Ko Iehova ha Tautolu a Iki Pule Katoatoa!
‘Kua eke e au e Iki Pule Katoatoa ko Iehova mo kolo haku.’—SALA. 73:28.
1. He tau kupu haana ne fakamau he 1 Korinito 7:31, ko e heigoa ne hagaao mooli a Paulo ki ai?
“KO E mena mole atu e mahani he lalolagi nai.” He talahau pihia he aposetolo ko Paulo. (1 Kori. 7:31) Ne fakatatai mooli e ia e lalolagi ke he fata i mua, ne ha ha i ai e tau tagata taute tala hane taute e tau vala ha lautolu ko e tau tagata mitaki po ke kelea ato hiki e tau vala tala.
2, 3. (a) Ko e heigoa ka fakatatai ki ai e paleko ke he pule katoatoa ha Iehova? (e) Ko e heigoa e tau hūhū ka fakatutala a tautolu ki ai?
2 He vaha nei, ko e taute tala aoga lahi mahaki hane fa e tupu—ti lauia ai a koe! Mua atu ha kua matutaki ke he fakatokoluga he pule malolō ha Iehova ko e Atua. Ko e taute tala nei kua maeke ke fakamaama he tuaga kua liga tupu mooli he taha motu. Ke he taha faahi, ha ha i ai e fakatufono fakavē pauaki ke moua e maopoopo. Ke he taha faahi foki, ha i ai e fakatokatokaaga kolokolovao ne pule ke he puhala fakavaia, favale, mo e kelipopo. Ko e fakatokatokaaga holifono kua paleko ke he pule katoatoa he motu ti kamatamata e mahani fakamooli he tau tagata oti ke he fakatufono ha lautolu.
3 Pihia e tuaga kua tupu ke he lalolagi katoa. Ha i ai e fakatufono tonutika ne fakatū he “Iki [“Pule Katoatoa,” NW] ko Iehova.” (Sala. 71:5) Ka ko e tau tagata he mogonei kua fakamatakutaku he fakatokatokaaga kolokolovao ne takitaki e ‘ia kua mahani kelea.’ (1 Ioa. 5:19) Kua paleko ai ke he fakatufono ne fakatū pauaki he Atua ti kamatamata e mahani fakamooli he tau tagata oti ke he pule katoatoa haana. Tupu fēfē e tau tuaga nei? Ko e ha ne fakaatā ai he Atua? Ko e heigoa ka taute e tautolu takitokotaha hagaao ki ai?
Tau Vala he Taute Tala
4. Ko e heigoa e ua e matakupu ne fetataiaki kua putoia e fakamaamaaga ke he taute tala he lagi mo e lalolagi katoatoa?
4 Ko e fakamaamaaga nei ke he taute tala he lagi mo e lalolagi katoatoa kua putoia ua e matakupu ne fetataiaki: Pule katoatoa ha Iehova mo e mahani hakohako he tagata. I loto he tau Tohiaga Tapu, ne fa ui a Iehova ko e ‘Iki Pule Katoatoa.’ Tuga anei, he falanaki katoatoa ki a ia, ne lologo he salamo: “Kua eke e au e Iki [“Pule Katoatoa,” NW] ko Iehova mo kolo haku.” (Sala. 73:28) Ha i ai e tau kakano mitaki ke mailoga a Iehova ko e Atua ko Ia ne Mua Ue Atu.—Tani. 7:22.
5. Ko e ha kua lata ia tautolu ke omoomoi ke fakamatalahi e pule katoatoa ha Iehova?
5 Ha ko e Tufuga, ko Iehova ko e Atua ko e Pule Katoatoa ke he lalolagi mo e lagi katoatoa. (Totou Fakakiteaga 4:11.) Ko Iehova foki ko e ha tautolu a Fakafili, Pule, mo e Patuiki, ti tuku fakalataha ni e ia e fakafiliaga, matafakatufono, mo e tau faahi leveki he fakatufono he lagi mo e lalolagi katoatoa. (Isaia 33:22) Ha kua fakalago e tau momoui ha tautolu ke he Atua ti kua falanaki ki a ia, lata ia tautolu ke onoono ki a ia ko e Iki Pule Katoatoa ha tautolu. To omoomoi a tautolu ke fakamatalahi e tuaga tokoluganea haana kaeke ke tokaloto tumau e tautolu “kua fakatu e Iehova hana nofoaiki ke he lagi, kua pule okooko foki hana kautu.”—Sala. 103:19; Gahua 4:24.
6. Ko e heigoa e mahani hakohako?
6 Ke lalago e pule katoatoa ha Iehova, latatonu ia tautolu ke fakatumau e mahani hakohako ha tautolu ki a ia. Ko e “mahani hakohako” ko e mahani mitaki lahi po ke katoatoa. Ko ia ne fakatumau e mahani hakohako ko e tagata mitaki mo e mahani tonu. Ko e tagata pihia e tupuna ko Iopu.—Iopu 1:1.
Puhala ne Kamata e Taute Tala
7, 8. Paleko fēfē e Satani e tonuhia he pule katoatoa ha Iehova?
7 Kavi ke 6,000 e tau kua mole, ne totoko he mena moui fakaagaaga e tonuhia he pule katoatoa ha Iehova. Ko e manako fulukovi ke tapuaki age ki a ia ne fakaohooho aki e tau kupu mo e tau gahua haana ne totoko. Ne fakaohooho e ia e hoa tagata fakamua ko Atamu mo Eva ke nakai fakamooli ke he pule katoatoa faka-Atua ti lali ke moumou e higoa ha Iehova he talahau kua pikopiko a Ia. (Totou Kenese 3:1-5.) Ne eke a ia ne totoko ko e Fī ne mua, ko Satani (Totoko), Tiapolo (Pikopiko), gata (fakavaia), mo e tarako (kelipopo).—Fakakite. 12:9.
8 Ne eke ni e Satani a ia ko e pule totoko. Fehagai mo e paleko nei, ko e heigoa la ka taute he Iki Pule Katoatoa ko Iehova? To fakaotioti fakamafiti nakai e ia e matakau totoko ne tokotolu—ko Satani, Atamu, mo Eva? Kua ha ha mooli ia Iehova e malolō ke taute pihia, ti to tali foki he matagahua ia e hūhū ko hai ne mua ue atu e malolō. To fakakite foki kua mooli e mena ne talahau e Iehova hagaao ke he fakahala he moumou e matafakatufono haana. Ko e ha ne nakai taute pihia he Atua?
9. Ko e heigoa ne hūhū toko e Satani?
9 He pikopiko mo e fuluhi kehe a Atamu mo Eva mai he Atua, ne hūhū toko e Satani e tonuhia ha Iehova ke moua e omaoma he tau tagata. Mua atu, he fakaohooho e hoa tagata fakamua ke liuliu ke he Atua, ne hūhū toko foki e Satani e mahani fakamooli he tau mena momoui lotomatala oti kana. Tuga ne fakakite he mena ne tupu ki a Iopu, ne mahani fakamooli ke he pule katoatoa ha Iehova, ne talahau e Satani kua maeke a ia ke fuluhi kehe e tau tagata oti mai he Atua.—Iopu 2:1-5.
10. He fakatolomaki e fakapuloa he pule katoatoa haana, ko e heigoa ne fakaatā he Atua?
10 He fakatolomaki e fakapuloa he pule katoatoa Haana, ne fakaatā e Iehova a Satani ke fai magaaho ke fakamooli e totoko haana. Kua foaki foki he Atua ke he tau tagata e fifiliaga ke fakakite e mahani fakamooli ha lautolu ke he pule katoatoa haana. Ko e heigoa ne tupu he tau senetenari ne mole atu? Kua fakatū e Satani e fakatokatokaaga kolokolovao malolō lahi mahaki. Fakahiku ni, to moumou ai e Iehova fakalataha mo e Tiapolo, ti foaki e fakamooliaga mua ue atu ke he tonuhia he pule katoatoa he Atua. Kua mauokafua mooli a Iehova ko e Atua ke he kautūaga mitaki ati talahau tuai ai e ia he magaaho ne tupu e totokoaga i Etena.—Kene. 3:15.
11. Ko e heigoa ne taute he tau tagata tokologa hagaao ke he pule katoatoa ha Iehova?
11 Tokologa e tagata ne fakagahua e tua mo e fakatumau e mahani hakohako ha lautolu hagaao ke he pule katoatoa ha Iehova mo e fakatapu e higoa haana. Ko e numera ha lautolu ia kua putoia a Apelu, Enoka, Noa, Aperahamo, Sara, Mose, Ruta, Tavita, Iesu, mo e tau tutaki fakamua atu he Keriso, mo e totou miliona ne fakatumau ke mahani hakohako he vahā nei. Ko lautolu ia ne fakamatalahi e pule katoatoa faka-Atua kua fai vala he fakakite ko Satani ko e pikopiko, mo e fakameā e higoa ha Iehova mai he ekefakakelea ne fata ki ai he Tiapolo he hula na maeke a ia ke fuluhi kehe e tau tagata oti mai he Atua.—Fakatai 27:11.
To Mooli Lahi e Fakahikuaga
12. Mauokafua fēfē a tautolu to nakai fakauka tukulagi e Atua ke he mahani kelea?
12 Iloa mooli ai e tautolu to nakai leva ti fakapuloa e Iehova e pule katoatoa haana. To nakai fakamanavalahi tukulagi a ia ke he tau mahani kelea, mo e iloa e tautolu hane nonofo a tautolu he tau aho fakahiku. Ne fakahala e Iehova a lautolu ne mahani kelea he magahala he Fakapuke. Ne moumou e ia a Sotoma mo Komora mo Farao mo e tau kau haana. Ko Sisera mo e haana kau mo Sanerivi mo e haana kau Asuria kua nakai fakaai ke tatai ke he Mua Ue Atu. (Kene. 7:1, 23; 19:24, 25; Esoto 14:30, 31; Fakafili 4:15, 16; 2 Patu. 19:35, 36) Mauokafua ai a tautolu to nakai fakauka tukulagi a Iehova ko e Atua ke he nakai fakalilifu he higoa haana mo e ekefakakelea e Tau Fakamoli haana. Taha mena foki, kua kitia e tautolu mogonei e fakamooliaga he fakamailoga he ha ha hinei ha Iesu mo e fakaotiaga he fakatokaaga kelea nei.—Mata. 24:3.
13. Hao fēfē a tautolu neke moumou fakalataha mo e tau fī ha Iehova?
13 Ke hao neke moumou fakalataha mo e tau fī he Atua, latatonu ia tautolu ke fakakite e mahani fakamooli ha tautolu ke he pule katoatoa ha Iehova. Puhala fe ka taute ai e tautolu? He fakatumau ke vevehe kehe mai he pule kolokolovao ha Satani mo e fakaheu ke nakai matakutaku he tau hukui haana. (Isaia 52:11; Ioane 17:16; Gahua 5:29) Ko e tau tuaga ia ni ka maeke ia tautolu ke fakamatalahi e pule katoatoa he ha tautolu a Matua he lagi mo e amaamanaki ke fakahao he magaaho ka fakameā e Iehova e higoa haana he ekefakakelea ti fakakite ko ia ko e Pule Katoatoa he Lagi mo e Lalolagi.
14. Ko e heigoa ne fakakite he tau vala kehekehe he Tohi Tapu?
14 Ko e tau tala matafeiga hagaao ke he tau tagata mo e pule katoatoa ha Iehova kua fakakite he Tohi Tapu katoa. Ko e tau veveheaga tolu fakamua ne talamai ki a tautolu hagaao ke he tufugatiaaga mo e veliaga he tagata ke he agahala, ka ko e tau veveheaga tolu fakamui kua hagaao ke he fakafoouaga he tagata. Ko e tau lautohi he vahāloto kua fakakite e tau tala matafeiga hagaao ke he tau lakaaga ne taute he Iki Pule Katoatoa ko Iehova ke fakamooli aki e finagalo haana ma e tau tagata, lalolagi, mo e lagi katoatoa. Fakakite he Kenese e puhala ne hoko mai a Satani mo e mahani kelea ke he lalolagi, mo e vala fakahiku he Fakakiteaga ne fakakite e puhala ka fakaotioti e kelea muitui, ka moumou e Tiapolo, mo e ka eke e finagalo he Atua he lalolagi tuga ne eke he lagi. Mooli, ne fakakite he Tohi Tapu e tupumaiaga he agahala mo e mate ti fakakite e puhala ka utakehe ai mai he lalolagi, mo e hukui aki e fiafia lahi mahaki mo e moui tukulagi ma lautolu ne fakatumau e mahani hakohako.
15. Ke moua e aoga fakatagata ka fakaoti e taute tala ne putoia e pule katoatoa, ko e heigoa kua lata ia tautolu ke taute?
15 Nakai leva to hiki katoatoa e mahani he lalolagi nei. To tuku hifo e ie puipui ke he taute tala he tau senetenari mai i tuai ne putoia e pule katoatoa. To utakehe a Satani mai he fata i mua, ti gutu atu ke he fakahikuaga katoatoa, mo e to kautū mooli ai e finagalo he Atua. Ka ke aoga mai he mena nei mo e olioli e tau monuina loga ne talahau tuai he Kupu he Atua, latatonu ia tautolu ke fakamatalahi e pule katoatoa ha Iehova mogonei. Nakai lata ia tautolu ke nofo he fuga pā. Ke maeke ke talahau: “Ha ha ia au a Iehova,” latatonu ia tautolu ke nonofo tumau he tapa haana.—Sala. 118:6, 7.
Maeke ia Tautolu ke Fakatumau e Mahani Hakohako!
16. Ko e ha kua mauokafua ai a tautolu na maeke he tau tagata ke fakatumau e mahani hakohako ke he Atua?
16 Maeke ia tautolu ke fakamatalahi e pule katoatoa ha Iehova mo e fakatumau e mahani hakohako ha tautolu, he tohi he aposetolo ko Paulo: “Nakai moua a mutolu he kamatamata kua kehe mo e tau tagata auloa; ha kua fakamoli e Atua, he nakai tuku atu e ia a mutolu ke he kamatamata kua mua ke he mena kua fahia ai a mutolu, ka e taute foki e ia fakalataha mo e kamatamata e mena ke hao ai, kia fahia a mutolu ke fakauka ai.” (1 Kori. 10:13) Ko e heigoa e punaaga he kamatamata ne totoku e Paulo, ti taute fēfē he Atua e mena ke hao ai a tautolu?
17-19. (a) Ko e heigoa e tau kamatamata ne mokulu ki ai e tau Isaraela he tutakale? (e) Ko e ha kua maeke ia tautolu ke fakatumau e mahani hakohako ha tautolu ki a Iehova?
17 Tuga ne fakakite he tau mena ne tutupu ki Isaraela he tutakale, ko e “kamatamata” kua puhala mai he tau tuaga ka fakatupu a tautolu ke moumou e matafakatufono he Atua. (Totou 1 Korinito 10:6-8, 10.) Maeke he tau Isaraela ke totoko e kamatamata, ka e manako na lautolu ke he “tau mena kelea” he magaaho ne foaki fakamana e Iehova ma lautolu e tau salu ke taha e mahina. Pete kua fai magaaho ne nakai kai he tau tagata e kakano manu, ne foaki fakalahi he Atua ki a lautolu e manai ke kai. Ka kua mahala a lautolu ke he kamatamata he fakatokatoka atu ke he mahani lotokai he magaaho ne tatanaki e tau salu.—Nume. 11:19, 20, 31-35.
18 Fakamua atu, he hake a Mose ke he Mouga ko Sinai ke moua e Fakatufono, ne tapuaki tupua e tau Isaraela, he tapuaki ke he punua povi mo e fiafia fakalialia ke he tau mena he tino. Ha kua nakai ha ha i ai e takitaki ha lautolu ne kakano kua tokanoa a lautolu ke he kamatamata. (Esoto 32:1, 6) Ato huhū atu ke he Motu he Maveheaga, tokoafe e tau Isaraela ne fakataki he tau fifine Moapi, ne matutaki mo lautolu ke he mahani fakataane mo e fifine. He magaaho ia, ne tokoafe e tau Isaraela ne mamate ha ko e agahala ha lautolu. (Nume. 25:1, 9) Falu magaaho, ne mahala e tau tagata ha Isaraela ke he kamatamata ke gūgū fakafualoto, ti taha e magaaho ne vagahau totoko ki a Mose ti pihia foki ke he Atua! (Nume. 21:5) Ne loma foki e tau tagata ha Isaraela he mole e tamate a lautolu ne mahani kelea ko Koru, Tatano, Apiramo, mo e tau hoa ha lautolu, he talahau hehē ko e tamateaga he tau tagata totoko kua nakai tonu. Ko e fua, ne 14,700 e tau Isaraela ne mamate ke he tatalu ne mai he Atua.—Nume. 16:41, 49.
19 Nakai fai kamatamata ne totoku i luga kua tuga nakai fahia e tau Isaraela ke totoko ki ai. Ne fakatokatoka atu e tau tagata ke he kamatamata ha kua galo e tua ha lautolu ti nimo a Iehova, haana manamanatu fakaalofa ma lautolu, mo e tau puhala hakohako haana. Tuga e mena ne tupu ke he tau Isaraela, ko e tau kamatamata ne fakafehagai mo tautolu kua fa tutupu tumau ke he tau tagata. Ka lali fakalahi a tautolu ke totoko ki ai ti falanaki ke he Atua ke fakamalolō a tautolu, maeke ia tautolu ke fakatumau e mahani hakohako. Maeke ia tautolu ke mauokafua ke he mena nei ha kua “fakamoli e Atua” ti nakai fakaatā a tautolu ke he “kamatamata kua mua ke he mena kua fahia ai a [ta]utolu.” Ne nakai toka e Iehova a tautolu ke hokotia ke he tau tuaga ka nakai maeke katoatoa ke taute e finagalo haana.—Sala. 94:14.
20, 21. Ka kamatamata, taute fēfē he Atua “ke hao ai” a tautolu?
20 He fakamalolō a tautolu ke totoko e kamatamata, ne taute e Iehova e puhala “ke hao ai.” Ma e fakatai, liga ekefakakelea fakatino he tau tagata favale a tautolu he lali ke taute a tautolu ke fakatikai e tua ha tautolu. Ko e tau puhala pihia ka liga kamatamata a tautolu ke fakahui e tua ke hao neke au atu e fahi, fakakikiveka, po ke liga tamate. Ka e fakavē ke he fakamafanatia omoomoi ha Paulo ne fakamau he 1 Korinito 10:13, kua iloa e tautolu ko e tau tuaga ne fakatupu e kamatamata na kū ni e magaaho. To nakai fakaatā ai e Iehova ke hoko ke he mena ka nakai maeke ia tautolu ke fakatumau e tua fakamooli ki a ia. Maeke he Atua ke atihake e tua ha tautolu mo e foaki ki a tautolu e malolō fakaagaaga kua lata mo tautolu ke fakatumau e mahani hakohako.
21 Kua fakamalolō e Iehova a tautolu puhala he agaaga tapu haana. Liuaki mai foki he agaaga ia ke he tau loto ha tautolu e tau manatu faka-Tohiaga Tapu kua lata mo tautolu ke totoko ke he kamatamata. (Ioane 14:26) Ko e fua, kua nakai fakavaia a tautolu ke mumui ke he puhala hehē. Tuga anei, kua maama e tautolu e tau matakupu pihia ke he pule katoatoa ha Iehova mo e mahani hakohako he tagata. Ha ko e iloilo ia, tokologa ne fakamalolō he Atua ke fakatumau ke tua fakamooli ke hoko ke he mate. Ka e nakai ko e mate ke hao ai a lautolu; ko e lagomatai ha Iehova ati maeke ia lautolu ke fakauka ke hoko ke he fakaotiaga mo e nakai fakatokatoka atu ke he kamatamata. Maeke ia Ia ke taute pihia foki ma tautolu. Ti fakaaoga foki e Ia e tau agelu tua fakamooli haana ke lagomatai a tautolu, ko e tau fekafekau ‘kua fakafano mai ke fekafekau ma lautolu ke moua ai e moui.’ (Hepe. 1:14) Tuga ka fakakite he vala tala ka mui mai, ko lautolu ni ne tumau e mahani hakohako ka amaamanaki ke moua e tufaaga fiafia he fakamatalahi tukulagi e pule katoatoa he Atua. Maeke ia tautolu ke fakalataha mo lautolu kaeke ke pipiki a tautolu ki a Iehova ko e Iki Pule Katoatoa ha tautolu.
To Tali Fēfē e Koe?
• Ko e ha kua lata ia tautolu ke mailoga ko Iehova ko e Iki Pule Katoatoa ha tautolu?
• Ko e heigoa e kakano ke fakatumau e mahani hakohako ha tautolu ke he Atua?
• Iloa fēfē e tautolu to nakai leva ti fakapuloa e Iehova e pule katoatoa haana?
• Hagaao ke he 1 Korinito 10:13, ko e ha kua maeke ai ke fakatumau e mahani hakohako?
[Fakatino he lau 24]
Fakaohooho e Satani a Atamu mo Eva ke nakai mahani fakamooli ki a Iehova
[Fakatino he lau 26]
Kia fakamalolō ke fakamatalahi e pule katoatoa ha Iehova