Lata Kia a Koe ke Talitonu ke he Tolu Taha ke Eke mo Kerisiano?

Ko e tohi fakaako he aoga tokoluga ko e World Religions in Denmark ne taute fakailoa he 2007, ne talahau ko e matakau Kerisiano tote he Tau Fakamoli a Iehova ne muitua fakalahi ke he Tohi Tapu. Ko e Tau Fakamoli a Iehova ko e matakau lotu Kerisiano lahi mahaki ke toluaki i Tenemaka.

Pete ia, ko e pisopo he Danish National Church ne tuhituhi fakakelea e fifiliaga he tagata tohia ha kua putoia e Tau Fakamoli i loto he tohi. Ko e ha? “Nakaila feleveia au mo e akoako ne talahau ko e [Tau Fakamoli a Iehova] e tau Kerisiano,” he talahau he pisopo. “Ne fakatikai e lautolu e Tolu Taha, ko e matapatu he lotu Kerisiano.”

Ko e tagata tohia he tohi, ko e tagata kumikumi he lotu ko Annika Hvithamar, ne talahau ka hūhū ke he tau tagata e kakano ne ui a lautolu ko e tau Kerisiano, ne nakai fai ne tali ha kua talitonu a lautolu ke he Atua ko e Tolu Taha. Mua atu, ko e vala he tohi ne mataulu “Ko e Kerisiano Kia a Koe?” ne pehē: “Ko e taofiaga ke he Tolu Taha ko e taha he tau lekua uka lahi he fakaakoaga faka-Kerisiano.” Lafi ki ai: “He tau magaaho oti, kua uka lahi ke fakamaama ke he tau Kerisiano nakai ō he tau aoga lotu e kakano ko e Atua Kerisiano kua taha agaia e atua ka e nakai tolu e atua.”

Ko e mena ne fakaako he Tohi Tapu hagaao ke he Atua mo Iesu kua maama mo e mukamuka. Kua nakai halahū ai. Ko e talahauaga “Tolu Taha” po ke manatu kua nakai ha ha i loto he Kupu he Atua. Talahau fakamaama he Tohi Tapu ko Iesu Keriso ko e Tama uluaki he Atua. (Kolose 1:15) Kua hagaao foki ki a Iesu ko ia ko e “hulalo ke he Atua mo e tau tagata.” (1 Timoteo 2:5) Hagaao ke he Matua, ne pehē e Tohi Tapu: “Ko e hāu a higoa ko Iehova, hoko koe ni kua Mua ue atu ke he lalolagi oti.”—Salamo 83:18.

Kua talitonu e Tau Fakamoli a Iehova ko e tua ki a Iesu kua aoga lahi. (Ioane 3:16) Ma e kakano nei, ne omaoma fakahokulo e lautolu e poaki ha Iesu: “Ko e mena kua tohi, kia hufeilo atu a koe ke he Iki [Iehova] hau a Atua, ko ia ni hokoia ke fekafekau atu a koe ki ai.” (Mataio 4:10) Mooli, ko e ha tagata ne eketaha ke omaoma e tau poaki ha Iesu ka fakahigoa ko e Kerisiano.