Ko e Mena ne Ako e Tautolu Mai ia Iesu

Hagaao ke he “Fakaotiaga”

Ko e heigoa ka fakaoti?

Ne hūhū e tau tutaki ha Iesu ki a ia: “Po ke heigoa foki e fakamailoga he hāu a haele mai [“ha ha hinei,” NW] mo e fakaotiaga he lalolagi [“fakatokaaga he tau mena,” NW]?” (Mataio 24:3) He tali e hūhū ia, ne nakai hagaao a Iesu to moumou e fua lalolagi. Ne tutala a ia he magaaho fakamua hagaao ke he “fakatokaaga he tau mena” ti fakaaoga ai e talahauaga ke hagaao ke he tau fakatokaaga katoatoa he fakatufono mo e fakalotu ne pule e Satani. (Mataio 13:22, 40, 49) Ti ko e fakatokaaga na ne tokaloto e Iesu he magaaho ne pehē a ia: “[To] hoko mai ai e fakaotiaga.”—Mataio 24:14.

Fakamaama fēfē e Iesu e fakaotiaga?

Ko e “tala mitaki” e fakaotiaga he fakatokaaga nei ne nakai fakafili tonu. Ne pehē a Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; [to] hoko mai ai e fakaotiaga.” Ne fakamaama e Iesu e fakaotiaga he fakatokaaga ke he tau mena mogonei he puhala nai: “Ko e vaha ia ke lahi ai e matematekelea, nakai pihia taha mena tali mai he kamataaga he lalolagi, kua hoko ni ke he vaha nai; ti nakai tuai pihia foki. Aua he fakaku e vaha ia, po kua nakai fakamoui taha.”—Mataio 24:14, 21, 22.

Ko hai ka moumou?

Ko lautolu ni ne nakai fakaalofa mo e nakai fekafekau ki a Iehova mo Iesu ka moumou. Ko e tau tagata ia ne nakai omaoma ke he Atua. Ne pehē a Iesu: “Ka e tuga e vaha kia Noa, to eke pihia foki ka hau [po ke, ha ha hinei] e Tama he tagata. Ha ko e mena tuga ne eke ke he vaha ka e nakaila hoko e fakapuke. . . . Ti nakai [“omaoma,” NW] e lautolu ato hoko mai e fakapuke, mo e uta kehe a lautolu oti.” (Mataio 24:36-39) Ne pehē a Iesu kua tokologa he puhala ne takitaki atu ke he moumouaga. Ka e foaki e ia e maveheaga kua fai ‘hala lautote ke pu atu ke he moui.’—Mataio 7:13, 14.

A fē ka fakaoti e fakatokaaga nei?

He hūhū hagaao ke he fakamailoga he ha ha hinei haana mo e “fakaotiaga he fakatokaaga he tau mena,” ne tali a Iesu: “Ko e mena to laga e taha motu ke he taha motu, ko e taha kautu ke he taha kautu; to ha ha i ai e tau hoge . . . mo e tau mafuike. . . . Ke momoko foki e tau loto he tau tagata tokologa, nukua tupu lahi e mahani hepehepe.” (Mataio 24:3-12) Ti ko e tau tala momoko oti he vahā nei ne fai kakano lahi mahaki—he nakai leva to tamai he Kautu he Atua e mafola ke he tau tagata omaoma. Ne pehē a Iesu: “Ka kitia e mutolu e tau mena ia kua eke, kia iloa ai e mutolu, kua tata tuai e kautu he Atua.”—Luka 21:31.

Ko e heigoa haau kua lata ke taute?

Ne pehē a Iesu “kua ta mai ai [he Atua] hana Tama fuataha, kia nakai mate taha ne [fakagahua e] tua kia ia, ka kia moua e ia e moui tukulagi.” (Ioane 3:16) Ke fakagahua e tua ke he Atua mo e Tama haana, kua lata ia koe ke iloa mitaki a laua. Ati pehē a Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.”—Ioane 17:3.

Kia fakaeneene neke taofi he tau fakaatukehe mo e tau lekua a koe mai he fakaako e puhala ke fakatātā haau a fakaalofa ke he Atua. Ne pehē a Iesu: “A mutolu [“kia mataala,” NW] neke pehia ha mutolu a tau loto, he . . . fakaatukehe he tau mena he mouiaga nai; neke fakaofo mai e aho ia kia mutolu. Ha ko e mena tuga ne matahele, ke hoko mai ai.” Ka muitua a mutolu ke he hatakiaga a Iesu, to “talahaua a mutolu kua aoga ke hao mai ke he tau mena oti ia ka hohoko mai.”—Luka 21:34-36.

Ma e falu vala tala foki, kikite e tohi Ko e Heigoa ne Fakaako Moli he Tohi Tapu?a he veveheaga 9, “Ko Tautolu Kia he ‘Tau Aho Fakamui?’”

[Matahui Tala]