Puhala ke Fakaaoga e Tohi Tapuaki ke he Atua ke Taute e Tau Fakaako Tohi Tapu
1. Ko e heigoa ne fa latatonu ke maama e tau mena ne totou a tautolu ki ai?
1 He hūhū e tagata fakamatala ko Filipi ke he eunuka Aitiope kua maama nakai e ia e mena ne totou a ia ke he Kupu he Atua, ne tali e tagata: “To maeke fefe e au, ka nakai fakakite mai e taha kia au?” Ne lagomatai fiafia e Filipi a ia ke maama e tala mitaki hagaao ki a Iesu, ati papatiso a ia.—Gahua 8:26-38.
2. To fakaaoga fēfē e tohi Tapuaki ke he Atua, ti mo hai?
2 Ko e tohi Tapuaki ke he Atua Moli Tokotaha ko e tohi ke uaaki ka fakaaoga ke fakaako mo e tau tagata fakaako Tohi Tapu ka oti e tohi Fakaako he Tohi Tapu. Tokaloto kua kehekehe e tuaga he tupuaga fakaagaaga he tau tagata. Kua lata e tau fakaako takitaha ke taute he papahiaga kua latatonu ke he tagata fakaako. Mailoga mooli kua maama mitaki e vala tala kua fakaako ki ai. Laulahi ai, kua nakai lata e tohi nei ke fakaaoga ke kamata e tau fakaako Tohi Tapu mo e tau tagata ne liga fitā e fakaako ke he loga e tau tohi he magaaho kua mole, ka e nakaila fakalataha ke he tau feleveiaaga he fakapotopotoaga mo e maaliali kua nakai manako a lautolu he fakatatau e tau momoui ke he kupu mooli he Tohi Tapu ne fakaako e lautolu.
3. Ko e heigoa kua lata ke fakaako fakamua ti ko e heigoa e kakano ne talaga e Tapuaki ke he Atua?
3 Ka oti e tohi Fakaako he Tohi Tapu ti kua holo ki mua e tagata fakaako, kua lata mogoia ke fakaako e tohi Tapuaki ke he Atua. (Kolo. 2:7) Kua fakamaama he lau 2 e kakano he tohi ia: “Kua fakamalolo mai he Tohi Tapu a tautolu oti ne ofania e Atua ke ‘iloa . . . e hokulo, mo e tokoluga’ he tau kupu moli uho hana.”—Efeso 3:18.
4. Ko e heigoa kua lata ke taute e tautolu ka papatiso e tagata fakaako ka e nakaila oti e tohi Fakaako ke he Tohi Tapu mo e Tapuaki ke he Atua?
4 Ka papatiso e tagata fakaako ka e nakaila oti e tau tohi ua ia he fakaaoga, ti kua lata e fakaako ke matutaki ato oti e tohi Tapuaki ke he Atua. Pete he papatiso e tagata fakaako, maeke ia koe ke hokotaki e tulā, liu aahi atu, mo e fakaakoaga. Maeke foki he tagata fakailoa ne ō mo koe ti fai vala he fakaakoaga ke totou e tulā.
5. Liga fakaaoga fēfē e tohi Tapuaki ke he Atua ke lagomatai e tau tagata fakailoa kua fai magaaho ne nakai gahua he fonua?
5 Ka kotofa he komiti fekafekau a koe ke taute e fakaako Tohi Tapu mo e tagata ne nakai tumau ke he gahua he fonua, liga ole ki a koe ke fakaaoga e tau veveheaga pauaki he tohi Tapuaki ke he Atua. Ko e tau fakaako pihia kua nakai lata ke loa e magaaho. Manatu e mena ne tupu he mole e papatiso he Aitiope. “Kua fano foki a ia he hana fenoga mo e fiafia” ko e tutaki foou ha Iesu Keriso.—Gahua 8:39, 40.
[Puha he lau 2]
Fakamolemole mailoga ka fakaako mo e tagata vagahau Peritania, fakaaoga e tohi Keep Yourselves in God’s Love.—Kikite e Our Kingdom Ministry ia Mati 2009 lau 2.