Puha Hūhū

◼ Ko e heigoa e tau tohi ua kua lata ke fakaako mo e tau tagata ne fiafia?

Ko e tohi Fakaako he Tohi Tapu ko e matapatu tohi ke kamata mo e taute e tau fakaakoaga Tohi Tapu he kaina. Pete kua nakai hepe kaeke ke kamata e fakaakoaga aki e taha tohi foki, tuga e tuleke kua latatonu, kua lata ke lali fakamafiti ke hiki ke he tohi Fakaako he Tohi Tapu. Kua kehe lahi e tau fua ne moua he fakaaoga e tohi Fakaako he Tohi Tapu ke kamata e tau fakaakoaga.

Ka oti e tohi Fakaako he Tohi Tapu ti hane holo ki mua e tagata fakaako, kua lata mogoia ke fakaako e tohi Tapuaki ke he Atua. (Kolo. 2:7) Kua fakamaama he lau 2 e kakano he tohi ia: “Kua fakamalolo mai he Tohi Tapu a tautolu oti ne ofania e Atua ke ‘iloa . . . e hokulo, mo e tokoluga’ he tau kupu moli uho hana. (Efeso 3:18) Ko e kakano haia ati taute ai e tohi nei. Kua amaamanaki a mautolu to lagomatai a koe ke tupu fakaagaga mo e ke mau tauteute mitaki ke fano ke he puhala pukilu ne takitaki atu ke he moui he lalolagi fou tututonu he Atua.”

Kaeke ke hokotia e tagata fakaako ke he papatisoaga ka e nakaila oti e tau tohi ua nei, kua lata ke matutaki e fakaakoaga ato oti e tohi ke uaaki. Pete he papatiso e tagata fakaako, kua lata agaia ni e tagata ne taute e fakaakoaga ke totou e tulā, liu aahi atu, mo e fakaakoaga Tohi Tapu. Ko e tagata fakailoa ne fakatauō mo e tagata ne taute e fakaakoaga mo e kua kaufakalataha ki ai kua maeke foki ke totou e tulā.