Puha Hūhū

◼ Lata nakai e matakainaga fifine ke uufi e ulu ka haia e matakainaga taane mo ia he fakaako Tohi Tapu he gutuhala?

Ka taute tumau he matakainaga fifine e fakaako Tohi Tapu, mo e kua fakatoka pauaki ti haia e matakainaga taane mo ia, kua lata e matakainaga fifine ke uufi e ulu. (1 Kori. 11:3-10) He fufuta he Iulai 15, 2002, he The Watchtower, lau 27, ne fakamaama ai: “Ko e fakaakoaga nei kua fakatokatoka tuai ti ko e matakainaga kua taute e fakaakoaga ko ia ne takitaki. He tau tuaga pihia, ko e fakaakoaga nei kua eke mo vala fakalaulahi he fakapotopotoaga. Kaeke ko e matakainaga fifine kua papatiso ne taute e fakaakoaga pihia ti haia e matakainaga taane papatiso mo ia, kua tonuhia ni e matakainaga fifine ke uufi e ulu.” Kua latatonu ke pihia foki ka taute ai e fakaakoaga he kaina, he gutuhala, po ke he falu matakavi.

Ka e kaeke kua nakaila fakatumau ia e fakaako Tohi Tapu he gutuhala, kua nakai lata e matakainaga fifine ke uufi e ulu ka haia e matakainaga taane mo ia, pete foki kaeke ko e liliu aahi atu ke fakatātā e fakaako Tohi Tapu po ke fakatutala ke he matakupu he taha he tau tohi fakaako ne fakatoka mai. Ha ko e mena feaki fakahaga e tau fakaako Tohi Tapu he gutuhala, he lagaloga e liu aahi atu, kua lata he tau matakainaga ke manamanatu ke he tau tutūaga ti fakalatalata he fifili e magaaho kua latatonu ke uufi e ulu.