Fakatata Atu ke he Atua
“Hau a Kautu ke Tukulagi”
TALI mai he fakamauaga tuai, tokologa e tagata ne pule nukua utakehe mai he tau tuaga ha lautolu. Falu ne nakai kautū he viliaga, ka e poaki ke he falu ke oti. Ka e kua a Iesu Keriso, ko e Patuiki he Kautu he Atua he lagi? Fai mena nakai ke taofi a ia mai he pule ko e Patuiki ne fifili he Atua? Maeke ke moua e tali he tau kupu a Iehova ne tala age ke he Patuiki ko Tavita i Isaraela i tuai, ne fakamau ia 2 Samuela veveheaga 7.
He kamata e veveheaga, kua iloa e tautolu kua maimainā a Tavita ha ko ia ni ko e tagata ne patuiki kua nofo he fale patuiki fulufuluola ka e toka e puha he Atua i loto he fale ie.a Ne fakakite e Tavita e manako haana ke talaga e fale lilifu, po ke faituga ki a Iehova. (Kupu 2) Ka e nakai ko Tavita ka talaga e fale. Puhala he perofeta ko Natano, kua tala age a Iehova ki a Tavita ko e tama taane haana ka talaga e faituga.—Kupu 4, 5, 12, 13.
Ne mafanatia a Iehova ha ko e manako mooli a Tavita. He tali ke he loto fakamooli a Tavita mo e lagotatai ke he perofetaaga, ne taute he Atua e maveheaga mo Tavita to fakatū e Ia e tagata he mataohi fakapatuiki a Tavita ke pule tukulagi. Ne tala age e Natano e maveheaga mauokafua he Atua ki a Tavita: “To fakamau e au e magafaoa hau mo e hau a kautu ke tukulagi ki mua hau; to tumau tukulagi hau a nofoaiki.” (Kupu 16) Ko hai e Hakeaga tukulagi he maveheaga nei—ko Ia ka pule tukulagi?—Salamo 89:20, 29, 34-36.
Ko Iesu i Nasareta ko e huli ha Tavita. He fakailoa e fanauaga a Iesu, ne pehē e agelu: “To foaki atu he Iki ko e Atua kia ia e nofoaiki a Tavita hana matua; to eke a ia mo Patuiki he faoa a Iakopo tukulagi; ko e hana kautu foki nakai fai fakaotiaga ia.” (Luka 1:32, 33) Ti fakamooli e maveheaga mo Tavita ia Iesu Keriso. Ti pule a ia, nakai ha ko e fifili he tau tagata, ka e puhala he maveheaga mauokafua he Atua ne foaki ki a ia e tonuhia ke pule tukulagi. Kia manatu e tautolu kua fakamooli tumau e tau maveheaga he Atua.—Isaia 55:10, 11.
Ua e fakaakoaga aoga lahi ke fakaako mai he 2 Samuela veveheaga 7. Fakamua, maeke ia tautolu ke mauokafua kua nakai fai mena ti nakai fai tagata ke taofi a Iesu Keriso he pule. Ti maeke ia tautolu ke talitonu to fakamooli e ia e finagalo ne talahau e ia hagaao ke he pule haana, ke fakakatoatoa e finagalo he Atua ke he lalolagi tuga ke he lagi.—Mataio 6:9, 10.
Uaaki, kua fakaako he tala nei ki a tautolu e fakaakoaga omoomoi hagaao ki a Iehova. Manatu na kitia mo e aoga lahi ki a Iehova e manako he loto a Tavita. Kua atihake mooli ke iloa kua loto fakaaue a Iehova ke he loto fakamooli ha tautolu ke he tapuakiaga haana. He falu magaaho, ko e tau tuaga ne nakai ha ha ia tautolu e pule, tuga e nakai malolō e tino po ke fuakau, ne liga taofi a tautolu mai he fakamooli e tau mena oti ne manako e tau loto ha tautolu ke taute he fekafekau ke he Atua. Ka pihia, kia moua e tautolu e mafanatia mai he iloa na kitia foki e Iehova e tau manatu he tau loto ha tautolu kua puke ke he loto fakamooli ke he tapuakiaga haana.
[Matahui Tala]
a Ko e puha he maveheaga ko e puha tapu ne talaga ke he takitakiaga a Iehova mo e muitua ke he puhala haana ke talaga aki. Ne fakakite ai kua fakalataha a Iehova mo Isaraela i tuai.—Esoto 25:22.