Hiki he Tohi Tapu e Tau Momoui

Ko e ha ne fifili e tagata ne hagaaki e moui ke he tau pasikala afi, tau tulaki, mo e tau sipote, ke eke mo fekafekau tumau? Ko e heigoa ne omoi e tagata iloilo he pelē tupe ke vevete kehe mai he matagahua ia haana mo e lalago e magafaoa puhala he gahua mitaki? Ko e heigoa ne fakaohooho e fifine fuata ne tupu hake ko e taha he Tau Fakamoli a Iehova ne tiaki e tau fakaakoaga he Tohi Tapu mo e liu ai manamanatu ke he puhala moui haana? Manamanatu ke he tau mena ne talahau he tau tagata nei.

VALA TALA FAKATAGATA

HIGOA: TERRENCE J. O’BRIEN

TAU HE MOUI: 57

MOTU NE FANAU: AUSETALIA

MOUI FAKAMUA: FAKAAOGA HE TAU TULAKI, FIAFIA KE HE TAU PASIKALA AFI

MOUI HAAKU KUA MOLE: Ne tupu hake au he taone lavelave i Brisbane, ko e maaga lahi ha Queensland. Ko e tau Katolika e magafaoa haaku, ka e mole e tū e valu e tau moui haaku, ne oti e ō tapu ha mautolu ti nakai tala lotu. He hogofulu e tau moui haaku, ne hiki e magafaoa haaku ke he Gold Coast i Ausetalia. Ne nonofo a mautolu tata ke he mataafaga, ti fakaaoga e au e mataulu he vahā fuata mui haaku ke kakau mo e surfing.

Pete ia, ne nakai fiafia e vahā tama haaku. Ne toka he matua taane haaku e magafaoa ha mautolu he magaaho ne valu e tau haaku. Liu e matua fifine haaku fai taane, ti kua lofia tumau e kaina ha mautolu ke he kava mo e taufetoko. Taha pō, he mole e taufetoko vale lahi pauaki he tau matua haaku, ne nofo au he mohega haaku, ti omonuo ka fai hoana au, to nakai taufetoko au mo e hoana haaku. Pete ne tau lekua fakakaina, ko e magafaoa ha mautolu—ne tokoono e tama, matua fifine, mo e matua taane tutaki mai—ne fetataaki lahi.

He matahiku he vahā fuata mui haaku, tokologa e atu haaku ne totoko ke he fakatufono. Ne fakaaoga e lautolu e mariuana, tapaka, mo e falu tulaki, ti fakaaoga fakahehē e lautolu e kava. Ne putoia au ke he moui atāina pihia tuga he tau atu haaku. Ti fiafia foki au he heke pasikala afi. Pete he lagaua e pakia lahi haaku, ne matutaki e fiafia haaku ke he tau pasikala afi ti fifili ke heke e pasikala afi haaku ke he taha faahi i Ausetalia.

Pete ne ha ha ia au e atāina katoatoa, ne fa fakaagitau au ka manamanatu ke he tuaga he lalolagi mo e nakai manamanatu e tokologa ke he tau lekua he tagata. Ne loto lahi au ke iloa e kupu mooli hagaao ke he Atua, lotu, mo e tau tuaga he lalolagi. Ka ko e magaaho ne hūhū e au ke he tau patele Katolika tokoua, ne fakagogoa au he tau tali ha laua. Ne tutala au mo e tau akoako Porotesano kehekehe ke he tau matakupu ia ka kua hogohogo manava foki ke he tau tali ha lautolu. Ti fakatoka he kapitiga ke feleveia au mo Eddie, ko e taha he Tau Fakamoli a Iehova. Lagafā e fakatutala haaku mo Eddie, he tau magaaho takitaha ne fakaaoga e ia e Tohi Tapu ke tali e tau hūhū haaku. Mai he fakatutala fakamua, ne iloa e au kua moua tuai e au taha mena uho. Ka e he magaaho ia, ne nakai kitia e au e lata ke hiki e puhala moui haaku.

PUHALA NE HIKI HE TOHI TAPU E MOUI HAAKU: He fenoga haaku ke he taha faahi i Ausetalia, ne fakatutala foki au mo e taha Fakamoli, ne feleveia e au he fenoga haaku. Ka e he liu atu au ki Queensland, ne nakai fai matutakiaga atu foki mo e Tau Fakamoli ke ono e mahina.

Ti ko e taha aho he fano au ki kaina he tuku e gahua, ne kitia e au tokoua e tagata taane ne tauteute mitaki ne totō e tau kato he ō he puhalatū, ti fuafua manatu e au ko e Tau Fakamoli a Iehova a laua. Ne finatu au ki a laua, ti hako ni e manatu haaku, ati ole ai ki a laua ke fakaako e Tohi Tapu mo au. Ne kamata agataha au ke fano he tau feleveiaaga ne taute he Tau Fakamoli ti fano foki he fonoaga lahi ne fakahoko i Sydney he 1973. Ka e, he mogo ne iloa he magafaoa haaku, mua atu ke he matua fifine haaku, e mena hane taute e au ne tupetupe lahi a lautolu. Ko e mena nei mo e falu kakano foki ati fakaoti e lafiaga haaku mo e Tau Fakamoli. Ke he taha e tau, ne haga atu foki au ke he taha mena ne fiafia lahi au ki ai, ko e tā kilikiki.

Ka e fakahiku ai, ne mailoga e au ko e mogo ni ne logona e au e fiafia mooli ko e magaaho ne fakaako e au e Tohi Tapu mo e Tau Fakamoli a Iehova. Ne liu au matutaki mo lautolu ti kamata ke fano he tau feleveiaaga. Fakaoti foki e au e lafiaga haaku mo e tau kapitiga haaku ne fakaaoga tulaki.

Ko e mena ne omoomoi mooli au ke taute e tau hikiaga nei ko e mena ne fakaako e au hagaao ke he tagata he Tohi Tapu ko Iopu. Ko e Fakamoli motua mauokafua ka e totonu ne higoa ko Bill ne fakatutala tumau e Tohi Tapu mo au. He oti e fakaako ha maua he tala ki a Iopu, ne hūhū a Bill ki a au ko hai foki ne tukupau e Satani he nakai fekafekau katoatoa ke he Atua. (Iopu 2:3-5) Ne tohi hifo e au e tau tagata oti he Tohi Tapu ne iloa e au, ti fakahautoka a Bill he tali, “E, e, ko lautolu ia foki.” Ti ono fakahako a ia ki a au ti pehē, “Talahau pihia foki a Satani hagaao ki a koe!” Ne teitei tō au he nofoa haaku. To hoko ke he fakaakoaga ia, na iloa e au kua mooli e tau taofiaga ne fakaako e au. Ka kua maama e au mogonei e kakano kua lata ia au ke taute e tau mena ne fakaako e au. Fā e mahina he mole, ne papatiso au ko e taha he Tau Fakamoli a Iehova.

PUHALA NE AOGA KI A AU: Kua fakaatukehe au ke manatu ko e fēfē la e moui haaku mogonei ane mai nakai iloa e au ke moui fakatatau ke he tau puhala he Tohi Tapu. Liga kua fitā au he mate. Tokologa e tau kapitiga fakamua haaku ne mamate ha ko e tau tulaki po ke kava. Ti nakai fiafia foki e tau fakamauaga ha lautolu. Ka e manatu noa ni au to pihia foki e moui haaku.

Kua fai hoana au mogonei, mo e hoana haaku ko Margaret, hane gahua fiafia a maua he la ofisa he Tau Fakamoli a Iehova i Ausetalia. Nakai fai he magafaoa haaku ne fakalataha mo au ke he tapuakiaga ki a Iehova. Ka e he tau tau loga, kua fiafia au mo Margaret he fakaako e Tohi Tapu mo e tokologa e tagata takitaha mo e tau hoa mau ne hiki e tau momoui ha lautolu, tuga ne taute e au. He fakatokaaga ia, ne loga e kapitiga fulufuluola ha maua. Lafi ki ai, ko Margaret, ne feaki ko e Fakamoli, kua lagomatai au ke fakamooli e omonuo ne taute e au he teitei 40 e tau kua mole. Molea e 25 e tau, ne fiafia e fakamauaga ha maua. Pete he nakai taha e manatu ha maua ke he tau mena oti, ka e nakaila taufetoko a maua. Ne logona hifo tokoua e maua e loto fakaaue ke he Tohi Tapu ke lata mo e mena ia.

VALA TALA FAKATAGATA

HIGOA: MASAHIRO OKABAYASHI

TAU HE MOUI: 39

MOTU NE FANAU: SAPANĪ

MOUI FAKAMUA: TAGATA PELĒ TUPE

MOUI HAAKU KUA MOLE: Ne feaki hake au i Iwakura, ko e matakavi tote ne liga ke hafa e tulā he heke he tuleni mai i Nagoya. Ne manatu e au e matua fifine mo e matua taane haaku ko e tau tagata mahani totonu lahi. Ne iloa e au fakamui ko e matua taane haaku ko e yakuza, po ke kege, ne leveki e magafaoa tokolima ha mautolu mai ha ko e tau mahani kaihā. Ne inu kava lahi a ia he tau aho oti, ti he 20 e tau moui haaku, ne mate a ia he gagao ate (cirrhosis).

Ko e Korea e matua taane haaku, ti fa ekefakakelea he tau tagata he maaga e magafaoa ha mautolu. Ko e mena nei mo e falu lekua ati uka e vahā fuata mui haaku. Ne fakamau au ke fano he aoga tokoluga ka e fano lavea ni au ti oti he taha e tau. Fitā e fai fakamauaga au he tau leoleo, ti lafi e mena ia mo e ko au ko e hafa Korea ne uka au ke moua e gahua. Fakahiku ne moua e au e gahua, ka e pakia e tau matatuli haaku ti nakai maeke ke taute e tau gahua fakatino.

Ke leveki aki e moui haaku, ne kamata au ke pelē pachinko, ko e taha vahega pelē tupe ne fakaaoga he matini pinball. He magaaho ia, ne nofo au mo e tama fifine ne manako ke kumi e au e gahua aoga lahi mo e hoana a ia. Ka e lahi e tupe haaku ne moua he pelē tupe, ti nakai manako au ke hiki e puhala moui haaku.

PUHALA NE HIKI HE TOHI TAPU E MOUI HAAKU: Taha aho, ne hau e taha he Tau Fakamoli a Iehova ke he gutuhala ha maua mo e mai ki a au e tohi Life—How Did It Get Here? By Evolution or by Creation? Ne nakaila manamanatu au ke he hūhū nei. Pete ia, he oti e totou he tohi, ne talia e au ke fakaako fakalahi hagaao ke he Tohi Tapu. Na manamanatu tumau au ke he mena ka tupu he magaaho ka mate. Ko e tau tali mahino ne moua mai e au he Tohi Tapu ke he mena nei mo e falu matakupu foki ne taute au ke logona hifo kua tuga e mokulu e tau hinafi he tau mata haaku.

Ne kitia e au e lata ke fakagahua e tau mena ne fakaako e au mai he Tohi Tapu. Ti fakamau fakatufono e fakamauaga haaku, oti e ula, hifi e ulu loloa ne fakahū polone (blond), mo e fakameā e tino haaku. Ne oti foki e pelē tupe.

Nakai mukamuka ke taute e tau hikiaga oti nei. Ma e fakatai, nakai maeke au ke oti e ula tapaka haaku he malolō ni haaku. Ka e he fakamakamaka ke he liogi mo e falanaki ki a Iehova ko e Atua, ne maeke au ke oti ai. Ko e gahua fakamua foki haaku he mole e tiaki e pelē pachinko kua uka mooli ki a au. Ne hafa ni e tupe haaku ne moua ka fakatatai ke he tupe ne moua he pelē tupe, ti kua uka mo e mategūgū e gahua. Taha e kupu Tohi Tapu ne lagomatai au he magaaho uka ia ko e Filipi 4:6, 7. Ne pehē: “Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue. Ko e monuina foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu kia Keriso Iesu.” Kua moolioli e maveheaga nei ki a au he tau magaaho loga.

PUHALA NE AOGA KI A AU: Magaaho fakamua ne fakaako e au e Tohi Tapu mo e Tau Fakamoli a Iehova, ne nakai fiafia e hoana haaku. Ka ko e magaaho ne kitia e ia e tau hikiaga lalahi he mahani haaku, ne fakalataha foki a ia ke he tau magaaho fakaako haaku ti kamata ke fano mo au ke he tau feleveiaaga he Tau Fakamoli a Iehova. Mogonei, ko maua ko e Tau Fakamoli a Iehova. Ko e monuina mooli ke maeke ke fekafekau tokoua ke he Atua!

Ato fakaako e au e Tohi Tapu, ne manatu au kua fiafia au. Ka ko e mogonei, iloa e au e kakano he fiafia mooli. Ko e moui fakatatau ke he tau puhala he Tohi Tapu kua nakai mukamuka, ka e iloa mooli e au ko e puhala mitaki lahi a ia he moui.

VALA TALA FAKATAGATA

HIGOA: ELIZABETH JANE SCHOFIELD

TAU HE MOUI: 35

MOTU NE FANAU: TAU KAUTU KAUFAKALATAHA

MOUI FAKAMUA: MOUI KE LATA MO E TAU MATAHIKU VAHĀ TAPU

MOUI HAAKU KUA MOLE: Ne tupu hake au i Hardgate, ko e taone tote i fafo ha Glasgow i Sikotelani. He fitu e tau he moui haaku, ne eke e matua fifine haaku mo taha he Tau Fakamoli a Iehova, ti kamata ke fakaako e Tohi Tapu ki a au. He mogo ne 17 e tau he moui haaku, ne fiafia lahi au ke fakalataha mo e tau kapitiga aoga haaku—he ō ke he tau koli pō, fanogonogo ke he tau kofe heavy metal, mo e inu kava. Mamao ligo e tau mena fakaagaaga he manamanatuaga haaku. Ne moui au ke lata mo e tau matahiku vahā tapu. Ka e hiki oti e tau mena ia he tū e 21 e tau haaku.

Ne fano au ke feleveia mo e falu magafaoa haaku i Ailani Tokelau. He ha ha i ai, ne kitia e au e foleni fakaaliali Orange Walk he tau Porotesano. Ko e vihiatia mo e fili tagata lahi mahaki ne kitia e au he tau Porotesano mo e tau Katolika he magaaho ia ne ofomate au. Ne lagomatai au ke fakalotomatala. Ne manatu e au e tau mena ne fakaako he matua fifine haaku ki a au mai he Tohi Tapu mo e iloa kua nakai talia he Atua a lautolu ne fakaheu e tau puhala fakaalofa haana. Ti manatu agataha e au kua apituki au he tutuli e tau mena ne fiafia au ki ai, ka e fakaheu e puhala ne manako e Atua ke moui ai au. Ne fifili au ka liu au ki kaina i Sikotelani, to kumikumi fakamatafeiga e au e mena ne fakaako he Tohi Tapu.

PUHALA NE HIKI HE TOHI TAPU E MOUI HAAKU: He magaaho fakamua ne liu atu au ke he feleveiaaga he Tau Fakamoli a Iehova he maaga haaku, ne maimainā mo e hopoate au. Ka e fakafeleveia fakamitaki he tau tagata oti au. He kamata au ke fakagahua e tau mena ne fakaako e au mai he Tohi Tapu, ne fakakite he matakainaga totonu lahi he fakapotopotoaga e fiafia pauaki ki a au. Ne lagomatai mooli he matakainaga fifine ia au ke liu eke mo vala he fakapotopotoaga. Ko e tau kapitiga haaku fakamua ne matutaki ke uiina au ke ō ke he tau koli pō, ka e tala age au ki a lautolu kua manamanatu lahi au ke moui fakatatau ke he tau puhala he Tohi Tapu. Fakahiku, ne oti e matutaki ha lautolu mo au.

He magaaho kua mole, ne kitia hokoia e au e Tohi Tapu ko e tohi matafakatufono. Kua hiki e onoonoaga haaku mogonei. Kamata tuai au ke kitia e tau tagata i loto he Tohi Tapu ko e tau tagata mooli ne fai logonaaga mo e fai lolelole, tuga ni au. Ne fai hepehepe foki a lautolu, ka kua fakamagalo e Iehova ko e Atua a lautolu he magaaho ne fakatokihala mooli a lautolu. Ne mauokafua au pete he haga kehe au mai he Atua he fuata, to fakamagalo e ia au mo e fakanimo e tau hepehepe fakamua haaku ka eketaha au ke fakafiafia a ia.

Ne lauia mitaki foki e mahani he matua fifine haaku ki a au. Pete he tiaki e au e Atua, ne nakai tiaki ai he matua fifine haaku. Ko e fakafifitakiaga mauokafua haana he mahani fakamooli ne taute au ke mailoga kua aoga lahi e lali ke fekafekau ki a Iehova. He mogo ne tote au ti fano mo e matua fifine haaku ke fakamatala he taha gutuhala ke he taha gutuhala, ne nakai fiafia au ki ai ti nakai manamanatu foki au ke fakaaoga e tau tulā loga ke fakamatala ke he tau tagata. Ka ko e mogonei, ne fifili au ke fakagahua e maveheaga ha Iesu ia Mataio 6:31-33. Pehē a ia: “Aua neke fakaatukehe a mutolu, mo e pehe age, To kai e tautolu ha ha, po ke inu e tautolu ha ha, po ke tapulu a tautolu ha ha? . . . Ha ko e mena fioia he Matua ha mutolu ha ha he lagi kua aoga e tau mena oti ia kia mutolu. Ka kia kumikumi fakamua a mutolu ke he kautu he Atua mo e hana tututonu, ati lafi atu ai e tau mena oti ia kia mutolu.” Nakai leva e mole e papatiso haaku ke eke mo taha he Tau Fakamoli a Iehova, ne fakaoti e au e gahua tupe tumau, moua e gahua vala magaaho, ti eke mo fekafekau mau.

PUHALA NE AOGA KI A AU: He vahā fuata haaku mo e moui ke lata mo e tau matahiku vahā tapu, ne nakai katoatoa e fiafia haaku. Ne gatigati e moui haaku. Ka ko e mogonei ha kua putoia katoatoa au ke he fekafekauaga ki a Iehova, kua logona hifo e au e fiafia. Kua fai kakano mo e aoga e moui haaku. Kua fai taane au mogonei, ti ahiahi he taane haaku mo au e tau fakapotopotoaga kehekehe he Tau Fakamoli a Iehova he tau faahi tapu takitaha ke fakamalolō a lautolu. Onoono au ke he gahua nei ko e kotofaaga kua mua atu he moui haaku. Kua loto fakaaue lahi au ki a Iehova he liu foaki mai ki a au e magaaho!

[Blurb he lau 27]

“Mai he fakatutala fakamua, ne iloa e au kua moua tuai e au taha mena uho. Ka e he magaaho ia, ne nakai kitia e au e lata ke hiki e puhala moui haaku”

[Blurb he lau 29]

Nakai maeke au ke oti e ula tapaka haaku he malolō ni haaku. Ka e he fakamakamaka ke he liogi mo e falanaki ki a Iehova ko e Atua, ne maeke au ke oti ai”

[Blurb he lau 30]

“He magaaho kua mole, ne kitia hokoia e au Tohi Tapu ko e tohi matafakatufono. Kua hiki e onoonoaga haaku mogonei. Kamata tuai au ke kitia e tau tagata i loto he Tohi Tapu ko e tau tagata mooli ne fai logonaaga mo e fai lolelole, tuga ni au”