Taute e Tau Fakaakoaga Tohi Tapu Holo ki Mua he Gutuhala mo e Telefoni
1. Ko e heigoa e kakano ha tautolu ke taute e tau fakaakoaga Tohi Tapu?
1 Ko e fiafia ha ia he kamata e fakaakoaga Tohi Tapu! Pete ia, ke moua taha tagata ne fiafia ke fakaako e Tohi Tapu ko e kamataaga ni a ia. Ko e kakano he fakaakoaga ke lagomatai e tagata ke eke mo tutaki mooli he Keriso. (Mata. 28:19, 20) Ko e heigoa ka lagomatai a tautolu ke moua e foliaga ia?
2. Ko e heigoa e tau fakaakoaga Tohi Tapu he gutuhala mo e telefoni, ti ko e ha ne lauia mitaki ai?
2 Tau Tagata Lavelave: Kua tupu ki mua e lavelave he tau tagata he vahā nei. He falu matakavi, kua tokofiha ni e tagata ka liga manako he magaaho fakapā ke fakaaoga e tulā katoa ke fakaako e Tohi Tapu. Ke lagomatai a lautolu pihia, kua fakamafana ki a tautolu ke taute e tau fakaakoaga Tohi Tapu he gutuhala po ke he telefoni. He magaaho fakamua, liga kua kūkū e tau fakaakoaga nei ti liga fai fakatutalaaga ke he falu tohi he Tohi Tapu mo e fakaaoga taha po ke ua e paratafa i loto he tohi, tuga e tohi Fakaako he Tohi Tapu. Ko e nava ha ia he tokologa e tagata fakailoa hane taute mogonei e tau fakaakoaga pihia he gutuhala po ke he telefoni!
3. Ko e ha kua lata ia tautolu ke lali ke fakatupu ki mua e magaaho fakaako ha tautolu he gutuhala?
3 Ka e kua lata kia a tautolu ke makona he taute tumau e tau fakaakoaga he gutuhala? Nakai. Pete kua fakapulotu a tautolu ke nakai tala loa he magaaho fakapā ka kamata e fakaakoaga, ne talahau he Our Kingdom Ministry, ia Me 1990, lau 8: “He magaaho ka tumau e fakaakoaga mo e tupu ki mua e fiafia he tagata he fale, liga lata ke fakaloa atu e magaaho fakaako.” Kua aoga lahi e mena nei. Ke fakatai: Liga tote ni e mena kai ka fagai aki e tama ne matehoge he magaaho fakamua ato fahia a ia ke lahi e mena kai, ka e nakai maeke ia tautolu ke amanaki ki a ia ke moua agataha e malolō katoa ti tupu olaola kaeke kua tote ni e mena kai ne fagai aki a ia ke he tau mahina loga. Tatai foki, kua lata e tagata fakaako Tohi Tapu ke moua e fakaakoaga pauaki mo e tumau ke maeke ke tupu mo fekafekau motua fakaagaaga he Atua.—Hepe. 5:13, 14.
4. Ko e heigoa e tau aoga he taute e fakaakoaga Tohi Tapu i loto he fale?
4 Tau Fakaakoaga i Loto he Fale: Kua hagahaga mitaki ke taute e fakaakoaga ke he taha matakavi nakai fai tagata—i loto he fale po ke he taha matakavi kua lata. To mukamuka lahi e mena nei ke fakaako mo e lagomatai e tagata ke maama e Kupu he Atua. (Mata. 13:23) To taute foki e faiaoga ke tauteute e fakaakoaga ke lata mo e tau manako he tagata fakaako. Mua atu, he loa e magaaho ka fakaako ai ka fakaatā ma e fakatutalaaga fakamatafeiga mo e fakamalolō e tua ke he Kupu he Atua.—Roma 10:17.
5. Maeke fēfē ia tautolu ke hiki mai e fakaakoaga he gutuhala ke fakaako i loto he fale?
5 Maeke fēfē ia koe ke hiki e fakaakoaga he gutuhala ke fakaako i loto he fale? He mole falu fakaakoaga kūkū, ko e ha he ole ke fakaloa atu e fakaakoaga, mo e talahau e loa he magaaho? Po ke talahau foki e koe taha puhala he hūhū ke he tagata, “Fai magaaho nakai a koe he aho nei ke nonofo ke fakatutala tokoua ki ai?” po ke “Lahi fēfē e magaaho haau he aho nei ne manako ke fakatutala ke he matakupu nei?” Ka e kaeke kaumahala e tau laliaga haau, kia matutaki ke taute e tau fakaakoaga kūkū he gutuhala. He magaaho kua latatonu, lali foki ke hiki ki loto he fale.
6. Ko e heigoa e foliaga kua lata ke taute e fekafekauaga ha tautolu, mo e maeke fēfē he tau manatu he vala tala nei ke lagomatai a tautolu ke moua e foliaga nei?
6 He matutaki a tautolu ke kumi e tau tagata kua lata, kia nakai nimo e kakano ne kamata mo e taute e tautolu e tau fakaakoaga Tohi Tapu. Ko e foliaga ha tautolu ke lagomatai a lautolu ne loto fakamooli ke eke mo tau fekafekau tukulele mo e papatiso ha Iehova. Kia fakamonuina e ia e tau laliaga ha tautolu he taute e fekafekauaga ha tautolu mo e foliaga nei.—2 Timo. 4:5.