Omoomoi he Fakaalofa he Keriso a Tautolu ke Fakaalofa

“Kua fakaalofa a [Iesu] ke he hana tau tagata ha he lalolagi, ti fakaalofa ni a ia kia lautolu kua hoko ke he fakaotiaga.”—IOANE 13:1.

1, 2. (a) Kehe pauaki fēfē e fakaalofa ha Iesu? (e) Ko e heigoa e tau vala he fakaalofa ka fakatutala a tautolu he vala tala nei ki ai?

KUA fakatoka e Iesu e fakafifitakiaga mitaki katoatoa he fakaalofa. Ko e tau mena oti haana—ko e tau kupu vagahau haana, mahani haana, fakaakoaga haana, mo e poa haana he mate—ne fakatātā e fakaalofa haana. Ke hoko ke he fakaotiaga he moui haana he lalolagi, ne fakakite e Iesu e fakaalofa ki a lautolu ne feleveia mo ia mua atu ke he tau tutaki haana.

² Ko e fakafifitakiaga homo ue atu a Iesu he fakaalofa kua fakatoka e tuaga tokoluga ma e tau tutaki haana ke muitua ki ai. Kua fakalagalaga foki a tautolu ke fakakite e fakaalofa pihia ke he tau matakainaga fakaagaaga ha tautolu, mo lautolu oti foki ne toe. He vala tala nei, to fakatutala a tautolu ke he mena ka fakaako he tau motua he fakapotopotoaga mai ia Iesu hagaao ke he fakakite e fakaalofa ki a lautolu ne taute hehē mo e tau hehē agahala lalahi foki. To fakatutala foki a tautolu ke he fakaalofa ha Iesu kua omoomoi e tau Kerisiano ke taute e tau gahua atihake he tau magaaho uka, matematekelea pauaki, mo e tau gagao.

3. Pete ne tau hehē lalahi a Peteru, taute fēfē e Iesu a ia?

³ He pō to mate a Iesu, ne fakatikai lagatolu he aposetolo ko Peteru a ia. (Mare. 14:66-72) Ka e, he magaaho ne liu mai a Peteru tuga he talahau tuai e Iesu, ne fakamagalo e ia a Peteru. Ne tuku age e Iesu ki a Peteru e tau kotofaaga mamafa. (Luka 22:32; Gahua 2:14; 8:14-17; 10:44, 45) Ko e heigoa kua fakaako e tautolu mai he aga a Iesu ki a lautolu kua taute e tau hehē lalahi?

Fakatātā e Finagalo he Keriso ki a Lautolu ne Mahani Kelea

4. Ko e heigoa e tuaga ne lata pauaki ke fakakite e finagalo he Keriso?

⁴ Ke he loga he tau tuaga ne lata ke fakakite e finagalo he Keriso, taha ne maeke ke mua atu e fakatupetupe ko e fakafehagai mo e mahani kelea lahi mahaki i loto he magafaoa po ke i loto he fakapotopotoaga. Momoko ai, ha kua tata lahi mahaki mai e fakatokaaga a Satani ke he moumouaga, kua au atu e kelea he aga he lalolagi. Ko e kelea po ke fakateaga he tau mahani he lalolagi ka lauia a lautolu ne ikiiki mo e fuakau, he fakalolelole e fifiliaga ha lautolu ke ō he puhala lautote. He senetenari fakamua, ne tuku ki tua e falu mai he fakapotopotoaga Kerisiano, ti fakatonu e falu. Pihia foki he vahā nei. (1 Kori. 5:11-13; 1 Timo. 5:20) Ko e mena ia, ka taute he tau motua e tau mena nei he fakakite e fakaalofa tuga he Keriso, ti maeke he mena nei ke lauia lahi e tagata mahani kelea.

5. Kua lata ke fifitaki fēfē he tau motua e aga he Keriso ki a lautolu ne taute mahani kelea?

⁵ Tuga a Iesu, kua latatonu he tau motua ke fakatumau ke he tau tuaga tututonu a Iehova he tau magaaho oti. He taute pihia, kua fakaata e lautolu e mahani molu, mahani totonu, mo e fakaalofa a Iehova. Ka fakatokihala mooli e tagata, “loto malipilipi” mo e “loto pehia” ha ko e hehē haana, kua liga nakai uka he tau motua ke “liuaki mai . . . a ia kua pihia mo e loto he mahani molu.” (Sala. 34:18; Kala. 6:1) Ka e kua he fehagai mo ia ne loto maō mo e fakakite e tote po ke nakai fakatokihala?

6. Ko e heigoa kua latatonu he tau motua ke kalo kehe mai ka fehagai mo lautolu ne mahani kelea, ti ko e ha?

⁶ Ka tiaki he tagata mahani kelea e fakatonuaga faka-Tohi Tapu po ke lali ke tukupau e falu ma e hehē haana, kua liga ita e tau motua mo e falu foki. He iloa e hagahaga kelea ne fitā he taute he tagata, kua liga kamatamata a lautolu ke talahau e tau logonaaga ha lautolu ni hagaao ke he tau gahua mo e aga he tagata ia. Ka e fakamatematekelea e ita mo e nakai fakaata e “finagalo a Keriso.” (1 Kori. 2:16; totou Iakopo 1:19, 20.) Ne hataki e Iesu e falu he vahā haana aki e tau kupu malolō, ka e nakai lagataha e talahau e ia e mena ne fakavihiatia po ke fakahukia. (1 Pete. 2:23) Ka kua hafagi agaia e ia e puhala ma e tau tagata mahani kelea ke tokihala mo e liliu mai ke he taliaaga a Iehova. Mooli, taha he tau matapatu kakano he hau a Iesu ke he lalolagi “ke fakamomoui e tau tagata hala.”—1 Timo. 1:15.

7, 8. Ko e heigoa kua lata ke takitaki e tau motua he taute e tau fakafiliaga?

⁷ Kua lata ke lauia fēfē e aga ha tautolu he fifitakiaga a Iesu hagaao ki a lautolu ne latatonu ke akonaki he fakapotopotoaga? Manatu ko e takitakiaga he Tohi Tapu ma e tau fakafiliaga i loto he fakapotopotoaga kua puipui e fuifui mo e liga omoomoi a ia ne akonaki he mahani kelea ke tokihala. (2 Kori. 2:6-8) Kua momoko lahi ha kua nakai fakatokihala e falu ti latatonu ai ke tuku ki tua, ka e mafanatia ke iloa kua tokologa ia lautolu ia kua liliu mai ki a Iehova mo e haana fakapotopotoaga he magaaho fakamui. Ka fakakite he tau motua e aga tuga he Keriso, kua lagomatai e lautolu ke fakamukamuka e puhala ma e tagata ke fakatokihala ti fakahiku ke liu mai. He mogo i mua, ko e falu ia lautolu nei ne mahani kelea he magaaho fakamua kua liga nakai manatu e tau fakatonuaga faka-Tohi Tapu oti ne tala age he tau motua ki a lautolu, ka e manatu mooli e lautolu kua fakalilifu he tau motua a lautolu ti fakakite ki a lautolu e fakaalofa.

⁸ Ko e mena ia, kua latatonu he tau motua ke fakatātā e “fua he [a]gaga,” mua atu ke he fakaalofa ne tuga he Keriso, pete foki ke he tau tuaga kamatamata. (Kala. 5:22, 23) Kua nakai lata a lautolu ke fakatepetepe ke tuku e tagata mahani kelea ki tua he fakapotopotoaga. Kua lata ke fakakite e lautolu kua manako a lautolu ke he tau tagata hehē ke liliu mai ki a Iehova. Ti, ka hiki e loto he tagata agahala he magaaho fakamui, tuga he tokologa, kua liga loto fakaaue lahi a ia ki a Iehova mo e “tau mena fakaalofa ke he tau tagata” ne fakamukamuka ki a ia ke liu mai ke he fakapotopotoaga.—Efeso 4:8, 11, 12.

Fakakite e Fakaalofa Tuga he Keriso he Vahā he Fakaotiaga

9. Talahau e fakafifitakiaga ha Iesu he fakakite e fakaalofa ke he tau tutaki haana he puhala aoga.

⁹ Ne fakamau e Luka e gahuahuaaga mua ue atu he fakaalofa a Iesu. He iloa to hoko mai e magaaho, to pātakai he tau kau Roma e maaga malaia ko Ierusalema, ke nakai maeke ke fehola, ne hataki fakaalofa e Iesu e tau tutaki haana: “Ka kitia e mutolu kua pātakai a Ierusalema he tau kau, ti iloa ai e mutolu ke he vaha ia kua tata hana moumouaga.” Ko e heigoa kua lata ke taute e lautolu? Ne tala age tuai e Iesu e tau fakaakoaga maaliali mo e hakotonu. “Kia fehola a lautolu ha i Iutaia ke he tau mouga; ko lautolu foki ha i loto he māga ia, kia o kehe a lautolu; ko lautolu foki ha he tau kaina, aua neke huhu a lautolu ki loto he māga. Ha ko e tau aho ia ke fakahala ai, kia fakamoli ai e tau mena oti ne tohi.” (Luka 21:20-22) He mole e pātakai he tau kautau Roma a Ierusalema he 66 V.N., ko lautolu ne omaoma ne muitua ke he tau fakaakoaga nei.

10, 11. Maeke fēfē he manamanatu ke he tau Kerisiano fakamua atu ne fehola mai i Ierusalema ke lagomatai a tautolu ke mautauteute ma e ‘matematekelea lahi’?

¹⁰ He fehola ha lautolu mai i Ierusalema, ne latatonu e tau Kerisiano ke fakakite e fakaalofa tuga he Keriso ma e taha mo e taha, tuga foki he fakakite he Keriso e fakaalofa ki a lautolu. Ne kua lata mooli ia lautolu ke felagomataiaki e tau mena moua ha lautolu. Ka e mahomo atu e perofetaaga ha Iesu ke he maaga ia i tuai. Ne talahau tuai e ia: “Ko e vaha ia ke lahi ai e matematekelea, nakai pihia taha mena tali mai he kamataaga he lalolagi, kua hoko ni ke he vaha nai; ti nakai tuai pihia foki.” (Mata. 24:17, 18, 21) Fakamua mo e magaaho he ‘matematekelea lahi’ ia i mua, to liga fehagai foki a tautolu mo e tau mena uka mo e tuaga mativa. He moua e finagalo he Keriso ka lagomatai a tautolu ke fakauka.

¹¹ He magaaho ia, to latatonu a tautolu ke muitua ke he fifitakiaga a Iesu he fakakite e fakaalofa fakamokoi. Hagaao ke he mena nei, ne fakatonu e Paulo: “Ka kia takitokotaha a tautolu mo e fakafiafia a ia ne katofia mo ia, kia mitaki ai a ia, to fakamafanatia ai. Ha ko Keriso ni, nakai fakafiafia e ia hana finagalo. . . . Kia foaki atu kia mutolu he Atua hana e fakauka, mo e fakamafanaaga, ke fakalataha ha mutolu a tau loto ke lata mo e finagalo a Keriso Iesu.”—Roma 15:2, 3, 5.

12. Ko e vahega fakaalofa fe kua lata ia tautolu ke feaki mogonei, ti ko e ha?

¹² Ko Peteru ne moua e fakaalofa a Iesu, ne tomatoma pihia foki ke he tau Kerisiano ke feaki e “fakaalofa fak[a]moli ke he tau matakainaga” mo e fakatātā e ‘omaoma ke he kupu moli.’ Kua lata ia lautolu ke “feofanaki fakalahi ai a [la]utolu mai he loto mea.” (1 Pete. 1:22) He vahā nei, kua lata lahi mahaki a tautolu ke feaki e tau mahani pihia tuga he Keriso. Kua fitā e tau tagata oti he Atua he lauia he tau peehiaga lalahi. Nakai lata he ha tagata ke mauokafua ke he ha vala he tau mena he lalolagi tuai nei, ha kua kitia maaliali e tomo lahi mahaki mognei he fakatokaaga fakatupe he lalolagi. (Totou 1 Ioane 2:15-17.) Ka e, he tata lahi mahaki mai e fakaotiaga he fakatokaaga nei, kua lata ia tautolu ke fakatata lahi atu ki a Iehova mo e taha ke he taha, he feaki e tau fakafetuiaga kapitiga mooli i loto he fakapotopotoaga. Ne fakatonu e Paulo: “Kia fakafeheleaki ke he feofanaki he tau matakainaga; kia takitokotaha mo e mua ke tuku atu e lilifu ke he falu.” (Roma 12:10) Ti peehi fakalaulahi atu e Peteru e manatu, he pehē: “Kia mua ke he tau mena oti ke moua e mutolu e fakaalofa lahi ko e taha kia taha, ha ko e fakaalofa ke ufiufi ai e tau hala loga.”—1 Pete. 4:8.

13-15. Fakakite fēfē he falu matakainaga e fakaalofa tuga he Keriso he mole e tau matematekelea tupu pauaki?

¹³ He lalolagi katoa, ne kua iloa lahi e Tau Fakamoli a Iehova ha kua fakagahuahua e lautolu e fakaalofa tuga he Keriso. Manamanatu ke he Tau Fakamoli ne tali atu ke he manako lagomatai he mole e tau matagi malolō mo e tau afā ne moumou e faahi toga katoa he tau Faahi Kaufakalataha he 2005. He fakalagalaga he fifitakiaga a Iesu, molea e 20,000 tagata gahua foaki noa, tokologa ne toka e tau kaina hagahaga mitaki mo e tau gahua mitaki ke lagomatai ha lautolu a tau matakainaga ne lauia he matematekelea.

¹⁴ He taha matakavi, ko e afā ne hoko hake e tahi ke 80 e kilomita ki uta, papihi hake ke 10 e mita he tokoluga. He mamiti hifo e tahi, fakalahi tolu e kaina mo e falu fale foki he matakavi tonu ia ne malona tiaki. Ne tamai he Tau Fakamoli gahua foaki noa mai he tau motu loga ha lautolu a tau pulotu, tau mena gahua, mo e tau koloa talaga ke he matakavi ti kua makai ke taute ha gahua kua lata. Tokoua e lafu fifine, ko e tau takape, ne peke e tau koloa ha laua ke he tulaki tote ti fakaholo atu ai ke molea 3,000 e kilomita ke lagomatai. Taha ia laua ia ne nofo he matakavi ia, hane lagomatai agaia ke he komiti foaki lagomatai he matakavi mo e gahua ai ko e paionia tumau.

¹⁵ Molea e 5,600 kaina he Tau Fakamoli mo e falu he matakavi ia ne liu talaga po ke fakafoou. Fēfē e logonaaga he Tau Fakamoli he matakavi he moua e fakakiteaga mua ue atu ia he fakaalofa? Taha e matakainaga fifine ne malona e kaina kua hiki atu ke he caravan tote lahi ne tutulu e alofale mo e malona e sitou. Ne talaga he tau matakainaga ma haana e fale latalata ka e hagahaga mitaki. He tū i mua he kaina foou haana ne maopoopo, ne tagi a ia he loto fakaaue ki a Iehova mo e tau matakainaga haana. He tau mena tutupu loga foki, kua nonofo fano e Tau Fakamoli he matakavi he tau kaina fakakū ha lautolu ke he taha po ke loga e tau tau he mole he liu talaga e tau fale ha lautolu. Ko e ha? Ke maeke ke fakaatā e tau fale foou ha lautolu ke nonofo ai e tau tagata gahua lagomatai. Ko e fifitakiaga mooli he fakakite e finagalo he Keriso!

Fakakite e Aga he Keriso ki a Lautolu kua Gagao

16, 17. He tau puhala fe ka fakakite e tautolu e finagalo he Keriso ki a lautolu ne gagao?

¹⁶ Tokogahoa ni a tautolu ne moua he matematekelea tupu pauaki. Ka e teitei fehagai oti e tau tagata mo e tau lekua malolō tino, haana ni po ko lautolu he magafaoa. Ko e aga a Iesu ki a lautolu ne gagao kua eke mo fifitakiaga ma tautolu. Kua fakalagalaga he fakaalofa haana a ia ke fakakite e logonaaga hofihofi ki a lautolu. He tamai he moto tagata e tau tagata gagao ha lautolu ki a ia, ne “fakamalolo e ia e tau gagao ha lautolu.”—Mata. 8:16; 14:14.

¹⁷ He vahā nei, nakai ha ha he tau Kerisiano e malolō mana ha Iesu ke fakamaulu, ka e fakakite e lautolu e aga fakaalofa hofihofi noa ha Iesu ki a lautolu ne gagao. Fakatātā fēfē e mena ia? He taha fakamooliaga, kua fakakite he tau motua kua moua e lautolu e finagalo he Keriso he taute mo e taufakakia e tau fakatokaaga ke lagomatai a lautolu ne gagao he fakapotopotoaga, he muitua e matapatu fakaakoaga ke fakagahuahua ai ne talahau ia Mataio 25:39, 40.a (Totou.)

18. Maeke fēfē he tau matakainaga fifine tokoua ke fakakite e fakaalofa mooli ke he taha, ti ko e heigoa e fua?

¹⁸ Mooli, nakai ni ke eke mo motua ke taute e mitaki ke he falu. Manamanatu ki a Charlene, ne 44 e tau he moui, ne moua he kanesā ti tala age ki a ia ko e hogofulu ni e aho ke moui ai. He kitia e manako lagomatai he matakainaga fifine mo e tupetupe ne ha ha he taane fakamooli haana he leveki a ia, tokoua e matakainaga fakaagaaga ko Sharon mo Nicolette, ne foaki katoatoa e tau magaaho ha laua ke lagomatai a ia ke he tau aho fakahikuhiku haana. Ne hoko atu ai ke he ono e faahitapu, ka e fakakite he tau matakainaga fifine tokoua e fakaalofa ha laua ke hoko ke he fakaotiaga. “Mena uka lahi ka iloa kua nakai liu e tagata ke malolō,” he talahau e Sharon. “Ka e, fakamalolō e Iehova a maua. Kua fakatata lahi he mena ne tupu a maua ke he taane haana mo e pihia ki a maua ni.” Pehē e taane a Charlene: “To manatu tumau e au e totonu mo e lagomataiaga aoga he tau matakainaga fifine fakahelehele tokoua nei. Ko e fatuakiloto meā mo e aga mitaki ne taute e kamatamata fakahiku nei ke mukamuka lahi ma Charlene ne tua fakamooli ti foaki ki a au e totokaaga fakatino mo e manamanatuaga. To loto fakaaue tukulagi au ki a laua. Kua fakamalolō he foaki fakatagata ha laua e tua haaku ki a Iehova mo e fakaalofa haaku ke he tau matakainaga oti.”

19, 20. (a) Ko e heigoa e tau manatu ne lima he finagalo he Keriso ne fakatutala a tautolu ki ai? (e) Ko e heigoa kua fifili a koe ke taute?

¹⁹ He tau fufuta he tau vala tala tolu nei, kua fakatutala a tautolu ke he lima e manatu he finagalo ha Iesu mo e puhala kua maeke ia tautolu ke muitua e aga manamanatu mo e tau gahua haana. Kia “totonu mo e loto holoilalo,” tuga a Iesu. (Mata. 11:29) Kia eketaha foki a tautolu ke taute e falu ke he puhala totonu, pete he kitia e tau nakai mitaki katoatoa mo e tau lolelole ha lautolu. O mai ā tautolu ke omaoma fakamalolō ke he tau poakiaga oti a Iehova pihia foki ka hoko e tau kamatamata.

²⁰ Fakahiku ai, kia fakakite e tautolu e fakaalofa tuga he Keriso ke he tau matakainaga oti ha tautolu, tuga ne taute he Keriso ke “hoko ke he fakaotiaga.” Ko e fakaalofa pihia kua fakakite a tautolu ko e tau tutaki mooli ha Iesu. (Ioane 13:1, 34, 35) E, ‘kia tumau ha mutolu a feofanaki ke he tau matakainaga.’ (Hepe. 13:1) Ua tukumuli! Fakaaoga e moui haau ke fakaheke a Iehova mo e ke lagomatai e falu! To fakamonuina e Iehova e tau laliaga mooli haau.

[Matahui Tala]

Maeke Nakai a Koe ke Fakamaama?

• Maeke fēfē he tau motua ke fakakite e finagalo he Keriso ki a lautolu ne mahani kelea?

• Ko e ha e fifitaki ke he fakaalofa he Keriso kua aoga lahi mahaki he vahā nei he fakaotiaga?

• Maeke fēfē ia tautolu ke fakakite e finagalo he Keriso ki a lautolu ne gagao?

[Fakatino he lau 17]

Manako e tau motua ki a lautolu ne hehē ke liliu mai ki a Iehova

[Fakatino he lau 18]

Fakaata fēfē he tau Kerisiano ne toka a Ierusalema e finagalo he Keriso?

[Fakatino he lau 19]

Iloa lahi e Tau Fakamoli a Iehova he fakagahua e fakaalofa tuga he Keriso