“Kia Eke . . . e Mena Nai mo Fakamanatuaga kia Au”
1 Fa mahani e tau tagata ke fakatoka e tau mena aoga ke mole noa. Ko e taha kakano anei, he magaaaho ne taute e “kaiaga mena he Iki,” ne poaki e Iesu hana tau tutaki: “Kia eke . . . e mena nai mo fakamanatuaga kia au.” Tali mai ai, ko e fakamanatuaga he tau ne mate a Iesu, ne tumau e tau Kerisiano he omaoma ke “fakailoa atu . . . e matulei he Iki, ato haele mai a ia.”—1 Kori. 11:20, 23-26.
2 Tata lahi mogonei, to moua e Iesu ki luga he lagi a lautolu ne toe ke fakahiku aki he “fuifui mamoe” kiliiku. (Luka 12:32; Ioane 14:2, 3) He tau nei ko lautolu ne fakauku kua toe fakalataha mo e moto tagata he “tau mamoe kehe” ka liu moua e fakamonuinaaga ke fakamanatu e Kaiaga Mena he Iki, ia Aperila 11. (Ioane 10:16; Fakakite. 7:9, 10) To fakamalolo e fakaaueaga ma e fakaalofa lahi a Iehova he fakafano mai hana Tama fuataha ke lata mo e tau tagata. To fakakite ai e fakafifitakiaga a Iesu, hana fakaalofa, hana fakamoli ke hoko ke he mate he foaki e lukutoto, mo e hana pule mogonei ko e Patuiki he Kautu he Atua ne kua fakatu, ti pihia mo e tau monuina ka ta mai he Kautu ke he tau tagata. Ko e magaaho moli he fakamanatuaga!
3 Mautauteute Mogonei: Kia kaufakalataha a tautolu oti ke taute e magaaho Fakamanatu nei ke olioli lahi mo e fakaaue ma tautolu ni mo e ki a lautolu ka fakalataha mai. Kia tauteute e tautolu e manamanatuaga ha tautolu he liu totou e tau talahauaga he Tohi Tapu hagaao ke he tau aho gahoa fakahiku he fekafekauaga a Iesu mo e tau mena tutupu kua takitaki atu ke he hana a mate. He tau fahi tapu gahoa he fakaakoaga fakamagafaoa ha tautolu ato hoko e Fakamanatuaga kua liga lata ke liu kitekite e veveheaga 112-16 he tohi Greatest Man.
4 Tokofiha kua iloa e koe ke liga o mai he Fakamanatuaga mo e fakalotomatala a koe ke ati hake e fakaaueaga ha lautolu ma e magaaho nei, he uiina a lautolu, mo e fakafeleveia fakamitaki a lautolu? Tohi hifo mogonei, ti taute e mena kua maeke ia koe ke lagomatai ki a lautolu ke o mai. He magaaho fakamui, lagomatai ki a lautolu ke fakatumau e tupu fakaagaga he fakamalolo ki a lautolu ke fakalataha tumau ke he tau feleveiaaga.
5 Ke he mahina Fakamanatu to taute ai e tau fakatokatokaaga pauaki ke fakatolomaki e tau matagahua fakamatala he tau tagata oti. Mo e tauteuteaga mitaki, kua maeke nakai ia koe ke paionia ia Aperila? ia Me? Ko e taha he tau puhala mitaki lahi ke fakakite kua manatu fakaaue a tautolu ke he fai kakano he poa a Iesu ki a tautolu he tutala hagaao ke he Atua ha tautolu, ko Iehova, mo e tau fakamonuinaaga ka ta mai he Kautu ka pule he hana a Tama.—Sala. 79:13; 147:1.