Tau Fifine, Ko e Ha kua Lata ke Muitua ke he Ulu?
“Ko e ulu he hoana ko e tane haia.”—1 KORI. 11:3.
1, 2. (a) Ko e heigoa ne tohi he aposetolo ko Paulo hagaao ke he fakatokaaga a Iehova ke he ulu mo e omaoma? (e) Ko e heigoa e tau hūhū ka fakatutala he vala tala nei?
KUA fakatoka e Iehova e fakapapahiaga maopoopo ne talahau he aposetolo ko Paulo he magaaho ne tohi e ia “ko e ulu he tau tane oti ko Keriso haia” mo e “ko e ulu a Keriso ko e Atua haia.” (1 Kori. 11:3) Ne fakakite he vala tala fakamua na onoono a Iesu ki ai ko e monuina mo e olioli ke omaoma ke he Ulu, ko Iehova ko e Atua, ti kua eke he tau tagata taane Kerisiano e Keriso ko e ulu ha lautolu. Ne totonu, mahani molū, fakaalofa hofihofi noa, mo e fakamokoi a Keriso he fehagai mo e tau tagata. Kua lata e tau tagata taane he fakapotopotoaga ke mahani pihia ke he falu, mua atu ke he tau hoana ha lautolu.
2 Ka e kua e tau fifine? Ko hai e ulu ha lautolu? “Ko e ulu he [fifine] ko e tane haia,” he tohi e Paulo. Lata ke fēfē e onoonoaga he tau fifine ke he talahauaga omoomoi nei? Aoga agaia nakai e matapatu fakaakoaga ka nakai tua e taane? Ko e omaoma ke he ulu he taane kua lata kia he fifine ke eke mo hoa fakanono he fakamauaga, he nakai fai talahauaga ka taute e tau fifiliaga? Ke he puhala fe kua lata he fifine ke moua e nava ki a ia?
“To Eke e Au Māna e Lagomatai ke Lata mo Ia”
3, 4. Ko e ha ne aoga lahi e fakatokaaga he ulu he fakamauaga?
3 Ko e fakatokaaga he ulu ko e kamataaga mai he Atua. He mole e tufuga a Atamu, ne matutaki a Iehova ko e Atua ke pehē: “Kua nakai mitaki ke tokotaha e tagata [taane]; to eke e au māna e lagomatai ke lata mo ia.” He mole e tufuga a Eva, ne fiafia lahi a Atamu he fai hoa mo e lagomatai ti pehē ai a ia: “Ko e hui ni hanai he haku hui, mo e kakano he haku kakano.” (Kene. 2:18-24) Ne moua e Atamu mo Eva e amaamanakiaga homo ue atu he eke mo matua taane mo e matua fifine ke he tau tagata oti kana ne mitaki katoatoa, ka fiafia he momoui tukulagi ke he lalolagi parataiso.
4 Ha ko e totoko he tau matua fakamua ha tautolu, ne galo e tuaga mitaki katoatoa he kaina ko Etena. (Totou Roma 5:12.) Ka e tumau agaia e fakatokaaga he ulu. Ka muitua ke he puhala hako, to tamai ai e aoga mo e fiafia lahi ke he fakamauaga. Ko e fua to tuga ke he puhala ne logona hifo e Iesu he omaoma ke he haana a Ulu ko Iehova. Ato moui a ia ke he tino, ne “olioli mau [a Iesu] ki mua [ha Iehova] ke he tau aho oti ni.” (Fakatai 8:30) Ha ko e nakai mitaki katoatoa, ne nakai eke e tau tagata taane mo tau ulu mitaki katoatoa, po ke nakai maeke he tau fifine ke fakatātā e omaoma katoatoa. Ka fakatumau e tau taane mo e tau hoana ke gahua fakalahi tokoua, kua maeke mogoia ke fua mai e fiafia lahi mahaki ke he fakamauaga he magaaho nei.
5. Ko e ha e tau hoa mau kua lata ke tokaloto e fakatonuaga ne moua ia Roma 12:10?
5 Ko e matapatu ke he kautūaga he fakamauaga ke fakagahua he tau hoa he fakamauaga e fakatonuaga nei he Tohi Tapu kua lata mo e tau Kerisiano oti: “Kia fakafeheleaki ke he feofanaki he tau matakainaga; kia takitokotaha mo e mua ke tuku atu e lilifu ke he falu.” (Roma 12:10) Kua lata foki he taane mo e hoana ke gahua fakalahi ke “totonu ko e taha ke he taha, kia hofihofi [e] fakaalofa, mo e [atāina ke] fefakamagaloaki.”—Efeso 4:32.
Ka Nakai Tua e Hoa
6, 7. Liga ko e heigoa e fua ka omaoma e hoana Kerisiano ke he taane nakai tua?
6 Ka e kua ka nakai ko e fekafekau a Iehova e hoa mau haau? Fa mahani, ko e taane ne nakai tua. He tuaga nei, kua lata fēfē he hoana ke taute atu ki a ia? Kua tali he Tohi Tapu: “A mutolu ko e tau [hoana], kia omaoma ke he tau tane ha mutolu ni, kaeke foki kua faliuliu falu ke he kupu, kia moua a lautolu he mahani mitaki he tau hoana ha lautolu, ka e nakai vagahau, Ka kitekite age a lautolu kia mutolu kua nonofo fakatekiteki mo e matakutaku.”—1 Pete. 3:1, 2.
7 Kua tala age e Kupu he Atua ke fakatumau e aga omaoma he hoana ke he taane nakai tua haana. Ko e mahani mitaki haana ka fakaohooho e taane ke mailoga e mena kua fakalagalaga a ia ke mahani mitaki pihia. Ti ko e fua, maeke he taane ke onoono ke he tau taofiaga he hoana Kerisiano haana ti fakahiku ke talia e ia e kupu mooli.
8, 9. Ko e heigoa he hoana Kerisiano ka taute kaeke ke nakai talia fiafia he taane nakai tua e mahani mitaki haana?
8 Ka e kua ka nakai talia fiafia e taane nakai tua? Kua fakamalolō he tau Tohiaga Tapu e hoana Kerisiano ke fakatātā e tau mahani faka-Kerisiano he tau magaaho oti, pete he uka e mena nei. Ma e fakatai, totou e tautolu ia 1 Korinito 13:4: “Kua fakauka e fakaalofa.” Kua mitaki ma e hoana Kerisiano ke fakatumau ke mahani “loto fakatokolalo ni mo e holoilalo, mo e fakamanavalahi kia fakauka . . . ko e taha ke he taha mo e fakaalofa,” he fefakaukaaki ke he tuaga he fakaalofa. (Efeso 4:2) Mo e lagomatai he malolō gahuahua he Atua—he haana agaaga tapu—kua maeke ke fakatumau e tau mahani faka-Kerisiano i lalo he tau tuaga uka.
9 “Kua maeke ia au e tau mena oti kana ke he fakamalolo mai a [Iehova] kia au,” he tohi e Paulo. (Filipi 4:13) Kua fakamalolō he agaaga he Atua e hoa Kerisiano ke taute e tau mena loga ne tuga kua nakai maeke ai ke taute. Ma e fakatai, ko e mahani vale he hoa ne liga fakalagalaga e taha ke taui atu. Pete ia, talahau e Tohi Tapu ke he tau Kerisiano oti: “Aua neke taui atu e kelea ke he kelea he taha. . . . ha kua tohi mai, Kua pehe mai [a Iehova], Ha ha ia au ke taui atu, to taui atu e au ni.” (Roma 12:17-19) Pihia foki, kua fakatonu mai e 1 Tesalonia 5:15 ki a tautolu: “A mutolu neke taui atu e taha e kelea ke he kelea ke he taha tagata, ka kia fakamalolo a mutolu nakai noa ke he mena mitaki, ko e taha kia taha, katoa mo e tau tagata oti kana.” Mo e lalago he agaaga tapu a Iehova, ko e mena kua nakai maeke he malolō ni ha tautolu ke taute. Latatonu mooli ke liogi a tautolu ma e agaaga tapu he Atua ke foaki ke lata mo e tau mena ne nakai fahia ai a tautolu!
10. Fehagai fēfē a Iesu ke he tau kupu mo e tau mahani nakai totonu he falu?
10 Ne fakatoka e Iesu e fifitakiaga mua ue atu he fehagai mo lautolu ne talahau po ke taute e tau mahani kelea ki a ia. ‘Ne amuamu ki a ia,’ he talahau he 1 Peteru 2:23, ‘ka e nakai amuamu atu a ia ke taui atu. Ne fakamamahi a ia ka e nakai fakamatakutaku atu, ka e tuku atu kia Ia kua fakafili fakatonu.’ Kua tomatoma ki a tautolu ke muitua e fifitakiaga mitaki haana. Ua ita ha ko e mahani kelea he falu. He tomatoma ke he tau Kerisiano oti, kia “feofanaki, kia fakaalofa ke he tau matakainaga, kia hofihofi noa e fakaalofa, kia [loto holoilalo], Aua neke taui atu e kelea ke he kelea, po ke amuamu ke he amuamu.”—1 Pete. 3:8, 9.
Tau Hoa Fakanono Hokoia Kia?
11. Ko e heigoa e kotofaaga ne mua ka taute he falu fifine Kerisiano?
11 Ko e omaoma kia ke he ulu he taane kua kakano ko e tau fifine ko e tau hoa fakanono he fakamauaga, he nakai fai talahauaga ke he tau fifiliaga he magafaoa po ke falu matakupu foki? Nakai pihia. Ko e tau fifine, pihia mo e tau taane kua foaki ki ai e Iehova e tau kotofaaga loga. Manamanatu la ke he lilifu lahi he eke a lautolu he 144,000 mo tau patuiki mo e tau ekepoa he lagi i lalo he Keriso he magaaho ka pule a ia ke he lalolagi nei! Kua putoia e tau fifine he numera ia. (Kala. 3:26-29) Maaliali ai, ne age e Iehova ke he tau fifine e matagahua aoga lahi he fakatokaaga haana.
12, 13. Talahau e fakataiaga ke fakakite na perofeta e tau fifine.
12 He vahā Tohi Tapu, ma e fakatai, na perofeta e tau fifine. Ne talahau tuai he Ioelu 2:28, 29: “To liligi hifo e au haku [a]gaga ki luga he tau tagata oti; ti perofeta ai ha mutolu a tau tama tane, mo e ha mutolu a tau tama fifine, . . . to liligi hifo foki e au haku [a]gaga ke he tau fekafekau mo e tau fekafekau fifine ke he aho ia.”
13 Kavi ke he 120 e tutaki ha Iesu ne fakapotopoto ke he poko tapa ki luga i Ierusalema he aho Penetekoso 33 V.N. ne putoia e tau fifine fakalataha mo e tau tagata taane. Ne liligi e agaaga he Atua ke he matakau katoa nei. Ati fatiaki ai e Peteru e mena ne talahau tuai he perofeta ko Ioelu mo e fakagahua ai ke he tau tagata taane pihia mo e tau fifine. Pehē a Peteru: “Ko e mena hanai ne tala mai ai e perofeta ko Ioelu, Ko e tau aho fakamui, ne pihia mai e Atua to liligi hifo ai e au haku a [a]gaga ki luga he tau tagata oti kana; ati perofeta mai ai ha mutolu a tau tama tane mo e ha mutolu a tau tama fifine, to . . . liligi hifo ai e au haku [a]gaga ki luga he haku a tau fekafekau tane mo e haku a tau fekafekau fifine, ti perofeta mai ai a lautolu.”—Gahua 2:16-18.
14. Ko e heigoa e vala ne taute he tau fifine he fakapuloa e lotu faka-Kerisiano fakamua atu?
14 He senetenari fakamua, ne aoga lahi e vala ne taute he tau fifine he fakapuloa e lotu faka-Kerisiano. Ne fakamatala a lautolu ke he falu hagaao ke he Kautu he Atua ti taute e tau mena ne felauaki ke he gahua fakamatala ia. (Luka 8:1-3) Ma e fakatai, ne fakahigoa he aposetolo ko Paulo a Fipe ko e “[“fekafekau,” NW] haia he [fakapotopotoaga] i Kenekerea.” He fakafano e tau fakaalofa ke he tau ekegahua, ne totoku e Paulo e tau fifine tokologa mahani fakamooli, putoia a “Tufaina, mo Tufosa, ko e na fifine kua gahua ke he gahua he Iki.” Ne talahau foki e ia a “Peresita kua fakahele, ko ia ne gahua fakalahi ke he gahua he Iki.”—Roma 16:1, 12.
15. Ko e heigoa e vala ne taute he tau fifine he fakapuloa e lotu faka-Kerisiano he vahā ha tautolu?
15 He vahā ha tautolu, ko e vala lahi ne molea e fitu e miliona tagata hane fakamatala e tala mitaki he Kautu he Atua ke he lalolagi oti ko e tau fifine he tau tau momoui kehekehe. (Mata. 24:14) Tokologa ia lautolu ko e tau fekafekau gahua mau, tau misionare, tau tagata he tau magafaoa Peteli. Ne lologo he salamo ko Tavita: “Kua vagahau mai [a Iehova] ke he kupu; kua lahi e kau [“he tau fifine,” NW] ne fakamatala.” (Sala. 68:11) Ko e mooli ha ia he tau kupu nei! Kua uho lahi ki a Iehova e vala ne taute he tau fifine he fakapuloa e tala mitaki mo e fakamooli e tau finagalo haana. Ko e poakiaga haana ke he tau fifine Kerisiano ke omaoma kua nakai kakano ke omaoma he fakanono ni hokoia.
Tokoua e Fifine ne Vagahau Hake
16, 17. Fakakite fēfē he fifitakiaga a Sara kua nakai ko e tau hoa fakanono e tau fifine he fakamauaga?
16 Ka foaki e Iehova ke he tau fifine e tau kotofaaga loga, nakai kia lata he tau taane ke fakakia ke he tau hoana ha lautolu to taute e tau fifiliaga lalahi? To pulotu ke taute pihia e lautolu. Kua talahau he tau Tohiaga Tapu e tau mena tutupu loga ne vagahau hake po ke fai mena ne taute he tau hoana pete ne nakai fakakia atu ke he manatu he tau taane ha lautolu. Manamanatu la ke he ua e tala.
17 Ko Sara, ko e hoana he tupuna ko Aperahamo, ne matutaki ke tala age ki a ia ke vega e hoana ke uaaki mo e tama haana ha kua nakai fakalilifu a laua. “Ne mamahi lahi e loto a Aperahamo he mena ia”—ka e nakai pihia ke he Atua. Ne pehē a Iehova ki a Aperahamo: “Aua neke mamahi hau a loto ha ko e tama, mo e hau a fifine fakatupa; ko e tau mena oti ne tala atu e Sara kia koe, kia fanogonogo ai a koe ke he hana tau kupu.” (Kene. 21:8-12) Ne omaoma a Aperahamo ki a Iehova ti fanogonogo ki a Sara, ti taute e mena ne tala age e ia.
18. Ko e heigoa ne taute fakailoilo e Apikaila?
18 Manamanatu foki ki a Apikaila ko e hoana a Napalu. He hola a Tavita mai he patuiki mahekeheke ko Saulo, ne leva e heapi haana tata atu ke he tau manu a Napalu. He nakai uta e tau monuina loga he tagata nei, ne puipui e Tavita mo e tau tagata haana e tau koloa ha Napalu. Pete ia, ko Napalu ne “mahani uka a ia, ti kelea hana tau mena ne fa eke,” ti “oho atu a ia mo e favale” ke he tau tagata a Tavita. Ko ia ko e “tagata kolokolovao,” ti “ha ha ia ia e mahani goagoa.” He ole fakalilifu e tau tagata a Tavita ma e taha mena kai, ne fakaheu e Napalu. Tali atu fēfē a Apikaila he logona e ia e mena ne tupu? He nakai tala age ki a Napalu, ne “fakaave a Apikaila, ti uta ai e ia e tau areto ne ua e teau, mo e tau lupo kili manu ne ua ne puke ai ke he uaina, mo e lima e mamoe kua oti he taute, mo e tau fafati fua saito tunu ne lima mo e tau fuhi vine tavaki taha e teau, mo e tau fakapotopotoaga fua mati ne ua e teau” ti age ai ki a Tavita mo e tau tagata haana. Taute nakai e Apikaila e mena hako? Ti “ta ai e Iehova a Napalu,” he talahau he Tohi Tapu, “ti mate ai a ia.” Ne fakahiku ai ti hoana e Tavita a Apikaila.—1 Samu. 25:3, 14-19, 23-25, 38-42.
‘Fakaheke Atu Ni ke he Fifine’
19, 20. Ko e heigoa ne taute mooli e fifine ke fakaheke ki ai?
19 Ne nava he tau Tohiaga Tapu e hoana ne taute e tau mena ke he puhala a Iehova. Ne fakaheke he tohi a Tau Fakatai he Tohi Tapu e “fifine mahani mitaki,” he pehē: “Kua mua ue atu e mena ke fakafua aki a ia ke he tau penina. Kua tua kia ia e loto he hana tane; nakai nofogati a ia ke he tau koloa. Kua mahani mitaki a ia kia ia ka e nakai mahani kelea ke he tau aho oti he hana moui.” Mua atu, “kua vagahau a ia mo e iloilo; ti ha ha ia ia e alelo totonu. Kua kitekite fakamitaki a ia ke he tau mahani he hana magafaoa; nakai kai foki a ia e tau mena kai mo e mahani teva. Kua tutu mai e fanau hana mo e fakaaue atu kia ia; ko e hana tane foki kua fakaheke atu kia ia.”—Fakatai 31:10-12, 26-28.
20 Ko e heigoa ne taute e fifine ke fakaheke mooli? “Ko e fulufuluola ko e fakavai haia, ko e tino mitaki ko e mena fakateaga haia,” he talahau he Tau Fakatai 31:30, “ka ko e fifine kua matakutaku kia Iehova, to fakaheke atu ni kia ia.” Putoia ke he matakutaku ki a Iehova e lata ke muitua fakamakai ke he fakatokaaga faka-Atua he ulu. “Ko e ulu he hoana ko e tane haia,” tuga “ko e ulu he tau tane oti ko Keriso haia,” mo e “ko e ulu a Keriso ko e Atua haia.”—1 Kori. 11:3.
Kia Fakaaue ke he Mena Fakaalofa he Atua
21, 22. (a) Ko e heigoa e tau kakano kua fakaaue e tau Kerisiano kua mau ke he mena fakaalofa he Atua he fakamauaga? (e) Ko e ha kua lata ia tautolu ke fakalilifu e tau fakatokaaga a Iehova ma e pule mo e ulu? (Kikite e puha he lau 17.)
21 Ko e tau Kerisiano ne mau kua loga e tau kakano mooli ke fakakite e fakaaue ke he Atua! Maeke ia laua ke tuilima tokoua ko e hoa mau fiafia. Mua atu e fakaaue ha laua ke he mena fakaalofa tapu he Atua he fakamauaga ha kua hafagi ki a laua e magaaho ke fakalataha e tau momoui ha laua mo e ō mo Iehova. (Ruta 1:9; Mika 6:8) Ko Ia—ko e Punaaga he fakamauaga—kua iloa tonu e mena kua lata mo e fakamauaga fiafia. Taute tumau e tau mena oti ke he puhala haana, ti ‘ko e fiafia ha Iehova ko e malolo haau haia,’ pihia foki he lalolagi lekua he vahā nei.—Nehe. 8:10.
22 Ko e taane Kerisiano ne fakaalofa ke he hoana haana tuga ki a ia ni ka fakagahua e ulu ke he puhala fakaalofa mo e manamanatu. Ko e hoana mahani Atua haana to fakaalofa mooli, ha ko e mena to lagomatai mo e to fakakite e ia e fakalilifu hokulo ki a ia. Mua atu e aoga ke he tau mena oti, to fakalilifu he fakamauaga fakafifitaki mitaki ha laua e ha tautolu a Atua lilifu ue atu ko Iehova.
Manatu Nakai e Koe?
• Ko e heigoa e fakatokaaga a Iehova ke he ulu mo e omaoma?
• Ko e ha kua lata he tau hoa mau ke fefakalilifuaki?
• Lata ke taute fēfē he hoana Kerisiano e taane nakai tua haana?
• Ko e ha kua lata he tau taane ke fakakia ke he tau hoana ha lautolu ato taute e tau fifiliaga lalahi?
[Puha he lau 17]
Ko e Ha ne Fakalilifu e Pule?
Kua fakatū e Iehova he tau mena momoui lotomatala e tau fakatokaaga he pule mo e ulu. Kua taute e mena nei ma e mitaki he tau mena momoui fakaagaaga ti pihia mo e tau tagata. Kua hafagi ki a lautolu e magaaho ke fakagahua e atāina ha lautolu mo e fakalilifu e Atua he fekafekau ki a ia ke he puhala kaufakalataha mo e tatai.—Sala. 133:1.
Ko e matakau he tau Kerisiano fakauku kua mailoga e pule mo e ulu ha Iesu Keriso. (Efeso 1:22, 23) He mailoga e pule ha Iehova, to fakahiku ai ko e “Tama ki lalo ia ia ne tuku ai e tau mena oti ki lalo ia ia, kia pule okooko e Atua ke he tau mena oti kana.” (1 Kori. 15:27, 28) Latatonu mooli ai, ko e tau tagata ne tukulele ke he Atua kua kaufakalataha mo e fakatokaaga he ulu i loto he fakapotopotoaga mo e he magafaoa! (1 Kori. 11:3; Hepe. 13:17) He taute pihia, kua aoga ai a tautolu ko e tau tagata ne moua e taliaaga mo e monuina ha Iehova.—Isaia 48:17.
[Fakatino he lau 13]
Maeke he liogi ke lagomatai e hoana Kerisiano ke fakakite e tau mahani Atua
[Tau Fakatino he lau 15]
Uho ki a Iehova e vala ne taute he tau fifine ke fakaholo ki mua e tau mena he Kautu