Ne Ofania a Ia he Atua mo e Haana Tau Kapitiga

NAKAI FAI TAGATA he vahā nei ne iloa e higoa haana. Kua iloa ni a ia mogonei ha ko e higoa he matua taane haana ko Iefeta. Kia onoono a tautolu ke he Tohi Tapu mo e fakaako hagaao ki a laua tokoua. To moua e tautolu ko e tama fifine ha Iefeta kua ofania he Atua mo e tau kapitiga haana.

Maeke ia tautolu ke totou hagaao ki a Iefeta mo e tama fifine haana he Tohi Tapu he Tau Fakafili veveheaga 11. Ha ko Iefeta ko e fekafekau fakamooli he Atua, ne fakatutala tumau mooli e ia e tau Tohiaga Tapu mo e tama fifine haana.

Ne moui fakamua a Iefeta he tau tagata he Atua, ko e tau Isaraela ne ole ke fai patuiki ke pule ki a lautolu. Ko Iefeta ko e tagata malolō ne iloa ke tau. Ti ole e tau Isaraela ki a ia ke takitaki a lautolu ke totoko ke he tau tagata Amoni, ko e motu tata mai ne latau ke he tau Isaraela.

Ne manako a Iefeta ke he lagomatai he Atua ke fakakaumahala e tau tagata Amoni, ti taute e ia e omonuo. Ne pehē a Iefeta ka fakakautū e Iehova a ia, to foaki e ia ki a Iehova e tagata fakamua ka hau ki fafo he fale haana ka liu a ia ki kaina. To fekafekau e tagata ia ke he moui katoa haana he faituga he Atua—ko e matakavi ne tapuaki e tau tagata ke he Atua he magahala ia. Iloa nakai e koe ko hai ne hau fakamua ki fafo?—a

E, ko e tama fifine ha Iefeta! Ne momoko lahi a Iefeta. Na taha ni e tama haana. Ka kua taute e ia e maveheaga ki a Iehova ti lata ke taofi ki ai. Ne pehē agataha e tama fifine haana: “Haku matua na e, kua vagahau atu kia a koe kia Iehova? ati eke a e koe kia au tuga ne kupu kua fina atu ai ia koe.” Ti ole a ia ke toka a ia ke ua e mahina ke fina atu a ia ke he tau mouga ke tagi. Ko e ha ne momoko ai? Ha ko e fakamooli e omonuo he matua taane haana, kua nakai muitua e ia e tonuhia ke fai taane mo e fai tama. Pete ia, ne nakai onoono a ia ke he tau manako haana kua mua e aoga. Manako a ia ke omaoma ke he matua taane haana mo e fakamooli ki a Iehova. Manatu nakai a koe kua fakafiafia e ia a Iehova mo e matua taane haana?—

Ti fakafano atu e Iefeta e tama fifine haana fakalataha mo e tau kapitiga fifine haana ke he ua e mahina. He liu mai a ia, ne fakamooli he matua taane haana e omonuo haana he fakafano atu a ia ke he faituga he Atua i Sailo ke nofo tumau i ai. He tau tau takitaha, ne o atu e tau tamāfine ha Isaraela ki Sailo ke fakamafana e tama fifine ha Iefeta.

Iloa nakai e koe e tau fuata ikiiki ne omaoma ke he tau matua ha lautolu mo e ofania a Iehova?— Kua mitaki ke iloa lahi e tau tama ia ti eke mo kapitiga ha lautolu. Ka fifitaki e koe e tama fifine ha Iefeta mo e omaoma mo e fakamooli, to moua e koe e tau kapitiga mitaki. To fakafiafia e koe e tau matua haau, mo e to ofania foki e Iehova a koe.