Ne Fakaako a Iesu ke Omaoma

KUA uka kia a koe he falu magaaho ke omaoma?—a Nakai ofo ka pihia a koe. Kua uka e tau tagata oti he falu magaaho ke omaoma. Iloa nakai e koe na fakaako foki a Iesu ke omaoma?—

Iloa nakai e koe ko hai kua lata e tau fanau ikiiki oti ke omaoma ki ai?— E, ko e matua fifine mo e matua taane ha tautolu. “Kia omaoma ke he tau matua ha mutolu ke he Iki,” he talahau he Tohi Tapu. (Efeso 6:1) Ko hai e matua taane ha Iesu?— Ko Iehova ko e Atua, ko ia foki ko e Matua ha tautolu. (Mataio 6:9, 10) Kaeke ke pehē a koe ko Iosefa e matua taane ha Iesu mo Maria e matua fifine haana, to hako foki a koe. Iloa nakai e koe e puhala ne eke a laua mo tau matua haana?—

Ne tala age e agelu ko Kaperielu ki a Maria ke he puhala ka eke a ia mo matua fifine pete he nakaila iloa e ia ha tagata taane. Ko Iehova ne taute e mana lahi nei ati maeke ke fatu. Ne fakamaama e Kaperielu kia Maria: “To haele hifo e [a]gaga [t]apu kia koe to fakamalu hifo foki e koe he mana hana ne Mua ue atu ko e mena ia ke talahaua ai e tama tapu, ko e Tama he Atua.”—Luka 1:30-35.

Ne uta he Atua e moui he Tama haana i luga he lagi ti tuku he manava ha Maria. Ti tupu mogoia e moui ia i loto haana tuga ni e falu tama mukemuke i loto he tau matua fifine ha lautolu. Kavi ke he hiva e mahina he mole, ne fanau a Iesu. He magaaho ia, ne hoana e Iosefa a Maria, ti manatu ni e tau tagata tokologa ko Iosefa e matua taane mooli ha Iesu. Ka ko Iosefa e matua hiki haana. Ti tuga kua ua e matua taane ha Iesu!

Magaaho ne 12 laia e tau moui ha Iesu, ne taute e ia e taha mena ne fakakite e fakaalofa lahi mahaki haana ke he haana Matua he lagi, ko Iehova. He magaaho ia, ko e magafaoa ha Iesu, ko e aga ha lautolu, ke o atu he fenoga ki Ierusalema ma e Paseka. He oti ai, he liliu ke he kaina i Nasareta, ne nakai mailoga e Iosefa mo Maria kua nakai ha ha i ai a Iesu mo laua. Manamanatu nakai a koe kua maeke fēfē ia laua ke nimo a ia?—

He magaaho ia kua fai tama foki a Iosefa mo Maria. (Mataio 13:55, 56) Liga ha ha foki mo laua e tau magafaoa ne fakatauō mo lautolu, tuga a Iakopo mo Ioane fakalataha mo e matua taane ha laua, ko Sepetaio, mo e matua fifine ko Salome, ne liga ko e lafu ha Maria. Ti liga manatu a Maria ko Iesu haia mo e falu magafaoa ne o fakalataha.—Mataio 27:56; Mareko 15:40; Ioane 19:25.

Magaaho ne mailoga e Iosefa mo Maria kua galo a Iesu, ne liliu fakaave a laua ki Ierusalema. Ne kumi fakamakamaka a laua ke he tama taane ha laua. He aho ke toluaki, ne moua e laua a ia he faituga. Ne pehē a Maria ki a ia, “Ko e heigoa e mena ne eke pihia ai a koe kia maua? Kitiala, ne kumi hau a matua tane mo au kia koe mo e fakatukehe.” Ka e tali a Iesu: “Ko e ha ne kumi mai ai au e mua? Nakai kia iloa e mua ko e mena lata ke nofo au ke he fale he haku a Matua?”—Luka 2:45-50.

Manatu nakai a koe kua hepe a Iesu he tali pihia ke he matua fifine haana?— Na iloa he tau matua haana kua fiafia lahi a ia ke tapuaki he fale he Atua. (Salamo 122:1) Ti nakai kia hako a Iesu ke manamanatu ko e matakavi fakamua kua lata e tau matua haana ke kumi a ia ko e faituga he Atua?— Fakamui, ne manamanatu tumau a Maria ke he tau kupu ne talahau e Iesu.

Fēfē e aga ha Iesu ki a Iosefa mo Maria?— Pehē e Tohi Tapu: “Ti o hifo a [Iesu] mo laua, kua hoko ki Nasareta, kua omaoma [tumau] a ia kia laua.” (Luka 2:51, 52) Ko e heigoa ha tautolu ka fakaako mai he fakafifitakiaga ha Iesu?—E, kua lata foki ia tautolu ke omaoma ke he tau matua ha tautolu.

Ka kua nakai mukamuka tumau ki a Iesu ke omaoma—ke he haana foki a Matua he lagi.

He pō ato mate a Iesu, ne ole a ia ki a Iehova kua maeke nakai a Ia ke hiki e loto Haana hagaao ke he mena ne manako a Iehova ke taute e ia. (Luka 22:42) Ka kua omaoma a Iesu ke he Atua pete ne nakai mukamuka. Ne pehē e Tohi Tapu “ko e tau mena ne mamahi ai a ia kua ako ai e ia e omaoma.” (Heperu 5:8) Manatu nakai a koe kua maeke foki ia tautolu ke fakaako mai he fakaakoaga ia?—