Puhala ne Fakaheke e Iesu e Tututonu he Atua

“Ko [Keriso] ne tuku mai i mua he Atua mo poa ke fakalotomafola ai ke he tua, ke he hana toto; kia fakakite mai ai hana tututonu.”—ROMA 3:25.

1, 2. (a) Ko e heigoa ne fakaako he Tohi Tapu ki a tautolu hagaao ke he tuaga he tagata? (e) Ko e heigoa e tau hūhū ka fakatutala he vala tala nei?

KUA talahaua e tala he Tohi Tapu hagaao ke he totokoaga he kaina i Etena. Igatia a tautolu mo e logona hifo e tau lauiaaga he agahala a Atamu ne fakamaama he tau kupu nei: “He hoko mai ai e hala ke he lalolagi ke he tagata tokotaha, ko e mate foki ha ko e hala, ti kua hoko mai ai e mate ke he tau tagata oti kana, ha kua hala e tau tagata oti kana.” (Roma 5:12) Pete ne eketaha a tautolu he lali ke taute e mena kua hako, kua mahani hepehepe agaia a tautolu ti lata a tautolu mo e fakamagaloaga he Atua. Ne talahau foki he aposetolo ko Paulo: “Kua nakai eke e au e mena mitaki kua loto au ki ai, ka ko e mena kelea kua nakai loto au ki ai, ko e mena haia kua eke e au. Oi te, ko e tagata malaia au!”—Roma 7:19, 24.

² Ha ko e tuaga agahala ha tautolu, kua lata lahi e tau hūhū aoga nei: Maeke fēfē ia Iesu ko e Nasareta ke fanau mai nakai agahala, ti ko e ha ne papatiso a ia? Fakaheke fēfē he puhala moui ha Iesu e tututonu a Iehova? Mua atu e aoga, ko e heigoa ne fakakatoatoa he mate he Keriso?

Totoko ke he Tututonu he Atua

3. Fakahehē fēfē e Satani a Eva?

³ Ko e ha tautolu a tau matua fakamua ko Atamu mo Eva, ne tiaki fakakelea e pule katoatoa he Atua he talia e pule he “gata tuai haia, kua higoa ko e tiapolo, ko Satani.” (Fakakite. 12:9) Manamanatu ke he puhala ne tupu e mena nei. Ne tuahā a Satani ke he tututonu he puhala pule ha Iehova ko e Atua. Ne taute pihia e ia he hūhū ki a Eva: “Ko e moli kia kua pehe mai e Atua, aua neke kai e mua ke he tau akau oti he kaina?” Ne fatiaki e Eva e poakiaga maaliali he Atua ke he taha e akau pauaki ke nakai pipiki neke mamate ai. Ati tukupau e Satani kua pikopiko e Atua. “Nakai ni mamate a mua,” he ui he Tiapolo. Ne matutaki a ia ke fakahehē a Eva ke talia kua taofi he Atua e mena mitaki ti ko e kai he fua he akau, to tuga e Atua a ia he moua e mahani tū tokotaha.—Kene. 3:1-5.

4. O mai fēfē e tau tagata ki lalo he pule totoko a Satani?

⁴ Mua atu ai, ne tuga kua pehē a Satani to fiafia lahi e tau tagata ka muitua e puhala tū tokotaha ne nakai mai he Atua. He nakai taofi mau ke he tututonu he pule katoatoa he Atua, ne fanogonogo a Atamu ke he hoana haana ti fakalataha mo ia he kai e fua akau ne fakatapu. Ti kaumahala e tuaga mitaki katoatoa a Atamu ki a Iehova ti tamai a tautolu ki lalo he pehiaaga favale he agahala mo e mate. He magaaho taha, ne ha ha i ai e tau tagata ki lalo he pule totoko ha Satani, ko e “atua he lalolagi nai.”—2 Kori. 4:4; Roma 7:14.

5. (a) Fakamooli fēfē a Iehova ke he kupu haana? (e) Ko e heigoa e amaamanakiaga ne age he Atua ke he tau hologa ha Atamu mo Eva?

⁵ He fakamooli a Iehova ke he kupu mauokafua haana, ne fakahala mate e ia a Atamu mo Eva. (Kene. 3:16-19) Ka e nakai kakano e mena ia kua kaumahala e finagalo he Atua. Mamao ligo ai! He fakahala a Atamu mo Eva, ne age e Iehova ke he tau hologa ha laua a mui e amaamanakiaga homo ue atu. Ne taute e ia he fakapuloa e finagalo haana ke fakatū e [“tega,” NW] ka tatuki e Satani e muihui. Ka ko e Tega ia ne mavehe to liu maulu e muihui mo e to ‘tatuki a Satani ke he ulu.’ (Kene. 3:15) Kua fakalaulahi he Tohi Tapu e matakupu nai he talahau e kupu ne mui mai hagaao ki a Iesu Keriso: “Ko e mena ia ne fakakite mai ai e Tama he Atua, kia moumou e ia e tau gahua he [T]iapolo.” (1 Ioa. 3:8) Ka e maeke fēfē he mahani mo e mate ha Iesu ke fakaheke e tututonu he Atua?

Ko e Kakano he Papatiso ha Iesu

6. Iloa fēfē e tautolu kua nakai lauia a Iesu he agahala mai ia Atamu?

⁶ He lahi a Iesu, kua lata a ia ke tatai tonu ki a Atamu ne mitaki katoatoa he taha vahā. (Roma 5:14; 1 Kori. 15:45) Kakano he mena nei kua mitaki katoatoa a Iesu he fanau mai. Maeke fēfē e mena ia? Ne tala age he agelu ko Kaperielu e fakamaamaaga maali nei ke he matua fifine ha Iesu ko Maria: “To haele hifo e [a]gaga [t]apu kia koe to fakamalu hifo foki e koe he mana hana ne Mua ue atu ko e mena ia ke talahaua ai e tama tapu, ko e Tama he Atua.” (Luka 1:35) He kamataaga he moui ha Iesu, ne tala age e Maria ki a Iesu e falu tala mooli hagaao ke he fanauaga haana. Ti ko e taha magaaho ne moua e Maria mo e matua hiki ha Iesu ko Iosefa a Iesu he faituga he Atua, ne hūhū e tama tote: “Nakai kia iloa e mua ko e mena lata ke nofo au ke he fale he haku a Matua?” (Luka 2:49) Tali mai he vahā tote, na iloa e Iesu ko ia ko e Tama he Atua. He fakaheke e tututonu he Atua kua aoga lahi mogoia ki a ia.

7. Ko e heigoa e tau koloa uho ne ha ha ia Iesu?

⁷ Ne fakakite e Iesu e fiafia lahi haana ke he tau mena fakaagaaga he fina atu tumau ke he tau feleveiaaga he tapuakiaga. He mitaki katoatoa e manamanatuaga haana, kua liga manamanatu lahi a ia ke he tau mena oti ne logona mo e totou e ia he tau Tohiaga Tapu Heperu. (Luka 4:16) Ne ha ha ia ia foki e koloa uho—ko e tino mitaki katoatoa ka poa ke lata mo e tau tagata oti kana. He magaaho ne papatiso a Iesu, ne liogi a ia ti liga manamanatu ke he tau kupu fakaperofeta ia Salamo 40:6-8.—Luka 3:21; totou Heperu 10:5-10.a

8. Ko e ha ne lali a Ioane ko e Papatiso ke taofi a Iesu mai he papatiso?

⁸ Ko e manako fakamua ha Ioane ko e Papatiso ke taofi a Iesu mai he papatiso. Ko e ha? Ha kua tanumia e Ioane e tau Iutaia he fakamailoga ha lautolu a fakatokihala ke he agahala ne totoko e Fakatufono. Ha ko e matakainaga tata haana, liga iloa e Ioane na tututonu a Iesu ti kua nakai lata ke fakatokihala. Ne fakamalolō e Iesu a Ioane kua latatonu a Ia ke papatiso. “Mena lata ia tautolu he eke pihia e tau mena tonu oti,” he fakamaama e Iesu.—Mata. 3:15.

9. Ko e heigoa ne fakamailoga he papatiso ha Iesu?

⁹ Ha ko e tagata mitaki katoatoa, na maeke ia Iesu ke pehē ko ia, tuga a Atamu, ne latatonu ke matua e lanu tagata mitaki katoatoa. Ka e nakai manako a Iesu ke he vahā ia anoiha ha kua nakai ko e finagalo a Iehova a ia ma haana. Ne fakafano he Atua a Iesu ke he lalolagi ke fakamooli e matagahua he Tega ne mavehe, po ke Mesia. Kua putoia he mena nei e poa e Iesu e moui mitaki katoatoa haana. (Totou Isaia 53:5, 6, 12.) Mooli, ne nakai tatai e kakano he papatiso ha Iesu mo e ha tautolu. Kua nakai putoia e tukuleleaga ki a Iehova, ha kua fitā a Iesu he eke mo vala he motu tukulele he Atua, ko Isaraela. Ka ko e papatiso ha Iesu ne fakamailoga e foakiaga haana ke taute e finagalo he Atua ne talahau tuai he tau Tohiaga Tapu ma e Mesia.

10. Ko e heigoa ne putoia he taute he Mesia e finagalo he Atua, ti fēfē e logonaaga ha Iesu ke he mena nei?

¹⁰ Ko e finagalo ha Iehova ma Iesu ne putoia e fakamatala he tala mitaki he Kautu he Atua, taute tutaki, mo e tauteute a lautolu ma e gahua taute tutaki anoiha. Ko e foakiaga ha Iesu kua putoia foki haana makai ke fakauka ke he favaleaga mo e mate mamahi he lalago e pule katoatoa tututonu ha Iehova ko e Atua. Ha kua fakaalofa mooli a Iesu ke he haana Matua he lagi, ne fiafia a ia ke taute e finagalo he Atua mo e moua e makona hokulo ke foaki e tino haana mo poa. (Ioane 14:31) Ne fiafia foki a ia ke iloa ko e uho he moui mitaki katoatoa haana ka tuku age ke he Atua mo lukutoto ke fakatau mai aki a tautolu mai he fakatupa ke he agahala mo e mate. Talia kia he Atua e foaki e Iesu a ia ke lalago e tau matagahua lalahi nei? Talia mooli e ia!

11. Fakakite fēfē e Iehova e taliaaga haana ki a Iesu ne eke mo Mesia, po ke Keriso, ne mavehe?

¹¹ Ne hagaao oti e tau tagata tohia Evagelia tokofā ke he talahauaga maaliali he taliaaga ha Iehova ko e Atua he hake mai a Iesu he Vailele i Ioritana. “Ne kitia e au e [a]gaga ne hifo mai he lagi,” he talahau e Ioane ko e Papatiso, “mo e nofo ki luga ia [Iesu] . . . Ti kua kitia tuai e au mo e talahau atu, ko ia ni ko e Tama he Atua.” (Ioane 1:32-34) Lafi ki ai, he magaaho ia ne fakailoa e Iehova: “Ko e haku a tama fakahele hanā, kua fiafia na au kia ia.”—Mata. 3:17; Mare. 1:11; Luka 3:22.

Fakamooli Ato Hoko e Mate

12. Ko e heigoa ne taute e Iesu ke tolu mo e hafa e tau he mole e papatiso haana?

¹² Tolu mo e hafa e tau ki mui, ne foaki katoatoa e Iesu a ia ke fakaako e tau tagata hagaao ke he haana Matua mo e tututonu he pule katoatoa he Atua. He mategūgū he fano takai ke he Motu he Maveheaga, ne nakai fai mena ke taofi a ia ke talahau atu mo e fakamakai e kupu mooli. (Ioane 4:6, 34; 18:37) Ne fakaako e Iesu e falu hagaao ke he Kautu he Atua. He fakamaulu fakamana e tau tagata gagao, fagai e moto tagata ne hoge, mo e fakaliu tu mai a lautolu ne mamate, ne fakatātā e ia e mena ka fakakatoatoa he Kautu ma e tau tagata oti.—Mata. 11:4, 5.

13. Ko e heigoa ne fakaako e Iesu hagaao ke he liogi?

¹³ He nakai uta e Iesu e lilifu ma e tau fakaakoaga mo e tau gahua fakamaulu haana, ne fakatoka e ia e fifitakiaga mua ue atu he tuku atu fakatokolalo e tau fakahekeaga oti kana ki a Iehova. (Ioane 5:19; 11:41-44) Ne fakailoa foki e Iesu e tau mena ne mua atu e aoga hagaao ke he tau mena kua lata ia tautolu ke liogi. Kua lata e tau liogi ha tautolu ke putoia e tau ole ke he higoa he Atua ko Iehova, ‘kia fakatapu ai’ ti ko e pule tututonu katoatoa he Atua ka hukui e pule kelea a Satani ti “eke [Haana] a finagalo ke he lalolagi, tuga ne eke ke he lagi.” (Mata. 6:9, 10) Kua tomatoma foki e Iesu a tautolu ke gahua fakatatau mo e tau liogi pihia he “kumikumi fakamua . . . ke he kautu he Atua mo e hana tututonu.”—Mata. 6:33.

14. Pete he mitaki katoatoa a Iesu, ko e ha ne lata ai e laliaga ma haana ke fakamooli e matagahua haana he finagalo he Atua?

¹⁴ He tata mai e mate ha Iesu, ne mailoga lahi mahaki e ia e kotofaaga mamafa ne ha ha ia ia. Ko e finagalo mo e higoa he Matua haana kua fakavē ke he fakauka ha Iesu he kamatamata nakai fakafili tonu mo e mate mamahi. Lima e aho to mate a Iesu, ne liogi a ia: “Ha ne fakaatukehe nai hoku loto; to talahau e au ha ha? Ma Matua na e, fakamoui au mai he magala nai; ka ko e mena ia ne hoko mai ai au ke he magala nai.” He mole e fakakite e tau logonaaga pauaki nei he tagata, ne hiki fakamakai e Iesu e onoonoaga haana ke he tau mena ne mua atu e aoga ti liogi: “Ma Matua na e, fakaheke a ke he hau a higoa.” Ne tali fakamafiti e Iehova: “Kua fakaheke au ki ai, ato liu foki fakaheke au ki ai.” (Ioane 12:27, 28) E, ne makai a Iesu ke he kamatamata lahi mahaki he mahani fakamooli ne nakaila fehagai ia mo e ha tagata. Ka ko e logona e tau kupu ia he haana Matua he lagi kua foaki mooli ki a Iesu e mauokafua malolō to kautū a ia he fakaheke mo e fakatapu e pule katoatoa ha Iehova. Ti kautū mooli a ia!

Mena ne Fakakatoatoa he Mate a Iesu

15. Ato mate a Iesu, ko e ha ne pehē a ia: “Kua fakaoti tuai”?

¹⁵ He teitei a Iesu ne tautau he akau fakakikiveka ke fakapuhaki fakahiku mo e mamahi a ia, ne pehē a ia: “Kua fakaoti tuai.” (Ioane 19:30) Ko e tau mena lalahi mooli ne maeke ia Iesu ke fakakatoatoa ha ko e lagomatai he Atua he tolu mo e hafa e tau mai he papatiso haana ato mate a ia! Magaaho ne mate a Iesu, ne tō e mafuike malolō lahi, ti omoomoi e takitaki he tokoteau ne pule ke he tamateaga ke talahau: “Ko e moli, ko e Tama ni he Atua hanā.” (Mata. 27:54) Na kitia he takitaki he tokoteau kua vaiga ki a Iesu ha kua talahau ke eke mo Tama he Atua. Pete e tau mena oti ne matematekelea a Iesu, ne fakatumau a ia ke he mahani fakamooli haana ti fakakite ko e pikopiko kelea muitui a Satani. Ko lautolu oti ne lalago e pule katoatoa he Atua, ne talahau e Satani e totokoaga nei: “Ko e tau mena oti foki ha ha he tagata, to ta age e ia ke totogi aki hana moui.” (Iopu 2:4) He tua fakamooli ha Iesu, ne fakakite e ia na maeke ia Atamu mo Eva ke tua fakamooli i lalo he kamatamata mukamuka lahi ha laua. Mua atu e aoga, ne fakaheke mo e fakatapu he moui mo e mate ha Iesu e tututonu he pule katoatoa a Iehova. (Totou Tau Fakatai 27:11.) Fai mena foki nakai ne fakakatoatoa he mate ha Iesu? E fai!

16, 17. (a) Maeke he ha e tau fakamoli fakamua ato Kerisiano ha Iehova ke moua e tuaga tututonu mo Ia? (e) Taui fēfē e Iehova e tua fakamooli he Tama haana, ti ko e heigoa he Iki ko Iesu Keriso ne matutaki ke taute?

¹⁶ Tokologa e fekafekau a Iehova ne momoui fakamua to hau a Iesu ke he lalolagi. Ne olioli e lautolu e tuaga tututonu mo e Atua ti foaki ki a lautolu e amaamanakiaga he liu tu mai. (Isaia 25:8; Tani. 12:13) Ka e fakavē ke he fakatufono fe ka fakamonuina he Atua tapu ko Iehova e tau tagata agahala he puhala homo ue atu pihia? Fakamaama he Tohi Tapu: “Ko [Iesu Keriso] ne tuku mai i mua he Atua mo poa ke fakalotomafola ai ke he tua, ke he hana toto; kia fakakite mai ai hana tututonu he nakai taui atu e ia e tau hala kua mole atu, ha ko e fakauka he Atua; kia fakakite mai foki e tututonu hana ke he vaha nai, kia iloa ai a ia ko e tututonu, mo e talahaua tututonu e ia e tagata kua tua kia Iesu.”—Roma 3:25, 26.b

¹⁷ Ne palepale e Iehova a Iesu he fakaliu tu mai ke he tuaga ne mahomo atu ke he tuaga fakamua ato hau a ia ke he lalolagi. Ne olioli e Iesu mogonei e moui nakai mate ko e mena moui fakaagaaga mua ue atu. (Hepe. 1:3) Ko e Ekepoa ne Mua mo e Patuiki, ko e Iki ko Iesu Keriso kua matutaki ke lagomatai e tau tutaki haana ke fakaheke e tututonu he Atua. Nukua fakaaue mooli a tautolu ke he ha tautolu a Matua he lagi, ko Iehova, ko e Taui ha lautolu oti kua taute e mena nei mo e fekafekau fakamooli ki a ia he fifitaki e Tama haana!—Totou Salamo 34:3; Heperu 11:6.

18. Ko e heigoa e matapatu he vala tala fakaako ka mui mai?

¹⁸ Ko e tau tagata tua fakamooli ne hoko atu ki a Apelu ne olioli e fakafetuiaga tata mo Iehova ha kua fakagahua e lautolu e tua mo e mauokafua ke he Tega ne mavehe. Na iloa e Iehova to tumau e mahani fakamooli he Tama haana mo e to ufiufi katoatoa he mate haana e “hala he lalolagi.” (Ioane 1:29) Kua aoga foki e mate a Iesu ke he tau tagata ne momoui he vahā nei. (Roma 3:26) Ti ko e heigoa e tau monuina ka tamai he lukutoto he Keriso ma haau? Ko e matakupu a ia he vala tala fakaako ka mui mai.

[Tau Matahui Tala]

To Tali Fēfē e Koe?

• Totoko fēfē ke he tututonu he Atua?

• Ko e heigoa ne fakamailoga he papatiso a Iesu?

• Ko e heigoa ne fakakatoatoa he mate a Iesu?

[Fakatino he lau 9]

Iloa nakai e koe e mena ne fakamailoga he papatiso a Iesu?