Fiafia ke he Tututonu mo e Haau a Loto Katoa

“Kua finagalo a koe ke he tututonu.”—SALA. 45:7.

1. Ko e heigoa ka lagomatai a tautolu ke muitua ke he “tau puhala he tututonu?”

PUHALA he haana Kupu mo e haana agaaga tapu, hane takitaki e Iehova e tau tagata haana ke he “tau puhala he tututonu.” (Sala. 23:3) Ha kua nakai mitaki katoatoa a tautolu, liga hihiga a tautolu ke aafe kehe mai he puhala ia. Ke liu taute e tau mena hako kua lata ke lali fakamakamaka. Ko e heigoa ka lagomatai a tautolu ke kautū? Tuga a Iesu, lata ia tautolu ke fiafia po ke, finagalo ke taute e mena hako.—Totou Salamo 45:7.

2. Ko e heigoa e “tau puhala he tututonu”?

² Ko e heigoa e “tau puhala he tututonu”? Kua tuga e tau puhala pukilu ke o hui ai. Ne fifili ai ha ko e tuaga tututonu ha Iehova. He vagahau Heperu mo e Heleni, ko e “tututonu” kua hagaao ke he mena “hakohako,” kakano ke pipiki fakalahi ke he tau matapatu fakaakoaga he mahani. Ha ko Iehova “ko e mena kua nofo ai e mahani tututonu,” kua fiafia e tau tagata tapuaki haana ke onoono atu ki a ia ke fifili e puhala he mahani hakohako kua lata ia lautolu ke muitua.—Iere. 50:7.

3. Maeke fēfē ia tautolu ke fakaako fakalahi hagaao ke he tututonu he Atua?

³ He eketaha ni mo e loto katoa ha tautolu ke fakatatai ke he tau tuaga tututonu he Atua ka mua atu e fakafiafia e tautolu a ia. (Teu. 32:4) Ti kamata ai he fakaako e tautolu e tau mena oti hagaao ki a Iehova ko e Atua mai he haana Kupu, ko e Tohi Tapu. He lahi e mena ka iloa e tautolu hagaao ki a ia, fakatata fakalahi ki a ia he tau aho takitaha, to au atu e fiafia ha tautolu ke he tututonu haana. (Iako. 4:8) Lata foki ia tautolu ke talia e takitakiaga he Kupu omoomoi he Atua ka ui mai ki a tautolu ke taute e tau fifiliaga aoga he moui.

Kumi e Tututonu he Atua

4. Ko e heigoa ne putoia he kumi e tututonu he Atua?

⁴ Totou Mataio 6:33. He kumi e tututonu he Atua kua lahi atu e mena ne putoia he fakaaoga e tautolu e magaaho ke fakamatala e tala mitaki he Kautu. Ma e fekafekauaga tapu ha tautolu ke talia e Iehova, kua lata ha tautolu a tau mahani he tau aho takitaha ke fakatatau ke he tau tuaga tokoluga haana. Ko e heigoa kua lata ke taute he tau tagata oti hane kumi e tututonu ha Iehova? Lata ia lautolu ke “tapulu . . . ke he tagata fou kua eke ke lata mo e Atua, ke he tututonu mo e mahani mitaki ke fakamoli ai.”—Efeso 4:24.

5. Ko e heigoa ka lagomatai a tautolu ke kautū mai he fakaloleloleaga?

⁵ He lali a tautolu ke moui fakatatau ke he tau tuaga tututonu he Atua, kua liga fakalolelole a tautolu he falu magaaho ha ko e tau kūkū ha tautolu. Ko e heigoa ka lagomatai a tautolu ke kautū mai he fakalolelole lahi mahaki ti fakaako ke fiafia mo e fakagahua e tututonu? (Fakatai 24:10) Lata ia tautolu ke fakatata atu tumau ki a Iehova he liogi “mo e loto fakamoli ke he tua kua makamakafua.” (Hepe. 10:19-22) Pete ko tautolu ko e tau Kerisiano fakauku po ke moua e tautolu e amaamanakiaga he lalolagi, kua fakagahua e tautolu e tua ke he poa lukutoto ha Iesu Keriso mo e ke he tau gahua haana ko e ha tautolu a Ekepoa ne Mua ue atu. (Roma 5:8; Hepe. 4:14-16) Ko e aoga he toto ha Iesu ne fakamaligi kua fakakite he fufuta fakamuaaki he mekasini nei. (1 Ioa. 1:6, 7) Ne talahau he vala tala: “Ko e mena mooli, [ka] onoono ke he mena lanu kula momoho puhala he hio kalase kula ne tuku i mua he molī, ne tuga kua hina ai; ti pete kua kula momoho e tau agahala ha tautolu, ka haia a tautolu ke he onoonoaga he Atua to kitia ai ke he puhala he toto he Keriso, ati hina ai e tau agahala ia.” (Iulai 1879, lau 6) Ko e foakiaga homo ue atu ha ia ne taute e Iehova ma tautolu puhala he poa lukutoto he Tama fakahele haana!—Isaia 1:18.

Kikite ke he Tapulu Tau Fakaagaaga Haau

6. Ko e ha kua aoga lahi ke kikite e tautolu e tapulu tau fakaagaaga ha tautolu?

⁶ He tau magaaho oti, lata ia tautolu ke tapulu ‘ke he ufi kahokaho he tututonu,’ ha ko e vala aoga lahi he tapulu tau fakaagaaga mai he Atua. (Efeso 6:11, 14) Ko e tukulele laia a tautolu ki a Iehova po kua leva tuai ha tautolu a fekafekau tapu ki a ia, kua aoga lahi ai ke kikite e tautolu e tapulu tau fakaagaaga ha tautolu he tau aho takitaha. Ko e ha? Ha ko e Tiapolo mo e tau temoni haana kua tolo hifo ke he takaiaga he lalolagi. (Fakakite. 12:7-12) Kua ita a Satani ti iloa e ia kua fakakaupā haana vahā. Ati totoko fakalahi e ia e tau tagata he Atua. Kua loto fakaaue nakai a tautolu ke he aoga ke tapulu ‘ke he ufi kahokaho he tututonu’?

7. Ko e heigoa ka taute e tautolu ka loto fakaaue ke he aoga lahi ‘he ufi kahokaho he tututonu’?

⁷ Na puipui he ufi kahokaho e ate. Ha ko e tuaga nakai mitaki katoatoa ha tautolu, kua hihiga e loto ha tautolu ke fakavai mo e gagao lahi. (Iere. 17:9) Ha kua hihiga e loto ha tautolu ke taute e mena hepe, kua aoga lahi ke fakaako mo e akonaki ai. (Kene. 8:21) Ka loto fakaaue a tautolu ke he aoga lahi ‘he ufi kahokaho he tututonu,’ to nakai aaki fakakū ai e tautolu he fifili ke fakafiafia he tau mena ne fakavihia he Atua; to nakai fakaatā foki e tautolu a tautolu ke miti ke taute e mena hepe. To nakai moumou e tautolu e tau magaaho uho he lahi mahaki e kitekite televisoni. Ka e, to taufetului tumau a tautolu ke taute e tau mena kua fakafiafia a Iehova. Pihia foki kaeke kua veveli a tautolu he manamanatu fakakū ke he tau mena fakatino ne nakai tututonu, to liu a tautolu tutū hake ha ko e lagomatai ha Iehova.—Totou Tau Fakatai 24:16.

8. Ko e ha kua lata ia tautolu ke moua e “akau punuti [lahi] ko e tua haia”?

⁸ Ha ha he tau vala he tapulu tau fakaagaaga ha tautolu ko e “akau punuti [lahi] ko e tua haia.” Kua taute ai a tautolu ke maeke ke “tamate e tau fana kaka oti hana kua kelea.” (Efeso 6:16) Ha kua pihia, ko e tua mo e fakaalofa loto katoa ma Iehova ka lagomatai a tautolu ke fakagahua e tututonu mo e nofomau he puhala ke he moui tukulagi. Ka lahi e fakaako ha tautolu ke fakaalofa ki a Iehova, to lahi e tokiofa e tautolu e tututonu haana. Ka e kua e loto manamanatu ha tautolu? Maeke fēfē ai ke lagomatai a tautolu ke he tau laliaga ha tautolu ke fiafia ke he tututonu?

Fakatumau e Loto Manamanatu Mitaki

9. Aoga fēfē a tautolu he fakatumau e loto manamanatu mitaki?

⁹ He papatisoaga ha tautolu, ne taute e tautolu e olelalo ki a Iehova ma e “loto manamanatu hifo mitaki.” (1 Pete. 3:21) Ha kua fakagahua e tautolu e tua ke he lukutoto, ne ufiufi he toto ha Iesu e tau agahala ha tautolu ati maeke ia tautolu ke olioli e tuaga meā ki mua he Atua. Ka ke nofomau he tuaga ke moua e moui, lata ia tautolu ke fakatumau e loto manamanatu mitaki. Kaeke ke fakalaga mo e hataki mai e loto manamanatu ha tautolu he falu magaaho, lata ia tautolu ke fakaaue ha kua gahuahua mitaki ai. Ko e fakaohoohoaga pihia ne fakakite ko e loto manamanatu ha tautolu kua nakai maō hagaao ke he tau puhala tututonu ha Iehova. (1 Timo. 4:2) Ka ko e loto manamanatu kua fai matagahua foki ma lautolu kua manako ke fiafia ke he tututonu.

10, 11. (a) Talahau e mena tupu ne fakakite e kakano kua lata ia tautolu ke omaoma ke he loto manamanatu ha tautolu ne fakaako he Tohi Tapu. (e) Ko e ha kua maeke he fiafia ke he tututonu ke tamai ki a tautolu e fiafia lahi mahaki?

¹⁰ Ka taute e tautolu e mena hepe, liga fakahala po ke fakakikiveka he loto manamanatu ha tautolu a tautolu. Taha e fuata ne tafea kehe mai he “tau puhala he tututonu.” Ne hufia a ia he kitekite e tau mena telefua ti kamata ke ula mariuana. Ne kelea e loto haana he fano ke he tau feleveiaaga mo e logona hifo kua tuga e fakatupua a ia he fakalataha ke he gahua he fonua, ti oti e fakalataha haana ke he tau matagahua faka-Kerisiano nei. “Ka e,” he talahau e ia, “nakai mailoga e au to fakafili he loto manamanatu haaku au ha ko e tau gahua ni haaku.” Lafi e ia, “Ko e goagoa haaku ne katoa ai ke he kavi fā e tau.” Ati kamata a ia ke manamanatu ke liu atu ke he kupu mooli. Pete he manatu a ia to nakai fanogonogo a Iehova ke he liogi haana, ne liogi ni a ia ti ole ma e fakamagaloaga. Nakaila hogofulu e minuti he mole, ne aahi atu e matua fifine haana ki a ia mo e fakamafana a ia ke liu ke he tau feleveiaaga. Ne fano a ia ke he Fale he Kautu ti ole ke he taha motua ke fakaako mo ia. Fai magaaho, ne papatiso a ia ti fakaaue a ia ki a Iehova he foaki ki a ia e fakamouiaga.

¹¹ Mailoga nakai e tautolu kua moua mai e fiafia lahi mahaki he taute e tau mena hako? He fakaako a tautolu ke fiafia ke he tututonu mo e fakagahua katoatoa ai, to lahi e olioli ha tautolu he taute e tau mena ne fakafiafia ha tautolu a Matua he lagi. Mo e manamanatu la! To hoko mai e aho ka logona hokoia ni he tau tagata oti kana e fiafia mai he loto manamanatu ha lautolu; to fakaata katoatoa e lautolu e fakatai he Atua. Ti lata ia tautolu mogonei ke tō fakahokulo he tau loto ha tautolu e fiafia ke he tututonu mo e fakafiafia a Iehova.—Fakatai 23:15, 16.

12, 13. Maeke fēfē ia tautolu ke fakaako e loto manamanatu ha tautolu?

¹² Ko e heigoa ha tautolu ka taute ke fakaako e loto manamanatu ha tautolu? Magaaho ka kumikumi a tautolu ke he tau Tohiaga Tapu mo e tau tohi ha tautolu ne fakavē ke he Tohi Tapu, kua aoga ke tokaloto “kua manamanatu e loto he tagata tututonu, kia tali atu a ia.” (Fakatai 15:28) Manamanatu ke he puhala ne aoga mooli e mena nei ka fehagai a tautolu mo e tau hūhū hagaao ke he gahuaaga. Kaeke kua fekehekeheaki mooli e falu gahua mo e tau poakiaga he Tohi Tapu, to tali atu mafiti e laulahi ha tautolu ke he takitakiaga ne foaki mai puhala he vahega fekafekau fakamoli mo e loto matala. Ka nakai mahino e tali ke he hūhū hagaao ke he gahua, kua lata ke mailoga e tau matapatu fakaakoaga he Tohi Tapu mo e liogi hagaao ki ai.a Kua hagaao e mena nei ke he tau matapatu fakaakoaga tuga e lata ke kalo mai neke fakatupetupe e tau loto manamanatu he falu. (1 Kori. 10:31-33) Kua lata pauaki ia tautolu ke manamanatu ke he tau matapatu fakaakoaga ne putoia e fakafetuiaga ha tautolu mo e Atua. Kaeke kua mooli a Iehova ki a tautolu, to hūhū hifo fakamua a tautolu, ‘To fakahukia mo e fakahogohogo nakai he gahua nei ne taute e au a Iehova?’—Sala. 78:40, 41.

¹³ He magaaho ka tauteute ma e Fakaakoaga Kolo Toko po ke Fakaakoaga Tohi Tapu he Fakapotopotoaga, kia tokaloto e tautolu e lata ke manamanatu fakahokulo ke he tau vala tala ne foaki mai. Kua fakatumau kia a tautolu ke vase fakamafiti e tali ke he hūhū he fakaakoaga ti holo ke he taha paratafa? Ko e tau magaaho fakaako pihia to liga nakai fakahokulo, ha tautolu a fiafia ke he tututonu po ke feaki ia tautolu e loto manamanatu mitaki. Kaeke ke hokotia a tautolu ke fiafia ke he tututonu, lata ia tautolu ke fakaako fakamakutu mo e manamanatu fakahokulo ke he tau mena kua totou e tautolu he Kupu tohia he Atua. Nakai lata ke fakatepetepe he magaaho ka fakaako a tautolu ke fiafia ke he tututonu fakalataha mo e loto katoa ha tautolu!

Fia Kai mo e Fia Inu ke he Tututonu

14. Ko e heigoa ne manako a Iehova ko e Atua mo Iesu Keriso ke logona hifo e tautolu hagaao ke he fekafekauaga tapu ha tautolu?

¹⁴ Ko Iehova ko e Atua mo Iesu Keriso kua manako ki a tautolu ke fiafia he taute e fekafekauaga tapu ha tautolu. Ko e heigoa ka lafi ke he fiafia ha tautolu? Ko e fiafia ke he tututonu! He Lauga he Mouga, pehē a Iesu: “[Fiafia] a lautolu ne fia kai mo e fia inu ke he mahani tututonu; ha ko e mena to makona a lautolu.” (Mata. 5:6) Ko e heigoa e alito he tau kupu nei ma lautolu ne manako ke fiafia ke he tututonu?

15, 16. Ko e tau puhala fe ka fakamakona e fia kai mo e fia inu fakaagaaga?

¹⁵ Ko e lalolagi ne nonofo ai a tautolu kua pule e ia ne mahani kelea. (1 Ioa. 5:19) Kaeke ke lagaki e tautolu e nusipepa he ha motu, kua kitia e tautolu e tau hokotaki ke he mahani kelea muitui mo e favale nukua mua ue atu e kelea. Ko e mahani kelea lahi mahaki he tau tagata ki a lautolu ni kua fakatupetupe e manamanatuaga he tagata tututonu. (Fakama. 8:9) Ko lautolu ne fakaalofa ki a Iehova, kua iloa e tautolu to fakamakona ni e ia e fia kai mo e fia inu fakaagaaga he tau tagata kua manako ke fakaako ke he tututonu. Nakai leva to utakehe a lautolu ne nakai mahani Atua, ti ko lautolu ne fiafia lahi ke he tututonu to nakai liu logona e fakamamahi mai he tau tagata matahavala mo e tau gahua kelea ha lautolu. (2 Pete. 2:7, 8) To fakatotoka mooli e mena ia!

¹⁶ Ha ko e tau fekafekau ha Iehova mo e tau tutaki ha Iesu Keriso, kua mailoga e tautolu ko e tau tagata oti ne fia kai mo e fia inu ma e tututonu “to makona” ai. To makona katoatoa a lautolu puhala he fakaholoaga he Atua ke he lagi foou mo e lalolagi foou ka “nofo ai e tututonu.” (2 Pete. 3:13) Kia nakai fakalolelole ai a tautolu po ke ofo ha kua utakehe he mahani kelea mo e favale he lalolagi fakasatani nei e mahani tututonu. (Fakama. 5:8) Ko Iehova ko e Mua Ue Atu kua iloa e tau mena tutupu mo e nakai leva to laveaki a lautolu ne fiafia lahi ke he tututonu.

Aoga Mai he Fiafia ke he Tututonu

17. Ko e heigoa falu mena aoga kua moua mai he fiafia lahi ke he tututonu?

¹⁷ Ne peehi he Salamo 146:8 kua mua atu e aoga he muitua ke he puhala he tututonu. Ne lologo e salamo: “Ko Iehova ne fakaalofa ke he tau tagata tututonu.” Manamanatu la! Kua fakaalofa e Pule Katoatoa he lagi mo e lalolagi ki a tautolu kua fiafia ke he tututonu! Ha ko e fakaalofa ha Iehova ati mauokafua a tautolu to leveki fakatino e ia a tautolu he tuku mua tumau e tau mena he Kautu he tau momoui ha tautolu. (Totou Salamo 37:25; Tau Fakatai 10:3.) Fakahiku ai, to olioli e lautolu ne fiafia lahi ke he tututonu e palaneta katoa nei. (Fakatai 13:22) Ma e laulahi he tau tagata he Atua, ko e palepale he fakagahua e tututonu to fiafia lahi mahaki mo e moui nakai fai fakaotiaga he lalolagi parataiso fulufuluola. He mogonei foki, ko lautolu ne fiafia ke he tututonu he Atua kua palepale aki e loto mafola ne lafi ke he kaufakalataha he tau magafaoa ha lautolu mo e i loto he tau fakapotopotoaga ha lautolu.—Filipi 4:6, 7.

18. Ko e heigoa e tau mena atihake ka taute e tautolu he fakatali a tautolu ke he aho ha Iehova?

¹⁸ He fakatali a tautolu ke hoko mai e aho lahi ha Iehova, lata ia tautolu ke matutaki ke kumi e tututonu haana. (Sefa. 2:2, 3) Ti fakakite ai e tautolu e fakaalofa mooli ma e tau puhala hakohako ha Iehova ko e Atua. Kua lata ai ke tapulu tumau ‘ke he ufi kahokaho he tututonu’ ke puipui e loto ha tautolu. Lata foki ia tautolu ke fakatumau e loto manamanatu mitaki ka tamai ai e fiafia ki a tautolu mo e fakafiafia e loto he Atua ha tautolu.—Fakatai 27:11.

19. Ko e heigoa kua lata ia tautolu ke fakamalolō ke taute, ti ko e heigoa ka fakatutala he vala tala ka mui mai?

¹⁹ “Ko e tau fofoga a Iehova kua o tafeliuaki ai ke he lalolagi oti, ke lagomatai kia lautolu kua katoatoa ha lautolu a tau loto kia ia.” (2 Nofo. 16:9) Kua mafanatia mooli e tau kupu ia ki a tautolu he taute e tautolu e tau mena kua hako he fehagai ke he hikihikifano, favale, mo e kelea muitui kua tupu lahi ke he lalolagi lekua nei! Mooli, ko e tau puhala tututonu ha tautolu kua liga fakaofo ke he moto tagata ne vevehe kehe mai he Atua. Ka e moua ni e tautolu e aoga lahi he pipiki atu ke he tututonu ha Iehova. (Isaia 48:17; 1 Pete. 4:4) Ti fakalataha mogoia mo e loto katoa, kia fakamalolō a tautolu ke fakatumau ke olioli he fiafia mo e fakagahua e tututonu mo e loto katoa ha tautolu. Ka e, ke loto katoatoa kua putoia foki e fakavihia e tau mahani hepehepe. Ko e vala tala ka mui mai to fakakite ki a tautolu e kakano he mena nei.

[Matahui Tala]

To Tali Fēfē e Koe?

• Ko e ha kua lata he loto fakaaue ke he lukutoto ke moua e fiafia ke he tututonu?

• Ko e ha kua aoga lahi ia tautolu ke tapulu ‘ke he ufi kahokaho he tututonu’?

• Fakaako fēfē e tautolu e loto manamanatu ha tautolu?

[Fakatino he lau 26]

Ko e loto manamanatu ne fakaako kua lagomatai a tautolu ke tali e tau hūhū ke he gahuaaga