Ka e nakai nimo ia Iehova e hana a finagalo ma e lalolagi nei. Ne mavehe e ia to eke ia mo parataiso ko e mena ka nonofo tukulagi ai e tau tagata. To taute fefe e ia e mena nei?—Salamo 37:29.
4. Ato eke e lalolagi nei mo parataiso, kua lata ke utakehe e tau tagata kelea. (Salamo 37:38) To fakahoko e mena nei i Amaketo, ko e tau he Atua ke fakaoti aki e mahani kelea. Ka mole ia, to lili a Satani ke he 1,000 he tau tau. Ko e kakano he mena nei to nakai toe ha tagata kelea ke takiva e lalolagi. Ko e tau tagata ni he Atua ka hao mai.—Fakakiteaga 16:14, 16; 20:1-3.
5. To pule ai mogoia a Iesu Keriso ko e Patuiki ke he lalolagi nei ke he 1,000 he tau tau. (Fakakiteaga 20:6) To utakehe fakatekiteki e ia e hala mai he tau loto mo e tau tino ha tautolu. To eke a tautolu mo tau tagata mitaki katoatoa tuga ni a Atamu mo Eva ato hala a laua. To nakai fai gagao, fuakau, mo e mate. To fakamaulu e tau tagata gagao, mo e to fuata a lautolu ne fuakau.—Iopu 33:25; Isaia 33:24; Fakakiteaga 21:3, 4.
6. Ke he taha e Afe Tau he Pule a Iesu, ko e tau tagata fakamoli ka gahua ke he lalolagi ke eke ia mo parataiso. (Luka 23:43) Ko e taha mena foki, to miliona a lautolu ne mamate ka fakaliliu tutu mai ke momoui ke he lalolagi. (Gahua 24:15) Ka taute e lautolu e manako he Atua, to tumau ke momoui tukulagi a lautolu ke he lalolagi. Ka nakai, to fakaotioti tukulagi a lautolu.—Ioane 5:28, 29; Fakakiteaga 20:11-15.
7. To kautu e finagalo fakamua he Atua ma e lalolagi. Manako nakai a koe ke moua auloa e tau monuina nei he tau vaha i mua? Kaeke ke manako, kua lata ia koe ke fakaako tumau ki a Iehova mo e omaoma ke he hana a tau manako. Ko e fakalataha ke he tau feleveiaaga ke he Fale he Kautu he Tau Fakamoli a Iehova he matakavi hau ka lagomatai a koe ke taute pihia.—Isaia 11:9; Heperu 10:24, 25.
[Fakatino he lau 10]
Kua galo e Parataiso
[Tau Fakatino he lau 11]
Ka mole atu a Amaketo, to eke ai e lalolagi mo parataiso