“Ko Iehova Ko e Haku a Lagomatai Haia”
1 He magaaho ne kotofa e Iesu e tau tutaki fakamua hana, ne tala age a ia ki a lautolu: “Kitiala, kua fakafano atu e au a mutolu tuga e tau mamoe ke he vaha loto he tau luko.” (Mata. 10:16) Kua eke kia e mena ia ke fakatupetupe a lautolu mo e tukumuli? Nakai. Ne hiki e lautolu e aga kua talahau fakamui mai he aposetolo ko Paulo ne tala age e ia ke he tau matakainaga Kerisiano: “Kua talahau atu e tautolu mo e fakamalolo, Ko [Iehova], ko e haku a lagomatai haia, nakai matakutaku au ke he tau mena ke eke he tau tagata kia au.” (Hepe. 13:6) Kua fiafia a lautolu he talahaua ke eke fakakelea ha ko e higoa a Iesu, ti nakai oki e tau aho oti he fakaako atu a lautolu mo e fakamatala e tala mitaki.—Gahua 5:41, 42.
2 He vaha nei ko e gahua fakamatala ke he lalolagi kua hoko ke he vala fakaoti. Tuga ni ne talahaua tuai e Iesu, kua eke mena vihiatia he tau motu oti a tautolu. (Mata. 24:9) Kua totoko mo e va e gahua fakamatala ha tautolu, mo e he falu matakavi he lalolagi, pihia foki kua pa. Kaeke kua tote e tua ha tautolu, na liga matakutaku ni a tautolu. Ka e, ha kua iloa ko Iehova e Lagomatai ha tautolu ne fakahauhau ai a tautolu mo e fakamalolo a tautolu ke fakauka.
3 Ko e aga fakamanavalahi e fua he mahani malolo, fakamakamaka, toa. Ko e fakafehagaiaga he matakutaku, hehegi, pogite. Kua manako tumau he tau tutaki a Iesu e aga fakamanavalahi ke fakauka. Ko e mena mua atu a ia kaeke ke kalo kehe mai a tautolu he tau aga fakalolelole he tau mahani mo e tau makaukau he lalolagi ne faitaua mo e Atua. Ko e fakamafana ha a ia ma tautolu ke manatu e fakafifitakiaga mua ue atu a Iesu, kua kautu ke he lalolagi! (Ioane 16:33) Manatu foki, e tau aposetolo ne kua fehagai mo e tau kamatamata uka lahi ne fakapuloa fakamakamaka: “Kua lata ni ke mua e omaoma ke he Atua ke he omaoma ke he tau tagata.”—Gahua 5:29.
4 Ko Tautolu Nakai Ha Ia Kua Tukumuli: Kua lata a tautolu ke ukufeke ke fakatumau e mahani mauokafua he gahua ha tautolu. (Hepe. 10:39) Tokaloto tumau kua fakafano atu e Iehova a tautolu ha ko e talahauaga he fakaalofa hana mo e fakaalofa hofihofi noa ke he tau tagata oti. Na nakai ole e ia e tau fekafekau hana ke taute ha mena ne nakai kua aoga. Ko e tau mena oti kua kotofa a tautolu ke taute to fakaholo atu moli ni e mitaki ki a lautolu ne fakaalofa ke he Atua.—Roma 8:28.
5 To lagomatai he onoonoaga amaamanaki a tautolu ke kumi tumau a lautolu ne tuga e tau mamoe he fonua ha tautolu. Liga maeke ia tautolu ke mamata e mahani fakateaga ko e fakakiteaga he tau tagata ha ko e ha lautolu a hogohogomanava mo e noa e amaamanakiaga. Fakaata ha tautolu a fakaalofa ke fakaholo atu e feofanaki mo e fakauka. He tau magaaho oti kua toka e tautolu e tau tohi po ke kitia kua talia ai, kua foli a tautolu ke liliu atu fakavave mo e fakaohooho atu e fiafia ia. Aua neke fakauaua a tautolu he ha tautolu a malolo ke kamata e fakaakoaga he Tohi Tapu po ke he aoga ke takitaki ai. Nakai, ka e lata tumau ni mo e liogi fakalahi a tautolu ke kumi e lagomatai mo e takitakiaga a Iehova, he iloa tonuhia to lagomatai e ia a tautolu.
6 Kua tua mauokafua e tautolu to takitaki e Iehova e gahua ke hoko atu ai ke he hana fakakatoatoaaga. (Fakatatai Filipi 1:6.) Ko e falanaki katoatoa ha tautolu ki a ia he ha tautolu a Lagomatai kua fakamalolo ai a tautolu, ti “aua neke fakalolelole a tautolu ke he mahani mitaki.”—Kala. 6:9.