Fakatumau e Malolō Fakaagaaga Ka e Leveki he Tagata he Magafaoa ne Gagao

NUKUA moua ai e tuma ne tata ke he hoko tua ha Kim, ko e matakainaga fifine Fakamoli, kua lauia he kanesa.a “He iihi ai mo e utakehe e tuma,” he talahau he taane haana ko Steve, “ne tului a Kim he radiotherapy mo e chemotherapy. Ne fai mena foki ne tupu ha ko e tuluiaga, ti lolelole lahi a ia. Ne tote lahi mahaki e malolō haana ke fanofano.”

Manamanatu la koe ke he logonaaga mamahi ha Steve he onoono ke he hoana fakahele haana ne taufetului mo e gagao kelea lahi mahaki nei? Liga fai tagata a koe he magafaoa kua matematekelea he holo ki mua e gagao po ke tau lauiaaga he fuakau. (Fakama. 12:1-7) Ka pihia, kua iloa e koe na maeke ke leveki fakamitaki e fakahele haau ka kua lata ia koe ke leveki a koe. Ka lolelole fakaagaaga a koe, to maeke foki e manamanatuaga mo e malolō tino haau ke kamata ke lolelole ti liga nakai maeke ia koe ke foaki e lagomataiaga ke he tagata he magafaoa haau ne lata ke leveki. Maeke fēfē ia koe ke fakatumau e lagotatai fakaagaaga haau ka e leveki e tagata he magafaoa ne gagao po ke fuakau? Fai mena nakai ke lagomatai he tau tagata he fakapotopotoaga ke fakakite e manamanatu ha lautolu ki a lautolu ia ne gagao?

Fakatumau Fēfē e Lagotatai?

Ke fakatumau e lagotatai fakaagaaga mo e malolō he tino haau ka e leveki e tagata he magafaoa ne gagao, kua lata ia koe ke hikihiki mo e iloa ke fakaaoga fakamitaki e tau magaaho mo e malolō haau. “Ha ha i ai e iloilo kia lautolu kua fakatokolalo,” he talahau he Tau Fakatai 11:2. He manatu nei, ko e kupu “fakatokolalo” kua kakano ke mailoga he tagata e tau mena kua maeke a ia ke taute. Ke mailoga kua nakai lali a koe ke molea e tau mena ka taute ka kua lata ia koe ke liu kitekite ke he fakaholoaga mo e tau matagahua haau.

Ko Steve ne fakatātā e pulotu mo e fakatokolalo he liu kitekite ke he tau matagahua haana. Lafi ke he gahua tupe haana, ne fekafekau a ia ko e leveki he kau he tau motua ti ko e leveki fekafekau he fakapotopotoaga he Tau Fakamoli a Iehova i Ailani. Ko ia foki taha he Komiti Matutaki Fale Gagao he matakavi haana. “Ne nakai gugū a Kim kua tiaki e au a ia ha kua lahi mahaki e levekiaga haaku ke he tau matagahua nei,” he talahau e Steve. “Ka e iloa e au kua molea e gahua kua lata ia au ke taute.” Fēfē e tauteaga ha Steve ke he tuaga? “He mole e manamanatu ki ai he liogi,” he talahau e ia, “ne fifili au ke toka e matagahua ko e leveki he kau he tau motua. Ne matutaki au ke fekafekau ko e motua, ka ko e age e falu matagahua haaku he fakapotopotoaga ke he falu, ne maeke au ke foaki e magaaho mo e levekiaga kua lata mo Kim.”

Nakai leva ti laukauka e malolō tino ha Kim. Ne liu a Steve mo Kim onoono ke he tuaga ha laua, fakalataha mo e lalagoaga he hoana haana, ne maeke a Steve ke liu matutaki ke he tau matagahua fakamua haana he fakapotopotoaga. Ne iloa tokoua e maua ke gahua fakatatau mo e tau fakakaupāaga ne tupu ha ko e gagao,” he fakamaama e Steve. “Fiafia lahi au ki a Iehova ha ko e haana lagomatai mo e ke he hoana haaku ke he lagomatai nakai gugū haana pete he nakai malolō e tino.”

Manamanatu foki ke he mena ne tupu ki a Jerry, ko e leveki faifano, mo e hoana haana ko Maria. Ne hiki e tau foliaga ha laua ke maeke ke leveki e tau matua momotua ha laua. “Ha ha ia au mo e taane haaku e foliaga ke fekafekau ko e tau misionare he fonua motu kehe,” he talahau e Maria. “Ka ko Jerry, ko ia ni e tama, ti kua lata e tau matua haana ke leveki. Ti fifili a maua ke nonofo i Ailani ke leveki a laua. He taute pihia, ne maeke a maua ke fakakia tumau e matua taane ha Jerry he magaaho ne toka a ia he fale gagao ato mate a ia. Ne matutaki tumau a maua mo e matua fifine ha Jerry he tau aho oti, ti tata foki a maua ka manako lagomatai a ia. Lahi e lagomatai mo e lalago he fakapotopotoaga ne fano ai e matua fifine ha Jerry, ti fakaatā a maua ke fakatumau e gahua faifano.”

Puhala ka Lagomatai he Falu

He fakatutala ke he tau levekiaga fakatino kua lata ke taute ma e tau takape momotua he fakapotopotoaga, ne tohi he aposetolo ko Paulo: “Kaeke kua nakai leveki e taha hana faoa, ti au atu kia lautolu kua nonofo mo ia, kua fakatikai e ia e tua, kua mua foki hana kelea kia ia kua [nakai tua].” Ne fakamanatu e Paulo ke he tau matakainaga Kerisiano ke maeke e tau gahua ha lautolu ke “mitaki ia mo e fakafiafia ke he Atua,” kua lata ia lautolu ke leveki fakatupe e tau matua mo e tau tupuna momotua ha lautolu. (1 Timo. 5:4, 8) Ka e maeke mo e kua lata foki he falu he fakapotopotoaga ke foaki e lagomatai.

Mailoga e mena ne tupu ki a Hakan mo Inger, ko e hoa momotua ne nonofo i Suitene. “He iloa kua moua e hoana haaku he kanesa,” he talahau e Hakan, “ne ofo lahi mahaki a maua. Ne tino malolō mo e maō tumau a Inger. Mogonei kua ahiahi e maua e fale gagao he tau aho takitaha ma e tuluiaga, ti ko e tau lauiaaga he tau vai ekekafo haana kua fakamatematekelea lahi. Ne nofo ni a Inger i kaina he magaaho nei, ti lata au ke nofo mo ia ke leveki a ia.” Lagomatai fēfē he fakapotopotoaga a Hakan mo Inger?

Ne fakatoka he tau motua he fakapotopotoaga ma e hoa ke fanogonogo ke he tau feleveiaaga faka-Kerisiano he telefoni. Lafi ki ai, ne matutaki tumau e tau matakainaga ke ahiahi atu mo e tau hea he telefoni. Ne fakafano foki e lautolu e tau tohi fakatagata mo e tau lautohi. “Ne logona hifo e maua e lalagoaga he tau matakainaga oti ti pihia mo e lagomatai ha Iehova,” he talahau e Hakan. “Kua aoga lahi e levekiaga nei ke he malolō fakaagaaga tumau ha maua. Fakaaue ni ha kua liu a Inger malolō ti kua maeke foki a maua ke fakalataha ke he tau feleveiaaga Kerisiano he Fale he Kautu.” Magaaho ka taute he tau matakainaga he fakapotopotoaga e tau mena kua maeke ia lautolu ke lagomatai ki a lautolu ne gagao mo e momotua he fakapotopotoaga, kua fakakite e lautolu a lautolu ko e ‘kapitiga kua fakaalofa ke he tau aho oti kana; kua fanau foki e matakainaga ke lata ai mo e aho matematekelea.’—Fakatai 17:17.

Uho e Tau Laliaga Haau ki a Iehova

He leveki ma e tagata he magafaoa ne gagao kua lolelole mooli. Ka e tohi he Patuiki ko Tavita: “Uhoaki [po ke, fiafia] e tagata kua manatu ke he tagata [tokolalo],” tuga e tagata ne manako lagomatai ha kua gagao.—Sala. 41:1.

Ko e ha kua fiafia a lautolu ne leveki e tau tagata ne gagao po ke matematekelea? “Ko ia kua fakaalofa ke he tagata [tokolalo] kua ta age e ia hana tau mena kia Iehova,” he talahau ia Fakatai 19:17, “to taui mai foki e ia e tau mena ne ta age kia ia.” Ne fiafia pauaki e Atua mooli ke he tau fekafekau fakamooli haana ne matematekelea he gagao, ti fakamonuina e ia a lautolu ne fakakite e lautolu e fakaalofa ki ai. Ne lologo he salamo ko Tavita: “To faihoani a Iehova [ke he tagata pihia] ka takoto a ia he hana gagao; kua fuluhi e koe hana mohega oti kana ke he hana gagao.” (Sala. 41:3) Maeke ia tautolu ke mauokafua ka feleveia e tagata ne foaki e levekiaga fakaalofa mo e tuaga uka po ke matematekelea, to lagomatai e Iehova a ia.

Ko e mitaki ha ia ke iloa na mailoga mo e talia e Iehova ko e Atua e tau mena ne taute e tautolu ke leveki e tagata he magafaoa ne gagao! Pete ko e foaki he lalagoaga pihia kua lata mo e laliaga ha tautolu, kua fakamafana mai e tau Tohiaga Tapu ki a tautolu “ko e tau poa pihia kua fiafia ai e Atua.”—Hepe. 13:16.

[Matahui Tala]

[Tau Fakatino he lau 18]

Fakatumau e lagotatai fakaagaaga mo e talia e lagomataiaga he falu