Hūhū he Tau Tagata Totou ha Tautolu

Aahi Atu Mooli Kia he Tau Tagata Pulotu Tokotolu e Tama Mukemuke ko Iesu?

Kua holofa e taofiaga Kirisimasi mai i Amerika Toga ki Europa Uta ki Asia ne fakakite e fakatino he Fanauaga ne ha ha ai tolu e patuiki, po ke tau tagata pulotu ne uta e tau mena fakaalofa uho ke he tama mukemuke ko Iesu. Mooli nakai e tala nei? Lagotatai nakai mo e tau mena mooli ne tutupu? Kia kitekite a tautolu ki ai.

Tokoua e Evagelia, ko Mataio mo Luka ne fakamau e fanauaga ha Iesu. Kua fakakite he tala nei ko e tau leveki mamoe tutokolalo ni he tau fonua tata mai ne aahi atu ki a Iesu he magaaho ne fanau a ia. Ko lautolu ne ui ko e tau patuiki, po ke tau tagata pulotu, ko e tau makoi ka e nakai ko e tau patuiki, ti nakai talahau e numera ha lautolu. Ne nakai o atu e tau makoi ke he tama mukemuke fanau foou he fale povi ka e hohoko atu he magaaho kua tama tote a Iesu ti nofo he fale. Ne fakahagahaga kelea foki he hohoko atu ha lautolu e moui ha Iesu!

Onoono fakamakutu lahi ke he tala he fanauaga a Iesu ne talahau he tagata tohia Tohi Tapu ko Luka, mo e to moua e koe e mena ne talahau: “Ha ha . . . e tau leveki mamoe, ha ne nonofo mo e leveki ai ke he po ha lautolu a tau fuifui mamoe. Kitiala, e agelu [a Iehova], kua tu mai kia lautolu . . . ti pehe . . . kia lautolu, . . . To kitia e mutolu e tama mukemuke, kua kaputi ke he ie, ha ne takoto ke he fale povi. . . . Kua alumaki atu a lautolu, ti moua ai a Maria, mo Iosefa, mo e tama mukemuke ha ne takoto ke he fale povi.”—Luka 2:8-16.

Ko Iosefa, Maria, mo e tau leveki mamoe hokoia ne haia i ai mo e tama mukemuke ko Iesu. Nakai fai foki ne fakamau he tohi a Luka.

Kumikumi la mogonei ke he tala ia Mataio 2:1-11: “Ne fanau a Iesu i Petelehema i Iutaia ke he vaha ia Herota e patuiki, kitiala, ko e [tau tagata pulotu] mai he fahi uta kua hohoko mai ki Ierusalema. . . . Kua huhū atu a lautolu ki fale; kua kitia ai e lautolu e tama tote fakalataha mo Maria hana matua fifine.”

Mailoga ne talahau he tala ko e “tau tagata pulotu,” nakai “tokotolu e tagata pulotu,” ti o fakamua a lautolu mai he faahi uta ki Ierusalema, nakai ke he maaga ne fanau a Iesu ko Petelehema. He magaaho ne hohoko atu a lautolu ki Petelehema, kua “tama tote” tuai a Iesu—nakai ko e tama mukemuke—ti nakai he fale povi ka e haia he fale.

He fakaaoga ai he Tohi Tapu e tau kupu “tau tagata pulotu” ke fakamaama aki e tau tagata ahiahi nei, ne fakaaoga he falu fakaliliuaga e kupu “Makoi” po ke “tau tagata kumikumi ke he aolagi.” Hagaao ke he A Handbook on the Gospel of Matthew, ko e talahauaga “tau tagata pulotu” ne fakaliliu “e nauna Heleni mena hagaao fakamua ke he tau akoako Peresia ne pulotu lahi he kumikumi ke he aolagi.” He The Expanded Vine’s Expository Dictionary of New Testament Words ne fakamaama e kupu ko e “tagata taulatua, ko e tagata taute lagatau mana, ko e tagata iloilo ke he tau puhala fakataulaatua.”

Pete he talahaua agaia e kumikumi ke he aolagi mo e taute taulātua he vahā nei, ne hataki he Tohi Tapu ke nakai fakaaoga e tau mena ia. (Isaia 47:13-15) Ko e tau puhala mo e tau gahua fakataulaatua a ia ne vihiatia e Iehova ko e Atua. (Teutaronome 18:10-12) Kakano haia ne nakai fai agelu he Atua ne fakailoa e fanauaga ha Iesu ke he tau makoi. Ka e fakailoa mai ke he miti faka-Atua, ne hataki ki a lautolu ke nakai tala age ke he patuiki kelea ko Herota ha kua kumi he patuiki ke tamate a Iesu. “Ati o atu ai a lautolu ke he taha hala ke he motu ha lautolu.”—Mataio 2:11-16.

To manako kia e tau Kerisiano mooli ke talahau atu e tala fakavai ia nukua fakakeukeu e tala mooli ne takatakai ke he fanauaga ha Iesu? Ko e tali, nakai.