Ko e Tohi Fakaako he Tohi Tapu—Ha Tautolu a Matapatu Lagomataiaga Fakaako he Tohi Tapu
1 Ko e fiafia ha ia ke kitia e fakatoka maiaga he tohi Ko e Heigoa ne Fakaako Moli he Tohi Tapu? he Fonoaga he Fahimotu “Omaoma Mahani Atua”! Ne fiafia e tau tagata ne fakalataha ke moua e lagaki fakatagata he oti e fakaholoaga he Aho Faiumu. To fakaaoga fēfē e kanavaakau fakaako foou nei? Kua talaga ke eke mo matapatu lagomataiaga fakaako he Tohi Tapu. Pete ko e tohi foou to fakakite fakamua ko e tohi ka foaki ia Mati, kua fakamalolō ke he tau tagata fakailoa ke kamata he fakaaoga fakamafiti ke tamata mo e taute e tau fakaakoaga Tohi Tapu.
2 Tau Fakaakoaga Tohi Tapu Foou: Ko e tau tagata fakailoa ne taute e tau fakaakoaga Tohi Tapu ke he tohi Iloilo po ke porosua Manako kua lata ke fakaaoga e fifiliaga mitaki he fifili e puhala mo e magaaho ke kamata fakaaoga e tohi foou he fakaakoaga. Ka nakai la leva e fakaako, kua maeke ia koe ke kamata mai he kamataaga he tohi foou. Ka lotoga a koe he tohi Iloilo, liga matutaki e koe e fakaakoaga ke he veveheaga taha ia he tohi Fakaako he Tohi Tapu. Kaeke ko koe he matahiku he tohi Iloilo, liga fifili e koe ke taute ke oti.
3 Nakai fakauaua kua iloa oti e tautolu e tokologa he tau tagata ka aoga mai he fakaako e tohi Fakaako he Tohi Tapu. Ko e ha he nakai hafagi ke he tau tagata takitaha e fakaakoaga he Tohi Tapu he taute fakapapahi e lagomataiaga fakaako nei? Ma e fakatai, ko lautolu ne fakaako e porosua Manako po ke tohi Iloilo ka e nakai holo atu ke he tukuleleaga mo e papatisoaga liga mitaki ke liu fakaako he fakaaoga e tohi foou. Liga fifili he tau matua ke fakaaoga e tohi he talahau e lautolu e iloilo tonu he finagalo he Atua ke he tau tama ha lautolu.—Kolo. 1:9, 10.
4 Fakaako e Tohi ke Uaaki: Fai foakiaga nakai ma e tagata fakaako Tohi Tapu ke fakaako e tohi ke uaaki he oti e tohi Ko e Heigoa ne Fakaako Moli he Tohi Tapu? E. Ka kitia moli kua holo ki mua e tagata fakaako, pete he fakatuai, ti kua tupu e loto fakaaue ma e mena ne ako e ia, maeke ke matutaki e fakaaoga he tohi Tapuaki ke he Atua Moli Tokotaha. Kua mauokafua a tautolu ko e tohi Fakaako he Tohi Tapu to eke mo kanavaakau malolō ne ha hā ia tautolu he taute e tautolu e poakiaga ke taute tutaki.—Mata. 28:19, 20.