Ko e Ha kua Tukulele a Koe ki a Iehova?

“Ko e mena tu mai kia au ne po e agelu he Atua, ko e hana tagata au.”—GAHUA 27:23.

1. Ko e heigoa e tau lakaaga ha lautolu kua amanaki ke papatiso nukua taute e lautolu, ti ko e heigoa e tau hūhū ne lagā mai he mena nei?

“HE FAKAVEAGA ke he poa ha Iesu Keriso, kua fakatokihala nakai a koe he tau agahala haau mo e tukulele a koe ki a Iehova ke taute haana a finagalo?” Ko e taha anei he tau hūhū ua kua tali he tau tagata ne amanaki ke papatiso he matahiku he lauga papatiso. Ko e ha kua lata e tau Kerisiano ke tukulele a lautolu ki a Iehova? Aoga fēfē ki a tautolu e tukuleleaga ke he Atua? Ko e ha ne nakai maeke e tapuakiaga he tagata ke talia ke he Atua ka nakai tukulele ki a Ia? Ke maama e tau tali, kua lata fakamua ia tautolu ke manamanatu ke he kakano he tukuleleaga.

2. Ko e heigoa e kakano ke tukulele e tagata ki a Iehova?

² Ko e heigoa e kakano he tukulele e tagata ke he Atua? Mailoga e puhala ne fakamaama he aposetolo ko Paulo haana fakafetuiaga mo e Atua. Fakalataha mo e tokologa foki he foulua hagahaga kelea, ne ui atu a ia ki a Iehova ‘ko e Atua, ko e hana tagata au.’ (Totou Gahua 27:22-24.) Ko e ha Iehova e tau Kerisiano mooli oti. Ka ko e lalolagi oti “ha he pule hana kua mahani kelea.” (1 Ioa. 5:19) Ha Iehova e tau Kerisiano ka taute e lautolu e tukuleleaga kua talia ki a ia ke he liogi. Ko e tukuleleaga pihia ko e omonuo ni he tagata. Mui mai ai e papatisoaga ke he vai.

3. Ko e heigoa ne fakamailoga he papatisoaga a Iesu, ti maeke fēfē e tau tutaki haana ke muitua ke he fifitakiaga haana?

³ Ne foaki e Iesu e fifitakiaga ma tautolu he magaaho ne taute e ia e fifiliaga fakatagata ke taute e finagalo he Atua. Ha kua fanau a ia ke he motu tukulele, po ke, tapu a Isaraela, ne fitā a ia he tukulele ke he Atua. Ka e fai mena agaia ke he papatisoaga haana kua lata ke taute e ia ke felauaki mo e Fakatufono. Kua fakakite he Kupu he Atua na pehē a ia: “Ko e Atua na e, kitiala, kua fina atu au ke eke hau a finagalo.” (Hepe. 10:7; Luka 3:21) Ti ko e papatisoaga a Iesu ne fakamailoga a ia ke he Atua ke taute e finagalo he haana Matua. Ne muitua he tau tutaki haana e fifitakiaga haana ke papatiso a lautolu. Ko e tuaga ha lautolu mogoia, ko e papatiso ke he vai ko e fakakiteaga ke he moto tagata kua taute e lautolu e tukuleleaga fakatagata ke he Atua ke he liogi.

Puhala ne Aoga e Tukuleleaga ki a Tautolu

4. Ko e heigoa ne talahau he tuaga kapitiga a Tavita mo Ionatana ki a tautolu hagaao ke he fakamooliaga?

⁴ Ko e tuaga hokulo lahi e tukuleleaga Kerisiano. Nakai ni ko e fakamooliaga hokoia. Ti maeke fēfē mogoia he taute e tukuleleaga ke aoga ki a tautolu? He puhala ke fakatatai, fakatutala la tautolu ke he puhala kua tamai he fakamooliaga e tau aoga ke he fakafetuiaga he tau tagata. Taha he tau fakataiaga ko e kapitiga. He olioli ha kua fai kapitiga, kua lata ia koe ke talia e matafeua he eke mo kapitiga. Putoia he mena ia e fakamooliaga—kua logona hifo e koe e matagahua ke leveki e kapitiga haau. Taha he tau fakafetuiaga kapitiga uho lahi ne fakamaama he Tohi Tapu ko Tavita mo Ionatana. Ne taute foki e laua e maveheaga he tuaga kapitiga ha laua. (Totou 1 Samuela 17:57; 18:1, 3.) Pete he lavea e tuaga kapitiga ke hokotia ke he fakamooliaga pihia, laulahi he tau tuaga kapitiga ne mauokafua ai ka falanaki, po ke logona falu matagahua ki a laua tokoua ni.—Fakatai 17:17; 18:24.

5. Maeke fēfē e fekafekau ke aoga tukulagi mai he fakalataha ke he iki mitaki?

⁵ Ko e Fakatufono ne age he Atua ki a Isaraela ne fakamaama foki taha fakafetuiaga ne aoga ai ke he tau tagata ka taute e fakamooliaga. Ka manako e fekafekau ke nofo tukulagi ki lalo hifo he puipuiaga he iki mitaki, maeke a ia ke fakatū e maveheaga tukulagi kua talia tokoua mo e iki haana. Pehē e Fakatufono: “Kaeke ke vagahau fakatonu mai e fekafekau, Kua fakaalofa au ke he haku iki, mo e haku hoana, mo e haku fanau, nakai ni fano kehe au; ti uta he iki hana a ia ke he [“Atua mooli,” NW]; to uta foki a ia ke he pahala po ke pou he gutuhala; ti huki ai hana iki e teliga hana ke he huki, ti fekafekau muatua a ia kia ia.”—Esoto 21:5, 6.

6, 7. (a) Maeke fēfē he fakamooliaga ke aoga ke he tau tagata? (e) Ko e heigoa he mena ia ne fakakite hagaao ke he fakafetuiaga ha tautolu mo Iehova?

⁶ Ko e fakafetuiaga he fakamauaga kua lata ke mua ue atu e fakamooliaga. Ti ko e fakamooliaga anei, nakai ke he konotuleke, ka ke he tagata. Tokoua e tagata ne nonofo ka e nakai mau ka nakai olioli e puipuiaga mooli; ti nakai olioli foki he tau tama ha laua. Ka ko e tau hoa ne fefalanakiaki ke he fakamauaga lilifu ne moua e kakano omoomoi he Tohi Tapu he eketaha ke fakamafola e tau lekua ha laua ka tutupu ke he fakaalofa.—Mata. 19:5, 6; 1 Kori. 13:7, 8; Hepe. 13:4.

⁷ He tau vahā Tohi Tapu, ne aoga e tau tagata mai he fakamooli ke he tau fakatokaaga gahua. (Mata. 20:1, 2, 8) Kua pihia foki he vahā nei. Ma e fakatai, kua aoga ki a tautolu mai he fakamau tohi, po ke tohi hifo e konotuleke, ato kamata e tautolu e pisinisi po ke kamata gahua ko e tagata gahua he kamupanī. Ti ka fakatupu malolō he fakamooliaga e fakafetuiaga tuga e tuaga kapitiga, fakamauaga, mo e gahua, to mua atu e aoga he tukuleleaga katoatoa ki a koe mo e fakafetuiaga haau mo Iehova! Kia fakatutala la tautolu mogonei ke he puhala ne aoga e tau tagata i tuai mai he tukulele ki a Iehova ko e Atua mo e puhala ne mua atu e aoga he mena nei ke he fakamooliaga hokoia.

Puhala ne Aoga a Isaraela ha ko e Tukulele ke he Atua

8. Ko e heigoa e kakano he tukulele ke he Atua ma Isaraela?

⁸ Ne eke e motu katoa ha Isaraela mo tukuleleaga ki a Iehova he magaaho ne taute e lautolu e omonuo ke he Atua. Ti fakapotopoto e Iehova a lautolu nukua tata atu ke he Mouga ko Sinai, ti tala age ki a lautolu: “Kaeke ke fanogonogo fakamakutu a mutolu ke he haku tau kupu mo e omaoma ke he haku a maveheaga, ti eke ni a mutolu mo koloa uho maku, ke mua ke he tau motu oti.” Ne tali auloa a lautolu: “Ko e tau mena oti ne tala mai e Iehova, to eke ni e mautolu.” (Esoto 19:4-8) He tukulele ne kakano kua lahi atu e mena ka taute he tau Isaraela he fakamooliaga hokoia. Ne kakano ko lautolu ko e tau tagata a Iehova, ti taute e Iehova a lautolu ko e haana “koloa uho.”

9. Aoga fēfē a Isaraela mai he tukulele ke he Atua?

⁹ Ne aoga e tau Isaraela ha kua eke mo tau tagata a Iehova. Ne fakamooli mo e leveki e ia a lautolu tuga e matua fakahele ne leveki e tama. Ne pehē e Atua ki a Isaraela: “To nimo kia he fifine hana tama kai huhu, ke nakai fakaalofa a ia ke he tama ne fanau ai e ia? mena nimo foki ia lautolu na, ka e nakai ni nimo ia au a koe.” (Isaia 49:15) Ne age e Iehova ki a lautolu e takitakiaga he Fakatufono, ko e fakamalolōaga he tau perofeta, mo e puipuiaga he tau agelu. Ne tohi he salamo: “Kua fakailoa e ia hana kupu kia Iakopo, ko e hana tau fakatufono mo e hana tau fakafiliaga kia Isaraela. Kua nakai eke pihia e ia ke he taha motu.” (Sala. 147:19, 20; totou Salamo 34:7, 19; 48:14.) He leveki e Iehova e motu haana i tuai, to leveki foki e ia a lautolu ne tukulele ki a ia he vahā nei.

Kakano kua Lata ke Tukulele e Tautolu a Tautolu ke he Atua

10, 11. Fanau nakai a tautolu ke he magafaoa he Atua he lagi mo e lalolagi katoa? Fakamaama.

¹⁰ He manamanatu ke he tukuleleaga mo e papatisoaga faka-Kerisiano, falu ne liga manatu, ‘Ko e ha kua nakai maeke ia au ke tapuaki ke he Atua ka e nakai tukulele au ki a ia?’ Kua maaliali e kakano ka manamanatu a tautolu ke he mena mooli he tuaga ha tautolu mogonei ki mua he Atua. Manatu, ha ko e agahala a Atamu, kua fanau a tautolu oti i fafo he magafaoa he Atua. (Roma 3:23; 5:12) He tukulele a tautolu ke he Atua ko e poakiaga aoga lahi ke talia ki loto he magafaoa haana he lagi mo e lalolagi katoa. Kitekite la tautolu ke he kakano.

¹¹ Nakai fai ia tautolu ne ha ha ai e matua taane fanau ka fakatoka mai ki a tautolu e moui kua latatonu—ko e moui mitaki katoatoa. (1 Timo. 6:19) Ne nakai fanau a tautolu ko e tau tama he Atua ha kua agahala e hoa fakamua, ne vevehe kehe e lanu tagata mai he Matua mo e Tufuga fakaalofa. (Fakatatai Teutaronome 32:5.) Tali mai he magaaho ia, ko e tau tagata he lalolagi ne momoui i fafo he magafaoa a Iehova he lagi mo e lalolagi katoa, ne vevehe kehe mai he Atua.

12. (a) Eke fēfē e tau tagata nakai mitaki katoatoa mo tau tagata he magafaoa he Atua? (e) Ko e heigoa e tau lakaaga kua lata ke taute e tautolu ato papatiso?

¹² Ka ko e tau tagata takitaha, kua maeke ia tautolu ke olelalo ke talia he Atua a tautolu ke he magafaoa haana he tau fekafekau ne talia.a Maeke fēfē e mena ia ma e tau tagata agahala tuga a tautolu? Ne tohi he aposetolo ko Paulo: “Ko e mena kaeke kua fakafeilo a tautolu mo e Atua ke he matulei he Tama hana, ka ko e tau fi a tautolu.” (Roma 5:10) He papatisoaga, ne ole a tautolu ke he Atua ma e loto manamanatu mitaki ke maeke ke talia e ia. (1 Pete. 3:21) Ato papatiso ai, fai lakaaga kua lata ia tautolu ke taute. Kua lata ia tautolu ke iloa e Atua, fakaako ke falanaki ki a ia, tokihala, mo e hiki e tau puhala ha tautolu. (Ioane 17:3; Gahua 3:19; Hepe. 11:6) Ti fai mena foki kua lata ke taute ato maeke a tautolu ke talia ke he magafaoa he Atua. Ko e heigoa e mena ia?

13. Ko e ha kua latatonu ma e tagata ke taute e omonuo he tukuleleaga ke he Atua ke eke mo vala he magafaoa he tau tagata tapuaki talia Haana?

¹³ Ato eke e tagata ne vevehe kehe mai he Atua mo tagata he magafaoa he tau fekafekau talia he Atua, kua lata fakamua a ia ke taute e maveheaga mauokafua ki a Iehova. Ke maama e kakano, manamanatu ke he matua taane lilifu ne fakakite e fiafia ke he fuata nakai fai matua mo e manako ke hiki tohi a ia ko e taha he magafaoa haana. Kua talahaua e matua taane ko e tagata taane mitaki. Ato eke foki e fuata mo tama taane haana, kua manako e tagata taane ke he tama taane ke taute e maveheaga. Ti pehē e tagata taane, “Ato talia e au a koe ko e tama taane haaku, kua manako au ki a koe ke iloa to fakaalofa mo e fakalilifu e koe au ko e matua taane haau.” Ko e magaaho la ka makai e fuata ke taute e maveheaga mauokafua to fakaatā he tagata taane a ia ke he magafaoa haana. Nakai kia tonu e mena ia? Pihia foki kua talia ni e Iehova ke he magafaoa haana a lautolu kua makai ke taute e omonuo he tukuleleaga ki a ia. Ne pehē e Tohi Tapu: “Kia tuku atu e mutolu ha mutolu a tau tino ke he Atua, ko e poa moui, mo e [faka]tapu, ke talia mo e fiafia.”—Roma 12:1.

Fakakite e Fakaalofa mo e Tua

14. Ko e puhala fe he tukuleleaga ko e fakakiteaga he fakaalofa?

¹⁴ Ko e taute e omonuo he tukulele ke he Atua ko e fakakiteaga he fakaalofa mai he tau loto ha tautolu ki a Iehova. Ke he falu puhala kua tatai ai ke he omonuo he fakamauaga. Kua fakakite he taane Kerisiano e fakaalofa haana he omonuo ke fakamooli ke he hoana haana, pete ne tau mena ka tutupu. Ko e omonuo ke he tagata ka e nakai ko e maveheaga noa ni ke fai mena ka taute. Kua maama he taane Kerisiano to nakai moua e ia e kotofaaga ke nonofo mo e hoana haana ka nakai taute e ia e omonuo he fakamauaga. He puhala pihia foki, kua nakai olioli katoatoa e tautolu e tau aoga he eke mo magafaoa ha Iehova ka nakai taute e omonuo he tukuleleaga. Ti tukulele e tautolu a tautolu ke he Atua, pete ne nakai mitaki katoatoa, kua manako a tautolu ke eke mo tau tagata Haana mo e fifili ke fakamooli ki a ia pete ne tau mena ka tutupu.—Mata. 22:37.

15. Maeke fēfē e tukuleleaga mo fakakiteaga he tua?

¹⁵ Ka tukulele e tautolu a tautolu ke he Atua, kua fakakite e tautolu e tua. Ko e ha ne pihia ai? Kua taute he tua ha tautolu ki a Iehova a tautolu ke mauokafua ko e fakatata ke he Atua kua mitaki ma tautolu. (Sala. 73:28) Iloa e tautolu to nakai mukamuka tumau ke o fano mo e Atua he momoui he “hau fakakeukeu mo e faliuliu,” ka e falanaki a tautolu ke he maveheaga he Atua ke lalago a tautolu ke he tau laliaga ha tautolu. (Filipi 2:15) Iloa e tautolu kua nakai mitaki katoatoa a tautolu, ka kua mauokafua a tautolu to fakaalofa noa a Iehova ki a tautolu pete ka taute e tautolu e tau hepehepe. (Totou Salamo 103:13, 14; Roma 7:21-25.) Ha ha ia tautolu e tua to palepale e Iehova e fifiliaga ha tautolu ka fakatumau e mahani fakamooli ha tautolu.—Iopu 27:5.

Tukuleleaga ke he Atua kua Takitaki Atu ke he Fiafia

16, 17. Ko e ha e taute e tukuleleaga ki a Iehova kua takitaki atu ke he fiafia?

¹⁶ He tukulele ki a Iehova kua fua mai e fiafia ha kua putoia e foaki atu ha tautolu ni. Ne talahau e Iesu e mena mooli he pehē a ia: “Kua mua e [fiafia] hana ke foaki atu, ke he [fiafia] hana ke talia mai.” (Gahua 20:35) Kua moua katoatoa e Iesu e fiafia he foaki atu, ke he magaaho he fekafekauaga haana he lalolagi. Ka lata ai, ne nakai okioki, nakai kai, mo e nakai nofo hagahaga mitaki a ia ke maeke ke lagomatai e falu ke kumi e puhala ke he moui. (Ioane 4:34) Ne moua e Iesu e fiafia he fakafiafia e loto he Matua haana. Ne pehē a Iesu: “Ko e mena eke mau e au e tau mena kua mitaki kia ia.”—Ioane 8:29; Fakatai 27:11.

¹⁷ Ti, takitaki atu e Iesu e tau tutaki haana ke he puhala fiafia he moui he pehē a ia: “Ko e tagata ka fia mui mai kia au, aua neke omaoma a ia kia ia.” (Mata. 16:24) He taute pihia kua fakatata lahi a tautolu ki a Iehova. To tuku atu nakai e tautolu a tautolu ke he ha tagata ka maeke ke leveki fakaalofa lahi ki a tautolu?

18. Ko e ha e moui fakalagotatai mo e tukuleleaga ha tautolu ki a Iehova kua tamai e fiafia lahi ke he tukulele ke he ha mena po ke ha tagata foki?

¹⁸ Ko e tukulele a tautolu ki a Iehova mo e momoui fakatatau ke he tukuleleaga ia he taute e finagalo haana ka tamai e fiafia lahi foki he tukulele ke he ha mena po ke taha tagata. Ma e fakatai, tokologa e tagata ne foaki e tau momoui ha lautolu ke tutuli e maukoloa fakatino ne nakai ha ha ai ha fiafia mo e makona mooli. Ka ko lautolu ne tukulele a lautolu ki a Iehova kua moua e lautolu e fiafia tukulagi. (Mata. 6:24) Ko e lilifu he eke mo ‘tau ekegahua he Atua’ kua taute a lautolu ke fiafia, ka ko e tukuleleaga ha lautolu kua nakai ke he gahua ka ke he ha tautolu a Atua loto fakaaue. (1 Kori. 3:9) Nakai fai tagata kua mua atu e loto fakaaue ke he foaki fakatagata ha lautolu ki a Ia. To liuaki foki e ia a lautolu ne fakamooli ke he fuata ha lautolu ke maeke ia lautolu ke aoga mai he levekiaga tukulagi haana.—Iopu 33:25; totou Heperu 6:10.

19. Ko e heigoa e kotofaaga kua olioli e lautolu kua tukulele ki a Iehova?

¹⁹ He tukulele e moui haau ki a Iehova kua tamai a koe ke he fakafetuiaga tata mo ia. Pehē e Tohi Tapu: “Kia fakatata atu a mutolu ke he Atua, ti fakatata mai ai a ia kia mutolu.” (Iako. 4:8; Sala. 25:14) He vala tala ka mui mai, to fakatutala a tautolu ke he kakano ka mauokafua a tautolu hagaao ke he taute he fifiliaga ke eke mo tagata a Iehova.

[Matahui Tala]

To Tali Fēfē e Koe?

• Ko e heigoa e kakano he tukulele e tagata ke he Atua?

• Aoga fēfē ki a tautolu e tukulele ke he Atua?

• Ko e ha kua lata e tau Kerisiano ke tukulele ki a Iehova?

[Fakatino he lau 6]

Momoui lagotatai ke he tukuleleaga ha tautolu kua takitaki a tautolu ke he fiafia tukulagi