Hiki he Tohi Tapu e Tau Momoui

KO E heigoa ne fakaohooho e tagata taane ke liu mai ke he feakiaga fakalotu ne tafea kehe mai a ia? Puhala fe he fuata taane ne moua e matua taane fakatai ne manako lahi a ia ki ai he moui katoa haana? Totou e talahauaga he tau tagata nei.

“Lata au ke liu ki a Iehova.”—ELIE KHALIL

TAU NE FANAU: 1976

MOTU NE FANAU AI: CYPRUS

MOUI FAKAMUA: TAMA TAANE MOUMOU KOLOA

MOUI HAAKU KUA MOLE: Ne fanau au i Cyprus ka e tupu hake i Ausetalia. Ko e Tau Fakamoli a Iehova e tau matua haaku, ti eketaha a laua ke feaki i loto ia au e fakaalofa ki a Iehova mo e haana Kupu, ko e Tohi Tapu. Ka e he tau tau fuata mui haaku, ne kamata au ke totoko. Ne hola au ka pō ke feleveia mo e falu fuata mui. Ne kaihā e mautolu e tau motokā mo e loga atu foki e tau lekua ne taute.

He mogo fakamua, ne taute fufū e au e tau mena ia he matakutaku neke nakai fiafia e tau matua haaku. Ka e fakahiku ti galo e matakutaku ia haaku. Ne fakatū kapitiga au mo e tau tagata ne momotua atu ia au ne nakai fakaalofa ki a Iehova, ti fakaohooho kelea a lautolu ki a au. Fakahiku, ne tala age e au ke he tau matua haaku kua nakai fia loto au ke taute ha mena taha mo e tua ha laua. Ne fakamanavalahi a laua he lali ke lagomatai au, ka e fakaheu e au e tau laliaga oti ha laua. Ne loto malipilipi e tau matua haaku.

He fano kehe mai au he kaina, ne kamata au ke fakataitai e tau tulaki kona, hoko foki ke tō mo e sela e tau mariuana loga. Ne kelea lahi e puhala moui haaku ti lahi e magaaho ne patī au he tau kalapu. Ne ita vave foki au. Ka fai tagata ne talahau po ke taute taha mena ne ai fiafia au ki ai, ne tupu e ita haaku, ti fa tui kalaga ke he tau tagata mo e keli a lautolu. Ne taute e au e tau mena oti ne fakaako ki a au ke nakai taute ko e Kerisiano.

PUHALA NE HIKI HE TOHI TAPU E MOUI HAAKU: Ne kapitiga tata au mo e taha tagata ne fakaaoga tulaki ne mate e matua taane haana he tote agaia a ia. Ne fa aala a maua ti mule ka pō he tutala. Falu he tau pō ia, ne tutala mai a ia he momoko lahi haana he ai fai matua taane. Ha kua fakaako au mai he vahā tama ke he amaamanakiaga he liu tu mai, ne nakai leva ti feiga au he tala age ki a ia hagaao ki a Iesu—na liu fakatu mai e ia a lautolu ne mamate ti mavehe mai a ia to liu foki a ia ke taute pihia he vahā i mua. (Ioane 5:28, 29) “Manamanatu la ke he magaaho ka liu a koe ke kitia e matua taane haau,” he ui e au. “Maeke a tautolu oti ke moui tukulagi he Parataiso he lalolagi.” Ne aamotia he tau manatu ia e loto he kapitiga haaku.

He tau mogo kehekehe, ne ta hake mai he kapitiga haaku e tau matakupu tuga e tau aho fakamui po ke taofiaga he Atua Tolu Taha. Ne tamai e au e Tohi Tapu haana ti fakakite age ki a ia e tau kupu tohi kehekehe ne fakakite e kupu mooli hagaao ki a Iehova ko e Atua, Iesu, mo e tau aho fakamui. (Ioane 14:28; 2 Timoteo 3:1-5) He lahi e tutala haaku ke he kapitiga haaku hagaao ki a Iehova, ne au atu e manamanatu au hagaao ki a Iehova.

Fano fakahaga ai, ko e tau tega he kupu mooli he Tohi Tapu ne kua nakaila tupu ia he loto haaku—tau tega ne lali fakalahi e tau matua haaku ke tō—ne kamata agataha ai ke tupu. Ma e fakatai, falu magaaho ka haia au he patī mo e fakaaoga e tau tulaki mo e tau kapitiga haaku, ne amanaki au ti kamata ke manamanatu hagaao ki a Iehova. Ne tokologa e tau kapitiga haaku ne pehē ke fakaalofa ke he Atua, ka e nakai fakakite pihia he tau mahani ha lautolu. He nakai manako ke tuga a lautolu, ne mailoga e au e mena haaku kua lata ke taute. Kua lata ia au ke liu ki a Iehova.

Mooli, ko e iloa e mena ke taute mo e taute ai ko e tau mena kehekehe ua. Kua mukamuka e falu hikiaga ke taute; ne nakai uka lahi au ke tiaki e fakaaoga he tau tulaki. Ne mumutu kehe foki au mai he tau kapitiga tuai haaku, ti kamata ke fakaako e Tohi Tapu mo e motua Kerisiano.

Ka ko e falu hikiaga kua uka lahi. Ne uka lahi mahaki ke tautaofi e ita haaku. Falu magaaho ne mitaki fakakū au ti auhia he liu taute. Ne kelea e logonaaga haaku he mogo fakamui he manatu kua kaumahala au. He loto lolelole, ne fina atu au ke he motua ne fakaako e Tohi Tapu ki a au. Ne lahi e fakauka mo e totonu haana, ne eke a ia mo punaaga mooli he fakamafanaaga. Taha e mogo ne fekau e ia au ke totou e vala tala he The Watchtower hagaao ke he aoga ke nakai mahala.a Ne fakatutala a maua ke he tau lakaaga ka taute e au he mogo ka ita au. Fano fakahaga ai, he tokaloto e vala tala mo e lahi e liogi ki a Iehova, ne maeke au ke fakatotoka e ita haaku. Fakahiku, ia Aperila 2000, ne papatiso au mo taha he Tau Fakamoli a Iehova. Ne fiafia lahi e tau matua haaku.

PUHALA NE AOGA KI A AU: Kua moua e au mogonei e mafola he loto mo e meā he manamanatuaga, he iloa kua nakai liu au ke takiva e tino haaku aki e tau tulaki po ke mahani kelea. Pete ne tau mena ne taute e au, ko e gahua, fano ke he feleveiaaga Kerisiano, po ke taute falu fakafiafiaaga, kua lahi atu e fiafia haaku. Moua e au e onoonoaga mitaki he moui.

Kua fakaaue au ki a Iehova ma e tau matua haaku, he nakai nimo au. Ne manamanatu foki au ke he tau kupu ha Iesu he Ioane 6:44: “Nakai maeke ia taha ke hau kia au, ka nakai futia mai he Matua ne fakafano mai au.” Kua aamotia au ke manamanatu kua maeke au ke liu mai ki a Iehova ha kua futiaki mai e ia au.

“Manako lahi au ke fai matua taane.”—MARCO ANTONIO ALVAREZ SOTO

TAU NE FANAU: 1977

MOTU NE FANAU: CHILE

MOUI FAKAMUA: TAGATA HE MATAKAU LOLOGO DEATH-METAL

MOUI HAAKU KUA MOLE: Ne feaki hake he matua fifine haaku au i Punta Arenas, ko e taone fulufuluola he Strait ha Magellan ne tata ki luga he faahi toga ha Amerika Toga. Ne tau vevehe e tau matua haaku he mogo ne lima e tau haaku he moui, ti ha ha ia au e logonaaga kua tiaki. Ne manako lahi au ke fai matua taane.

Ne fakaako Tohi Tapu e matua fifine haaku mo e Tau Fakamoli a Iehova, ti uta e ia au ke he tau feleveiaaga faka-Kerisiano he Fale he Kautu. Ka kua nakai fiafia au ke he tau feleveiaaga, ti ita lahi au ka o atu he puhala. Mogo ne 13 e tau haaku, ne oti pōpō e fano haaku he tau feleveiaaga.

He mogoia, kua ha ha ia au e fiafia ke he tau leo kofe, ti mailoga e au ko e taleni pauaki haaku a ia. He 15 e tau he moui, ne tā e au e tau leo kofe heavy-metal mo e death-metal he tau faiagahau, tau fale kava, mo e tau fakafiafiaaga ikiiki. Ko e lafi haaku mo e tau tagata taleni he tā leo kofe ne fakatupu ia au e fiafia ke he tau leo kofe tuai. Ne kamata au ke fano he aoga tā leo kofe he matakavi. He 20 e tau he moui, ne hiki au ke he taone ko Santiago ke fakalaulahi atu e tau fakaakoaga haaku. Matutaki foki au ke he tau matakau tā lologo heavy-metal mo e death-metal.

He tau magaaho oti nei, ne lauia kelea au mo e tau logonaaga matimati. He lali ke fakatote hifo e tau logonaaga ia, ne kona kava au mo e fakaaoga e tau tulaki mo lautolu he matakau tā kofe, ne eke e au mo magafaoa haaku. Ne mahani liuliu au, ti kitia ai ke he foliga haaku. Ne tui e au e tau tapulu uli, fakatupu e hafe, ti fakaloloa e ulu haaku ti teitei hoko hifo ke he kupu manava haaku.

Lagaloga ai, ha ko e mahani haaku, ne putoia au ke he taulatau ti fai lekua mo e tau matafakatufono. Taha mogo ne kona au, ne tau atu au ke he matakau sela tulaki ne kunuene ki a au mo e tau kapitiga haaku. Ne keli lahi he tau tagata fakafua tulaki au ti mapaki e kauloa haaku.

Ka ko e mamahi lahi mahaki haaku kua mai ni he tau tagata ne tata lahi mahaki ki a au. He taha aho ne iloa e au kua leva tuai e nakai mahani fakamooli he kapitiga fifine haaku mo e kapitiga uho haaku, ti fufū he tau kapitiga oti haaku mai ia au. Ne loto malipilipi au.

Ne liu atu au ki Punta Arenas, ti kamata au ke fakaako tā leo kofe mo e gahua ko e tagata tā kofe kili lahi (cello). Ne matutaki foki au ke tā kofe ti tapaki leo kofe mo e tau matakau heavy-metal mo e death-metal. Ne feleveia au mo e tama fifine mata fulufuluola ne higoa ko Sussan, ti kamata a maua ke nonofo tokoua. Fai mogo he mole, ne iloa e Sussan kua talitonu e matua fifine haana ke he fakaakoaga he Atua Tolu Taha ka e nakai talitonu au. “Ti ko e heigoa e tala mooli?” he hūhū mai e ia ki a au. Ne tali e au na iloa e au kua nakai mooli e fakaakoaga he Atua Tolu Taha ka e nakai maeke ia au ke fakamooli mai he Tohi Tapu. Ka e iloa e au a ia kua maeke. Ne tala age au ki a ia kua maeke e Tau Fakamoli a Iehova ke fakakite age ki a ia e tala mooli mai he Tohi Tapu. Ti taute e au e taha mena ne kua totou tau tuai he nakai taute e au—ne liogi au ke he Atua mo e ole ke he lagomataiaga haana.

Gahoa e aho he mole, ne kitia e au e tagata taane ne fa mahani, ti hūhū au ki ai ko ia kia ko e taha he Tau Fakamoli a Iehova. Pete he vivivivi he kitia e foliga he tino haaku, ne tali totonu e ia e tau hūhū haaku hagaao ke he tau feleveiaaga he Fale he Kautu. Ne iloa tonuhia e au ko e feleveiaaga nei ko e tali ke he liogi haaku. Ne fano au ke he Fale he Kautu ti nofo he tau atu nofoa fakahiku i tua ke nakai fai tagata ka kitia au. Ka e tokologa ne mailoga au mai he tau aho ne fa fina atu au he tau feleveiaaga he vahā tote. Ne fakafeleveia e lautolu au mo e peka mafanatia ki a au ti logona hifo e au e mafola lahi mahaki. Tuga ni kua hau au ki kaina. Mogo ne kitia e au e tagata taane ne fakaako e Tohi Tapu mo au he mogo ne tote, ne ole au ki a ia ke liu ke fakaako mo au.

PUHALA NE HIKI HE TOHI TAPU E MOUI HAAKU: He taha aho ne totou e au e Tau Fakatai 27:11, ne pehē: “Haku tama na e, kia iloilo ai a koe, kia fiafia ai haku loto.” Ne fiafia lahi au he manamanatu kua maeke e tagata tokolalo ke fakafiafia e Tufuga he lagi mo e lalolagi katoatoa. Ne mailoga e au ko Iehova ko e Matua Taane ne kua kumi e au he moui katoa haaku!

Ne manako au ke fakafiafia e haaku Matua he lagi mo e taute e finagalo haana, ka kua leva lahi e fakatupa au ke he tau tulaki mo e kava. Ne hokotia au ke maama e fakaakoaga ha Iesu ne fakamau ia Mataio 6:24, ne pehē kua “nakai maeke ia taha ke fekafekau ke he na iki tokoua.” He taufetului au ke taute e tau hikiaga, ko e matapatu fakaakoaga ne fakamau he 1 Korinito 15:33 ne lauia lahi ai au: “Ko e feoaki mo lautolu kua mahani kelea kua kelea ai e tau mahani mitaki.” Ne mailoga e au kua nakai maeke ia au ke fakamamutu e tau aga hagahagakelea haaku kaeke ke matutaki au ke fakatumau au ke he tau matakavi pihia mo e lafi mo e tau tagata pihia. Maaliali e fakatonuaga he Tohi Tapu: Kua lata au ke taute e tau hikiaga lalahi ke fakamamutu mai he tau mena kua fakatupetupe au.—Mataio 5:30.

Ko e fiafia haaku ke he tau leo kofe ne taute e fakamamutu he tā leo kofe heavy-metal ko e fifiliaga kua mua atu e uka ne taute e au. Ka e mai he lagomatai he tau kapitiga haaku i loto he fakapotopotoaga, ati maeke au ke fakamamutu kehe. Ne fakaoti e inu kava lahi mo e fakaaoga he tau tulaki haaku. Ne hifi foki e au e ulu haaku, hifi e hafe haaku, ti nakai tui ni he tau tapulu uli. Magaaho ne tala age e au ki a Sussan kua manako tuai au ke hifi e ulu haaku, ne fia iloa lahi a ia he kakano. Ne pehē a ia, “Ko e fano fai au mo koe ke kitia e mena nei ko e Fale he Kautu!” Ne fiafia a ia ke he mena ne kitia e ia i ai, ti nakai leva ne kamata a ia ke fakaako e Tohi Tapu. Fakahiku ai ne mau a maua mo Sussan. He 2008, ne papatiso a maua ko e Tau Fakamoli a Iehova. Kua fiafia a maua ke fakalataha mo e matua fifine haaku he fekafekau ki a Iehova.

PUHALA NE AOGA KI A AU: Kua hola kehe mai tuai au he lalolagi fiafia fakavai mo e tau kapitiga fakahehēina. Ne fiafia agaia au ke he tau leo kofe, ka kua fifili tuai e au mogonei. Ne fakaaoga e au e lotomatala haaku ke aoga e tau tagata he magafaoa haaku mo e falu, mua atu ki a lautolu ne fuata. Manako au ke lagomatai a lautolu ke kitia ko e tau mena kua foaki mai he lalolagi nei kua tuga na fulufuluola, ka ko e fakahikuaga “ko e otaota ia.”—Filipi 3:8.

Kua moua e au e tau kapitiga fakamooli i loto he fakapotopotoaga Kerisiano, ne ha ha ai e fakaalofa mo e mafola mooli. Mua atu ke he tau mena oti ia, he fakatata atu ki a Iehova ti kua moua tuai e au e Matua Taane haaku.

[Matahui Tala]

[Blurb he lau 13]

“Kua maeke au ke liu mai ki a Iehova ha kua futiaki mai e ia au”