4 Fehagai mo e Tau Mahalohalo Haau

“Ko koe ni ne tua fakatote, ko [e] heigoa e mena ne mahalohalo ai a koe?”—Mataio 14:31.

KO E HEIGOA E PALEKO? Ne fa mahalohalo, po ke fakauaua foki e tau tutaki a Iesu. (Mataio 14:30; Luka 24:36-39; Ioane 20:24, 25) Ka kua fakamaama he Tohi Tapu ko e tote e tua ko e ‘hala kua moua vave a tautolu.’ (Heperu 12:1) Ne tohi he aposetolo ko Paulo: “Ko e mena nakai ha he tau tagata oti kana e tua.” (2 Tesalonia 3:2) Nakai ko e ai maeke he falu ke fakagahua e tua. Ka kua tokologa ne nakai eketaha ke moua ai. To fakamonuina he Atua a lautolu ne eketaha ke moua e tua.

MAEKE FĒFĒ A KOE KE KAUTŪ KE HE PALEKO? Mailoga e tau matalekua ne fakatupu a koe ke mahalohalo. Tuga anei, ne mahalohalo, po ke fakauaua e tutaki ko Toma nukua fakaliu tu mai a Iesu pete he tala age he falu tutaki kua kitia e lautolu a ia. Ne manako a Toma ke he fakamooliaga. Ko e fua? Ne foaki e Iesu ki a ia e fakamooliaga kua lata ke maeke ke malolō e tua haana.—Ioane 20:24-29.

Puhala mai he Tohi Tapu, ne foaki e Iehova ko e Atua e tau tali kua lata ma tautolu ke kautū ke he tau mahalohalo ha tautolu. Ma e fakatai, tokologa ne mahala e tua ke he Atua ha kua tukupau hokoia, po ke tukupau e lautolu a Ia ke he falu puhala ha ko e tau felakutaki, favale, mo e matematekelea ne lauia e tau tagata. Ko e heigoa ne talahau he Tohi Tapu hagaao ke he matakupu nei?

Nakai pule e Atua he puhala he tau fakatufono he tagata. Ne hagaao a Iesu ke he agaaga ne nakai kitia ne higoa ko Satani ko e “iki he lalolagi nei.” (Ioane 14:30) Ne foaki e Satani ki a Iesu e pule ke he tau kautu oti he lalolagi ka lagataha e tapuaki haana, he pehē: “To ta atu oti e au kia koe e pule nai, mo e lilifu ha lautolu; ha kua tuku mai ia kia au, to ta atu foki e au kia ia na loto au ki ai.” Ne nakai fakatikai e Iesu kua ha ha ia Satani e pule ia. Ka e pehē a Ia: “Nukua tohi, Kia hufeilo a koe ke he Iki [Iehova] hau a Atua, ko ia ni hokoia ke fekafekau a koe ki ai.” (Luka 4:5-8) Kua lata ke tukupau aki a Satani mo e tau fakatufono he tagata e tau matematekelea he lalolagi, ka e nakai ko e Atua.—Fakakiteaga 12:9, 12.

Nakai leva to utakehe e Iehova ko e Atua e tau mena oti ne fakatupu e tau matematekelea. Kua fitā he fakatoka e ia e Kautu, po ke fakatufono i lalo he haana Tama, ko Keriso Iesu, ke pule ke he tau tagata. (Mataio 6:9, 10; 1 Korinito 15:20-28) He fakamooli e perofetaaga he Tohi Tapu, hane fakamatala e tala mitaki hagaao ke he Kautu nei ke he lalolagi katoa. (Mataio 24:14) Nakai leva to utakehe he Kautu nei a lautolu oti ne totoko ki ai mo e to fakaotioti e tau mena ne fakatupu e matematekelea he tau tagata.—Tanielu 2:44; Mataio 25:31-33, 46; Fakakiteaga 21:3, 4.

KO E HEIGOA E PALEPALE? Ko lautolu ne mahalohalo kua tuga e tau peau ne havilia he “tau matagi oti he tau kupu fakaako, ko e pikopiko he tau tagata.” (Efeso 4:14; 2 Peteru 2:1) Kehe ai, ko lautolu ne moua e tau tali makona ke he tau hūhū ha lautolu kua maeke ke ‘tumau ke he tua.’—1 Korinito 16:13.

Ko e Tau Fakamoli a Iehova, ne tohi fakailoa e senolo nei kua manako ke lagomatai a koe ke moua e tau tali ke he tau hūhū ne liga paleko ke he tua haau. Kua uiina e lautolu a koe ke fakalataha mo lautolu mo e kumikumi ni e koe e tau fakaakoaga ha lautolu. Ko e taute pihia e koe ka fakamalolō lahi e tua haau ke he Atua.

Ma e falu vala tala foki, kikite e tohi Ko e Heigoa ne Fakaako Moli he Tohi Tapu?a he veveheaga 8, “Ko e Heigoa e Kautu he Atua?,” mo e veveheaga 11, “Ko e Ha ne Fakaata he Atua e Matematekelea?”

[Matahui Tala]

[Fakatino he lau 9]

Ko lautolu kua moua e tau tali makona ke he tau hūhū ha lautolu kua mauokafua e fakavēaga ke he tua ha lautolu