Moua e Okiokiaga he Tau Mena Fakaagaaga

‘Kia hahamo e mutolu e lakau hahamo haku ti moua ai e mutolu e okiokiaga mo e tau agaga ha mutolu.’—MATA. 11:29.

1. Ko e heigoa ne fakatoka he Atua he Mouga ko Sinai, ti ko e ha?

HE PUTOIA e maveheaga he Fakatufono he Mouga ko Sinai, ne lauia e fakatokaaga he Sapati fakafaahi tapu. Puhala he gutuvagahau haana ko Mose, ne poaki a Iehova ke he motu ko Isaraela: “Ono ni e aho ke eke ai hau a tau gahua, ka koe aho fitu ke okioki ai a koe, kia okioki ai hau a povi mo e hau a asini, kia fakamanava foki e tama he hau a fekafekau fifine, katoa mo e tagata kehe.” (Esoto 23:12) E, he manamanatu ki a lautolu i lalo he Fakatufono, ne fakatoka fakamitaki e Iehova e aho ke okioki ai ke maeke he tau tagata haana ke “fakamanava [po ke, okioki].”

2. Aoga fēfē a Isaraela he muitua ke he Sapati?

² Ko e Sapati kia ko e aho okioki hokoia? Nakai, ko e vala aoga lahi he tapuakiaga he tau Isaraela ki a Iehova. He muitua ke he Sapati ne fakaatā e tau ulu he magafaoa ke fakaako e magafaoa ha lautolu “ke taofi e lautolu ke he puhala a Iehova ke mahani tututonu.” (Kene. 18:19) Ti foaki foki e magaaho ma e magafaoa mo e tau kapitiga ke fakalataha auloa ke manamanatu ke he tau gahua ha Iehova mo e lafiaga fiafia. (Isaia 58:13, 14) Mua atu e aoga, ne tuhi fakaperofeta atu e Sapati ke he magaaho ka moua mai e okiokiaga mooli puhala he Pule Meleniamu he Keriso. (Roma 8:21) Ka e kua e vahā nei ha tautolu? I fe mo e puhala fe he tau Kerisiano mooli kua fiafia ke he tau puhala ha Iehova ne moua e okiokiaga pihia?

Moua e Okiokiaga Puhala he Lafiaga Faka-Kerisiano

3. Puhala fe ne felagomataiaki e tau Kerisiano he senetenari fakamua atu, ti ko e heigoa e fua?

³ Ne fakamaama he aposetolo ko Paulo ko e fakapotopotoaga Kerisiano “ko e pou foki ia mo e fakaveaga he kupu moli.” (1 Timo. 3:15) Ne lahi e lagomatai ne moua he tau Kerisiano fakamua atu he fefakamalolōaki mo e featihake ke he fakaalofa. (Efeso 4:11, 12, 16) He nofo i Efeso, ne moua e Paulo e fakamalolō he ahiahi atu he tau matakainaga he fakapotopotoaga i Korinito. Mailoga e lauiaaga i ai: “Kua fiafia au he hohoko mai a Setefano mo Fotunato, mo Akaiko,” he talahau e Paulo, “ha ko e mena fakamafanatia e lautolu haku a loto.” (1 Kori. 16:17, 18) Pihia foki, he magaaho ne finatu a Tito ki Korinito ke fekafekau ke he tau matakainaga i ai, ne tohi a Paulo ke he fakapotopotoaga he talahau: “Nukua fakamafanatia hana loto kia mutolu oti kana.” (2 Kori. 7:13) Ke he vahā nei foki, kua moua he Tau Fakamoli a Iehova e mafanatia mooli puhala he feoakiaga atihake faka-Kerisiano.

4. Maeke fēfē he tau feleveiaaga he fakapotopotoaga ke foaki e okioki ki a tautolu?

⁴ Kua iloa e mutolu ko e punaaga he fiafia lahi e tau feleveiaaga he fakapotopotoaga. Moua e tautolu i ai e ‘fefakamafanaaki ha ko e tua he falu.’ (Roma 1:12) Ko e tau matakainaga Kerisiano ha tautolu ne nakai ko e tau tagata mahani hokoia ne ha ha ai e fakafetuiaga potake. Ko lautolu ko e tau kapitiga mooli, ko e tau tagata ne ofania mo e fakalilifu e tautolu. Kua moua e tautolu e fiafia mo e mafanatia lahi he fakalataha tumau mo lautolu ke he tau feleveiaaga ha tautolu.—File. 7.

5. Foaki fēfē e tautolu e okiokiaga ke he falu he tau fonoaga mo e tau toloaga?

⁵ Ko e taha punaaga he okiokiaga kua puhala mai he ha tautolu a tau fonoaga mo e tau toloaga ne lagataha he tau. Lafi ke he tanakiaga he tau vai foaki moui he kupu mooli mai he Kupu he Atua ko e Tohi Tapu ne foaki he tau fakapotopotoaga lalahi nei ki a tautolu e magaaho ke ‘fakalahi atu’ ha tautolu a tau lafiaga. (2 Kori. 6:12, 13) Ka e kua ka mā a tautolu ti uka ke feleveia mo e tau tagata? Taha puhala ke iloa e tau matakainaga ha tautolu ko e foaki e tautolu e lagomatai he fonoaga. He mole e lagomatai ke he fonoaga he lalolagi katoa, ne pehē taha matakainaga fifine: “Ko e magafaoa mo e tau kapitiga gahoa ni haaku ne iloa e au ka e tokologa ne nakai iloa e au. Ka e lagomatai au ke fakameā, ne tokologa e tau matakainaga ne feleveia e au! Ko e fulufuluola ha ia!”

6. Ko e heigoa taha okiokiaga ka moua e tautolu he tau aho okioki?

⁶ Ne fa ō hake e tau Isaraela ki Ierusalema ma e tapuakiaga ke he tau galue ne tolu he tau tau takitaha. (Esoto 34:23) Kakano kua fa toka hifo e tau fonua mo e tau fale koloa ha lautolu ti ō hui he tau puhalatū efu ke he tau aho loga. Ka ko e ō hake ke he faituga ko e mena “fiafia lahi” ha ko lautolu i ai ne ‘fakaheke atu kia Iehova.’ (2 Nofo. 30:21) Tokologa e tau fekafekau ha Iehova he vahā nei kua fiafia lahi foki he ō atu mo e tau magafaoa ha lautolu ke ahiahi atu ke he Peteli, ko e la ofisa ne tata mai he Tau Fakamoli a Iehova. Maeke nakai ia koe ke putoia e tau ahiahi pihia he tau aho okioki fakamagafaoa haau?

7. (a) Aoga fēfē e tau magaaho fakafiafia? (e) Ko e heigoa ne lafi ke he tau fakalatahaaga atihake mo e manatu tumau?

⁷ He fakalataha auloa mo e magafaoa mo e tau kapitiga ma e tau magaaho fakafiafia ka atihake foki. Ne talahau he patuiki pulotu ko Solomona: “Nakai fai mena mitaki ke he tagata, ka kia kai ai e ia mo e inu, mo e fakafiafia hana loto ke he tau mena mitaki he hana tau gahua.” (Fakama. 2:24) Ko e tau magaaho fakafiafia ne nakai ni fakaokioki e tino ka kua fakamalolō ha tautolu a pipiaga he fakaalofa mo e tau matakainaga Kerisiano he iloa mitaki e tautolu a lautolu. He lagomatai ke lafi ke he magaaho ka manatu tumau mo e atihake, kua lata e tau magaaho fakafiafia ke nakai tokologa mo e fakatokatoka fakamitaki, mua atu ka fai kava.

Tamai he Gahua he Fonua e Okiokiaga

8, 9. (a) Fakakite e fekehekeheaki he ogo ha Iesu mo e he tau tohikupu mo e tau Farasaio. (e) Aoga fēfē a tautolu he talahau e tau kupu mooli he Tohi Tapu?

⁸ Ne makutu a Iesu ke gahua he fakamatala, ti fakamalolō e ia e tau tutaki haana ke pihia foki. Kua kitia mooli e mena nei ke he tau kupu haana: “Kua loga e tau saito ke helehele, ka ko e tau tagata gahua, kua tokogaogao a lautolu. Ko e mena ia, kia olelalo atu ai a mutolu ke he Iki hana e tau saito ke helehele, kia fakafano mai e ia e falu ke gahua ke he tau saito hana ke helehele.” (Mata. 9:37, 38) Ko e ogo ne fakaako e Iesu kua moua mooli e okiokiaga; ko e “tala mitaki.” (Mata. 4:23; 24:14) Kua kehe mamao e mena nei ke he tau matafakatufono mamafa ne fakatoka he tau Farasaio ma e tau tagata.—Totou Mataio 23:4, 23, 24.

⁹ He fakamatala e ogo he Kautu ke he falu, ne foaki e tautolu ki a lautolu e okiokiaga fakaagaaga, ke he magaaho taha kua fakahokulo hifo e tautolu e tau kupu mooli he Tohi Tapu ne uho ke he tau manamanatuaga mo e tau loto ha tautolu. Ne talahau fakamooli he salamo: “[“Fakaheke a Iehova ma tau tagata,” NW], ha kua mitaki ni ke uhu lologo ke he Atua ha tautolu, ha ko e mena fulufuluola ia.” (Sala. 147:1) Maeke nakai a koe ke fakatupu ki mua e fiafia ne moua e koe he fakaheke a Iehova ke he tau katofia haau?

10. Kua fakavē kia e kautū ha tautolu he gahua he fonua ke he tali mitaki ke he ogo ha tautolu? Fakamaama.

¹⁰ Mooli, he falu matakavi kua talia he tau tagata e tala mitaki ka e nakai pihia he falu matakavi. (Totou Gahua 18:1, 5-8.) Kaeke kua nofo a koe he matakavi ne nakai fiafia lahi ke he ogo he Kautu, lali ke hagaaki mau ke he mitaki hane taute e koe he gahua he fonua. Manatu ko e fakamakamaka tumau haau ke fakapuloa e higoa ha Iehova kua nakai teao noa. (1 Kori. 15:58) Mua atu, ko e kautū ha tautolu ke he gahua he fonua kua nakai fakavē ke he tali he tau tagata ke he tala mitaki. Kua mauokafua a tautolu to kitia ai e Iehova to moua he tau tagata loto mooli e magaaho ke talia e ogo he Kautu.—Ioane 6:44.

Moua Ai e Okiokiaga he Tapuakiaga he Magafaoa

11. Ko e heigoa e matagahua ne age e Iehova ke he tau matua, ti maeke fēfē ia lautolu ke fakamooli ai?

¹¹ Kua lago ke he tau matua mahani Atua ke fakaako e fanau ha lautolu hagaao ki a Iehova mo e tau puhala haana. (Teu. 11:18, 19) Kaeke ko e matua a koe, kua fakatoka nakai e koe e magaaho ke fakaako e fanau haau hagaao ke he ha tautolu a Matua fakaalofa he lagi? Ke lagomatai a koe ke fakamooli e matagahua aoga nei mo e fehagai ke he tau manako he magafaoa haau, kua foaki e Iehova e tau mena kai fakaagaaga loga ne atihake puhala he tau tohi, tau mekasini, tau vitiō, mo e tau tapakiaga autiō.

12, 13. (a) Maeke fēfē e tau magafaoa ke aoga mai he Tapuakiaga he Magafaoa he afiafi? (e) Maeke fēfē he tau matua ke mailoga mooli ko e tapuakiaga he magafaoa ha lautolu ko e punaaga he okiokiaga?

¹² Lafi ki ai, kua taute he vahega fekafekau fakamoli mo e loto matala e tau fakaholoaga ma e Tapuakiaga he Magafaoa he afiafi. Ko e afiafi anei ne fakatoka he tau faahi tapu takitaha ke fakaako Tohi Tapu e magafaoa. Tokologa ne mailoga ko e fakaholoaga nei kua fakatata lahi e fakaalofa ha lautolu ke he taha mo e taha, ti kua fakamalolō e fakafetuiaga ha lautolu mo Iehova. Ka e maeke fēfē he tau matua ke mailoga mooli ko e tapuakiaga he magafaoa ha lautolu ko e punaaga he okiokiaga fakaagaaga?

¹³ Ko e Tapuakiaga he Magafaoa he afiafi kua nakai lata ke eke mo magaaho mateafu mo e pāpā maō. Ha kua tapuaki a tautolu ke he ‘Atua fiafia,’ mo e manako a ia ke fiafia a tautolu he tapuakiaga ha tautolu. (1 Timo. 1:11; Filipi 4:4) He fai afiafi foki ke fakatutala ke he tau manatu uho fakaagaaga mai he Tohi Tapu ko e monuina mooli. Maeke he tau matua ke hikihiki e tau puhala fakaako ha lautolu, he fakaaoga e manamanatuaga mo e lotomatala. Ma e fakatai, ne fakaatā he taha magafaoa ha laua a tama taane hogofulu tau, ko Brandon, ke talahau e tala ne mataulu “Ko e Ha ne Fakaaoga e Iehova e Gata ke Hukui a Satani?” Fakatupetupe he tala nei a Brandon ha kua fiafia lahi a ia ke he tau gata, ti momoko a ia ha kua putoia ki a Satani. Falu magafaoa ne fa taute e tau tala faka-Tohi Tapu he igatia e tagata he magafaoa mo e takitaha e vala ke totou mai he Tohi Tapu, po ke taute e tala ne tupu. Kua fakafiafia e tau puhala fakaako pehēnei ha kua maeke ke fai vala e fanau i ai, ti maeke he tau matapatu fakaakoaga he Tohi Tapu ke hufia ke he tau loto ha lautolu.a

Fakamamao he Tau Mena ka Fakapehia Aki a Koe

14, 15. (a) Kua holo ki mua fēfē e fakaatukehe mo e aga nakai haohao mitaki he tau aho fakahiku? (e) Ko e heigoa e falu fakaatukehe kua liga fehagai mo tautolu?

¹⁴ Ko e fakaatukehe mo e aga nakai haohao mitaki kua holo ki mua he tau aho fakahiku he fakatokaga kelea nei. Nakai fai gahua mo e falu tuaga uka fakatupe kua lauia e tau miliona tagata. Pihia foki a lautolu ne fai gahua, kua fa logona hifo ko e tupe ne moua e lautolu kua uta ki kaina ne tuku he kofukofu pūpū ti nakai aoga lahi ke he magafaoa ha lautolu. (Fakatatai Hakai 1:4-6) Ko e tau tagata politika mo e falu takitaki kua tuga kua taufetului a lautolu mo e fakamatakutaku mo e falu punaaga he kelea muitui. Tokologa e tagata kua fakaatukehe ha ko e tau kūkū fakatagata ni ha lautolu.—Sala. 38:4.

¹⁵ Kua lauia foki e tau Kerisiano mooli he tau lekua mo e tau pehiaaga ne fakaohooho he fakatokaaga ha Satani. (1 Ioa. 5:19) He falu a tuaga, ko e tau tutaki he Keriso kua liga fehagai mo e falu fakaatukehe foki he eketaha a lautolu ke fakatumau ke tua fakamooli ki a Iehova. “Kaeke kua favale a lautolu kia au, ti favale foki kia mutolu,” he talahau e Iesu. (Ioane 15:20) Pete ia, he magaaho ka “favale mai kia [t]autolu ka e nakai tiaki a [t]autolu.” (2 Kori. 4:9) Ko e ha ne pihia ai?

16. Ko e heigoa ka lagomatai a tautolu ke fakatumau e fiafia ha tautolu?

¹⁶ Ne pehē a Iesu: “Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu.” (Mata. 11:28) He tua katoatoa ke he foakiaga he lukutoto he Keriso, tuga kua tuku atu e tautolu a tautolu ki a Iehova. He puhala nei, kua moua e tautolu e “lahi ue atu he malolo.” (2 Kori. 4:7) Ko e agaaga he Atua “ko e [l]agomatai” ne fakamalolō e tua ha tautolu ke maeke ia tautolu ke fakauka ke he tau kamatamata mo e tau matematekelea ne fehagai mo tautolu mo e fakatumau foki e fiafia.—Ioane 14:26; Iako. 1:2-4.

17, 18. (a) Ko e heigoa e agaaga kua lata ia tautolu ke puipui mai ai? (e) Ko e heigoa e fua ka moua mai he tuku fakamua e tau fakafiafiaaga he tau aho takitaha?

¹⁷ Ko e tau Kerisiano mooli he vahā nei kua lata ke puipui mai he fakaohooho fakahanoa he agaaga manako fakafiafia lahi he lalolagi nei. (Totou Efeso 2:2-5.) Neke lautaki a tautolu he “manako lahi he tino, mo e manako lahi he tau mata, katoa mo e tau mena he mouiaga nai ke hula ki ai.” (1 Ioa. 2:16) Po ke liga talitonu fakahehē a tautolu ke tataki atu ke he tau manako he tino ka tamai e okiokiaga. (Roma 8:6) Ma e fakatai, ko e falu tagata kua fuluhi ke fakaaoga fakahehē e tulaki mo e kava, tau fakatino telefua, tau sipote hagahaga kelea, po ke tau mahani feuaki kehekehe he lali ke fakafiafia e tau manako ha lautolu. Ko e “tau lagatau” ha Satani kua foli ke fakahēhē e tagata ke manako ke he okiokiaga fakavaia.—Efeso 6:11.

¹⁸ Mooli, kua nakai hepe ke kai, inu, mo e fakalataha ke he falu vahega fakafiafia kua atihake ka taute ke he puhala fakalatalata. Pete ia, kua nakai fakaatā e tautolu e tau mena pihia ke eke mo mena kua mua he moui. Kua aoga lahi e lagotatai mo e mahani fakalatalata, mua atu ke he tau magaaho kua nonofo ai a tautolu. Kua maeke he tau tutuliaga fakatagata ke fakapehia a tautolu ti taute a tautolu ke “teva, po ke teao ke he maama mitaki ke he Iki ha tautolu ko Iesu Keriso.”—2 Pete. 1:8.

19, 20. Maeke fēfē ke moua e okiokiaga mooli?

¹⁹ Ka fakatatau a tautolu ke he tau fakatufono ha Iehova, kua iloa e tautolu to mole vave e tau fakafiafia ne foaki he lalolagi nei. Ne iloa e Mose e mena ia, ti iloa foki e tautolu. (Hepe. 11:25) Ko e okiokiaga mooli e okiokiaga ne tamai e logonaaga fiafia mo e makona tumau, he taute e finagalo he ha tautolu a Matua he lagi.—Mata. 5:6.

²⁰ Kia fakatumau a tautolu ke moua e okiokiaga mai he tau mena fakaagaaga. Ka taute pihia, kua “tiaki e tautolu e tau mahani hepehepe, katoa mo e tau manako lahi he lalolagi [he] fakatalitali ke he amaamanaki ke monuina ai, mo e fakakiteaga he lilifu he Atua kua mua, mo e Fakamoui ha tautolu ko Iesu Keriso haia.” (Tito 2:12, 13) Kia eketaha a tautolu ke tumau i lalo he lakau hahamo ha Iesu he omaoma ke he pule mo e takitakiaga haana. He taute pihia, to moua e tautolu e fiafia mo e okiokiaga mooli!

[Matahui Tala]

To Tali Fēfē e Koe?

• Moua fēfē he tau tagata ha Iehova e okiokiaga he vahā nei?

• Puhala fe ne fakamafanatia he gahua he fonua a tautolu mo lautolu ne tutala a tautolu ki ai?

• Ko e heigoa ka taute he tau ulu magafaoa ke mailoga mooli to eke e tapuakiaga he magafaoa ha lautolu mo okiokiaga?

• Ko e heigoa e tau mena ne fakapehia fakaagaaga aki a tautolu?

[Tau Fakatino he lau 26]

He hahamo e tautolu e lakau hahamo ha Iesu, to moua e tautolu loga e tau punaaga he okiokiaga