Tau Hūhū he Tau Tagata Totou

Kua latatonu nakai e matakainaga fifine ke ufiufi e ulu ka fakahokohoko ke he vagahau matalima e tau lauga faka-Tohi Tapu he tau feleveiaaga, toloaga, po ke tau fonoaga Kerisiano?

Fa mahani ai, kua lata e fifine Kerisiano ke ufiufi e ulu ka taute e tau matagahua ne fa taute he taane haana po ke matakainaga taane he fakapotopotoaga. Kua lagotatai e mena nei mo e matapatu fakaakoaga ne talahau he aposetolo ko Paulo “ka liogi po ke perofeta mai ha fifine ka e nakai ufiufi hana ulu kua fakakelea e ia hana ulu” ha ko e “ulu he hoana ko e tane haia.” (1 Kori. 11:3-10) Ka ufiufi he matakainaga fifine e ulu ke he puhala kua gali mo e latatonu he tau tuaga pihia, ko e fakakiteaga he omaoma ke he fakaholoaga fakateokarasi i loto he fakapotopotoaga Kerisiano.—1 Timo. 2:11, 12.a

Ka e kua e tau tuaga ka fakahokohoko he matakainaga fifine ke he vagahau matalima e lauga ne foaki he matakainaga taane? Mooli, ko e matakainaga fifine kua fakahokohoko hokoia he tau talahauaga. Ko e kakano, nakai ko e tau fakaakoaga he matakainaga fifine ka ko e tau fakaakoaga ne fakahokohoko e ia ma e matakainaga taane. Pete ia, kua kehe lahi mahaki e fakahokohoko ke he vagahau matalima mo e fakahokohoko e vagahau ne tutala. Ke he tau tagata ne maeke ke vagahau, kua onoono ai ke he tagata lauga mo e fanogonogo agaia ke he tagata fakahokohoko. Nakai tatai ai ke he fakahokohoko he vagahau matalima, ko e tau matakainaga fifine ne fakahokohoko e vagahau ne tutala kua fa mahani ke nakai hagaaki pauaki ki ai. He falu magaaho, liga fa fifili a lautolu ke nonofo ka fakahokohoko po ke, ka tutū ti haga atu ke he tagata lauga ka e nakai ke he toloaga. Ti nakai lata mogoia e matakainaga fifine ka fakahokohoko e vagahau ne tutala ke ufiufi e ulu.

Ke lafi ke he mena nei, ha ko e tupu ki mua he tau matini foou ne fakaaoga ka fakahokohoko e tau lauga ke he vagahau matalima, kua liga kitia maaliali e matagahua he tagata fakahokohoko. Ne kitia tumau e fakatino he tagata fakahokohoko ke he vagahau matalima he screen lahi, ka e nakai kitia he toloaga e tagata lauga. He tokaloto e tau puhala nei, ti liga latatonu ai ma e matakainaga fifine ne fakahokohoko ke he vagahau matalima ke fakakite ko e matagahua ke uaaki e tagata fakahokohoko ha kua ufiufi e ulu haana.

Lauia fēfē e takitakiaga nei kua liu hikihiki ka fakahokohoko ke he vagahau matalima e tau vala he Aoga Fekafekau Fakateokarasi, tau fakatātāaga, mo e tau tali he Fakaakoaga Tohi Tapu he Fakapotopotoaga, he Feleveiaaga Fekafekau, mo e Fakaakoaga he Kolo Toko? Kua lata nakai e matakainaga fifine ne fakahokohoko ke he vagahau matalima ke ufiufi e ulu he tau magaaho pihia? Tuga kua nakai lata e matakainaga fifine ke ufiufi e ulu he falu tuaga, ha kua lata ia lautolu oti he toloaga ke maama nakai ko ia ne takitaki mooli e feleveiaaga. Ma e fakatai, kua lata ke pihia ka fakahokohoko he matakainaga fifine e tau tali mai he toloaga, tau lauga he tau matakainaga fifine, po ke tau fakatātāaga. Pete ia, kua lata he matakainaga fifine ke ufiufi e ulu ka fakahokohoko e tau lauga ma e tau matakainaga taane he tau feleveiaaga nei, mo e ka fakahokohoko ma e matakainaga ne taute e Fakaakoaga he Kolo Toko po ke matakainaga ne taute e Fakaakoaga Tohi Tapu he Fakapotopotoaga, po ke ka takitaki e lologo ke he vagahau matalima. He feleveiaaga katoa, liga lata he matakainaga fifine ke fakahokohoko ma e tau matakainaga taane mo e fifine, tau fanau, mo e tau motua. Ha ko e mena nei, liga aoga lahi ke ufiufi e ulu ke he feleveiaaga katoa.

[Matahui Tala]