Tau Magafaoa Kerisiano—Mumuitua e Fifitakiaga a Iesu!
“Toka ai e [Keriso] e fakafifitaki ma mutolu, kia mumui atu a mutolu ke he hana tau tuagahui.”—1 PETE. 2:21.
1. (a) Ko e heigoa e matagahua he Tama he Atua he tufugatia? (e) Fēfē e logonaaga a Iesu ke he tau tagata?
KO E magaaho ne eke he Atua e lagi mo e lalolagi, kua ha ha ai mo ia e Tama uluaki haana ko e [“iki gahua iloilo,” NW]. Ko e Tama he Atua kua kaufakalataha foki mo e Matua haana he magaaho ne talaga mo e tufuga e Iehova e tau manu huifā mo e tau akau kehekehe loga i hinei he lalolagi mo e ko e magaaho ne tauteute e Ia e Parataiso ka eke mo kaina ke he tau mena momoui ne tufuga ke he fakatai a Iehova. Ko e Tama he Atua, ne iloa ke he magaaho fakamui ko Iesu, ne fakaalofa lahi ke he tau tagata. “Ko e [haana] a fiafia foki, ha ha i ai ke he fanau he tau tagata haia.”—Fakatai 8:27-31; Kene. 1:26, 27.
2. (a) Foaki fēfē e Iehova ma e tau tagata nakai mitaki katoatoa? (e) Ko e heigoa e taha faahi he moui ne foaki he Tohi Tapu e takitakiaga?
2 He mole e agahala he hoa fakamua, ko e laveakiaga he tau tagata agahala kua eke mo vala aoga he finagalo a Iehova. Ne foaki e Iehova e poa lukutoto he Keriso ke fakamooli aki e laveakiaga ia. (Roma 5:8) Lafi ki ai, ne foaki e Iehova e haana Kupu, ko e Tohi Tapu, ne puhala mai e takitakiaga ke he tagata ke fahia ke he nakai mitaki katoatoa ne moua. (Sala. 119:105) He haana Kupu, ne foaki e Iehova e takitakiaga ke lagomatai e tau tagata ke tumau e malolō mo e fiafia he tau magafaoa. Hagaao ke he fakamauaga, ne talahau he tohi a Kenese kua lata e tagata taane ke “pipiki ke he hana hoana; ti eke ai a laua mo tino taha.”—Kene. 2:24.
3. (a) Ko e heigoa ne fakaako e Iesu hagaao ke he fakamauaga? (e) Ko e heigoa ka fakatutala a tautolu ki ai he vala tala nei?
3 He gahua fakamatala haana ke he lalolagi, ne peehi e Iesu kua lata ke tukulagi e fakamauaga. Ne fakaako e ia ka fakagahua e tau matapatu fakaakoaga to lagomatai e tau tagata he magafaoa ke kalo mai he tau aga mo e tau mahani ne fakatauhele e fakamauaga ha lautolu po ke fiafia he magafaoa ha lautolu. (Mata. 5:27-37; 7:12) To fakatutala e vala tala nei ke he puhala he tau fakaakoaga mo e fakafifitakiaga ne fakatoka e Iesu he nofo a ia ke he lalolagi ka lagomatai e tau taane, tau hoana, tau mamatua, mo e tau fanau ke moua e moui fiafia mo e makona mitaki.
Puhala ne Fakalilifu he Taane Kerisiano e Hoana Haana
4. Tatai fēfē e matagahua ha Iesu mo e tau taane Kerisiano?
4 Ne kotofa he Atua e taane ko e ulu he magafaoa, tuga ni a Iesu ko e Ulu he fakapotopotoaga. Ne talahau he aposetolo ko Paulo: “Ko e tane, ko e ulu he hoana haia, tuga a Keriso, ko e ulu he ekalesia [po ke, fakapotopotoaga] haia, ko ia foki ko e fakamoui he tino. Ko mutolu, ko e tau tane, kia fakaalofa a mutolu ke he tau hoana ha mutolu, tuga e fakaalofa a Keriso ke he ekalesia [po ke, fakapotopotoaga], mo e foaki mai e ia a ia ke eke mo hukui māna.” (Efeso 5:23, 25) Mooli, ko e mena ne taute e Iesu ke he tau tutaki haana kua fakatoka e fifitakiaga ma e puhala kua lata he tau tagata taane Kerisiano ke taute atu ke he tau hoana ha lautolu. Kia fakatutala la a tautolu ke he falu puhala ne fakagahua e Iesu e pule ne age he Atua ki a ia.
5. Fakagahua fēfē e Iesu haana pule ke he tau tutaki haana?
5 Ne “totonu mo e loto holoilalo” a Iesu. (Mata. 11:29) Ne taute foki e ia e tau gahua kua tonu. Ti nakai kaumahala a ia ke fakamooli e tau kotofaaga haana. (Mare. 6:34; Ioane 2:14-17) Ne foaki totonu e ia e fakatonuaga ke he tau tutaki haana, ti fatiaki foki kaeke kua lata. (Mata. 20:21-28; Mare. 9:33-37; Luka 22:24-27) Pete ia, ne nakai tauage po ke fakamā e Iesu a lautolu, po ke taute e ia a lautolu ke logona hifo kua nakai fakaaalofa po kua nakai maeke a lautolu ke taute e tau mena ne fakaako e ia ki a lautolu. Ka e nava mo e atihake e ia e tau tutaki haana. (Luka 10:17-21) Ko e mena ia ati moua e Iesu e fakalilifu he haana tau tutaki ha ko e ofania mo e fakaalofa hofihofi noa haana ne taute ki a lautolu!
6. (a) Ko e heigoa ka ako mai he taane he puhala ne taute e Iesu ke he tau tutaki haana? (e) Ko e heigoa e fakamalolōaga ne foaki e Peteru ke he tau taane?
6 Ko e fifitakiaga a Iesu ne fakaako ke he tau taane nukua nakai vale e tuaga ulupule Kerisiano. Ka kua fakamailoga ai he fakalilifu mo e fakaalofa foaki noa. Ne fakamalolō he aposetolo ko Peteru e tau taane ke fifitaki e tau puhala fakaalofa a Iesu he “nonofo fakalataha” mo e ha lautolu a tau hoana ‘kia fakalilifu a lautolu.’ (Totou 1 Peteru 3:7.) Ti maeke fēfē mogoia he taane ke fakagahua e pule haana mo e he magaaho taha taute e hoana haana ko e taha kua latatonu ke moua e lilifu?
7. Puhala fe ka fakalilifu he taane e hoana haana? Fakatai.
7 Ko e taha puhala ke fakalilifu he taane e hoana haana ko e manamanatu fakamitaki ke he manatu mo e tau logonaaga haana ato taute e ia [taane] e tau fifiliaga kua lauia e magafaoa. Liga ko e fifiliaga hagaao ke he hiki ke he taha fale po ke gahua po ke hagaao ke he tau fifiliaga he tau aho takitaha, tuga e matakavi ka ō ke okioki ai po ke puhala ke hikihiki e fatifatiaga tupe he magafaoa ke maeke ke fahia ke he tau koloa tauuka he moui. Ha ko e mena to lauia e magafaoa, kua liga aoga lahi mo e totonu ma e taane ke fanogonogo ke he manatu he hoana haana, ti liga lagomatai a ia ke taute e fifiliaga lagotatai mo e manamanatu, ti to mukamuka lahi he hoana ke lalago a ia. (Fakatai 15:22) Ko e tau taane Kerisiano ne fakalilifu e tau hoana ha lautolu kua nakai ni moua e fakaalofa mo e fakalilifu he tau hoana ha lautolu, ka e mua atu e aoga kua talia ai e Iehova.—Efeso 5:28, 29.
Puhala ke Fakakite he Hoana e Fakalilifu Hokulo ke he Taane Haana
8. Ko e ha kua lata ke kalo mai he fifitakiaga a Eva?
8 Ia Iesu, kua moua he tau hoana Kerisiano e fifitakiaga mitaki katoatoa he omaoma ke he pule. Ko e kehekehe ha ia ke he onoonoaga haana he pule mo e aga ne fakatātā he hoana he tagata fakamua! Ne mahala a Eva ke fakatoka e fifitakiaga mitaki ma e tau hoana ke mumuitua. Ha ha ia ia e ulu ne poaki faka-Atua ko e puhala ne matutaki mai e Iehova e fakaakoaga. Ka e nakai fakalilifu e Eva e fakatokaaga nei. Ne mahala a ia ke talia e fakaakoaga ne tala age e Atamu ki a ia. (Kene. 2:16, 17; 3:3; 1 Kori. 11:3) Mooli, kua fakahehē ki a Eva; ka kua lata ia ia ke fakakia ke he taane haana kua tonu nakai ke fanogonogo ke he leo ne tala age ki a ia ke he mena ne “fioia he Atua.” Ka e, hataki e ia e puhala ke he taane haana.—Kene. 3:5, 6; 1 Timo. 2:14.
9. Ko e heigoa e fifitakiaga he omaoma ne fakatoka e Iesu?
9 He nakai pihia a Iesu, kua foaki e fifitakiaga mitaki katoatoa he omaoma ke he Ulu haana. Ko e aga mo e puhala moui haana ne fakakite kua “nakai manatu a ia ko e fofo mena ke fakataufata a ia mo e Atua.” Ke he taha faahi, “kua fakatokolalo e ia a ia, ne mahani a ia fakalataha mo e tupa.” (Filipi 2:5-7) He vahā nei, kua fakatumau e Iesu, ko e Patuiki hane pule e aga taha ia. Ne omaoma fakatokolalo a ia ke he Matua haana he tau mena oti mo e lalago e ulupule Haana.—Mata. 20:23; Ioane 5:30; 1 Kori. 15:28.
10. Liga lalago fēfē he hoana e ulupule he taane haana?
10 Kua latatonu he hoana Kerisiano ke fifitaki a Iesu he lalago e ulupule he taane haana. (Totou 1 Peteru 2:21; 3:1, 2.) Manamanatu la ke he tuaga ne maeke ia ia ke taute e mena nei. He kumi he tama taane haana e fakaatāaga ke taute e matagahua nukua lata ke moua e fakaatāaga he matua. Ha kua nakaila fakatutala fakamua e tau mamatua ki ai, to latatonu he matua fifine ke hūhū, “Kua ole nakai a koe ke he matua taane haau?” Ka nakaila taute he tama taane, kua lata e hoana ke fakatutala e matakupu mo e taane haana ato taute ha fifiliaga. Mua atu, to manako mooli e hoana Kerisiano ke kalo mai he fekehekeheaki mo e taane haana po ke totoko e manatu he taane haana i mua he tau tama ha laua. Ka nakai talia e ia e taha mena he taane haana, to tutala a ia mo e taane hoko laua ni.—Efeso 6:4.
Fifitakiaga a Iesu ma e Tau Mamatua
11. Ko e heigoa e fifitakiaga ne fakatoka e Iesu ma e tau mamatua?
11 Pete he nakai fai hoana po ke fai fanau a Iesu, ko e fifitakiaga mitaki lahi mahaki a ia ma e tau mamatua Kerisiano. Pihia fēfē? Ne fakaalofa mo e fakamanavalahi a ia he fakaaako e tau tutaki haana ke he tau kupu mo e fifitakiaga. Ne fakakite e ia ki a lautolu e puhala ke taute aki e poakiaga ne age e ia ki a lautolu. (Luka 8:1) Ko e aga mo e mahani a Iesu ke he tau tutaki haana ne fakaako ki a lautolu e puhala ke taute pihia foki ne lautolu ki a lautolu.—Totou Ioane 13:14-17.
12, 13. Ko e heigoa kua lata kaeke ke manako e tau mamatua ke feaki e tau fanau matakutaku Atua?
12 Fa mahani e tau tama ke fifitaki e tau mamatua ha lautolu ke he tau mena mitaki po ke ke he tau mena kelea. Ti hūhū hifo ki a mutolu ma tau mamatua: ‘Ko e heigoa hane fakaako e tautolu ke he tau fanau ha tautolu he lahi e magaaho ke he televisoni mo e fakafiafiaaga, mo e he taha faahi ko e fakaako Tohi Tapu mo e fakalataha ke he gahua he fonua? Ko e heigoa ne tuku mua mooli he magafaoa ha tautolu? Kua fakatoka kia e tautolu e fifitakiaga mitaki he hagaaki e tau momoui mo e tau fifiliaga ha tautolu ke he tapuakiaga mooli?’ Kua lata e fakatufono he Atua ke tuku mua he tau loto he tau mamatua ka manako ke feaki e tau fanau matakutaku Atua.—Teu. 6:6.
13 Ka eketaha e tau mamatua ke fakagahua e tau matapatu fakaakoaga he Tohi Tapu ke lata mo e tau mena oti he tau aho takitaha, to mailoga tumau he tau tama e mena nei. To fakalagalaga lahi e tau kupu mo e tau fakaakoaga he tau mamatua. Kaeke ke ua e puhala moui ne mailoga he tau fanau, to liga fakahiku e lautolu kua nakai aoga po ke nakai lagomatai mooli e tau matapatu fakaakoaga he Tohi Tapu. Ti ko e fua, kua liga hihiga lahi e tau fanau ke mahala ka fehagai ke he peehiaga fakalalolagi.
14, 15. Ko e heigoa e tau mena kua aoga ne lata he tau mamatua ke feaki i loto he tau fanau ha lautolu, ti ko e heigoa e taha puhala kua maeke ia lautolu ke taute e mena nei?
14 Kua mailoga he tau mamatua Kerisiano ko e feaki he tama kua lahi atu ke he foaki hokoia he tau levekiaga fakatino haana. Ko e mena ia, kua nakai pulotu mooli ke fakaako e tama ke tutuli e tau foliaga ke leveki hokoia aki e moui fakatino haana. (Fakama. 7:12) Ne fakaako e Iesu e tau tutaki haana ke tuku fakamua ha lautolu a tau mena kua aoga mo e tau tutuliaga fakaagaaga. (Mata. 6:33) Ko e mena ia, he fifitaki a Iesu, kua lata foki e tau mamatua Kerisiano ke eketaha ke feaki i loto he tau fanau ha lautolu e manako ke tutuli e tau foliaga fakaagaaga.
15 Taha puhala ka taute he tau mamatua e mena nei he fakatoka e tau magaaho ma e tau fanau ha lautolu ke fakalataha mo lautolu kua fekafekau mau. Manamanatu ke he puhala ka fakamalolō aki e tau fuata mui ke mahani mo e tau paionia po ke leveki takaiaga mo e hoana haana. Ko e tau misionare, tau matakainaga he Peteli, mo lautolu he gahua ta fale he lalolagi katoa ne fakalataha atu ka tutala fakamakai ke he tau olioli he fekafekau ki a Iehova. Nakai fakauaua ko e tau matakaianaga ia ne fakalataha atu to talahau e tau tala atihake. Ko e fifitakiaga ha lautolu he fekafekauaga foaki noa kua liga lagomatai lahi ke he tau fanau ha mutolu ke taute e tau fifiliaga pulotu, he fakatoka e tau foliaga uho lahi, mo e moua e fakaakoaga kua latatonu ke maeke ke lalago aki a lautolu ni he fekafekau mau.
Tau Fanau—Ko e Heigoa Ka Lagomatai a Mutolu ke Mumuitua ke he Fifitakiaga a Iesu?
16. Fakalilifu fēfē e Iesu haana tau mamatua he lalolagi mo e haana Matua he lagi?
16 Tau fanau, ne foaki foki e Iesu e fifitakiaga mitaki lahi mahaki ma mutolu. Ne tuku atu a Iesu ke he levekiaga a Iosefa mo Maria, ti omaoma a ia ki a laua. (Totou Luka 2:51.) Ne mailoga e ia, pete he nakai mitaki katoatoa a laua, ne tuku age he Atua e matagahua ki a laua ke leveki a ia. Ha ko e mena ia, ne lata ke fakalilifu ki a laua. (Teu. 5:16; Mata. 15:4) Ha kua lahi tuai, ne taute tumau e Iesu e tau mena kua fakafiafia e haana Matua he lagi. Kakano he mena ia ko e totoko e kamatamata. (Mata. 4:1-10) Ko mutolu ko e tau fanau, kua liga kamatamata he falu magaaho ke liuliu ke he tau mamatua ha mutolu. Ti ko e heigoa ka lagomatai a mutolu ke mumuitua ke he fifitakiaga a Iesu?
17, 18. (a) Ko e heigoa e vahega peehiaga kua fehagai mo e tau fuata he aoga? (e) Ko e manatu e heigoa ka lagomatai e tau fuata ke totoko e tau kamatamata?
17 Liga laulahi he tau kapitiga aoga ha mutolu kua tote po ke nakai manamanatu ke he tau tuaga he Tohi Tapu. Kua liga lali a lautolu ke taute e mutolu e tau matagahua hehē ti vaiga a mutolu ka nakai taute ai. Fa fakahigoa amuamu kia he tau kapitiga aoga ha mutolu a mutolu ha kua nakai taute e mutolu e falu matagahua mo lautolu? Ka pihia, tali atu fēfē a mutolu? Iloa e mutolu kaeke ke fakaatā e mutolu a mutolu ke hopoate mo e mumui ki a lautolu, to fakamamahi e mutolu e tau mamatua ha mutolu mo Iehova. Ko e heigoa ka tupu ki a mutolu kaeke ke mumui ke he tau kapitiga aoga ha mutolu? Liga kua fakatoka e mutolu e falu foliaga ma mutolu ni, tuga he eke mo paionia po ke fekafekau lagomatai, gahua he matakavi kua manako lahi ke he tau tagata fakailoa he Kautu, po ke eke mo matakainaga he Peteli. To lagomatai kia he fio mo e tau kapitiga aoga ha mutolu a mutolu ke hokotia ke he tau foliaga ha mutolu?
18 Kua putoia nakai a mutolu ma tau fuata he fakapotopotoaga Kerisiano ke he tau tuaga ne kamatamata e tua ha mutolu? Tali atu fēfē a mutolu? Manamanatu ke he ha mutolu a fifitakiaga, ko Iesu. Ne totoko a ia ke nakai mahala ke he kamatamata mo e tumauokafua ke he mena ne iloa e ia kua hako. He manatu e mena nei to foaki ki a mutolu e lagomatai ke fakamalolō ke tala age fakahako ke he tau kapitiga aoga ha mutolu kua nakai manako a mutolu ke fakalataha mo lautolu ke taute e mena kua iloa e mutolu kua hehē. Tuga a Iesu, kia hagaaki ke he tau amaamanakiaga he moui katoa he fekafekau fiafia mo e omaoma ki a Iehova.—Hepe. 12:2.
Ko e Kei ke he Moui Fiafia he Magafaoa
19. Ko e heigoa e puhala moui kua tamai e fiafia mooli?
19 Kua manako a Iehova ko e Atua mo Iesu Keriso ke moua he tau tagata e mena mitaki lahi mahaki. Pete foki he tuaga nakai mitaki katoatoa ha tautolu, kua maeke ia tautolu ke fai fiafia. (Isaia 48:17, 18; Mata. 5:3, NW) Ne fakaako e Iesu e tau kupu mooli he Tohi Tapu ne fakatoka e fakavēaga ma e fiafia he tagata, ka e nakai koenaia e mena ne talahau e ia ke he tau tutaki haana. Ne fakaako foki e Iesu e puhala mitaki lahi mahaki he moui. Mua atu ke he mena ia, ne toka hifo e ia e fifitakiaga aoga he moui mo e aga kua lagotatai. Ko e heigoa ni e matagahua ha tautolu ki loto he magafaoa, kua maeke ia tautolu oti ke aoga mai he mumuitua e fifitakiaga haana. Ti, ko e tau taane, tau hoana, tau mamatua, mo e tau fanau, kia mumuitua e fifitakiaga a Iesu! He taofi mau e tau fakaakoaga a Iesu mo e mumuitua ke he fifitakiaga haana ko e matapatu mooli ke olioli e moui makona mo e fiafia he magafaoa.
To Tali Fēfē e Koe?
• Lata ke fakagahua fēfē he tau taane e pule ha lautolu ne foaki he Atua?
• Maeke fēfē he hoana ke muitua e fifitakiaga a Iesu?
• Ko e heigoa ka ako he tau mamatua mai he puhala ne taute e Iesu e tau tutaki haana?
• Ko e heigoa ka ako he tau fuata mai he fifitakiaga a Iesu?
[Fakatino he lau 8]
Ato taute e fifiliaga kua lauia e magafaoa, ko e heigoa he taane fakaalofa ka taute?
[Fakatino he lau 9]
Ko e tuaga fē kua maeke he hoana ke lalago e ulupule he taane haana?
[Fakatino he lau 10]
Fifitaki he tau fanau e tau aga mitaki he tau mamatua ha lautolu