Fakalaulahi Atu e Uiina ki a Lautolu kua Fia Inu
1 He talahau tuai he perofeta ko Amosa, kua matematekelea e magafaoa he vaha nei he “nakai ko e fia inu ke he magavai, ka ko e hoge ke he tau kupu a Iehova ke fanogonogo ki ai.” (Amosa 8:11) Kehe ai ke he tuaga fia inu fakaagaga nei, ko e tau foakiaga he Atua ke fakamalolo aki e tau tagata omaoma mai he hala mo e mate kua fakakite he veveheaga fakahiku ia Fakakiteaga ko e “vailele tavana ko e vai he moui.” Ha ha ia tautolu e kotofaaga he foaki age ke he tau tagata oti ne fia inu ma e tututonu e uiina ke ‘uta noa e vai he moui.’ (Fakakite. 22:1, 17) Taute fefe e tautolu e mena nei ia Fepuari? He foaki ki a lautolu kua manako moli e tohi Ko e Kupu Mooli ke Takitaki Atu ai ke he Moui Tukulagi. Liga kua manako a koe ke fakaaoga e tau fakataitaiaga nei:
2 Ha kua fou e manatu ke moui tukulagi he lalolagi ke he tau tagata tokologa, liga to moua he fakataitaiaga nei e fiafia ha lautolu:
◼ “Huhu e mautolu e huhu ke he tau tuuta kaina. Ka uiina a koe ke moui tukulagi he lalolagi tuga anei, to talia nakai e koe e uiina? [Fakakite e fakatino he lau 4 he tohi Kupu Mooli. Fakaata ma e tali.] Kua maeke he mena nei ke eke mo fiafia moli he moui hau. Ka ko e heigoa kua manatu e koe ke taute e koe ke eke moli ma hau? [Fakaata ma e tali.] Mailoga la e gahua kua lata hagaao ki a Ioane 17:3. [Totou.] Kua lagomatai he tohi nei e tokologa ke moua e iloilo pauaki nei. Manako nakai a koe ma e lagaki ni hau ke totou? [Fakaata ma e tali.] Ka liu mai au, to fakatutala a taua ko e ha kua mitaki ai ke talitonu to moua e tautolu e moui tukulagi ke he lalolagi nei.”
3 Ka liu a koe ke ahi a lautolu ne kua fakatutala mo koe ke he Ioane 17:3, kia tutala e koe ke he puhala nei:
◼ “He hau fakahiku haku he mogo kua mole ne tutala a taua hagaao ke he amaamanakiaga he moui tukulagi he lalolagi mafola. Ka e tokologa e tau tagata ne talitonu kua maeke ni e moui mitaki ke moua he lagi. Fefe e logonaaga hau ke he mena ia? Mailoga la e talahauaga fuluola nei.” Totou Isaia 45:18. Ti hafagi ke he fakaakoaga 5 he porosua Manako ti tutala ke he paratafa 3-4, huhu ai e tau huhu fakamua ke he kamataaga he fakaakoaga mo e kumi ai e falu kupu tohi ne tohi ai. Talahau ko e liuakimaiaga he tau tagata ke he mitaki katoatoa he lalolagi ko e vala he fakamoliaga he finagalo fakamua he Atua ma e lalolagi. Fakatoka ke liu ke fakatutala e paratafa 1-2 mo e 5-7 he fakaakoaga taha ia.
4 Ka putoia ai e tau vala tala fou ke he mate fakaofo he tau loto he tau tagata, kia lali e koe e puhala nei:
◼ “Liga logona e koe e [talahau e tau mena tutupu]. Ka mole tuai e moui, tokologa ne manatu noa ko e heigoa e fakamafanaaga ka foaki ke he tau magafaoa hana ne mate. Ko e heigoa e manatu hau?” Fakaata ma e tali. Ti veveu ke he lau 45 he tohi Kupu Mooli. Fakatumau he talahau: “Tokologa ne ofo ke ako ko e tau tagata tututonu mo e hepehepe ka liu tutu mai ke he moui he Parataiso he lalolagi.” Totou Gahua 24:15 ne tohi he paratafa he lau 28. Ti totou e fakamaamaaga ne moua he paratafa 29. “Ko e tohi nei kua tutala ke he loga atu foki he tau matafeiga fulufuluola hagaao ke he finagalo he Atua ma e vaha anoiha. Ka manako a koe ke ako fakalahi atu ai, kia toka e lagaki e mo koe.” Taute e tau fakatokaaga ke liu ahi atu, he fakamau e manako tonu mo e tau kapeletu he tagata.
5 Ka liu a koe ke ahi atu, hiki e fakataitaiaga hau ke he tagata he kaina. Liga pehe a koe:
◼ “Ko e mogo kua mole ne tutala a taua, ne fakaaue au ke he talahauaga hau hagaao ke he finagalo he Atua ma e lalolagi. [Fatiaki e talahauaga.] Ne moua e au falu vala tala ne manatu au to fiafia a koe ki ai.” Hafagi e porosua Manako ke he fakaakoaga 5. Totou mo e fakatutala e loga he tau paratafa he fakaakoaga ia ne kua fiafia e tagata he kaina ki ai. He fakatoka ai e magaaho ke liu atu ke fakatolomaki e fakaakoaga, age ke he tagata he kaina e laupepa fakailoa ne tohi e tau magaaho feleveia he fakapotopotoaga. Fakamaama hagaao ke he Feleveiaaga he Toloaga, ti uiina a ia ke hau.
6 Ka manako a koe ke he fakataitaiaga mukamuka kua fakakite e tuleke, liga ke pehe a koe:
◼ “Manako au ke toka e tuleke nei ne higoa Ko e Heigoa e Amaamanakiaga ma e tau Fakahelehele Kua Mamate?” Age ke he tagata he kaina, ti uiina a ia ke muitua ka e totou e koe e paratafa fakamua. Fakaata a ia ke tali e huhu he fakahikuaga. Totou e paratafa ke ua aki, ti veveu ke he fakatataaga he lau 108 he tohi Kupu Mooli. Fakatumau he talahau: “Foaki lahi he tohi nei e tau matafeiga hagaao ke he liu tu mai mo e tau maveheaga homo ue atu he Tohi Tapu ma e vaha anoiha. Ka totou ai e koe, ti toka e lagaki nei.” Fakaata e tagata he kaina ke foaki e mena fakaalofa ke he gahua he lalolagi katoa, ti fakatoka ma e liu ahi atu.
7 Ko e foakiaga ha tautolu he uiina mitaki ke he falu ka liga fakatupu a lautolu ke o mai ke he vai he moui, ne kua fakaata e Iehova he magaaho nei. Ko e mena ia, kia pehe a tautolu ki a lautolu ne fia inu: “Ati hau ā.”—Fakakite. 22:17.