Fakamalolō ke Totoko e Kamatamata mo e Fahia ke he Fakaloleloleaga
“Ka to moua e mutolu e malolo, ka haele hifo e [a]gaga [t]apu ki luga ia mutolu.”—GAHUA 1:8.
1, 2. Ko e heigoa e lagomatai ha Iesu ne mavehe ke he tau tutaki haana, ti ko e ha ne manako a lautolu ki ai?
ILOA e Iesu kua nakai maeke e tau tutaki haana he malolō ni ha lautolu ke muitua ke he tau poaki oti haana. He manamanatu ke he lahi he poakiaga ha lautolu ke fakamatala, ko e malolō he tau tagata totoko ha lautolu, mo e lolelole he tino he tagata, ati maaliali ai kua lata a lautolu mo e malolō mua ue atu. Ato hake a Iesu ke he lagi, ne mavehe a ia ke he tau tutaki haana: “To moua e mutolu e malolo, ka haele hifo e [a]gaga [t]apu ki luga ia mutolu; to eke foki a mutolu mo tau talahau haku ki Ierusalema, mo Iutaia oti ni, mo Samaria, ke hoko ni ke he fakaotiaga he lalolagi.”—Gahua 1:8.
2 Ne kamata e maveheaga ia ke fakamooli he Penetekoso 33 V.N. he magaaho ne fakamalolō he agaaga tapu e tau tutaki ha Iesu Keriso ke hokotia e fakamatala ha lautolu ki Ierusalema. Nakai maeke ha totokoaga ke fakaoti ai. (Gahua 4:20) “Ke he tau aho oti, ato hoko ni ke he fakaotiaga he lalolagi,” ko e tau tutaki tua fakamooli ha Iesu, putoia a tautolu, to manako mafiti ke he malolō pihia ne foaki he Atua.—Mata. 28:20.
3. (a) Fakamaama e kehekehe he agaaga tapu mo e malolō. (e) Ko e heigoa he malolō mai ia Iehova ka lagomatai a tautolu ke taute?
3 Ne mavehe a Iesu ke he tau tutaki haana ‘to moua e lautolu e malolo, ka haele hifo e agaga tapu ki luga ia lautolu.’ Kua nakai tatai e tau kakano he tau kupu “malolo” mo e “agaga.” Ko e agaaga he Atua, ko e haana malolō gahuahua, kua fakamaama ko e malolō ne omoomoi mo e fakaohooho ke he tau tagata po ke tau mena ke taute e finagalo he Atua. Ka ko e malolō kua fakakakano ai ko e “lotomatala ke taute po ke fakatupu e lauiaaga.” Maeke ai ke nofo i loto he tagata po ke taha mena ato fakaaoga ai ke moua e fua ne manako. Ti ko e agaaga tapu kua liga fakatatai ke he hila ne fakamoui e puha hila, ka ko e malolō kua tatai ke he malolō ne haia i loto he puha hila. Ko e malolō ne foaki e Iehova ke he tau fekafekau haana puhala he agaaga tapu ne foaki ki a tautolu takitaha e lotomatala ke fakamooli e tukuleleaga Kerisiano ha tautolu, ti ka lata, ke totoko e tau fakaohoohoaga kelea ne peehi ki a tautolu.—Totou Mika 3:8; Kolose 1:29.
4. Ko e heigoa ka fakatutala he vala tala nei, ti ko e ha?
4 Kitia fēfē e malolō ne foaki he agaaga tapu ki a tautolu? Ko e heigoa e tau gahua po ke tau tali ne liga fua mai he fakaohoohoaga ia? He eketaha a tautolu ke fekafekau fakamooli ke he Atua, kua fehagai a tautolu ke he tau mena vihi loga ne fakatupu e Satani, he fakatokaaga haana, po ke he tino nakai mitaki katoatoa ha tautolu. Kua aoga ia tautolu ke kautū ke he tau mena vihi pihia ke maeke ke fakauka ko e tau Kerisiano, fakalataha tumau ke he gahua he fonua, mo e tumau e fakafetuiaga mitaki mo Iehova. Kia fakatutala a tautolu ke he puhala ka lagomatai he agaaga tapu a tautolu ke totoko e kamatamata ti fahia ke he mategūgū mo e fakaloleloleaga.
Fakamalolō ke Totoko e Kamatamata
5. Maeke fēfē he liogi ke fakamalolō a tautolu?
5 Ne fakaako e Iesu e tau tutaki haana ke liogi: ‘Aua neke uta a mautolu ke he kamatamata, ka e laveaki mai a mautolu ia ia ne kelea.’ (Mata. 6:13) To nakai tiaki e Iehova e tau fekafekau tua fakamooli haana kua taute e ole nei. He taha magaaho, ne pehē a Iesu ko e ‘Matua ha ha he lagi to foaki mai e agaga tapu kia lautolu ka ole atu ai kia ia.’ (Luka 11:13) Ko e fakamalolō ha ia he maveheaga ha Iehova ke foaki ki a tautolu e fakaohoohoaga nei ma e tututonu! Nakai kakano e mena nei to puipui e Iehova a tautolu mai he kamatamata. (1 Kori. 10:13) Ka fehagai mogoia a tautolu mo e kamatamata, ko e magaaho a ia ke liogi fakamakamaka atu foki.—Mata. 26:42.
6. Ko e heigoa ne fakavē ki ai e Iesu e tau tali haana ke he tau kamatamata ha Satani?
6 He tali ke he tau kamatamata he Tiapolo, ne fatiaki e Iesu e tau kupu tohi. Kua mahino e Kupu he Atua he manamanatuaga ha Iesu he tali a ia: “Kua tohi . . . Kua tohi foki . . . Ati fano kehe a a koe ma Satani; ha ko e mena kua tohi, kia hufeilo atu a koe ke he Iki hau a Atua, ko ia ni hokoia ke fekafekau atu a koe ki ai.” Ko e fakaalofa ma Iehova mo e haana Kupu ne omoomoi a Iesu ke tiaki e tau matahele ne tuku he Kamatamata ki mua haana. (Mata. 4:1-10) He mole e totoko tumau e Iesu e kamatamata ati toka e Satani a ia.
7. Lagomatai fēfē he Tohi Tapu a tautolu ke totoko e kamatamata?
7 Ha kua falanaki a Iesu ke he tau Tohiaga Tapu ke totoko e tau kamatamata he Tiapolo, ti lata foki ia tautolu ke taute pihia! Mooli, ko e lotomatala ha tautolu ke totoko e Tiapolo mo e tau hukui haana kua kamata aki e fifiliaga ke iloa mitaki e tau tutūaga he Atua ti muitua katoatoa ki ai. Tokologa e tagata kua omoomoi ke momoui ke he tau tutūaga he Tohi Tapu he kumikumi a lautolu ke he tau Tohiaga Tapu mo e loto fakaaue ke he pulotu mo e tututonu he Atua. Mooli, kua fakaohooho he “kupu he Atua” e malolō ne maeke ke iloa e “tau manatu mo e tau fakafiliaga he tau loto.” (Hepe. 4:12) Ka lahi e totou mo e manamanatu e tagata ke he tau Tohiaga Tapu, to lahi atu e mena ka moua e ia he ‘manamanatu ke he fakamoli ha Iehova.’ (Tani. 9:13) He pihia, kua lata ia tautolu ke manamanatu fakahokulo ke he tau kupu tohi ne matutaki mo e tau lolelole pauaki ha tautolu.
8. Tau puhala fe ka moua e tautolu e agaaga tapu?
8 Lafi ke he iloaaga he tau Tohiaga Tapu, maeke ia Iesu ke totoko e kamatamata ti ‘puke a ia ke he agaga tapu.’ (Luka 4:1) Ke maeke ke moua e malolō mo e lotomatala pihia, lata ia tautolu ke fakatata ki a Iehova he fakaaoga katoatoa e tau foakiaga oti ne taute e ia ke puke a tautolu ke he agaaga haana. (Iako. 4:7, 8) Ko e tau mena nei ko e kumikumi ke he Tohi Tapu, liogi, mo e fakalataha mo e tau matakainaga talitonu ha tautolu. Tokologa foki kua loto fakaaue ke he aoga he fakatumau e fakaholoaga he tau matagahua faka-Kerisiano, ka lagomatai ke hagaaki tumau e manamanatuaga ke he tau manatu atihake fakaagaaga.
9, 10. (a) Ko e heigoa e tau kamatamata mahani mau he matakavi haau? (e) Maeke fēfē he manamanatu fakahokulo mo e liogi ke fakamalolō a koe ke totoko e kamatamata pete kua logona e koe e mategūgū?
9 Ko e heigoa e tau matahele ke hehē ka totoko e koe? Kua kamatamata nakai a koe ke kalahī ke he tagata ne nakai ko e hoa mau haau? Ka nakai fai tokoua a koe, kua fakaohooho nakai a koe ke fakatū kapitiga mo e tagata nakai tua? Ka kitekite televisoni po ke fakaaoga e Internet, liga kamatamata fakaofo e tau Kerisiano ke kitekite e tau mena nakai meā. Kua tupu nakai e mena ia ki a koe, ti ka pihia, fēfē e tali haau? Kua pulotu ke manamanatu fakahokulo ke he puhala he taha lakaaga hehē ka takitaki atu ke he taha foki ti fakahiku ke he hehē makimaki. (Iako. 1:14, 15) Manamanatu hagaao ke he matematekelea he mahani nakai fakamooli ka tamai ki a Iehova, ke he fakapotopotoaga, mo e magafaoa haau. He taha faahi, ko e loto manamanatu meā kua fua mai he fakatumau e mahani fakamooli ke he tau matapatu fakaakoaga faka-Atua. (Totou Salamo 119:37; Tau Fakatai 22:3.) He ha magaaho ka fehagai a koe mo e tau kamatamata pihia, kia eketaha ke liogi ma e malolō ke totoko ai.
10 Fai mena foki ke manatu hagaao ke he tau kamatamata he Tiapolo. Ne finatu a Satani ki a Iesu he mole e fakakanopogi Haana ke 40 e aho he tutakale. Nakai fakauaua ne manatu e Tiapolo kua ‘hoko mai e magaaho’ pauaki ke kamatamata e mahani fakamooli ha Iesu. (Luka 4:13) Ne kumi e Satani e tau magaaho pauaki ke kamatamata foki e mahani fakamooli ha tautolu. Kua aoga mogoia ke fakatumau ke fakamalolō fakaagaaga a tautolu ni. Ne fa totoko a Satani he magaaho ka kitia e ia kua lolelole lahi mahaki e fī haana. Ti ko e ha magaaho ka logona e tautolu e mategūgū po ke fakaloleloleaga, lata ia tautolu ke fakamalolō fakalahi ke ole ki a Iehova ma e lagomataiaga puipui mo e agaaga tapu haana.—2 Kori. 12:8-10.
Fakamalolō ke Fahia ke he Mategūgū mo e Fakaloleloleaga
11, 12. (a) Ko e ha kua tokologa ne logona e fakaloleloleaga he vahā nei? (e) Ko e heigoa ka fakamalolō a tautolu ke totoko ke he fakaloleloleaga?
11 Ha ko e tau tagata nakai mitaki katoatoa, logona e tautolu e fakaloleloleaga he tau magaaho. Kua liga pauaki e mena ia he vahā nei ha ko e magahala ne momoui ai a tautolu kua tupetupe lahi mahaki. Hane liga mole atu a tautolu he tau magahala uka lahi ne nakaila iloa he tau tagata oti. (2 Timo. 3:1-5) Hane hoko mai a Amaketo, ne holo ki mua e kelea he tuaga fakatupe, manamanatuaga, mo e falu peehiaga. Ti nakai lata ke ofo, ha kua uka lahi e falu ke fakamooli e matagahua ha lautolu ke leveki mo e foaki ke lata mo e magafaoa ha lautolu. Kua logona e lautolu e mategūgū, pehia, mo e nakai fahia. Kaeke kua mooli e mena ia kia koe, maeke fēfē ia koe ke fahia ke he pehiaaga ia?
12 Manatu na fakamalolō e Iesu e tau tutaki haana to foaki e ia e lagomatai ma lautolu—ko e agaaga tapu he Atua. (Totou Ioane 14:16, 17.) Ko e fakaohoohoaga nei ne mua atu e malolō he lagi mo e lalolagi katoatoa. Fakalataha ki ai, maeke ia Iehova ke foaki e malolō ke he “tau mena oti kua mua” ke maeke ia tautolu ke fakauka ke he tau kamatamata. (Efeso 3:20) He falanaki ki ai, he talahau he aposetolo ko Paulo, kua moua e tautolu e “lahi ue atu he malolo,” pete kua “matematekelea a [t]autolu ke he tau mena oti.” (2 Kori. 4:7, 8) Nakai mavehe a Iehova ke utakehe e tupetupe, ka e fakamalolō mooli e ia a tautolu puhala he agaaga haana, to foaki e ia e malolō ki a tautolu ke fehagai ki ai.—Filipi 4:13, NW.
13. (a) Fakamalolō fēfē e taha tagata fuata ke fahia ke he tuaga uka? (e) Fai fakataiaga pihia nakai ne iloa e koe?
13 Manamanatu ke he fakafifitakiaga ha Stephanie ne 19 e tau he moui ko e paionia tumau. He 12 e tau, ne matematekelea a ia he gagao stroke ti lauia ai e uhoulu he tuma. Tali mai he magaaho ia, ne lagaua e iihi haana, moua e tuluiaga mao hila, mo e liu foki lagaua e stroke, ti nakai gahuahua lahi e faahi hema haana mo e ataata e kitiaaga. Ne lata a Stephanie ke fakamau e malolō haana ma e tau mena kua manatu a ia kua aoga lahi, tuga e tau feleveiaaga Kerisiano mo e gahua he fonua. Ka e kitia e ia e malolō ha Iehova ne lagomatai a ia ke fakauka ke he tau puhala loga. Ko e tau tohi fakavē ke he Tohi Tapu ne ha ha i ai e tau tala ke he tau matakainaga Kerisiano kua atihake a ia he magaaho ne fakaatukehe a ia. Ne lalago he tau matakainaga a ia he ta atu ki a ia e tau lautohi po ke he vagahau mafanatia ki a ia ato kamata mo e hili e tau feleveiaaga. Ne fakakite foki he tau tagata fiafia e loto fakaaue ke he tau mena ne fakaako e Stephanie ki a lautolu he o atu ke he kaina haana ke moua e fakaakoaga faka-Tohi Tapu ha lautolu. Ma e tau mena oti nei, ne fakaaue lahi mahaki a Stephanie ki a Iehova. Ko e kupu tohi mahuiga haana ko e Salamo 41:3, ne talitonu a ia kua fakamooli ke he mena ne tupu ki a ia.
14. Ko e heigoa ka kalo a tautolu i ai he mogo ka lolelole a tautolu, ti ko e ha?
14 Ka mategūgū po ke pehia a tautolu, kua nakai lata ia tautolu ke manatu ko e puhala ke fehagai mo e tupetupe ko e fakatote hifo e tau matagahua fakaagaaga. Ko e mena kelea lahi mahaki a ia ke taute e tautolu. Ko e ha? Ha ko e tau matagahua pihia tuga e fakaako Tohi Tapu fakatagata mo e fakamagafaoa, gahua he fonua, mo e o atu ke he tau feleveiaaga ko e tau puhala ke moua e tautolu e agaaga tapu ke fakamalolō. Kua atihake tumau e tau matagahua Kerisiano. (Totou Mataio 11:28, 29.) Kua lagaloga e o mai he tau matakainaga ke he tau feleveiaaga mo e logonaaga lolelole, ka hoko e mogo ke o ki kaina, tuga kua fakafoou e malolō ha lautolu, ti liu e tau puha hila fakaagaaga ha lautolu moui foki!
15. (a) Mavehe mai kia a Iehova to fakamukamuka lahi e ia e moui he Kerisiano? Fakamaama mai he Tohi Tapu. (e) Ko e heigoa ne mavehe he Atua ki a tautolu, ti takitaki atu ke he hūhū fe?
15 Nakai pehē e mena nei, kua māmā e kavega he tuaga tutaki faka-Kerisiano. Kua lata ke eketaha mo Kerisiano tua fakamooli. (Mata. 16:24-26; Luka 13:24) Ka e puhala mai he agaaga tapu, kua maeke ia Iehova ke fakamalolō a ia ne mategūgū. “Ko lautolu kua tatali kia Iehova, to fakafou ai ha lautolu a malolo,” he tohi he perofeta ko Isaia. “To o hake a lautolu ke he tau tapakau po ke tau aeto; to tafepoi a lautolu ka e nakai mategugu; to o a lautolu, ka e nakai lolelole ai a lautolu.” (Isaia 40:29-31) He pihia, kua lata ia tautolu ke hūhū hifo, Ko e heigoa mooli e matapatu he mategūgū fakaagaaga?
16. Ko e heigoa ha tautolu ka taute ke utakehe e tau mena ka fakatupu e mategūgū po ke fakaloleloleaga?
16 Ne fakamafana he Kupu ha Iehova a tautolu ke “mailoga ai e [“tau mena ne mua atu e aoga lahi,” NW].” (Filipi 1:10) He fakatatai e puhala moui faka-Kerisiano ke he poitufi manava loa, ne omoomoi he agaaga e aposetolo ko Paulo ne pehē: “Kia tuku kehe e tautolu e tau mena mamafa oti kana, . . . ka e tafepoi fakauka a tautolu ke he poitufi kua toka ki mua ha tautolu.” (Hepe. 12:1) Ko e manatu haana kua lata ia tautolu ke kalo kehe mai he tau tutuliaga nakai aoga, tau mena mamafa teao ka mategūgū ai a tautolu. Liga ko e falu ia tautolu kua lali ke fakahaohao e tau mena loga ke he tau momoui kua fitā he lavelave. Ti ka mategūgū tumau a koe mo e pehia, liga aoga ki a koe ke liu filifilia e puhala ne fehagai a koe ke he eketaha he gahua tupe, fano tumau a koe he fenoga fakafiafia, mo e lahi mahaki e tutuli e koe e tau sipote po ke falu a matagahua fakafiafia foki. Kua lata e manamanatu mo e fakalatalata ke omoomoi a tautolu oti ke mailoga e tau fakakaupāaga ha tautolu ti fakatumau ke fakatote hifo e tau matagahua nakai aoga.
17. Ko e ha kua liga logona hifo he falu e fakalolelole, ka ko e heigoa e fakamafanaaga ne foaki e Iehova hagaao ke he mena nei?
17 Liga foki kua logona hifo he falu ia tautolu e fakalolelole he nakai hoko mai vave e fakaotiaga he fakatokaaga nei tuga kua amanaki a tautolu ki ai. (Fakatai 13:12) Ka ko e tagata ne logona hifo pihia kua maeke ke moua e fakamalolōaga mai he tau kupu ia Hapakuka 2:3: “Kua tuku mai e fakakiteaga mo e hana tau aho ne kotofa, kua alumaki foki a ia ke hoko ke he fakahikuaga, to nakai pikopiko a ia; pete he fakamule mai a ia, ka kia tatali atu ki ai; ha ko e mena to hoko mai ni, nakai mule mai.” Kua fakamafana e Iehova a tautolu, to hoko mai e fakaotiaga he fakatokaaga nei he magaaho tonu!
18. (a) Ko e heigoa e tau maveheaga kua foaki ki a koe e malolō? (e) To aoga fēfē e vala tala ka mui mai ki a tautolu?
18 Mooli, kua manako lahi e tau fekafekau tua fakamooli oti ha Iehova ma e aho ke utakehe e tau mategūgū mo e fakaloleloleaga, ti ko lautolu oti ne momoui to olioli e “vaha fuata.” (Iopu 33:25) Maeke foki ia tautolu mogonei ke malolō e tau loto ha ko e gahua he agaaga tapu he fakalataha a tautolu ke he tau matagahua atihake fakaagaaga. (2 Kori. 4:16; Efeso 3:16) Ua fakaatā e fakaloleloleaga ke taofi a koe ke moua e tau monuina tukulagi. Ko e tau kamatamata oti ne fakatupu he tau mena uka, mategūgū, po ke fakaloleloleaga to momole atu, ka nakai mogonei, ti he lalolagi foou he Atua. He vala tala ka mui mai, to kumikumi e tautolu e puhala kua fakamalolō he agaaga tapu e tau Kerisiano ke tumau ke he favaleaga, totoko e peehiaga hagahagakelea, mo e fakauka ke he falu matematekelea kehekehe.
To Tali Fēfē e Koe?
• Fakamalolō fēfē he totou Tohi Tapu a tautolu?
• Fakamalolō fēfē he liogi mo e manamanatu fakahokulo a tautolu?
• Maeke fēfē ia koe ke utakehe e tau mena ka fakatupu e fakaloleloleaga?
[Fakatino he lau 24]
Maeke he tau feleveiaaga Kerisiano ke atihake fakaagaaga a tautolu