Ko e Mena ne Ako e Tautolu Mai ia Iesu

Hagaao ke he Tapuakiaga Mooli

Talia oti nakai he Atua e tau tapuakiaga?

▪ Ne fakaalofa a Iesu ke he tau tagata ne fakahehē he lotu fakavai. Ne hataki a ia hagaao ke he “tau perofeta pikopiko; to o mai a lautolu kia mutolu mo e tau tapulu mamoe, ka ko loto ko e tau luko kakati haia.” (Mataio 7:15) Mailoga nakai e koe kua fakaaoga he falu tagata e lotu ke fakahoko e tau mena kelea?

Ne pehē a Iesu he liogi ke he Atua: “Ko e hau a kupu ko e kupu moli haia.” (Ioane 17:17) Ti kua nakai talia he Atua e tapuakiaga ne nakai tatai ke he kupu mooli he Tohi Tapu. Ti ko e mena ia, ke he falu tagata lotu fakatupua, ne fakaaoga e Iesu e tau kupu he Atua ne pehē: “Kua tapuaki noa mai a lautolu kia au he fakaako e lautolu e tau poaki he tau tagata.”—Mataio 15:9.

Fai lotu mooli nakai?

▪ He feleveia a Iesu mo e fifine i Samaria ne fakahehē he lotu fakavai, ne tala age a ia ki ai: “Kua tapuaki fakahaupo na mutolu . . . Ko lautolu ne tapuaki fakamoli, to tapuaki a lautolu ke he Matua mo e agaga mo e fakamoli; ha ko e mena kumi e Matua kia pihia a lautolu ne tapuaki kia ia.” (Ioane 4:22, 23) Maaliali ai, maeke e tapuakiaga mooli ke moua.

Ne pehē a Iesu: “Nakai eke noa foki e au ha mena, ha ko e mena tuga ne fakaako mai he haku a Matua kia au, ko e tau mena ia ne tala atu ai e au.” Ti iloa e Iesu ko e lotu ne fakaako e ia ko e lotu mooli ni. (Ioane 8:28) Ati pehē a ia: “Ko au nai ko e puhala, mo e kupu moli, mo e moui; nakai hau taha ke he Matua, ka noa mo au.” (Ioane 14:6) Ha kua fakalataha e tau tagata tapuaki mooli ke he taha e liogi ke he Matua, kua lata ia lautolu ke kaufakalataha ke he taha e lotu mooli.

Maeke fēfē a koe ke kitia e tau tagata tapuaki mooli?

▪ Ko e Kerisiano ko e tagata kua muitua ki a Iesu Keriso. Manamanatu ke he fā e puhala he muitua ke he fifitakiaga ha Iesu kua fakakite maali e tau tutaki haana.

1. Ne talahau e Iesu Keriso he liogi ki a Iehova: “Ne fakailoa atu foki e au hau higoa.” (Ioane 17:26) Kua taute agaia he tau Kerisiano mooli e mena ia.

2. Ne fakamatala a Iesu hagaao ke he Kautu a Iehova mo e fakafano atu pihia foki e ia e tau tutaki haana mai he taha fale ke he taha fale. Ne pehē a ia: “Ko e māga, po ke magamotu ke hohoko atu a mutolu ki ai, kia hūhū po ko hai ha i ai kua lata.” Fakamui, ne tala age a ia ke he tau tutaki haana: “Hanei, kia o atu a a mutolu ke eke e tau motu oti kana mo tutaki.” (Mataio 10:7, 11; 28:19) Mukamuka ia koe ke kitia e tau Kerisiano mooli he vahā nei ha kua matutaki a lautolu ke taute e matagahua taha ia.

3. Ne nakai talia e Iesu ke fai vala ke he tau mena politika. Ti, pehē a ia hagaao ke he tau tutaki haana: “Ko e mena nakai ko e tau tagata he lalolagi a lautolu; tuga na au, nakai ko e tagata he lalolagi au.” (Ioane 17:14) Ko e tau tagata tapuaki mooli kua lata ke talahaua ke he tū uho ha lautolu ke he tau mena politika.

4. Ne foaki noa e Iesu e fakaalofa haana ma e falu. Ne pehē a ia: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:35) Kua felevekiaki e tau Kerisiano mooli ti nakai fai vala ke he tau felakutaki.

Maeke fēfē e tapuakiaga mooli ke aoga ki a koe?

▪ Ke fakagahua e tapuakiaga mooli, kua lata fakamua ia koe ke iloa mitaki a Iehova. Ko e iloilo he Atua ka omoomoi a koe ke tutuli e puhala mitaki lahi mahaki he moui mo e to fakapuke e loto haau ke he fakaalofa ma e Atua. Ne mavehe e Iehova e moui nakai fai fakaotiaga ki a lautolu kua fakaalofa ki a ia. Ati pehē a Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni.”—Ioane 17:3.

Ma e falu vala tala foki, kikite e veveheaga 15 he tohi nei, Ko e Heigoa ne Fakaako Moli he Tohi Tapu? ne taute fakailoa he Tau Fakamoli a Iehova.

[Fakatino he lau 24]

“A mutolu mo e tau perofeta pikopiko; to o mai a lautolu kia mutolu mo e tau tapulu mamoe, ka ko loto ko e tau luko kakati haia.”—Mataio 7:15