Eke mo Tau Tagata a Iehova—Ko e Fakaalofa Noa

“Ko e tau tagata [a Iehova] a tautolu.”—ROMA 14:8.

1, 2. (a) Ko e heigoa e kotofaaga kua moua e tautolu? (e) Ko e heigoa e tau hūhū ka fakatutala ki ai a tautolu?

KO E lilifu uho mooli ne foaki ke he motu a Isaraela he magaaho ne pehē a Iehova ki a lautolu: “T[o] eke ni a mutolu mo koloa uho maku, ke mua ke he tau motu oti.” (Esoto 19:5) He vahā nei, ko e tau tagata he fakapotopotoaga Kerisiano ne moua foki e lilifu ko e tau tagata a Iehova. (1 Pete. 2:9; Fakakite. 7:9, 14, 15) Ko e lilifu ka aoga tukulagi ki a tautolu.

² He nakai ni ko e lilifu, ka e fai matagahua foki e tagata a Iehova. Falu ne liga manatu: ‘To maeke nakai au ke taute e mena ne amaamanaki a Iehova ki a au? Ka agahala au, to tiaki kia e ia au? To fofō kia e atāina haaku he eke mo tagata a Iehova?’ Ko e tau tupetupe pihia kua aoga lahi ke manamanatu ki ai. Fakamua mogoia, ko e taha hūhū foki kua latatonu ke manamanatu fakamitaki ki ai: Ko e heigoa e tau aoga he eke mo tagata a Iehova?

He Eke mo Tagata a Iehova kua Takitaki Atu ke he Fiafia

3. Aoga fēfē e fifiliaga a Raava ki a ia ke fekafekau ki a Iehova?

³ Aoga mai nakai e tau tagata a Iehova he tuaga ha lautolu? Manamanatu ke he mena ne tupu ki a Raava, ko e fifine fakataka ne nofo i Ieriko i tuai. Ne feaki hake mooli a ia ke taute e tapuaki fakalialia he tau atua ha Kanana. Ka e, he logona e ia e tau kautūaga ne foaki e Iehova ki a Isaraela, ne mailoga e ia ko Iehova e Atua mooli. Ti foaki e ia e moui haana ke puipui e tau tagata fifili he Atua ti tuku foki e moui haana ke he tau lima ha laua. Ne pehē e Tohi Tapu: “[Ko] Raava ko e fifine fakataka, kua nakai kia talahaua tututonu a ia ha ko e tau gahua, he talia e ia e tau fekau mo e fakafano kehe a laua ke he taha hala?” (Iako. 2:25) Manamanatu la ke he tau aoga ne moua e ia he eke a ia mo vala he tau tagata meā he Atua, ko e tau tagata ne fakaako ke he Fakatufono he Atua he tau puhala he fakaalofa mo e fakafili tonu. Ko e fiafia ha ia haana he tuku ki tua e puhala moui tuai haana! Ne fai taane a ia ke he tagata Isaraela ti feaki haana tama taane, ko Poasa, ke eke mo tagata taane mitaki lahi he Atua.—Iosua 6:25; Ruta 2:4-12; Mata. 1:5, 6.

4. Aoga fēfē a Ruta mai he fifiliaga haana ke fekafekau ki a Iehova?

⁴ Ne fifili foki a Ruta i Moapi ke fekafekau ki a Iehova. Ko e tama fifine, ne liga tapuaki a ia ki a Kemosa mo e falu atua ha Moapi, ka e he iloa e ia e Atua mooli ko Iehova, ti faitaane a ia ke he tagata Isaraela ne hau ke kumi huaga he motu haana. (Totou Ruta 1:1-6.) Fakahiku, he kamata a Ruta mo Orepa ke o mo e matua fugavai ha laua, ko Naumi ki Petelehema, ne tomatoma e Naumi e tau fifine fuata tokoua ke liliu ki kaina. To nakai mukamuka ia laua ke nonofo i Isaraela. Ati “liu [a Orepa] ke he hana motu, mo e hana tau atua,” ka e nakai liu atu a Ruta. Ne fakakite e Ruta e tua haana mo e iloa a Ia ne manako a ia ke fakalataha ki ai. Ne tala age a ia ki a Naumi: “Aua neke ole mai a koe kia au ke toka a koe, ke ua mui atu au kia koe; ha ko e mena ke fano a koe ki ai, to fano ai ni au, ko e mena ke nofo ai a koe to nofo ai au, to eke e motu hau mo motu haku, to eke e Atua hau mo Atua haku.” (Ruta 1:15, 16) Ha ko e fifiliaga haana ke fekafekau ki a Iehova, ne aoga a Ruta mai he Fakatufono he Atua, ne taute e foakiaga pauaki ma e tau takape mo lautolu ne mativa mo e nakai fai kelekele. I lalo he tau tapakau a Iehova, ne moua e ia e fiafia, puipuiaga, mo e haohao mitaki.

5. Ko e heigoa ne mailoga e koe ke he tau tagata kua fekafekau fakamooli ki a Iehova?

⁵ Liga iloa e koe falu matakainaga he mole e tukulele ha lautolu ki a Iehova hane fekafekau fakamooli agaia ki a ia ke he tau tau loga. Hūhū ki a lautolu ke he puhala ne aoga a lautolu mai he fekafekau ki a Ia. Pete he lauia e tau tagata oti he tau lekua, kua lalago lahi he fakamooliaga e tau kupu he salamo: “Uhoaki e motu [po ke, tau tagata] kua eke a Iehova mo Atua ha lautolu.”—Sala. 144:15.

Kua Fakalatalata e Tau Amaamanakiaga a Iehova

6. Kua lata he ha ke nakai matakutaku a tautolu he nakai maeke ke taute e mena ne amaamanaki a Iehova mai ia tautolu?

⁶ Liga manatu a koe to maeke la nakai ia koe ke taute e mena ne amaamanaki a Iehova ki a koe. Kua mukamuka ke kapaletū he amaamanaki ke eke mo fekafekau he Atua, moui lagotatai ke he matafakatufono haana, mo e tutala ke he higoa haana. Ma e fakatai, ne logona e Mose e maimainā he magaaho ne fakafano atu a ia ke vagahau ke he tau Isaraela mo e patuiki a Aikupito. Ka e nakai molea e mena ne amaamanaki e Atua ke taute e Mose. Ko Iehova ‘ne fakaako e tau mena ke eke e ia’ (Totou Esoto 3:11; 4:1, 10, 13-15.) Ha kua talia e Mose e lagomatai ne foaki, ne moua e ia e olioli he taute e finagalo he Atua. Kua fakalatalata, po ke, nakai molea pihia foki e mena ne amaamanaki a Iehova ke taute e tautolu. Ne maama e ia e aga nakai mitaki katoatoa ha tautolu ti manako a ia ke lagomatai a tautolu. (Sala. 103:14) He fekafekau ke he Atua ko e tutaki ha Iesu kua fakatotoka ka e nakai kapaletū ha ko e puhala moui haia kua aoga ke he falu mo e fakafiafia e loto a Iehova. Ne pehē a Iesu: “Kia o mai a mutolu kia au, . . . ko au foki ke okioki ai a mutolu. Kia hahamo e mutolu e lakau hahamo haku, mo e fifitaki mai a mutolu kia au; ha ko au ni ko e totonu mo e loto holoilalo.”—Mata. 11:28, 29.

7. Maeke he ha ia koe ke mauokafua to lagomatai e Iehova a koe ke taute e mena ne amaamanaki a ia ki a koe?

⁷ To foaki tumau e Iehova e fakamafanaaga kua lata mo tautolu, kaeke ke falanaki tumau a tautolu ke he malolō haana. Ma e fakatai, ne nakai gutu mahifi pauaki a Ieremia. Ti ko e magaaho ne kotofa e Iehova a ia ke eke mo perofeta Haana, ne pehē a Ieremia: “Oi te fakaalofa, ko e Iki na e Iehova, kitiala, nakai iloa e au ke vagahau, ha ko e tama tote au.” Fakamui, ne pehē foki a ia: “Ti nakai vagahau foki e au ke he hana higoa.” (Iere. 1:6; 20:9) Ka e, he fakamalolō e Iehova, ne maeke ia Ieremia ke fakamatala e ogo nakai mahuiga ke 40 e tau. Ne fakamafana tumau e Iehova a ia aki e tau kupu: “To fakalataha au mo koe ke fakamoui a koe, mo e laveaki e au a koe.”—Iere. 1:8, 19; 15:20.

8. Fakakite fēfē e tautolu kua falanaki a tautolu ki a Iehova?

⁸ Tuga ni he fakamalolō e Iehova a Mose mo Ieremia, maeke a ia ke lagomatai a tautolu ke taute e mena ne amaamanaki a ia ke he tau Kerisiano he vahā nei. Ko e matapatu puhala ko e tua ke he Atua. Pehē e Tohi Tapu: “Kia [falanaki] a koe kia Iehova mo e hāu a loto katoa; ka e aua neke falanaki a koe ke he hāu a pulotu. Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.” (Fakatai 3:5, 6) Fakakite e tautolu kua falanaki a tautolu ki a Iehova ka fakaatā e tautolu a tautolu ke he lagomatai ne foaki e ia puhala he haana Kupu mo e he fakapotopotoaga. Ka fakaatā e tautolu a Iehova ke takitaki e tau lakaaga ha tautolu he moui, to nakai fai mena ke taofi a tautolu mai he mahani fakamooli ki a ia.

Leveki e Iehova e Tau Tagata Takitaha Haana

9, 10. Ko e vahega puipuiaga fe ne mavehe mai he Salamo 91?

⁹ He manamanatu ke he fifiliaga ha lautolu ke tukulele a lautolu ki a Iehova, falu ne liga manatu hagaao ke he hagahaga kelea he agahala, ti nakai fai aoga ai, mo e kua tiaki e Iehova. Fiafia ai, ne foaki e Iehova ki a tautolu e tau puipuiaga oti kua lata mo tautolu ke leveki aki e fakafetuiaga uho ha tautolu mo ia. Kia kitekite la tautolu ke he puhala ne talahau he Salamo 91.

¹⁰ Ne kamata pehē e Salamo ia: “Ko ia kua nofo ke he mena galo ha i ai e Mua ue atu, to nofo a ia ke he malu hana ha i ai e malolo oti kana. To pehe atu au kia Iehova, Ko e haku a kolo, mo e haku a taue; ko e haku a Atua kua falanaki au kia ia. Ha ko ia ni ke laveaki a koe mai he hele he tagata takafaga.” (Sala. 91:1-3) Mailoga e maveheaga he Atua ke puipui a lautolu ne ofania a ia mo e falanaki ki a ia. (Totou Salamo 91:9, 14.) Ko e vahega puipuiaga fe ne talahau e ia? Ne puipui e Iehova falu he tau fekafekau haana i tuai ke he puhala fakatino—he falu tuaga ke fakahao e ohi ne takitaki atu ke he Mesia ne mavehe ki ai. Ka e tokologa foki e tau tagata fakamooli ne tuku he fale puipui, fakakikiveka, mo e tamate ke he tau ekefakakelea ha Satani ke liliu kehe mai he mahani fakamooli ke he Atua. (Hepe. 11:34-39) Ne moua e lautolu e fakamalolō kua lata, ke fakauka ha kua puipui e Iehova a lautolu fakaagaaga mai he hagahaga kelea neke moumou e mahani fakamooli ha lautolu. Ko e mena ia, maeke e Salamo 91 ke maama ko e maveheaga he puipuiaga fakaagaaga.

11. Ko e heigoa e “mena galo ha i ai e Mua ue atu,” ti ko hai ne puipui he Atua i ai?

¹¹ Ko e “mena galo ha i ai e Mua ue atu,” ne talahau he salamo, ko e matakavi fakatai he puipuiaga fakaagaaga. Ko lautolu ne nonofo ai mo e Atua ko e tau tagata uiina haana kua hao mai he tau mena mo e tau tagata ne fakahagahaga kelea e tua ha lautolu mo e fakaalofa ha lautolu ke he Atua. (Sala. 15:1, 2; 121:5) Ko e mena galo ha kua nakai maama he tau tagata ne nakai tua. He mena nei, ne puipui e Iehova e tau tagata ne talahau pehē: ‘Ko koe na, haku Atua na e, kua falanaki au kia koe.’ Ka nonofo mau a tautolu he mena nei he huaga, kia nakai tupetupe lahi a tautolu hagaao ke he galo e taliaaga he Atua neke mokulu ke he matahele a Satani, “[ko e] tagata takafaga.”

12. Ko e heigoa e tau mena ne fakahagahaga kelea aki e fakafetuiaga ha tautolu mo e Atua?

¹² Ko e heigoa e tau mena kua fakahagahaga kelea e fakafetuiaga uho ha tautolu mo e Atua? Ne loga e hagahaga kelea ne totoku he salamo, ha ha i ai ko e “tatalu kua evaeva ke he pouli, mo e malaia kua moumou ke he tupou la.” (Sala. 91:5, 6) ‘Ko e tagata takafaga’ ne hele e tokologa aki e manako lotokai ma e tutokotaha. (2 Kori. 11:3) Ne moua e ia falu he fakatupu ki mua e lotokai, fakaikaluga, mo e velevele koloa. Ha ha i ai falu ne fakahehē e ia ke he tau fakaakoaga tuga e papale fakamotu, evolusene (evolution), mo e lotu fakavai. (Kolo. 2:8) Ti tokologa ne fakataki ke he matahele he tau mahani feuaki velagia. Ko e hagahaga kelea fakaagaaga pihia ne fakatupu e toko miliona ke galo e fakaalofa ha lautolu ke he Atua.—Totou Salamo 91:7-10; Mata. 24:12.

Puipui e Fakaalofa Haau ma e Atua

13. Puipui fēfē e Iehova a tautolu mai he tau mena ne fakahagahaga kelea e tauaga fakaagaaga ha tautolu?

¹³ Puipui fēfē e Iehova e tau tagata haana mai he tau hagahaga kelea fakaagaaga nei? Pehē e salamo: “Ko e mena fekau e ia hana tau agelu kia koe, ke leoleo kia koe ke he hāu a tau puhala oti kana.” (Sala. 91:11) Kua takitaki mo e puipui he tau agelu he lagi a tautolu ke maeke ia tautolu ke fakamatala e tala mitaki. (Fakakite. 14:6) Lafi ke he tau agelu, ko e tau motua Kerisiano, ne taofi mau ke he tau fakaako atu ha lautolu ke he tau Tohiaga Tapu nukua puipui a tautolu mai he fakahehē he tau manatu fakavai. Maeke ia lautolu ke foaki ke he tau tagata takitaha e lagomatai ne taufetului ke fahia mai he tau aga he lalolagi. (Tito 1:9; 1 Pete. 5:2) Pihia foki, ko e “fekafekau fakamoli mo e loto matala” hane foaki e tau mena kai fakaagaaga ke puipui a tautolu mai he fakaakoaga evolusene, ko e fakahehē he tau manako feuaki, tutuli he muhukoloa mo e talahaua, mo e loga atu foki he tau manako hagahaga kelea mo e tau fakaohoohoaga. (Mata. 24:45) Ko e heigoa ne lagomatai a koe ke totoko falu he tau hagahaga kelea ia?

14. Maeke fēfē a tautolu ke fakaaoga e puipuiaga ne foaki mai he Atua?

¹⁴ Ko e heigoa ha tautolu kua lata ke taute ke nonofo mau he “mena galo” he puipuiaga he Atua? Tuga ni he fakatumau a tautolu ke puipui a tautolu mai he tau hagahaga kelea fakatino, tuga e tau pakia, tau tagata kolokolovao, po ke pikitia he tau gagao, ti kua lata foki ia tautolu ke fakatumau ke puipui a tautolu mai he tau hagahaga kelea fakaagaaga. Ti kua lata tumau a tautolu ke fakaaoga e takitakiaga ne foaki e Iehova ki a tautolu puhala he tau tohi mo e tau feleveiaaga he fakapotopotoaga mo e tau fonoaga ha tautolu. Kumi e tautolu e fakatonuaga he tau motua. Ti nakai kia aoga a tautolu mai he tau mahani kehekehe ne fakakite he tau matakainaga Kerisiano ha tautolu? Mooli, ko e feoakiaga ha tautolu mo e fakapotopotoaga kua lagomatai a tautolu ke pulotu ai.—Fakatai 13:20; totou 1 Peteru 4:10.

15. Ko e ha kua maeke ia koe ke mauokafua na maeke ia Iehova ke puipui a koe mai he tau mena ka fakatupu a koe ke galo e taliaaga Haana?

¹⁵ Nakai fai kakano a tautolu ke fakauaua na maeke ia Iehova ke puipui a tautolu mai he tau mena ka fakatupu a tautolu ke galo e taliaaga Haana. (Roma 8:38, 39) Ne puipui e ia e fakapotopotoaga mai he tau fī malolō fakalotu mo e fakapolitika ne foli ai ke nakai kelipopo a tautolu ka e vevehe kehe a tautolu mai he ha tautolu a Atua tapu. Ne kua mooli e maveheaga a Iehova: “Ko e tau kanavaakau oti kua taute ke tau kia koe, nakai monuina ia.”—Isaia 54:17.

Ko Hai ne Foaki Mai ki a Tautolu e Tokanoaaga?

16. Ko e ha ne nakai maeke he lalolagi ke foaki ki a tautolu e tokanoaaga?

¹⁶ To fōfō kia e tokanoaaga ha tautolu ha kua eke mo tagata a Iehova? Nakai, to fōfō e tokanoaaga ha tautolu he eke mo tagata he lalolagi. Ne vevehe kehe e lalolagi mai ia Iehova ti kua pule he atua vale ne fakatupa e tau tagata. (Ioane 14:30) Ma e fakatai, ko e fakatokaaga a Satani ne fakaaoga e peehiaga fakatupe ke fōfō e tau tagata he tokanoaaga ha lautolu. (Fakatatai Fakakiteaga 13:16, 17.) Ha ha foki he agahala e malolō fakahehē ke fakatupa e tau tagata. (Ioane 8:34; Hepe. 3:13) Ti pete he liga mavehe ke he tau tagata nakai tua e tokanoaaga ka fakaholo ki mua e lautolu e tau puhala moui ne nakai fakatatau mo e tau fakaakoaga a Iehova, ko e tau tagata ne fanogonogo ki a lautolu to mafiti lahi ke fakatupa a lautolu ke he puhala moui agahala mo e fakalialia.—Roma 1:24-32.

17. Ko e heigoa e tokanoaaga kua foaki e Iehova ki a tautolu?

¹⁷ He taha faahi, to fakatokanoa e Iehova a tautolu mai he tau mena oti ka fakahagahaga kelea a tautolu kaeke ke tuku atu e tautolu a tautolu ki a ia. He falu puhala, ko e tuaga ha tautolu kua tuga e tagata ne tuku atu e moui haana ke he tagata iihi lotomatala ka fakatoka noa mai a ia he tuaga matakutakuina ke he moui. Ha ha ia tautolu oti e tuaga matakutakuina ke he moui—ko e tufaaga he agahala. Ato tuku atu ni e tautolu a tautolu ki a Iehova, he fakavē ke he poa a Keriso, ka amaamanaki a tautolu ke hao mai he tau lauiaaga he agahala mo e moui tukulagi ai. (Ioane 3:36) Tuga ni he tupu e mauokafua ha tautolu he tagata iihi he iloa e aga haana, to tupu pihia foki e falanaki ha tautolu ki a Iehova he matutaki a tautolu ke fakaako hagaao ki a ia. Ti, matutaki a tautolu ke fakaako fakamitaki e Kupu he Atua ha ko e mena ia ka lagomatai a tautolu ke fakaalofa ki a ia he puhala ka utakehe e tau matakutaku he eke mo tagata Haana.—1 Ioa. 4:18.

18. Ko e heigoa e fua ma lautolu kua eke mo tagata a Iehova?

¹⁸ Kua foaki mai e Iehova ke he tau tagata oti kana e tokanoaaga ke fifili. Pehē haana Kupu: “Kia fifili la e moui, kia moui ai a koe katoa mo e hau a fanau; kia fakaalofa atu a koe kia Iehova hau a Atua.” (Teu. 30:19, 20) Manako a ia ke fakakite e fakaalofa ha tautolu ki a ia he fifili katoatoa ke fekafekau ki a ia. He nakai fōfō e tokanoaaga ha tautolu, ko e eke mo tagata he Atua ne fakaalofa a tautolu ki ai to taute mo e fakatumau mooli a tautolu ke fiafia.

19. Ko e ha e eke mo tagata a Iehova ko e fakaalofa noa?

¹⁹ Ha ko e tau tagata agahala, kua nakai lata a tautolu ke eke mo tau tagata he Atua mitaki katoatoa. Ko e fakaalofa noa hokoia ni he Atua ati maeke ai. (2 Timo. 1:9) Ti tohi e Paulo: “Ko e mena ka momoui a tautolu, kua momoui ni ha ko [Iehova], ka mamate a tautolu kua mamate ni ha ko [Iehova]; haia ni, po ke momoui, po ke mamate a tautolu, ko e tau tagata [a Iehova] a tautolu.” (Roma 14:8) To nakai tokihala mooli a tautolu he fifili ke eke mo tau tagata a Iehova.

To Tali Fēfē e Koe?

• Ko e heigoa e tau aoga he eke mo tagata a Iehova?

• Ko e ha kua maeke ia tautolu ke taute e mena ne amaamanaki e Atua ke taute e tautolu?

• Foaki fēfē e Iehova e puipuiaga ma e tau fekafekau haana?

[Tau Fakatino he lau 8]

Hūhū ke he falu e puhala ne aoga a lautolu mai he eke mo tagata a Iehova

[Fakatino he lau 10]

Ko e heigoa falu puhala ne foaki e Iehova e puipuiaga?