“Ko e Haku a Tau Kapitiga a Mutolu”
“Ko e haku a tau kapitiga a mutolu, kaeke ke eke e mutolu e tau mena oti kana kua tala atu ai au kia mutolu.”—IOANE 15:14.
1, 2. (a) Ko e heigoa e tau feakiaga kehekehe he tau kapitiga ha Iesu? (e) Ko e ha ne aoga lahi ai ke eke a tautolu mo tau kapitiga ha Iesu?
KO E tau tagata taane ne nonofo mo Iesu he poko tapa ki luga kua ō mai he tau feakiaga kehekehe. Ko e lafu ko Peteru mo Aneterea ko e tau tagata takafaga ika. Ko Mataio ko e tagata oko tukuhau fakamua—ko e tagata he feua ne vihiatia he tau Iutaia. Ko e falu, tuga a Iakopo mo Ioane ne liga iloa a Iesu mai he vahā tama. Falu foki ne tuga a Natanielu, ne liga gahoa laia e tau he iloa a Iesu. (Ioane 1:43-50) Ka ko lautolu oti ne fakalataha ke he pō Paseka mahuiga ia i Ierusalema ne talitonu ko Iesu e Mesia ne mavehe mai, ko e Tama he Atua moui. (Ioane 6:68, 69) Kua liga mafanatia e tau loto ha lautolu ke logona a ia ne talahau ki a lautolu: “Ka e totoku atu e au a mutolu ko e tau kapitiga; ha kua fakailoa atu e au kia mutolu e tau mena oti ne fanogonogo ai au ke he haku a Matua.”—Ioane 15:15.
2 Ko e tau kupu ia ha Iesu ke he tau aposetolo tua fakamooli haana kua fakamatapatu ke he tau Kerisiano fakauku oti he vahā nei, ti fakalaulahi atu, ke he tau hoa ha lautolu ko e ‘tau mamoe kehe.’ (Ioane 10:16) Pete e feakiaga ha tautolu, maeke ia tautolu ke moua e lilifu he kapitiga mo Iesu. Kua aoga lahi mahaki e kapitiga ha tautolu mo ia ha kua eke mo tau kapitiga haana ati kapitiga foki a tautolu mo Iehova. Kua nakai maeke mooli ke futiaki fakatata atu ki a Iehova ka nakai futiaki fakatata atu fakamua ke he Keriso. (Totou Ioane 14:6, 21.) Ko e heigoa mogoia ha tautolu ka taute ke eke mo tau kapitiga ha Iesu ti fakatumau ki ai? Ato fakatutala ke he matakupu aoga ia, kia kumikumi a tautolu ke he fakafifitakiaga ni ha Iesu he eke mo kapitiga mitaki mo e kitia e mena ka fakaako e tautolu mai he puhala ne tali atu e tau tutaki haana ki a ia.
Fakafifitakiaga ha Iesu he Eke mo Kapitiga Mitaki
3. Ko e heigoa ne talahaua ai a Iesu?
3 “Tokologa kua fakaalofa atu [po ke, kapitiga] ke he tagata maukoloa,” he tohi he patuiki pulotu ko Solomona. (Fakatai 14:20) Kua fakakite he onoonoaga ia e fatuakiloto he tau tagata nakai mitaki katoatoa ke moua e tau kapitiga he fakavē ke he mena ka moua e lautolu ka e nakai ke he mena ka foaki atu e lautolu. Ne nakai fakakite e Iesu e lolelole pihia. Ti nakai fakaohooho a ia he tuaga fakatupe mo e mahuiga he tagata. Mooli, ne logona hifo e Iesu e fakaalofa ma e pule fuata muhukoloa ti uiina a ia ke eke mo tutaki haana. Pete ia, ne fekau e Iesu e tagata ia ke fakafua e tau koloa haana ti foaki ke he tau tagata nonofogati. (Mare. 10:17-22; Luka 18:18, 23) Ne talahaua a Iesu he kapitiga mo lautolu ne nonofogati mo e fakavihia, ka e nakai ha ko e matutakiaga haana mo lautolu ne mautū mo e he tuaga tokoluga.—Mata. 11:19.
4. Ko e ha ne talahau kua nakai mitaki katoatoa e tau kapitiga ha Iesu?
4 Mooli, ko e tau kapitiga ha Iesu ko e tau tagata nakai mitaki katoatoa. Ne fai magaaho a Peteru ne kaumahala ke kitia e tau mena mai he puhala fakaagaaga. (Mata. 16:21-23) Ne fakakite e Iakopo mo Ioane e aga foli tuaga he magaaho ne ole a laua ke foaki e Iesu ki a laua e tau tuaga tokoluga he Kautu. Ne fakaita he gahua ha laua e falu aposetolo, ti fakalagalaga tumau he matakupu he tuaga tokoluga e taufetoko. Ka ko Iesu, ne fakauka a ia he lali ke fakahako e tau manamanatuaga he tau kapitiga haana ti nakai mukamuka foki ke hogohogo manava ki a lautolu.—Mata. 20:20-28.
5, 6. (a) Ko e ha ne fakatumau a Iesu ke kapitiga mo e laulahi he tau aposetolo haana? (e) Ko e ha ne fakaoti e Iesu e kapitiga haana mo Iuta?
5 Ne fakatumau a Iesu ke kapitiga mo e tau tagata nakai mitaki katoatoa nei, nakai ha kua molea e tokanoa po kua matapouli ke he tau nakai mitaki katoatoa ha lautolu. Ka kua fifili e ia ke hagaaki ke he tau manatu mo e tau mahani mitaki ha lautolu. Ma e fakatai, ne momohe a Peteru, Iakopo, mo Ioane ka e nakai lalago a Iesu he magaaho matematekelea lahi haana. Kua maama ai e hogohogo manava ha Iesu ki a lautolu. Pete he pihia, ne kitia e ia e tau manatu mitaki ha lautolu, he pehē: “Kua makai ni e loto, ka ko e tino kua lolelole.”—Mata. 26:41.
6 Ke he taha faahi, ne fakaoti e Iesu e kapitiga haana mo Iuta Isakariota. Pete he fakatumau a Iuta ke fakakite e fakafetuiaga kapitiga, ne mailoga e Iesu kua fakaatā he kapitiga tata fakamua nei e loto haana ke kelea. Ha kua kapitiga a Iuta mo e lalolagi, ne taute e ia a ia mo fī ke he Atua. (Iako. 4:4) Ti kua fitā he fakafano kehe e Iesu a Iuta he magaaho ne tala age a Ia ke he tau aposetolo toko 11 tua fakamooli ne toe, ko e tau kapitiga Haana a lautolu.—Ioane 13:21-35.
7, 8. Fakakite fēfē e Iesu e fakaalofa haana ma e tau kapitiga haana?
7 Ne nakai onoono a Iesu ke he tau hehē he tau kapitiga mahani fakamooli haana ti taute e tau mena mitaki lahi ma lautolu. Ke tuga anei, ne liogi a ia ke he Matua haana ke puipui a lautolu he tau kamatamataaga ha lautolu. (Totou Ioane 17:11.) Ne fakakite e Iesu e manamanatu ke he tau kūkū ha lautolu. (Mare. 6:30-32) Ti nakai fiafia ni a ia ke tala age ki a lautolu e tau manatu haana, ka e fanogonogo mo e maama foki e tau manatu mo e tau logonaaga ha lautolu.—Mata. 16:13-16; 17:24-26.
8 Ne moui mo e mate a Iesu ma e tau kapitiga haana. Ti iloa mooli e ia kua lata ia ia ke foaki e moui haana ha ko e poakiaga tonu ke lalago aki e tuaga fakafili tonu he Matua haana. (Mata. 26:27, 28; Hepe. 9:22, 28) Ka e foaki e Iesu e moui haana ke fakakite aki e fakaalofa haana. “Nakai mua ni e fakaalofa he taha ke he fakaalofa nai,” he talahau e Iesu, “kia tuku atu e taha hana moui ke hukui aki hana tau kapitiga.”—Ioane 15:13.
Tali Atu Fēfē e Tau Tutaki ke he Aga Kapitiga ha Iesu?
9, 10. Tali atu fēfē e tau tagata ke he fakamokoi ha Iesu?
9 Ne fakamokoi a Iesu he foaki e magaaho, fakaalofa hofihofi, mo e tau koloa haana. Ko e fua, ne futiaki e tau tagata ki a ia mo e fiafia ke fafati atu ki a ia. (Luka 8:1-3) Mai he tau mena ne tutupu ki a ia, ne maeke a Iesu ke pehē: “Kia foaki atu e mutolu, ti foaki mai ai kia mutolu; to foaki mai e lautolu ke he tapulu ha mutolu ko e fafatiaga mitaki, kua fofota mo e lulululu ai, ke puke mo e puā ki tua. Ha ko e fafati ke fafati atu ai e mutolu, to fafati mai ai kia mutolu.”—Luka 6:38.
10 Mooli, ne lali falu ke fakalataha mo Iesu ha kua fai mena ne manako ke moua mai ia ia. Ko e tau kapitiga fakavai nei ne tiaki a Iesu he magaaho ne nakai maama e lautolu e falu mena ne talahau e ia. He nakai talitonu ki a Iesu, ne mafiti a lautolu ke hehē e tau manatu ti fakaheu a ia. Ke he taha faahi, ne fakamooli e tau aposetolo ki a ia. Kua fa kamatamata e kapitiga ha lautolu mo Keriso, ka e taute e lautolu e tau mena kua fahia a lautolu ki ai ke lalago a ia he tau magaaho mitaki mo e kelea. (Totou Ioane 6:26, 56, 60, 66-68.) He pō fakahiku he moui haana he lalolagi, ne fakakite e Iesu e loto fakaaue haana ke he tau kapitiga haana, he pehē: “Ko mutolu nā, ne tumau a mutolu kia au ke he tau mena ne kamatamata ai au.”—Luka 22:28.
11, 12. Fakamafana fēfē e Iesu e tau tutaki, mo e tali atu fēfē a lautolu?
11 He nakai leva he nava e Iesu e tau tutaki haana ma e mahani fakamooli ha lautolu, ne tiaki he tau tagata nei ni a ia. Ne fakaatā fakakū e lautolu e matakutaku tagata ke maluia e fakaalofa ha lautolu ma e Keriso. Ne liu foki a Iesu fakamagalo a lautolu. He mole e mate mo e liu tu mai haana, ne fakakite a ia ki a lautolu mo e fakamafana age kua tumau e kapitiga haana mo lautolu. Lafi ki ai, ne kotofa e ia ki a lautolu e fekau uho—ke eke e “tau motu oti kana” mo tau tutaki mo e tau tagata fakamatala hagaao ki a ia “ke he fakaotiaga he lalolagi.” (Mata. 28:19; Gahua 1:8) Tali atu fēfē e tau tutaki?
12 Ne fakamakai e tau loto mo e tau momoui he tau tutaki ke fakamatala e fekau he Kautu. Ha kua lalago he agaaga tapu ha Iehova, nakai leva ti puke a Ierusalema he tau fakaakoaga ha lautolu. (Gahua 5:27-29) Ne nakai taofi foki he fakamatakutaku he mate a lautolu mai he omaoma ke he poaki ha Iesu ke taute tutaki. He gahoa laia e tau tau ne moua e lautolu e poaki ha Iesu, ne maeke he aposetolo ko Paulo ke tohia kua fakamatala e tala mitaki “ke he tau tagata oti ke he lalolagi.” (Kolo. 1:23) Mooli ai, ne fakakite he tau tutaki nei kua loto fakaaue a lautolu ke he fakafetuiaga kapitiga ne moua e lautolu mo Iesu!
13. Ko e tau puhala fe ne fakaatā he tau tutaki ha Iesu e tau fakaakoaga haana ke hufia a lautolu?
13 Ne fakaatā foki e lautolu ne eke mo tau tutaki e tau fakaakoaga ha Iesu ke hufia ke he tau momoui ha lautolu takitokotaha. Ma e tokologa, kua lata ke taute e tau hikihikiaga lalahi ke he tau mahani mo e tau aga ha lautolu. Ko e falu tutaki foou he magaaho fakamua ko e tau tagata mahani Sotoma, tau tagata faivao, tau tagata konahia, po ke tau tagata kaihā. (1 Kori. 6:9-11) Ko e falu kua lata ke hiki e tau aga ha lautolu hagaao ke he tau tagata kehe. (Gahua 10:25-28) Ka e omaoma agaia a lautolu ki a Iesu. Ne tuku kehe e lautolu e tagata tuai mo e tapulu ke he tagata foou. (Efeso 4:20-24) Ne iloa mitaki e lautolu “e finagalo a Keriso,” he maama mo e fifitaki e puhala manamanatu mo e gahua haana.—1 Kori. 2:16.
Kapitiga mo Keriso he Vahā Nei
14. Ko e heigoa ne mavehe e Iesu ke taute he magahala he “fakaotiaga he lalolagi”?
14 Tokologa e tau Kerisiano he senetenari fakamua ia ne iloa fakatagata a Iesu po ke kitia a ia he mole e fakaliu tu mai haana. Maaliali ai, kua nakai moua e tautolu e lilifu ia. Maeke fēfē mogoia a tautolu ke kapitiga mo Keriso? Taha puhala ko e omaoma ke he takitakiaga ne foaki he vahega fekafekau fakamoli mo e loto matala, ko e tau matakainaga ha Iesu ne fakauku he agaaga ne momoui agaia he lalolagi. Ne mavehe mai a Iesu to kotofa e ia e fekafekau nei he magahala he “fakaotiaga he lalolagi” ke “pule ke he hana tau mena oti.” (Mata. 24:3, 45-47) He vahā nei, kua tokologa lahi a lautolu ne lali ke kapitiga mo Keriso kua nakai ko e tau tagata he vahega fekafekau nei. Fakaohooho fēfē he tali atu ha lautolu ke he takitakiaga ne moua mai he vahega fekafekau fakamoli e aga kapitiga ha lautolu mo Keriso?
15. Ko e heigoa ka taute e tagata ke vahega mo e tau mamoe po ke tau koti?
15 Totou Mataio 25:31- 40. Ne ui e Iesu a lautolu he vahega fekafekau fakamoli ko e tau matakainaga haana. He fakataiaga hagaao ke he veheveheaga he tau mamoe mai he tau koti, ne talahau fakamaaliali e Iesu kua hagaaki fakalahi a ia ke he puhala ne fehagai a tautolu ke he tau matakainaga haana. Ha kua pehē a ia, ko e matapatu ka fifili aki e mamoe mai he koti ko e puhala ne fehagai e tagata “ke he taha ne muikau ia lautolu ko e [haana] a tau matakainaga nai.” Ti, ko e matapatu puhala ne fakatātā e lautolu ne amaamanaki ke moui he lalolagi e manako ha lautolu ke kapitiga mo Keriso ko e lalago e vahega fekafekau fakamoli.
16, 17. Maeke fēfē ia tautolu ke fakakite kua kapitiga a tautolu mo e tau matakainaga he Keriso?
16 Ka amaamanaki a koe ke moui he lalolagi i lalo he Kautu he Atua, maeke fēfē ia koe ke fakakite kua kapitiga a koe mo e tau matakainaga he Keriso? Kia fakatutala a tautolu ke he tolu e puhala. Fakamua, he fakalataha loto katoatoa ke he gahua fakamatala. Ne poaki he Keriso e tau matakainaga haana ke fakamatala e tala mitaki ke he lalolagi katoa. (Mata. 24:14) Pete ia, to uka lahi ke he tau matakainaga he Keriso ne toe agaia he lalolagi he vahā nei ke hahamo e matagahua ia ka nakai fai lalagoaga mai he tau hoa ha lautolu ko e tau mamoe kehe. Mooli, ko e tau magaaho takitaha ne fakalataha e tau tagata he vahega he tau mamoe kehe ke he gahua fakamatala, kua lagomatai e lautolu e tau matakainaga he Keriso ke fakamooli e fekau uho ha lautolu. Kua loto fakaaue hokulo e Keriso mo e vahega fekafekau fakamoli mo e loto matala ma e aga kapitiga nei.
17 Ko e puhala ke uaaki kua maeke ia lautolu he vahega he tau mamoe kehe ke lagomatai e tau matakainaga he Keriso ko e lalago fakatupe e gahua fakamatala. Ne fakamalolō e Iesu e tau tutaki haana ke eke e tau kapitiga ma lautolu ni puhala he ‘tau koloa he mahani hepehepe.’ (Luka 16:9) Kua nakai kakano na maeke ia tautolu ke fakatau tupe ke kapitiga mo Iesu po ko Iehova. Ka e, he fakaaoga e tau koloa ha tautolu ke fakalaulahi aki e tau mena he Kautu, kua fakakite e tautolu e aga kapitiga mo e fakaalofa ha tautolu, nakai ke he tau kupu hokoia, ka e he “mahani [po ke, gahua] mo e fakamoli.” (1 Ioa. 3:16-18) Kua foaki e tautolu e lagomatai fakatupe pihia he fakalataha a tautolu ke he gahua fakamatala, he foaki tupe a tautolu ke talaga mo e leveki e tau fale he feleveiaaga ha tautolu, mo e he foaki noa e tautolu e tau tupe ke he gahua fakamatala he lalolagi katoa. Pete he tote po ke lahi e tupe ne foaki noa e tautolu, kua fakaaue mooli a Iehova mo Iesu ke he foaki fakamakai ha tautolu.—2 Kori. 9:7.
18. Ko e ha kua lata ia tautolu ke omaoma ke he takitakiaga ne fakavē ke he Tohi Tapu ne foaki he tau motua he fakapotopotoaga?
18 Puhala ke toluaki kua fakakite e tautolu oti ko e tau kapitiga he Keriso a tautolu, ko e kaufakalataha mo e takitakiaga ne foaki he tau motua he fakapotopotoaga. Ko e tau tagata taane nei kua kotofa he agaaga tapu i lalo he takitakiaga he Keriso. (Efeso 5:23) “Kia omaoma a mutolu ke he tau takitaki ha mutolu, mo e fifitaki a mutolu ki ai,” he tohi he aposetolo ko Paulo. (Hepe. 13:17) He falu magaaho, kua liga paleko ki a tautolu ke omaoma ke he takitakiaga ne fakavē ke he Tohi Tapu ne foaki he tau motua he fakapotopotoaga ki a tautolu. Tuga kua mailoga e tautolu e nakai mitaki katoatoa ha lautolu, ti liga fakahehē ai e onoonoaga ha tautolu ke he fakatonuaga mai ia lautolu. Pete ia, kua fiafia agaia a Iesu, ko e Ulu he fakapotopotoaga ke fakaaoga e tau tagata nakai mitaki katoatoa nei. Ti ko e puhala ne tali atu a tautolu ke he takitakiaga ha lautolu kua lauia mooli e kapitiga ha tautolu mo Keriso. Ka nakai hagaaki a tautolu ke he tau kūkū he tau motua ti fiafia ke muitua ke he takitakiaga ha lautolu, kua fakakite ai e fakaalofa ha tautolu ma e Keriso.
Matakavi ka Moua e Tautolu e Tau Kapitiga Mitaki
19, 20. Ko e heigoa ka moua e tautolu i loto he fakapotopotoaga, ti ko e heigoa foki ha tautolu ka fakatutala ki ai?
19 Kua fakatumau a Iesu ke leveki ki a tautolu nakai ni puhala he leoleoaga he tau leveki fakaalofa ka e pihia foki he foaki ki a tautolu e tau matua fifine mo e tau matakainaga mo e tau mahakitaga fakaagaaga i loto he fakapotopotoaga. (Totou Mareko 10:29, 30.) He magaaho fakamua ne kamata a koe ke fakalataha mo e fakatokatokaaga ha Iehova, fēfē e aga he tau magafaoa haau? Amanaki ni, kua lalago e lautolu e tau laliaga haau ke futiaki fakatata atu ke he Atua mo Keriso. Ka e hataki mai a Iesu to “eke foki e tagata mo fi he faoa hana” he falu magaaho. (Mata. 10:36) Kua mafanatia mooli ke iloa na maeke ia tautolu ke moua i loto he fakapotopotoaga a lautolu ka mua atu e pipiki mai ki a tautolu ke he matakainaga he tino!—Fakatai 18:24.
20 Tuga ne fakakite he fakafeleveia fakatagata ha Paulo he fakahikuaga he tohi haana ke he fakapotopotoaga i Roma, ne moua e ia loga e kapitiga tata. (Roma 16:8-16) Ne fakahiku he aposetolo ko Ioane e tohi ke toluaki haana ke he tau kupu: “Kua fakaalofa atu au ke he tau kapitiga takitokotaha.” (3 Ioa. 14) Mailoga ai foki ne feaki e ia loga e kapitiga mauokafua. Maeke fēfē ia tautolu ke muitua e fakafifitakiaga ha Iesu mo e tau tutaki fakamua atu he feaki mo e fakatumau ke kapitiga mitaki mo e tau matakainaga fakaagaaga ha tautolu? To fakatutala e vala tala ha tautolu ka mui mai ke he tali he hūhū nei.
To Tali Fēfē e Koe?
• Ko e heigoa e fakafifitakiaga ne fakatoka e Iesu he eke mo kapitiga mitaki?
• Tali atu fēfē e tau tutaki ke he aga kapitiga ha Iesu?
• Maeke fēfē ia tautolu ke fakakite kua kapitiga a tautolu mo Keriso?
[Fakatino he lau 14]
Ne fiafia a Iesu ke he tau manatu he tau kapitiga haana mo e tau logonaaga ha lautolu
[Tau Fakatino he lau 16]
Fakatātā fēfē e manako ha tautolu ke kapitiga mo Keriso?