Vala 1—Taute e Tau Fakaakoaga Tohi Tapu Holo ki Mua
Ko e Heigoa e Fakaakoaga Tohi Tapu?
1 He lalolagi katoa, kavi ke ono e miliona he tau fakaakoaga Tohi Tapu kua taute he tau tagata he Atua ke he tau mahina takitaha. He fakaaoga fakamitaki e tau puhala fakaako mitaki, kua maeke a tautolu ke lagomatai e tau tagata fakaako Tohi Tapu nei ke hoko ke he tukuleleaga mo e papatisoaga mo e “maeke ni ke fakaako atu ke he falu.” (2 Timo. 2:2) Manako nakai a koe ke lagomatai e tagata fakaako hau ke holo ki mua? Kamata he fufuta nei, to fakakite he Ha Tautolu a Fekafekauaga he Kautu e tau fakatokaaga he tau vala tala ke fakamaama e tau puhala aoga he taute e tau fakaakoaga Tohi Tapu holo ki mua.
2 Magaaho ke Hokotaki e Fakaakoaga Tohi Tapu: Ka taute fakatumau mo e fakatokatoka e koe e fakatutalaaga Tohi Tapu, pete he ku, ka e fakaaoga e Tohi Tapu fakalataha mo e taha he tau tohi ne kua kotofa, hane taute e koe e fakaakoaga Tohi Tapu. Moli e mena nei kaeke foki kua fakahoko e fakaakoaga he gutuhala po ke he telefoni. Kia hokotaki ko e fakaakoaga ka lagaua e taute he mole e fakataitaiaga ke fakaako mo e ka fai kakano ke talitonu ke matutaki e fakaakoaga.
3 Ko e porosua Manako mo e tohi Iloilo e tau tohi ne fakaaoga ke taute e tau fakaakoaga Tohi Tapu loga. Ka oti he fakaaoga, ti ka kitia kua holo ki mua e tagata, fakatekiteki, mo e kua tupu e loto fakaaue hana ma e mena ne ako e ia, ti liga ke matutaki e fakaakoaga ke he tohi Worship God. Ko e porosua Maeke a Koe mo Kapitiga he Atua! ka maeke ke fakaako mo e tau tagata ne temotemoai e fakaakoaga po ke lotomatala ke totou.
4 Ko e gahua fakaakoaga Tohi Tapu ne lauia mitaki he lagomatai e tau miliona ke eke mo tau tutaki ha Iesu Keriso. (Mata. 28:19, 20) He fakagahua e tau manatu ne foaki he tau vala tala i mua he fakatokaaga nei, maeke ia koe ke taute e fakaakoaga Tohi Tapu holo ki mua.