Veveheaga 4

Fatu ka e Nakai La Fakamau

KO MARIA kua tolu e mahina he fatu. To manatu e koe ne nofo a ia mo Elisapeta ke he vala fakamua he hana fai tama, ka ko e ha ha i kaina i Nasareta a ia ke he magaaho nei. To nakai leva to iloa oti he maga e fatu hana. Ti, ko ia moli, ha he tuaga tupetupe lahi!

Ko e mena ne hagahaga kelea foki ai ha kua fakatutane a Maria mo hoana he tagata ta fale ko Iosefa. Mo e iloa foki e ia, ki lalo hifo he fakatufono he Atua ke he tau Isaraela, ko e fifine ne fakatutane ke he taha tagata, ka kua talia ke taute e mahani fakatane mo e fifine mo e taha tagata kehe kua lata ke pinimaka ke mate. To fakamaama fefe e fatu hana ki a Iosefa?

Ha kua tolu e mahina ha Maria he fano kehe, ko e moli kua lahi e fiafia ha Iosefa ke kitia a ia. Ke he magaaho ne feleveia a laua, ne liga tala age e Maria e tala ki a ia. Ne lali a ia ke fakamaama ko e agaga tapu he Atua ne fatu ai a ia. Ka e taha e mena, ke he hau a manamanatuaga, ko e mena uka lahi a nei ki a Iosefa ke talitonu.

Ne iloa e Iosefa e talahauaga mitaki ha Maria. Mo e maaliali hana a fakaalofa ki a ia. Ka e taha e mena, pete ni he talahau e ia e fakamaamaaga, tuga ni ko e fatu hana mo e taha tagata tane. Pete ni a ia, nakai manako a Iosefa ke pinimaka a ia ke mate, po ke fakama ki mua he tau tagata. Ti taute e fifiliaga hana ke vevehe fufu a ia. Ke he vaha ia ko lautolu ne fakatutane kua tatai ne onoonoaga mo e fakamau, mo e kua lata ke taute e vevehe ke fakaoti aki e fakatutane.

Ko e magaaho fakamui he manamanatu agaia ni a Iosefa ke he tau mena nei, ne mohe a ia. Ne fakakite mai e agelu a Iehova ki a ia he miti mo e pehe: “Aua neke matakutaku a koe ke ta mai hau a hoana ko Maria; ha ko e agaga tapu kua fatu ai a ia. To fanau mai e ia e tama tane, to fakahigoa foki e koe a ia ko Iesu; ha ko e mena fakamoui e ia hana tau tagata mai he tau hala ha lautolu.”

Ko e magaaho ne ala hake a Iosefa, ne lahi hana a fakaaue! Ne nakai fakapuga ne taute e ia tuga he fakailoa he agelu. Ne uta e ia a Maria ke he kaina hana. Ko e tauteaga nei ki mua he tau tagata ko e aga mo e mahani he fakamauaga, ko e fakailoaaga kua fakamau tuai a Iosefa mo Maria. Ka e nakai taute e Iosefa e mahani fakatane mo e fifine mo Maria ke he hana a fatu ia Iesu.

Kitiala! Kua lahi e fatu ha Maria, ka e taha e mena kua fakaheke e Iosefa a ia he asini. Ko e o a laua ki fe, mo e ko e ha ne o fenoga ai ka kua teitei a Maria ke fanau? Luka 1:​39-41, 56; Mataio 1:​18-25; Teutaronome 22:​23, 24.

▪ Fefe e manamanatuaga a Iosefa he iloa kua fatu a Maria, mo e ko e ha?

▪ Maeke fefe a Iosefa ke vevehe a Maria ka e nakai la fai fakamauaga a laua?

▪ Ko e heigoa e tauteaga ki mua he tau tagata ne eke mo fakamauaga ha Iosefa mo Maria?