Tau Hūhū he Tau Tagata Totou
He Kenese 6:3, totou e tautolu: “Nakai taufetoko tukulagi haku [a]gaga mo e tau tagata, ha ko lautolu foki ko e tau tagata ni; ka ko e tau aho ha lautolu ko e taha teau he tau tau ia, ti uafulu ni e tau.” Na fakakaupā kia e Iehova e tau he moui he tagata ke he 120 e tau, ti leva pihia kia e fakamatala ha Noa hagaao ke he hoko mai he Fakapuke?
Ko e tali ke he ua e vala he hūhū ko e nakai.
Ato hoko e Fakapuke, tokologa e tagata ne leva e momoui. Ne 600 e tau he moui a Noa he magaaho he Fakapuke, ti moui a ia ke 950 e tau. (Kene. 7:6; 9:29) Ko e falu ne fanau he mole e Fakapuke ne molea foki e 120 e tau tau. Ne mate a Afakasata he 438 e tau mo Silaha he 433 e tau. (Kene. 11:10-15) Ka e he vahā ha Mose, ko e loa he moui fa mahani kua to hifo ke he 70 po ke 80 e tau. (Sala. 90:10) Ti nakai fakavē he Kenese 6:3 e katoa po ke leva he moui he tagata ke he 120 ni e tau.
Ti hagaao kia e kupu ia ke he talahauaga faka-Atua ki a Noa he hataki e falu ke he moumouaga ka hoko mai he 120 e tau? Nakai. Lagaloga ne vagahau e Atua ki a Noa. Totou e tautolu hogofulu e kupu ki mui he tala: “Ti pehe mai ai e Atua kia Noa, Kua hoko mai ki mua haku e fakahikuaga he tau tagata oti; ha kua puke ni e lalolagi ke he favale.” He tau tau fakamui, ne oti e gahua makimaki ha Noa ko e talaga he vaka, ti ko e mogoia “Na pehe mai a Iehova kia Noa, Kia hu atu a koe katoa mo e hau a magafaoa oti ke he vaka.” (Kene. 6:13; 7:1) Ti fai magaaho foki ne vagahau a Iehova ki a Noa ke he falu manatu.—Kene. 8:15; 9:1, 8, 17.
Ka e kehe e totouaga he Kenese 6:3; ne nakai totoku a Noa po ke pehē ai na vagahau a Iehova ki a ia. Maeke ai ke maama ko e manatu mukamuka he finagalo po ke fifiliaga he Atua. (Fakatatai Kenese 8:21.) Ti kua aoga e fakamauaga tala hagaao ke he tau mena tutupu ato hoko e vahā ha Atamu, ne moua e tautolu e tau talahauaga tuga: “Ne pehe mai e Atua.” (Kene. 1:6, 9, 14, 20, 24) Maaliali ai, kua nakai vagahau a Iehova hagaao ke he tagata he lalolagi, ha kua nakaila tufuga e tagata.
Ti kua hako mogoia ke fakahiku aki kua hagaao e Kenese 6:3 ke he finagalo he Atua ke fakaotioti e fakatokaaga matahavala he lalolagi. Ne talahau e Iehova e poakiaga he fakafiliaga ke taute pihia he 120 e tau, ka e nakaila iloa ia e Noa. Ka ko e ha ne fakakaupā e magaaho? Ko e fakatali he ha?
Ne talahau he aposetolo ko Peteru e tau kakano: “He fakatalitali mai e fakauka he Atua i tuai ke he vaha kia Noa, ka kua taute ai e vaka, ne hao ai ke he vai e tau tagata tokogaogao, ko e tokovalu ni.” (1 Pete. 3:20) E, magaaho ne taute he Atua e fifiliaga haana hagaao ke he 120 e tau, ne fai mena agaia ne nakaila taute. Kavi ke he 20 e tau he mole, ne kamata a Noa mo e hoana haana ke fanafanau. (Kene. 5:32; 7:6) Ne lalahi hake e tau tama taane tokotolu ha laua ti faihoana, ti katoa ai e magafaoa “ko e tokovalu ni.” Ati lata ia lautolu ke talaga e vaka, nakai ko e matagahua mafiti he onoono ke he lahi he vaka mo e lahi he magafaoa ha Noa. E, ko e fakauka he Atua ke 120 e tau kua fakaatā ma e tau mena ia ke fakakatoatoa mo e fakatoka e fakavēaga ma e fakamouiaga, he fakaatā e tau tagata tokovalu ne tua fakamooli ke “hao ai ke he vai.”
Ne nakai fakamahino he Tohi Tapu e tau ne fakailoa e Iehova ki a Noa to hoko e Fakapuke. Tali mai he fanau e tau tama taane haana, lalahi hake ti faihoana, liga 40 po ke 50 e tau ne toe ato hoko e Fakapuke. Ti pehē a Iehova ki a Noa: “Kua hoko mai ki mua haku e fakahikuaga he tau tagata oti.” Ne pehē foki a ia ko Noa ka talaga e vaka makimaki ti hu a ia ki loto mo e magafaoa haana. (Kene. 6:13-18) He tau tau loga ne toe, ne lahi atu e mena ha Noa ne taute ke he fakatoka e fakafifitakiaga he mahani tututonu he moui haana. Ne eke a ia “ko e ogo he tututonu” ne ha ha i ai e hatakiaga mahino ke fakapuloa—ko e fifiliaga he Atua ke fakamahakava e tau tagata nakai mahani Atua he magahala ia. Ne nakai leva e iloa tuai e Noa e tau ka hoko ai, ka e iloa e ia to hoko mooli mai. Ti iloa e koe na hoko mooli ai.—2 Pete. 2:5.